الجمعة، 24 ديسمبر 2010

ابداع





يارب يعجبكم زى ماعجبنى

بجد احب احى صاحب الفكرة لانه بجد عرف يوصل فكرته بطريقه منتهى الروعه وقدر يحسس الناس باهميه حاجة التهديد والتحذير والحبس والغرامة حتى ما اثرتش فيهم

بجد برافو

الأربعاء، 22 ديسمبر 2010

الهوم ورك بتاعى





طلبت منى صديقتى شرين اعمل هوم ورك بتاع انت ليه مدون ؟وقبل مابدء بشكرها جدا كان نفسى بصراحة حد يقولى اعمليه ههههههه


ليتس جوووووو
1\التعريف بالمدون
اسمى نور,مسلمة,مصرية,من المنصورة
الصورة اللى حطاها على المدونة صورة  بحبها جدا وكتير من اصحابى بيقولوا انها شبهى لانى ديما بقعد كده فى شغلى وديما بفكر بغض النظر عن النضارة يعنى

  سميت نفسى  ريماس لانه اسم بنت
اعز صحباتى وانا اللى مخترالها الاسم ومن زمان وانا بستخدمه كاسم ليا فى الفيس بوك وهنا كمان  ومعناه ماء الماس

انا مجرد بنوته مصريه زى اسم المدونة مش بكتب شعر ولا قصص بس متزوقة جيدة جدا للاتنين بحب اتامل كل حاجة حواليه وده بيخلينى ابان ساكتة كتير وقليله الكلام للى مايعرفنيش طبعا

بحب قراية اى حاجة وكل حاجة ابتداء من ميكى ومجلدات الاطفال لحد كبار الادباء والمفكرين

ايه تانى ايه تانى! اه ومش مرتبطة
2\المكانة العلمية والوظيفة
انا خريجة صيدلة المنصورة دفعة 2003 وحاليا اجازة من الحكومة لان فيها سرقه كتير
وبدير صيدليه خاصة

3\كيف كانت البداية مع التدوين
هى المدونة مش من زمان بدئتها فى شهر 9 اللى فات ده لكن علاقتى انا بالمدونات كانت من قبل كده من زمان
 اقدر اقول ان الفضل فى تعريفى بالتدوين هى غادة عبد العال صاحبة مدونة عاوزة اتجوز كنت متابعاها وفضلت كده لحد ما هى توقفت بعد عمل المسلسل وبعدها كانت مدونة بنوته لاسعه لسارة درويش حبيت الفكرة جدا بسببهم وكنت بمارس مايشبه التدوين فى الفيس بوك وزوربيا وحتى فى اجندتى كنت بكتب مايشبه اليوميات لكل غريب وكل موقف فى يومى

لحد ماجتلى فكرة وقلت طيب ما اجرب واعمل مدونة وبينى وبينكم ماكنتش اتخيل ان فيه حد هيتابعها اصلا
بس الحمد لله عرفتنى على ناس اعتز بيهم جدا وموهوبين بجد

4\ليه انت مدون؟
كتابه اللى بيجى فى خاطرك وبتفكر فيه شئ جميل لانه هيخفف عنك كتير شبه الفضفضة
وانك تدون وحد يشاركك ويقولك رائيه سواء بالثناء على كتابتك او بالنقد او بالنصيحة لو انت طالبها ده اجمل  فى وقت ماحدش عاد فاضى فيه لحد
وبالتالى انا حابه التدوين

يارب اكون عملت الواجب صح

واتمنى ان اللى يعمل الواجب بعدى Temoصاحب مدونة اسف على الازعاج   

الاثنين، 20 ديسمبر 2010

وبعدين؟

عمرك حسيت انك مكعب تلج نفسه يخرج من الفريزر اللى عايش فيه؟
عمرك حسيت ان شعاع الشمس مش عارف يوصلك!وانك تايه منه وبتدور عليه؟

عمرك حسيت انك لغز نفسك حد يحله؟
                                                  انا حاسة ده 
                                            

الثلاثاء، 14 ديسمبر 2010

- مكعب سكر



ضايع منى ازازة مية
ومش راضية الطيارة تطير
راح الصبر ورجع الصبر
وتعب القلب ولسه كتير
اه ياتي شيرت العمر يا ابيض
لفيت بيك مشاوير مشاوير
املك صورة انا فيها صغير,شكلى اتغير ماعرفتوش
كان فى جيوبى مكعب سكر ,داب السكر مالقتهوش
واما اتقطعت منى الساعة, وقع الوقت لقتنى كبير!!!!

اعرف واحد قال لواحد اهمل صاحبك واقسى عليه
واحد قال للواحد نفسه انت مزعل صاحبك ليه؟؟!

واحد حاول يعرف واحد طلع الواحد صفر كببير!

الثلاثاء، 7 ديسمبر 2010

kzbk 7lw-كذبك حلو -فراق








الاغنية دى ديما محيرانى هل ممكن فعلا نحب لدرجة اننا حتى لو عارفين ان دى كدبة حابين نعيش فيها؟


السبت، 4 ديسمبر 2010

نفسنة بس مفيدة والله

اعتقد كلنا عرفنا موضوع فوز قطر بتنظيم المونديال والمؤكد ولو بنسبة كبيرة اننا فرحنا

انا عن نفسى فرحت يعنى اخيرا دولة عربية فلحت وقدرت تعملها وكمان فازت فى التصفيات  على الفوز ده مع امريكا وده فى حد ذاته مفرحنى جداااااااااا

ورغم كده ماقدرش انكر انى لما شفت الملف القطرى اللى ادمته للفيفا تحركت جواية نفسنة كده وغيره مصحوبين بكثير من الحزن لما افتكرت الملف بتاعنا ولله العلم اصلا ماكنش فيه ملف

لما قريت عن العقبات اللى قابلت قطر واللى ذللت بعضها مثل صغر مساحة الدولة واللى قلبته لمصلحتها بانها ممكن تستغل ده فى سهولة وسرعه الانتقال بين ملاعبها

وحلت بعضها زى حكاية ارتفاع درجة الحرارة فى الملاعب دى بردت الملاعب يا جماعة

جه فى دماغى مقارنة بين كل ده وبين اللى حصل معانا ,عارفين لو كانت مشكلتنا فى الحر واننا ماعندناش سيولة نبرد زيهم كنت سكت يعنى على اد لحافك مد رجليك

لكن احنا مشكلتنا ولا فخر   النظاااااااافة
يعنى حاجة تكسف الصراحة وبصراحة من كتر غيظى وزعلى قعدت اقول لنفسى طيب يعنى ده مش عيب حكومة بس احنا كمان اكيد معيوبين يعنى احنا اللى رمينا الزباله فى الشارع

وعليها قعدت امخمخ فى حلول او تعديلات لسلوكيتنا كده من الملاحاظات اللى بشوفها من الناس وعليه هقولكم اللى جه فى بالى ونتناقش فيه او نحاول نظبطه كده ومافيش مانع من حلول ومخمخات منكم 
1\كل واحد مننا وهو ماشى فى الشارع بيبقى فى ايده كانز ولا فارغه مياه معدنية ولا ورقه مش محتاجها ولا حتى  منديل ياسلام لو يفضل شايلها لحد ما يلاقى صندوق قمامة ويرميها فيه

2\ممكن يبقى معاك لى من الحاجات السابق ذكرها وراكب عربية ولا ميكروباص وترميها من الشباك ياريت برده تخليها معاك لحد ماتنزل

3\ياريت اكياس الزباله لما تخرج من البيت ياريت ناكد على اللى بيرميها انه برده يرميها فى صندوق  مش يحطها ادام العمارة او البيت

4\الاهالى اللى قالبين بلوكانتهم مخزن بيعينوا فيه بصل وااقفاص وحاجات غريبة جداااااا الواحد بيشوفها فى البلوكانات ياريت بلاش لانها لو مش واخدين بالهم بتبقى باينة والله

5\دى خاصة بالولاد شوية بقى ياريت بلاش بصق فى الشارع وانت ماشى والله حاجة وحشة خاااااااالص

الملاحظات دى يا جماعة حاجات جت فى بالى من خلال يومين بس ركزت فيهم فى تصرفات البشر ولو لاحظتم حاجات والله سهل تتحل جدا وماتقولش يعنى هى جت عليا

يعنى هفترض ان هيقرا البوست ده اربعه وهيتأثروا ويعملوا بيه مثلا كل واحد من الاربعه هيأثر مثلا فى اربعه من اهله او اصحابه كده بقينا 16 وهكذا ماهى الزباله مابقتش اكوام من يوم وليلة وكذلك حلها وتصحيح سلوكيتنا مش هيحصل بين يوم وليله
نحاول جايز نحقق ده بعد قطر وطالما مش عارفين نتأهل لكاس العالم  على الاقل ننظمه

                                                                         ويجعله عامر 

الأربعاء، 1 ديسمبر 2010

قطعة سكر

حين تنظر حولك..وتجد الكثير ممن تواجدوا بجانبك,الكثير من الذين يهتمون بأمرك ولامرك,الكثير من الذين يتذكروك,الكثير من الذين يعنيهم امر سعادتك
الكثير من الذين تضئ اعينهم وترسم بسمة ذات طابع خاص عند رؤيتك
الكثير ممن تشعر بحبهم عندما تتواجد بقربهم,,الكثير ممن يبادرون دائما لاسعادك دون ان ينتظروا منك مقابل!!!!!!!

وذلك واكثر..
لا لشئ سوى لان هناك من الالفة والمحبة ماربط بين القلوب..وقرب المسافات حتى وان كانت بعيدة..
فعندما يتواجد الحب الحقيقى..الحب الخالى من اى شوائباو مواد حافظة..


عندما تتواجد تلك الكلمة الصغيرة بعدد حروفها..الكبيرة بمعانيها..عندما يتواجد ذلك الشعور الغير مسؤل عنه اى بشر..
الذى يضعه الله_عز وجل_بقلبك دون  ان تشعر..عندما يتواجد حولك من هؤلاء الكثير حتى ولو شخص واحد.......اعلم ان هذه نعمة لله ان نحمده عليها


فمن النادر_وليس تشاؤما_ان نجد من يجسد كلمة محبة بمعانيها


ومن النادر ايضا ان تكون لديك تلك الهبة التى يمكنك من خلالها ان تميز ان كانت تلك المحبة حقيقة ام زيف ووجابات نصنعها


فعندما ياتى الموقف الذى يعبر عن مشاعر من حولك فاستغله للتعبير عن مايجول بخاطرك
                                       لكل من احبونى ..واسعدونى

                                   ***********************



لكل من احبونى وكانوا بقربى دائما ولم يبخلوا على سواء بالانصات او الاهتمام..
لكل من احببتهم..سواء اخبرتهم بذلك او جعلت من الموقف بطلا للتعبير عن مشاعرى
تجاههم
لكل من احببتهم ..واخبرتهم حتى ولو لم يكن بالقول..بانى سعيدة بتواجدهم فى حياتى واحداث يومى


لكل من احببتهم..ولجأت اليهم فى لحظة ضيق فلم افكر الا بهم لابوح لهم.
لكل من احببتهم..وقصرت فى حقهم رغما عنى
لكل من احببتهم..وجمعت بيننا سنوات الصحبة والمحبة
لكل من احببتهم..دون ان اراهم ولكن قد جمعتنى بيهم محبة قد تكون ابلغ بكثير من محبة كانت تجمعنى بهم عند رؤيتهم


لكل من احببتهم..وفتحت لهم ابواب حياتى لكى يتواجدوا بداخلها
                     
                                     لكم جميعا


احبكم فى الله


                                

الثلاثاء، 30 نوفمبر 2010

يا من احببتك





                                ليس من العدل....ان تقول بأنك تحبنى عندما اردتك صديقا
              
                    وكم غريبا ان تقول اننا اصدقاء!! بعد ان احببتك بصدق
                     
                    والاغرب من هذا كله ان لا اجدك!!!!!!!!!!

الاثنين، 29 نوفمبر 2010

العمل التانى

وان شاء الله يارب تبقى اخر مرة لان كده هيبقى اوفر الصراحة

دى قصة صحبتى التانيةواللى حصلت بعد القصة الاولى بمافيش شهرين تقريبا ولقيت واحدة صحبتى  كانت مخطوبة مارتحتش فى خطوبتها دى فقررت انها تفركش
قوووووووم ايه اهلها يولوا دى اكيد معمولها عمل ازاى تسيب عريس زى ده هو حد لاقى عرسان لازم نوديها لشيخ


صحبتى رغم اعتراضها وافقتهم لانها كانت لسه عملة عملة وفاسخة خطوبة فمش معقوله هتعمل عامله تانيه وتقف ادمهم وتقولهم بلاش جهل


البنية سكتت وقالت هعمل اللى يقولوا عليه المهم انى ماكملش مع حد غصب عنى وقد كان
ماعرفش راحتله ولا جابوه البيت  وبينى وبينكم ماعرفش هو نفس الشيخ ولا لاء
الكدب خيبة يعنى


بس الكلام هو هواه بتاع تشرب اللبخة ولا البتاع اللى بيحضره ده ولو لامؤخذه رجعت دم يبقى العمل شرباه والبنت شربت واذا بمعدتها تتقطع من المغص الشديد وياخدها لدكتور باطنى يشوف اى اللى جرالها


الدكتور يعمل اشعه ويلاقى  فى معدتها قطع ازاز صغيرة  جدا عملت تهتك فى جدار المعدة ايه يا بنتى اللى جابلك الازاز تحكيله صحبتى اللى حصل وطبعا متخيلين رد فعل الدكتور


طبعا انا اول ماسمعت  رغم ان صحبتى كانت صعبانة عليا جدا كانت هتروح فيا الغلبانة بس لقتنى وبرد فعل تلقائى جدا بسقف وبقول ظهر الحق اخيرا فهممممممممت


هى استغربت وانا طبعا ماحكتش انا ايه اللى خلانى اقول كده
ده سرررررررررر


                                                               ويجعله عامر

السبت، 27 نوفمبر 2010

والله مابتفرق معانا الشهادات

زمان لما كنا بنسمع عن السحر والشعوذة الاعمال او العمالات زى مابيقولها الناس البسيطة كان ديما ده مربوط عندنا بناس ماتعلمتش ناس بسيطة جدا وعقلها جايبه ان فيه حد ممكن يئذيها ويكرهلها الخير فيقفهولها بعمل ويروحوا بقى للراجل اياه او الست اياها فيفكوا العمل ده وبتقديم ماغلى او رخص من القرابين ابتداء من الفرخة لحد ماعقلك ييبك بقى ويعمل عمل معاكس  او اى تخريفة المهم انه يبطل العمل القديم
مسلسل قديم بنشوفه فى  الافلام والمسلسلات والجرايد يعنى مش جديد

الجديد بقى انى اكتشفت ان الحكاية دى مش مرتبطة بالشهادات خالص يعنى عن طريق حكايتين لاتنين من اصحابى  دكاترة يعنى وصلوا لاعلى درجات التعليم المتاحة

اول واحده جاتلى البيت تقولى اقولك على سر يا ريمو قولتلها  خير يارب قالتلى ماما مصممة اروح لشيخ علشان يعرف اى سبب تاخر الزواج ده قولتلها شيخ ايه يابنتى وهبل ايه دى قسمة ربنا  مال الشيخ ومالها  بلاش تخريف قالتلى بصى انا قلت اجرب يعنى والراجل بيستخدم القراءن فى العلاج وكده وبياخد اجر رمزى
رمزى اييه ورسمى اييييييييييه يابنتى عيب الكلام ده قالتلى بعد ماستفذتها برفضى طب ايه رائيك ان انا رحت فعلا وسقانى ترياق كده وقالى لو رجعتى دم يبقى العمل انتى شرباه ولو مارجعتيش يبقى العمل ماشية عليه


قلتلها يعنى كده كده فيه عمل ماعلينا وبعدين؟ قالتلى وقد كان يابنتى شربته من هنا و مغص بقى ودم كتير !!!!يخرب بيت شيطانك اكيد حاطتلك حاجة فيه يا دكتورة اخر زمن قالتلى لا انا شاربة عمل يابنتى الحمد لله بعدها حسيت انى ارتحت
اتغظت بقى وقولتلها وبتحمدى ربنا ليه بقى ماتشكرى عمك الشيخ


المهم يعنى بعدها بشهرين تقريبا اتخطبت ههههههههه رحت خطوبتها وماقلكوش بقى النظرات اللى بتحمل معنى شفتى مش قولتلك!!!! وطبعا انا استغفر ربى فى سرى وابتسم واسكت مانا لو اتكلمت  هبقى حاقدة وحاسدة وعندى حبة ضغائن


ثبت علينا العقل والدين يااااااااااااااااارب
                                                                    ويجعله عامر

                       ملحوظة

اه من حق هبقى احكيلكم حكاية صاحبتى التانيه ومفاجئتها البوست الجاى 

السبت، 20 نوفمبر 2010

فكييرة

الوحدة زى ماهى احساس فظيع ومؤلم جدا فممكن كمان تكون سبب انك تحاول تعمل حاجة جديدة
حاجة تخرجك من المود وتشغلك وقتك اللى انت مش شاغله فى شغلك
يعنى على سبيل المثال المدونة دى انا عملتها فى يوم كنت مخنوقه فيه جداااااااااااااا
وزهقانة من الشغل ومن البشر اللى اعرفهم ومن المواقع اللى انا مشتركة فيها زى زوربيا والفيس بوك فقررت انى اغير 
من يومين بقى طقت فى دماغى فكيره مجنونة


هكتب مذكراتى
هههههههه
اه والله وبدءت فعلا اكتب احداث حصلالى فى اليوم وذكرى افتكرتها وحاجة زعلتنى وحاجة فرحتنى وحطتها جنب بعضها كده لقيتها  بداية مش بطالة
فضفضة وبفك عن نفسى وبقول كلام اوقات مابلاقيش  حد اقولهوله او بتكسف احكيه او مش عاوزة غيرى يعرفه
ولقيتها طريقة حلوة بصراحة اه والله ومنها برده ممكن تحاسب نفسك وتصارحها باعمالك طول اليوم


بس السؤال بقى


هل حتى واحنا بنكتب يوميتنا هنبقى صادقين فيها؟ولا هنجامل نفسنا ونخبى؟
                                                                         ويجعله عامر

الاثنين، 15 نوفمبر 2010

ماتحبنيش بالشكل ده!!!




اولا كل سنة وانتم طيبين وعيد سعيد عليكم يارب انتم وكل اللى تحبوهم

جملة سمعتها ولفتت نظرى جدا"لو سمحتى لو بتحبينى انا عاوزك تحبينى بالطريقة الفلانية"
هو احنا ممكن نطلب من اللى بنحبهم انهم يحبونا بطريقة معينة؟
يعنى ممكن احب حد واعترض على طريقته فى اظهار الحب ده؟
امال ايه اللى حببنى فيه طالما طرقته مش عاجبانى او خنقانى ماعرفش الجملة استغربتها جدا
طيب هو ممكن حد يغير طريقة حبه؟ يعنى ده اوبشن موجود عندنا ممكن نغيره ونظبطه زى ما الطرف التانى عاوز؟
طب ممكن لو ماعرفش يغيرها ابطل احبه؟
اسيبه وانا عارفه انه بيحبنى بس طريقته مش عجبانى؟
بصراحة انتم مش هتطلعوا من البوست باى اجابة لو مستنينى اجاوب لانى فعلا محتارة فكل اللى هتلاقوه اسئلة اتمنى ان اللى يعرفلها اجابة يقول



الثلاثاء، 9 نوفمبر 2010

هيا بنا نأكل


ثقافة الاكل فى بلدنا ثقافة عريقة جداوماقدرش اقول فى بلدنا بس لا اعتقد فى العالم العربى كله بس انا هخلينى فى بلدنا لان ده اللى شفته يعنى

مثلا لما يبقى فيه واحد تخين وواحد رفيع يتقال على التخين انه ابن عز,او مثلا الطريق لقلب الراجل معدته,وواجب الضايفة ده حاجة رغم انها حميمية وبتدل على الالفة لكنها عادة شرقية صميمة يعنى

كل دى مقدمة ممكن اقعد اكتب فيها يجى بلوجين تلاته لكن انا بصراحة وبينى وبينكم مش جاية اعرفكم اهميه الاكلة بالامثله والا مثال لا
انا كعادتى اللى ربنا مايقطعها جايه احكيلكم اخر مواقفى وطرائفى

مؤخرا رحت يوم الصيدلى زى عيد العمال كده بيحتفلوا بيه كل سنة تقريبا فى فندق شيراتون القاهرة

كان يوم ظريف ببروجرام اتضمن يجى خمستاشر كلمة لناس مهمه فى المجال وتكريم ناس اينعم مانعرفهاش بس اكيد يعنى تستاهل

ادونا فاصل كده ونزلوا البوفيه  اللى كان ترتيبه كالاتى

طربيزة كبيره على اليمين واختها على الشمال وفى اخر القاعه خاااااالص يجى اربع طرابيزات مرصوصه صف واحده

انا بقى وصحباتى ماعرفناش ان ده البوفيه الا لما شفناالقاعه اللى ماكنش فيها مكان لرجل لدرجة اننا كنا واقفين مرة واحدة كراسيها فضيت واتوزعوا على الاماكن السابق ذكرها بشكل منظم ورهيب

اوووم اييييييييه ,اخدنا بلنا انا والابرياء صحباتى ان ده مارثون اكل وكل واحد خارج ومحمل طبق  بيقع منه من كتر ماهو مليان

قلتلهم تعالوا نتفرج ورحنا على التربيزة اليمين ربع ساعه على ماعرفنا نوصلها  ونلاقيلكم ايييه....بح  اه والله اتمسحت بالاطباق اللى عليها وكذلك الشمال

سمسمة وطمطم صحاتى جاتلهم صدمه وقالوا نرجع نلحق كراسى بكرامتنا واهو يبقى لحقنا حاجة فى الليلة دى
قلتلهم لا انا لازم افهم لحقوا خلصم البوفيه ازاى دول وكان موجود ايه

على ماوصلنا ورا لكم ان  تتخيلوا ان المشهد بيتكرر ولكن بصورة اكبر
وكل واحد طالع ومعاه طبق يكفيه هو  وعيلته كلها وانتهى المولد او الفاصل وطلع دكاتره يكملوا محاضرات بس تقول لمين ......الناس مشيت

اخدوا غرضهم من الحفلة ومشيوا والباقى اللى قاعدين بيشتركوا فى صفة واحده الا وهى انهم مالحقوش البوفيه

وكنت انا وصحباتى منهم طبعا.......

وطلعنا بمعلومة المؤتمرات ماهى الا حفلات اكل كبيرة والاكل فرص وكل واحد وشطارته

                                                       ويجعله عامر



الأحد، 7 نوفمبر 2010

هم فى عيون بعض

من فترة كده قريت باقى قصة فى مدونة الشحات ولفت نظرى فيهاانه جاب وجهة نظر الزوج والزوجة فى بعض فخلالنا نشوف كل واحد فيهم شايف نفسه وشايف الطرف التانى ازاى
وسمعت انا بقى حكاية من يومين ماشية على نفس الوتيرة للاسف

الحكاية باختصار تتلخص فى شاب عمره حوالى 29 سنة وسيم,طبيب,جراح,نايب فى احد المستشفيات الجامعية يعنى قيمة وسيمة اهو
البيه كأى شاب بيدور على عروسة فعجبته بنوتة فى كلية طبفراح فاتحها وهى طبعا طارت من الفرح ماهو لقطة بقى ومايترفضش

المهم الولد دخل البيت ولاى اسباب بقى الموضوع اتفركش ماكملش لحد هنا قصة عادية جدا اتنين حصل بينهم قبول بس النصيب لعب لعبته عادى جدا

الغريب بقى ان دى ماكنتش اجابتهم

اتسال الولد عن سبب عدم اكمال الحدوتة كان رده اصلى اكتشفت انها كانت بتحب واحد زميلها دكتور قبل كده وبينهم كلام

لسان حالى كان نفسى اقوله وانت ولا مؤاخذه مالك يعنى انت ليك تحاسبها من يوم ماعرفتها مش من كام سنة فاتوا

اتسالت البنت بقى ليه ماكملتش الحكاية تقولك ايه
اصله بلدى وعيلته يااااااى سوفاج    نو كمنت الصراحة

ليه بنلبخ فى بعض كده؟! ليه مايكنش الرد بمنتهى البساطة مافيش نصيب؟؟!
ليه لازم نطلع اى غلط فى الطرف التانى ونعيب فيه؟

اسئلة ماعتقدش انى هلاقيلها جواب

الثلاثاء، 2 نوفمبر 2010

وانت ماااااااااااااااالك

   


اوقات كده بيجيلى حالة غيظ من الناس لما الاقيهم حشرين مناخيرهم فى تفاصيل حياتى

اوقات التدخل ده  بنحطه تحت مسمى انهم بيحبوك وعاوزين يطمنوا عليك بس مش فى كل الاوقات هينفع نضحك على بعض ونقول كده
لا
بمنتهى البساطة ده تدخل

لما تبقى حد مافيش بينا اتصالات ولا يحزنون وخلاص كنا زمايل ثانوى ولا اعدادى وجايز ابتدائى وتقابلينى صدفة والاقيكى بالاحضان امواااه امووواااه ايه يا ريمو يا حبيبتى لسه ماتجوتيش ؟...لا!طب ليه؟..وعشان ايه؟ وبترفضى ليه؟ولا ماحدش بيجى؟!!!!!!!يلا بقى اتجدعنى .....على الله التساهيل  لا ياحبيبتى العمر بيعدى

انتى ماااااااااااالك وايش عرفك بظروفى يابنتى طبعا ده بيبقى حاجة فى نفوخى نفسها تطلع بس للادب والبروتوكول بسكت

وبعد ما احاول اتناسى الهانم تطلعى طنط اللى بقالها قرن من الزمن مانعرفش عنها حاجة
جايز اخر مره كلمتنا من رمضان اللى قبل اللى قبل اللى فات صحيت من النوم  العصريه كده مالقتش وراها حاجة فهفينا عليا
تمسك الهانم سماعه التليفون وتكلم ماما ازى ريمو عامله ايه نفسنا نفرح بيها الا قوليلى يا حبيبتى هى لو جالها فلان ترضى بيه؟
طبعا ماما بمنتهى البراءة وايه اللى هيخلينا نرفض يا حبيبتى بس هو كلمك فى حاجة؟
لا ابدا!!!!!!!!!!!!!!!!!!!
امال بتتكلمى على اساس ايه
يعنى بقول لو
اسمه ايه ده بقىىىىىىىىىى

وكله كوم والتالته دى كوم
ازيك ياريمواخبارك ايه
فله يا توتا انى ايه اخبارك وخلاص خلصت السلامات وتمشى وتقابل اختى بعدها بنصايه كده ازيك يا اخت ريمو الحمد لله
الا قوليلى يا جميله هى صيدليه ريمو دى بتاعتها ولا حاة اسمها عليها بس
طيب يعنى انتى كنتى لسه معايا  مابتسألنيش انا ليييييييييييييييه؟
واساسا انتى مااااااااااااااااااااااااااااااااااااااالك؟

يا جماعه زمان كنا بنسمع حكمة انقرضت باين
  من تدخل فيما لا يعنيه سمع مالا يرضيه
ومالايرضيه هنا هتكون انت مالك والواحد مش هيفضل يقولها فى سره كتير فى مرة هتنطلق بقى واللى يحصل يحصل اهو انا حذرت

                                                              ويجعله عامر  

الخميس، 21 أكتوبر 2010

برجع بعمري شذى تيمور و شفيقة

اد ايه جميل لما يبقى لينا ذكريات كده نرحعلها ونحن ليها وتبقى هى الحاجة الحلوة اللى لما تيجى على بالنا تهون علينا ايامنا


الأربعاء، 13 أكتوبر 2010

عن العشق والهوى





فيلم جميل ومعقد زى معظم او كل افلام تامر حبيب بس بصراحة احلى مافيه اغنيته
عمرك دققت فى كلامها؟
"كتير بنعشق ولا بنقول وكتير بنعشق ولا بنطول ومافيش حكاية بتستمر زى مابدئت ليه على طول"
كلنا مرينا تقريبا بكل المراحل دى كلنا حبينا وماقولناش وخبينا جوانا وبقى سرنا الصغير وكتير مننا حب وماطلش لظروف خارجة عن ارداته وغالبا حكايتنا ما بتستمرش ماعرفش العيب فينا احنا ولا فى حكايتنا دى
"فى عشق بيستنانا وعشق بنستناه وعشق بينسينا العشق اللى عشقناه"
حصلللللل
كل واحد فينا مكتوبله اكيد يلاقى نص التانى اللى هيكمل بيه حياته نصيبه اللى منتظره واللى مش شرط انت تتوقعه او تتخيله حتى واحسنلك ترضى بيه
وفى حب بنفضل طول عمرنا منتظرينه نفسنا نلاقيه وياعالم هو ده نصيبنا ولا لا بس فى الغالب ماينفعش تبنى حياتك على حاجة انت مستنيها  لانها لو ماجتش صدقنى هتتعب جدا
وفى حب بقى ممكن ينسيك قصة انت عشتها وانتهت وكنت فاكر انك عمرك ما هتحب تانى
وعلى فكرة فى رائ انا المتواضع الانسان ممكن يحب اكتر من مرة بس مش مع بعض طبعااااااا علاشان الناس اللى عنيهم زايغة
بس مافيش قلب بيموت ويبطل يحب علشان عاش الم قلبك بينبض يبقى انت ممكن تحب
"القلب اللى بيجرحنا فى حاجة اكيد جرحاه وجراحنا بتفكرنا بالقلب اللى جرحناه"
اسمحولى بقى ده احلى كوبليه  فى الكلام كله علشان انا حساه مبدء او طريقه حياه لو مشينا عليها هنرتااااااح جدا
تخيل كده انك تلاقى عذر لكل قلب جرحك سواء بقصد او بدون قصد انك ببساطة تقول اكيد جرحنى كده لانه مجروح او اتوجع وجت فيا انا يااااااااااه اد ايه انت نفسك هترتاح اد ايه مش هتحس انك عاوز تاخد بتارك او قلبك يتملى كره ماحدش هيتخنق منه الا انت 
واد ايه جميل لو انجرحنا فى يوم وجرحنا ده فكرنا بحد احنا جرحناه او جينا عليه فى يوم من الايام اد ايه ده ممكن يفوقنا ويخلينا مانجرحش تانى اقله علشان ماننجرحش تانى

من منطلق خاف تجرح علشان ماتنجرحش عيش حياتك فهتلاقيها كتير اجمل
                                                 ويجعله عامر
 

الأحد، 10 أكتوبر 2010

عاوزة اتجوز

طبعا كل الناس هتفهمنى غلط وتقول ريمو خلاص يا جدعان فجرت وبتقولها علنا
هو مش انا اللى قولتهابصراحة  اللى قالتها الشجاعة جداد\غادة عبد العال
ليه شجاعة؟
علشان كتبت مدونتها بدون نفاق كتبت احساسها وحكايتها بمنتهى الصدق وبدون تزييف وبمنتهى خفت الدم كتبت عن العاهات اللى اتقدمتلها واللى كان مفروض عليها انها   تقعد معاهم من منطلق ان ماينفعش فى سنها ده ترفض عرسان وانها اول ماعريس يتقدملها تمسك فيه باديها وسنانها وتقول عريس يا ماااااااااااااااى
المدونة دى لفتت نظرى من سنتين  تقريبا مش علشان اسلوبها بس لا علشان المواقف اللى اتعرضت لها بصراحة وبينى وبينكم انا اتعرضت لحبة منها هههههههههه
ده سر بقى
لكن بعد ما المدونة اتعملت مسلسل وبقت حديث الشارع العربى كله ماعدتش النظرة ليها انها المدونة ام دم خفيف لا بقت وثيقة اتهام 
المسلسل كان سلاح ذو حدين
عمل للمدونة ولصاحبتها وللكتاب اللى بيحمل نفس العنوان شهرة وسيط وفى نفس الوقت طريقة تمثيل هند صبرى والتغييرات الفظيعة اللى عملوها فى الكتابة والاحداث خلت النقد كتير 
ده طبعا دليل نجاح بس بصراحة غاظنى لانى حسيتها اتظلمت
كان فيه افورة فى التمثيل ضيعت جمال الكتابة وخلت الناس تتهم المسلسل انه جرئ وجرئ البنات اكتر من اللازم وده طبعا على اساس اننا قطط مغمضة
والطريف بقى انى سمعت تعليق جميل فى الوسط الصيدلانى على اساس ان دى اكتر فئة من البنات حصلها ضرر من المسلسل لان صاحبته وبطلته صيادله
بيقولوا ايييييه
المسلسل جرئ كل من هب ودب علينا ووصلت للزبالين
اينعم موضوع الزبال ده غادة مانزلتوش فى مدونتها وماعرفش ان كان حقيقى ولا فبركة بس ده مايمنعش ان ماعدش يا جماعه زى زمان الدكتور بياخد دكتورة والمدرس مدرسة
الموضوع تطور من زمان  انتم نايمين ولا ايه ده انتقل من مرحلة اللى معاه فلوس يشيل الليلة لحد ما وصل حاليا  باللى يلاقى اى فرصة يخطفها ويجرى
 ودول لسه عايشين فى زمن  مكتب التنسيق ده
غادة حكت تجربتها بكل صراحة ودى مش جريمة ولا تحريض للبنات على  اى حاجة
دى مجرد تجربة بنت وصلت ل30 بدون ارتباط بنت حاولت تقول ان العيب مش فيها 
لاهى كانت بتتنطط على العرسان ولا عاوزة فارس ابيض بحصان
بنت عادية مالقتش المناسب ليها  وخلاص
ياريت الكل يشوفها كده

السبت، 2 أكتوبر 2010

قصيدة عجبانى

من سنتين قريتها وعجبتنى جدااااااااااا فقلت يبقى اكيد مكانها هنا علشان الكل يعرفها
                                           سأفتقدك جدا
    حين تتساقط الامطار وتملئ رائحة الارض المكان وارتجف بردا,وارتجف شوقا,وارتجف رعبا,ويشتد حولى الشتاء
                                           سأفتقدك جدا
    حين يأتى الليل بلا صوتك وبلا طيفك وبلا دفئك وابحث عنك فى رداء القمر ولا اجدك
واعند كالطفلة الجريحة فوق صدر السماء
                                           سأفتقدك جدا
    حين يمد لى احدهم ذراعيه وينتشلنى من بحر احزانى ويمنحنى اجنحة ودماء جديدة,وحياة جديدةوسأل عنك قلبى فى خجل وتحن اليك فى عروقى الدماء
                                            سأفتقدك جدا
    حين اتناول طعامى ولا تكن فى المقعد المقابل ولا المقعد المجاورولا المقعد القريب ولا البعيد واجلس وحيدة تسألنى العيون من الغرباء
                                           سأفتقدك جدا
    حين اردد امامهم كاذبة انى نسيتك وان امرك ماعاد يعنينى وان فراقك ماعاد يضنينى وانى لا اعود فى المساءكالطفله سريرى ابكيك فى الخفاء
                                           سأفتقدك جدا
   حين اعترف بينى وبين نفسى ان الرسائل التى احرقتها احرقتنى وبان الهدايا التى كسرتها كسرتنى وان البقايا التى قتلتها قتلتنى وبان مشانق النسيان التى اعددتها لك وحدى انتهى تحتها فى المساء
                                          ٍسأفتقدك جدا
   حين تحدثنى عنك اخرى وتسرد حكاية شوقك واشم عطرك فى يديها فاشتاقك اكثر      وارفضك اكثر
   واحبك اكثر
   واكرهك بلا انتهاء
                                         سأفتقدك جدا

    حين يسألنى عنك قلبى واصمت,وسالنى عنك عقل ى واصمت,ويسالنى عنك ليلى واصمت,ويسألنى عنك جارى واصمت,ويسألنى عنك هاتفى واصمتواتحول الى قالب من الثلج يقتات الصمت فى كبرياء
                                         سأفتقدك جدا
   حين اعلم انك عشت بعدى الف حكاية حب,وكتبت بعدى الف قصيدة حب,وعشقت بعدى الف امرأة حسناء
    ومع ذلك.......
   مازلت تبحث عنى بين النساء

الخميس، 30 سبتمبر 2010

عجبتنى فسرقتها

جملة قريتها على بيدج صديق  ليا وعجبتنى جدااااااااااااا
قررت انى اسجلها هنا للذكرى علشان افتكرها ديما
"رافق كل من اراد الخروج من حياتك الى الباب,,وودعه بابتسامة وتأكد انك اغلقت الباب جيد"


 

الخميس، 23 سبتمبر 2010

هترضى مين

الواحد بيصحى كل يوم يبدء يفوق فى نفسه علشان يستقبل يوم جديد
ايا كان اليوم ده ممل ولا كويس مفرح محبط كلها حاجات مش هتبان الا فى اخر اليوم
لكن طالما انت صحيت وانت على قيد الحياة هتتعامل
مع اهل بيتك ,مع زمايلك,مع اصحابك,مع البشر عموما
وانت بتتعامل بقى اوقات بتتحط فى موقف كده معتاد
يا اما ترضيهم وتيجى على نفسك يا اما ترضى نفسك وتريحها وهم يتفلقوا
اوقات الواحد بيختار انه يرضيهم علشان الناس دى غاليه عنده او علشان يتملقهم لمصلحته
او علشان يريح دماغه من الزن

واوقات بيرضى نفسه علشان نفسيته تعبت وهى كمان ليها حق عليه فى مقابل بقى انه يخسر حد او يضيع فرصة بيبقى ساعتها وصل لدرجة ان كله يهون بقى

كلنا بنحط فى الموقف ده وكلنا اوقات بنيجى على نفسنا واوقات ببنصرها
واتمنى بس من الكل انه يقدر
يقدر لما حد يجى على نفسه علشانه ويعذر لما حد يبيع القضية علشان مش عارف يجى على نفسه
صدقونى اوقات الاختيار يبقى صعب
                                                                 ويجعله عامر

الاثنين، 20 سبتمبر 2010

فعلا لازم هدف

ديما بسمع فى البرامج والمسلسلات واقرا فى الجرايد ان الانسان لازم يبقى له هدف علشان يعيش
وانه من غير هدف يعتبر نفسه مش عايش اصلا 
بصراحة ديما كنت بحس ان ده كلام انشى ,كلام نظرى
يعنى ماكل الناس عايشه اهو يعنى كل الناس دى عندها اهداف ايه الكلام العجيب ده
بس مع الوقت والتجارب الكلام ده طلع صحيح
وكل الناس فعلا البسيط منها والعبقرى ليها هدف حتى لو كانوا مايعرفوش ده
يعنى اللى عاوز يبقى دكتور واللى عاوز يبقى غنى واللى عاوزة تتجوز واللى عاوزة تتعلم واللى عاوز يتشهر واللى عاوز ينجح
ما كل دى اهداف بيسعوا ليها وبالتالى بتمشى حياتهم فى اتجاه تحقيقها
وعلى فكرة الهدف بيكبر وينمو معاك من يوم ماتوعى على الدنيا
يعنى الطفل ابسط اهدافه انه يكبر وده ابسط مثال
لما اتاملت حياتى انا لقيت كلها اهداف وعشت وبعيش علشان احققها
من اول حلم انى اكبر واللى بعده انى انجح فى دراستى
حلم انى ادخل صيدله
حلم انى اتخرج واشتغل وابقى شاطرة
وهكذا
ومع الوقت اكتشفت ان حالة الملل والزهق المنتشرة الايام دى زى انفلونزا الطيور ليها سببين
الاول انك ماعدش عندك هدف جديد تعساله ولو بسيط يغيرلك ركود يومك وروتينه
التانى انك فشلت فى تحقيق هدفك لاسباب خارجة عن ارادتك مقدرات يعنى

وفى كلا الحالتين بيظهر عليك بقى اعراض زى انا زهقان
مخنوق ومش قادر اتعامل

طب ماكده العلاج بسيط  لاقى هدف يعنى انا مثلا لما زهقت من زوربيا والفيس عملت مدونة وبقى هدفى انى املاها بمخمخاتى
حسيت ان الملل اللى كان بيجيلى كل لما اقعد على الجهاز قل
وقتى شغلته بشكل ما

قيس على كده بقى كل حاجة
لاقى هدف ولو بسيط هيعمل اكيد تغيير ...........واسأل مجرب
                                                                                                             ويجعله عامر

السبت، 18 سبتمبر 2010

قفششششششششتك

الكلمة دى بصراحة بقيت بخاف اول مافتح الياهو منها شبه كلمة بخ كده بالظبط
بخ ايه؟
اه صحيح ماهو اصحابى بس اللى عارفين معنى بخ,  بخ دى انا بقولها ديما لما ببدء كلامى مع اى حد من اصحابى على الياهو
هم اخدوا على كده خلاص مش موضوعنا ده دوقتى ,احنا بنتكلم دوقتى عن كلمة قفشتك امتى بقى بتتقالى؟
لما داخلة الميل اف لاين اوووووم ايييييييييييه الاقيلك حد داخلى وانا لابيه ولا عليا ويقولى  موجودة ومش بتقولى ليه
قفشتك
اهرج انا واقول طب انا داخلة اف عرفت منين انى هنا يقولى عنده كاشف الاون على الياهو
اختراع فى منتهى السخافة وهقولكم ليه
اللى داخل اوف ده له اسباب محددة
1\انه مخنوق ومش عاوز يكلم حد
2\انه فى ايده شغل ومش فاضى يكلم حد
3\ان فى ناس كتير موجودة ومش هيعرف يكلمهم مع بعض
4\انه مش عاوز يتكلم مع ناس محددة
لييييييييه بقى نتتطفل على حرية الناس؟ليه نحرجهم ونخليهم  يبدؤا يدورا على اسباب لتخفيهم؟ليه مانسيبش الاف لاين فى حاله لحد مايقرر يظهر ونبقى نسلم عليه


ده غير انى جربت بنسى  شكل الناس لما تعرف ان اصحابهم موجودين ومش بيكلموهم بيزعلوا طب ليه نعمل كده فى نفسنا 
مش مستاهلة ياجماعه
ولذلك ومن موقعى هذا اطال الكل بالغاء هذا الاختراع السخيف وندى لبعضنا مساحة حرية كده
اوعوا حد يزعل منى  انا بفضفض معاكم بس
ويجعله عامر

نبتدى منين الحكاية

والله مانا عارفة ابدئ منين ولا التدوين ده ازاى
حاسة ان الموضوع يخوف رغم انى متابعة جيدة لكذا مدونة
ورغم انى بكتب فى مواقع كتير بس مدونة دى حاجة محسسانى انى خير اللهم اجعله خير اتشهرت كده

الفكرة جاتلى من ايام مدونة عاوزة اتجوزبتاعة الدكتورةغادة عبد العال او علا زى ما معروف من المسلسل او برايد زى مااللى متابعين المدونة عارفين

وبعديها سارة درويش وكتير بقى فحسيت ان الواحد زى ماهو ماينفعش يمشى من غير اكونت على الفيس بوك ماينفعش يمشى من غير مدونة

نتفضح يعنى
هتكلم فيها عن ايه بقى اهى دى اللى نفسى اعرفها
ممكن اتكلم عن اللى بيحصلى فى شغلى كل يوم والمواهب اللى بقابلها
ممكن اتكلم عن ذكرياتى امنياتى احلامى
هى وظروفها بقى فضفضة يعنى والسلام
والله المستعان

تم بحمد الله تعالى وتوفيقه افتتاح مدونة بنوتة مصرية اليوم السبت الموافق18\9\2010 سجل يا تاريخ