الخميس، 14 ديسمبر 2017

مما قرأت

زار احد الشباب أحدى المدن وقرر مضيفوه ان يطوفوا به البلده ترحيبا بمقدمه وفى نهاية الجولة مروا بالمقابر فدنى الضيف من شاهد احدى المقابر فوجد مكتوبا عليه هذا قبر فلان ولد سنة 1910 وتوفى 1975 وعاش 7 سنوات ومر على شاهد ثانى وثالث وكل شاهد مكتوب عليه تاريخ ميلاد ووفاة صاحبه وحساب للسنوات التى عاشها لكنه غير دقيق فتساءل عن السر فأخبروه انهم يحسبون لمن مات عدد السنوات التى عاشها بعدد الايام السعيدة التى قضاها فى الحياة ويسقطون تلك الايام التعيسة فلا تستحق ان تحسب!
ياترى الواحد ممكن يكتب انه عاش اد ايه؟ .. فاكر ايامك السعيدة ؟ طب سابت علامة فيك لدرجة ان تفتكرها زى الايام الحزينة ؟ ياترى فاكر ايام ماضحكت من القلب زى مانت فاكر ايام مابكيت بحرقة زى الاطفال؟

الأربعاء، 22 نوفمبر 2017

مع نفسى 49

فجأة لقيت كل اللى أعرفهم ومشاركين فى بادرة 100 يوم سعادة وقفوا .. استغربت ازاى تشجعونى وتوقفوا انتم ؟!
لقيت اغلبهم خايفين من الحسد على سعادتهم! .. خايفين من منطلق دارى على شمعتك تقيد وكدة .. تلقائى انا كمان خفت رغم عدم اقتناعى بس غصب عنى خفت .  واللى اخدوا منى الفكرة لقونى وقفت فكسلوا او خافوا هم كمان .. والنتيجة العامة نشر السعادة وقف وفى الغالب نتيجة للخوف!
العجيب بقى انا ماحدش بطل ينشر حالة الاحباط اللى عنده حتى ولو من منطلق اذا بليتم فاستتروا مثلا
ممكن يكون ده طبيعى بس الأكيد انه محبط

السبت، 4 نوفمبر 2017

مع نفسى 48

شفت امبارح فيلم حلو اسمهthe cobblerالفيلم ده بيحكى عن ايسكافى  سابله ابوه حرفته اللى طورها .. كان وحيد ومالوش علاقات ولما مكنته الجديدة باظت واضطر انه يطلع مكنة ابوه يصلح بيها حذاء زبون طقت فى دماغه يجربه لقى نفسه بيتحول لصاحب الحذاء .. ومفارقات كوميدية بقى لحد ما يستلم ميراث ابوه وهو مخزن احذية لناس كتير عظماء!
السؤال بقى .. لو الواحد عنده الامكانية دى هيحب يبقى مين .. انا عن نفسى قعدت اتخيل كدة لقتنى مثلا انا نفسى البس حذاء هتلر واشوفنى الناس بتتصرف معايا ازاى..طب فى الفيلم الملامح بس هى اللى بتتغير ،لو انا غيرت ملامحى بس لهتلر هلى ممكن اغير تاريخه ولا انا اللى هتغير من معاملة الناس ومن الظروف؟!
طب لو لبست حذاء تشارلى شبلن مثلا هل ممكن اعبر زيه كده صامته لحد ما اعمل اسمى فى التاريخ ؟
طب لبست حذاء عبد الناصر مثلا ولا السادات هغير فيهم ايه ولا ايه ولا ايه
طب لو لبست حذاء حد لسه عايش ..
نفترض مثلا السيسى 😂 ياترى هغير ايه فى تصرفاته ولا هى البلد اللى مش فالحة؟!😜
لو لبست حذاء مين ياترى هفضل حياته عن حياتى واسرق لحظات منه مش عارفة اعيشها كنورة .. الصراحة ماعرفتش اجاةب على السؤال ده .. رغم تزمرى من حاجات فى حياتى نفسى تتغير لكن بعد تفكير لقتنى مش هعرف ابقى غيرى وممكن نقول مش عاوزة .. الحمد لله

الجمعة، 27 أكتوبر 2017

مع نفسى 47

شوفت النهاردة فيلم حلو اوى اسمه eternal sunshine of te spotless mind
الفيلم ده فيه اتنين بيحبوا بعض واختلفوا وانفصلوا واتوجعوا فراحوا لدكتور بيقدر يمسح الذكريات المؤلمة والاشخاص من المخ .. بيخليك تجيب كل الحاجات المشتركة بينكم هدايا وخلافه وبتعمل خريطة لذكرياتكم ويركب فوق دماغك جاهز ويمشى ورا كل ذكرى ويمسحها فتصحى خالى من الشخص اللى وجعك بذكرياته الحلوة والوحشة بحيث لو شفته ولاتعرفه!
الفكرة بغض النظر عن نهاية الفيلم غريبة وشدتنى .. لو فعلا ممكن ده ومش مجرد خيال ..هل ممكن نعملها؟! هل عندنا الجرأة نخوض التجربة؟ هل التجارب لو سيئة تستاهل تتمحى كدة ؟ طب هنتعلم ازاى؟! طب لو التجربة سيئة والشخص سيئ ماكنش فيه ذكرى حلوة تستاهل تفضل؟
طب فرضا اننا مسحناه ورجعنا قبلناه تانى  هل ممكن نقرب ونحبه تانى ؟ هل ممكن تشدنا نفس الصفات ونكرر نفس التجربة ؟ اسئلة كتيرة فكرت فيها طول الفيلم وابقى كدابة لو قلت ان فيه اجابات قاطعة ليها عندى
الفيلم حلو

الخميس، 26 أكتوبر 2017

100 يوم سعادة(8)

اليوم 8 #100يوم_سعادة

النهاردة اشتريت شلة صوف وابرة كورشيه وبدأت اول درس ليا😀 غرزة الحشوة
شكراSally Atef Elmasry بحجم الكون😄😃

الاثنين، 23 أكتوبر 2017

100 يوم سعادة(7)

اليوم 7 #100يوم_سعادة
النهاردة كان يوم أنتخة..من زماان مانتختش كدة وبسبب الانتخة دى كان فيه وقت انى أقرا.. الحمد لله

الأحد، 22 أكتوبر 2017

100 يوم سعادة(6)

اليوم 6 #100يوم_سعادة
النهاردة ماحصلش حاجة معينة تسبب السعادة ..فكرت اكتب ايه ،مش البوست ده اصلا معمول علشان نبطل سوداويية ونبقى ايجابيين طيب ما ابص للنعم اللى الواحد فيها ونحمد ربنا عليها وبالتالى كل ما اتزنق هحمد ربنا على نعمة  ما
النهاردة هحمده على نعمة القدرة على التعبير عن اى احساس بالكتابة .. الحكاية خففت عنى كتير وخرجت افكار وطاقة سلبية كتير من جوايا.. الحمد لله

السبت، 21 أكتوبر 2017

100يوم سعادة(5)

اليوم 5 #100يوم_سعادة
النهاردة اتفرجت على الجزء الاول والتانى منthe lord of the rings حلو المود اللى سببوه انا كنت قاعدة مشدودة جدا
النهاردة عمر تم3 شهور .. كل شهر وانت طيب ياقلبى ❤❤
النهاردة عملت كيكة ودى اول كيكة اعملها من فترة يمكن من قبل ما اولد بشهرين ههههه  فمشروع تم انجازه وطلعت حلوة 😄

الجمعة، 20 أكتوبر 2017

100 يوم سعادة(4)

اليوم4 #100يوم_سعادة
النهاردة فرح حنون فرحتلك جدا والله وكان نفسى اشوفك بس انتى عارفة بقى ماقدرتش اسيب عمر وحده وانتى منزلانا من المغرب سيادتك😐 بس كان نصاية ظريفة شفت فيها البنات كلهم 😄وحشتنى لمتنا باعيال ووحشنى قاعدة الخميس بس من غير شغل😉

الخميس، 19 أكتوبر 2017

100 يوم سعادة(3)

اليوم النهاردة كان صعب معظمه طاقة سلبية .. بس الحلو فيه انى غمضت عينى وحاولت اطلع منه حاجات حلوة .. وليكن عشوة حلوة دخلت المطبخ اجهزها بغرض انى اخرج الطاقة السلبية وطلعت عشوة  جميلة .. تسلم ايدى 😄

الأربعاء، 18 أكتوبر 2017

100 يوم سعادة (2)

#100يوم_سعادة 2
النهاردة قريت قصة فى كتاب العصافير الخرساء لعبد الوهاب مطاول سببتلى حالة من السلام النفسى

100 يوم سعادة (اليوم1)

مشاركة منى فى مبادرة #100يوم_سعادة
النهاردة كنت عاملة بروجرام لنفسى وكنت خايفة عمر مايخلنيش اعمل منه حاجة .. بس نجحت الحمد لله ونفذته كله😀
#100يوم_سعادة

#دعوة_للتفاؤل

الاثنين، 2 أكتوبر 2017

على الهامش 48

من منغصات الحياة ان تحاول ترضى كل الناس اللى بتحبهم فى حياتك.. مشكلة رهيبة وسبب فظيع لقلة الراحة .. رغبات كل واحد فيهم بتتعارض مع بعض وبتتعارض مع راحتك انت .. طب تعمل اى ماتسألش فى زعلهم وتعمل اللى يريحك ؟! زعلهم تاعبك.. تحاول ترضيهم ؟! هتتعب من مجرد التفكير فى الطريقة .. وتلاقى السؤال اللى بيفرض نفسه طب ليه هم مش سألين عن راحتك كدة .. ليه مابيحسوش انت اد ايه شايل همهم ؟! طب بيحبوك ازاى بقى ؟! .. صدااااع

الثلاثاء، 26 سبتمبر 2017

تويتات مامى 4

شعور غريب ان يبقى فيه حتة منك بين اديك وتلاقى فيها جزء من ملامحك .. بفرح اوى ياعمر لما حد يقولى انك شبهى .. وبفرح اوى لما حد يقول انك شبه ابوك .. حلو الكوكتيل ده 😄 بتنام انت زى باباك وبتضحك زى جدتك واخد عنين ابوك وشفايف امك .. حلو اما يبقى ملامحك من ملامح كل اللى بحبهم❤
شفت اعلان قريب لحازم امام مع بناته وموضح ازاى بيعملوا حركاته بالظبط .. الاعلان ده عبقرى ياعمر وكل ما اشوفه ابصلك وابتسم .. لما تكبر ابقى شوفه

الخميس، 21 سبتمبر 2017

مع نفسى 46

من صغرى انا واختى اتربينا على اننا نحافظ على الحاجة الجديدة مانبهدلهاش .. لو شنطة جديدة او فستان جديد نخليهم للمناسبات ونلعب بالقديم لو جزمة جديدة نخرج فيها فى المشاوير الرسمية ونلعب بالقديم طالما حالته كويس طبعا وكأسرة متوسطة  كان ده مناسب لأن الجديد كان بيجى فى العيدين وعلى الدراسة  فكان عندنا جديد ديما .. طريقة مصرية صميمة متبعة فى معظم البيوت للتوفير .. بس لما كبرت حسيت ان الطريقة دى غلط .. اصلها علمتنا نأجل السعادة لحد ماتيجى مناسبة  .. أجل فرحتى بالحاجة لحد مايجى وقت مناسب .. طب فرضا ان الفستان ضاق او موضته راحت هنعمل ايه؟!
من فترة صاحبتى جت تطلع شنطة كانت عيناها لمناسبة وماخرجتش بيها الا مرة لقت جلدها داب لوحدة من التخزين ! مش لو كانت خرجت بيها فى اي مكان كان زمانها فرحت بيها!
من فترة برده جيت البس جزمة جديدة وعيناها لخروجة لقتها لسة جلدها جامد ووجعتنى فى خروجتى  وكرهت الخروجة والجزمة الجديدة ونفسى يومها !
انا مش هأجل فرحتى للوقت المناسب تانى .. ماحدش عارف هيبقى مناسب وقتها ولا هعرف افرح وقتها ولا لأ .. ماحدش عارف هكون انا شخصيا وقتها موجودة علشان افرح ولا لأ

الثلاثاء، 19 سبتمبر 2017

تويتات مامى 3

ضحكتك جميلة يا عمر ماشاء الله .. ضحكة غريبة احترت كتيير فى وصفها لحد لما جدتك شافتها ولقتها بتقولك  "ضحكتك هنا ياعمر"" .. صح هو ده أحسن وصف ضحكتك هنا بتفرح القلب كدة وبتخلى التعب يهون

الأحد، 17 سبتمبر 2017

مع نفسى 45

ديما كانت امى تقولى العشر سنين اللى مابين عمر العشرين والتلاتين بتعدى هوا ،مابنحسش بيها .. ماكنتش بركز اوى فى الجملة
بعدها قالتهالى اخت واحدة صاحبتى اكبر مننا نفس العبارة تقريبا .. لما كسرت التلاتين فهمت !
هم صحيح عدوا امتى ال10 سنين دول .. عدوا فى ايه وايه اللى عملته فيهم .. ازاى ماحستش بيهم كده .. جايز لأنى ماحققتش فيهم تغيير فى حياتى ،فضلت زى مانا فيهم تقريبا اخسر ناس كتير من اصحاب ثانوى وجامعة لأى سبب كان حتى ولو كان السبب هو ان مافيش وقت نسأل حتى على بعض  وقصاد كده ماكسبتش ناس كتير بسبب ظروف شغلى .. ماحققتش فيهم اى حلم تقريبا حتى ماكنتش بقرأ فيهم كتير زى دلوقتى .. يمكن كل اللى زاد عليا انى اشتغلت كتير فيهم كتير جدا لدرجة انى  متأكدة ان الشغل ده هو اللى سرق ال10 سنين دول .. والكوميديا بقى انى ماطلعتش منهم بفلوس كتير مثلا احس معاهم انى انجزت .. لا.. كان اللى جاى على اد اللى رايح  ماكنتش بحرم نفسى ولا اللى حوليا من حاجة محتاجنها  جايز دى الميزة..
الشغل دى هو اللى سرق الوقت الاخير اللى كان لازم أقعده مع بابا الله يرحمه، لكن ده موضوع تانى محتاج فضفضة تانية
ولأن الوقت اتسرق كده بشكل محبط مش حاسة بقى انى فى التلاتينات خالص .. عايش فى العشرينات لسه ومش حسانى كبرت .. اصل الواحد بيكبر فى رأي باللى عمله واللى عاشه وبكده يبقى انا لسه يدوبك بنت 23 سنة
هكبر امتى وهحقق الحاجات المجنونة امتى مش عارفة
قدام الكل انا كبرت  بس انا حسانى لسه صغيرة البس البنطلون الجينز والتيشرت واجرى واتنطط ..
مش عارفة دى ميزة ولا عيب لكن جوايا زعل على ال10 سنين اللى فاتوا وخوف على اللى جاى حتى ولو يوم 
عاوزة اعيش بقى ومش عارفة ابدأ منين !

الأحد، 10 سبتمبر 2017

تويتا مامى 2

ماكنتش اعرف ان البكرية اللبن الطبيعى عندها بيبقى ضعيف وخاصة لو والدة قيصرى وقبل معادها.. ماحدش قال!
لما كنت بتعيط ياعمر ومش عندى لبن طبيعى كنت بحس انى مقصرة اوى بحس انى أم خايبة .. الكل كان بيهدينا واننا هنجيب لبن صناعى .. ماكنوش حاسيين باللى جوايا .. احساس وحش ياعمر

الجمعة، 8 سبتمبر 2017

تويتات مامى 1

احساس غريب ياعمر .. اول ماشفتك وانت مغمض عنيك وضمام اديك تحت دقنك ومنكمش كده احساس غريب اوى ... انت بقى اللى كنت جوايا كل ده .. كنت دايخة جدا بسبب انسحاب البنج منى لكن فاكرة ملامحك وريحتك لما ابوك قربك منى .. بداية الالم كانت رهيبة بس كان نفسى اشيلك بقى .. طول مانا شايفة كل اللى حواليا شيلينك  طول مانا حاسة انك بقيت واقع و انى مابحلمش

السبت، 26 أغسطس 2017

تويتات حامل 9

وقفنا فييين .. اه
اتصلت بباك وانا بعيط لدرجة انه اتخض .. فيه ايه يابنتى
الحقنى يا محمود الدكتور قالى هولد النهاردة وانى اسبقه على المستشفى هيخلص العيادة ويجى يولدنى
الدنيا اتشقلبت بقى .. جدتك بقت بتجرى تحضر الحاجة وجدتك ام بابا تعيط لانها كانت متجبسة ومش هتعرف تحضر الولادة .. ركبنا العربية والكل متحمس وانا هموت من الرعب ..
وصلنا وانا بحاول اضحك مع اللى حوليا بس الخوف مسيطر لدرجة انى حاولت اشغل نفسى واتخيل ملامحك بس الممرضة قاطعتنى وقالت يلا نجهز!
دخلت اوضة العمليات وخالتك اقنعت الدكتور تحضر العملية معايا .. طلعت فوق سرير العملية ودكتور البنج بدأ يشرحلى ويقنعنى انه يدى البنج النصفى من غير ماينيمنى وافضل صاحية خلال العملية.. ماستحملتش الحقيقة من الخوف لقتنى بقوله لا نيمنى مش هقدر .. وبالفعل نمت ماعرفش اد ايه وصحيت لقيت اول حد اشوفه باباك وهو مبتسم وبيقولى قابلة ياستى ابننا .. عمر 😄

الثلاثاء، 22 أغسطس 2017

تويتات حامل 8

المفروض تبقى تويتات مامى بقى لكن لأنى اتكلفت والولادة جت بدرى فبقالى فترة ماكتبتلكش..بس استحالة افوت عليك اليوم اللى نورت حياتى فيه 😁
انا ياسيدى كان عندى متابعة عادى مع الدكتور اياه .. رحت فى معادى وكانت العيادة زحمة اوى فضلت منتظرة وكانت قاعدة معايا واحدة تعبانة اوى وبتتألم جدا لدرجة خوفتنى .. سألتها انتى فى الكام قالتلى انها زى حلاتى فى أول التاسع والدكتور محددلها نفس يوم ولادتى بس تعبت وفضلت تعيط من الالم وانا اتعجب واقول الحمد لله انى مش حاسة زيها .. دخلت للدكتور وقالها هتولدى حالا وراح سابنا علشان العملية .. بينى وبينك انا اترعبت .. مو ممكن يحصلى زيها؟! لا لا دى تعبت انا تمام اهو .. اينعم بدأت احس بتقل كده بس عادى .. اينعم حاسة انى مش مرتاحة ومش عارفة اقعد بس عادى برده ممكن نفسيا
من هنا لهنا الدكتور جه ودخلت وكشف وانا كنت ناوية اقوله نستنى اسبوع كده علشان ابوك مسافر 😂
لقيته بيقولى هتولدى النهاردة 😱
ازاى يعنى يا دكتور؟!
ابدا السائل حوالين البيبى متعكر كده لازم يخرج
مش عارفة  بقى اوصغلك .. كوكتيل احاسيس كتير من خوف عليك لفرحة انك هتخرج لخوف من العملية لخوف ابوك مايعرفش يحضر بسبب سفره لخوف من الدكتور نفسه .. كل ده طلع دموع كتيييير .. سيل من العياط ماتفهمش جت ازاى
خرجت اكلم ابوك وابلغه..
اكملك بعدين بقى لأن جنابك صحيت وقصيدة الواء واء اشتغلت 😂

الجمعة، 7 يوليو 2017

تويتات حامل 7

أحاسيس غريبة حستها مع الحمل لو كان حد وصفهالى ولا كنت هفهم الا لما أعيشها .. يعنى مثلا أنا بقيت حساسة جدا فى كل حاجة حساسة جسمانيا لدرجة عجيبة حساسة نفسيا اى حاجة بتأثر فيا ودموعى القريبة قربت أكتر واكثر .. حتى معدتى اللى كانت تهضم الظلط زى ما بيقولوا مابقتش حتى قادرة تهضم كلمة مش فى محلها

الأربعاء، 5 يوليو 2017

تويتات حامل 6

اتمنيت من ربنا كتير تطلع ولد .. مش لأنى مابحبش البنات بالعكس دول نعمة ورزق  بس لأنى طول عمرى حتى قبل جوازى كان نفسى البكرى بتاعى يبقى ولد .. انا ماليش اخوات صبيان وطبعا جدك توفى فى وقت حرج من حياتنا فحسينا يعنى اى أم وبنتين يواجهوا الدنيا العجيبة دى من غير راجل .. نفسى تطلع ولد وأربيك تربية تبقى بيها راجل وسند لينا فى حياتنا .. مش بعيدة على ربنا 😊

الأحد، 2 يوليو 2017

تويتات حامل 5

فكرة انى مسؤلة عند حد مرتبط بيا فى اقل حركة دى فكرة غريبة جدا ومرعبة .. يعنى ماتخيلتش ابدا انى لازم اكل مش علشانى لأ علشانى انا وانت واختار كويس نوع أكلى مش الرمرمة اللى كنت بعملها قبلك  ... لازم انام كويس .. لازم ابقى هادية وماتنرفزش لأن ده بيتنقلك وبيأثر عليك .. ماينفعش اخد اى دوا لانك هتتأثر .. دموعى بتأثر عليك .. ضحكى بيأثر عليك نفسيتى بتأثر عليك .. بقيت بحسب حسابى حتى فى النفس بتاعى علشان خاطرك .. ارتباط رهيب اسمع عنه بس انت عيشتهولى

الخميس، 29 يونيو 2017

تويتات حامل 4

انى ارضى بكل حاجة غريبة بتحصلى بسببك دى حاجة كنت اسمع عنها بس مافهمتهاش الا لما بقيت حامل.. يعنى مثلا اللى كان يقولى هتتخنى كنت ممكن اقتله اهو وزنى زاد كتير وراضية علشانك.. رجلى ورمت واتبهدلت ترجيع وعادى حاسة ان كل ده حلو .. بالعكس حاسة ان ده بيطمنى عليك اكتر .. يعنى حركتك بتقلقنى وتتعبنى وتصحينى من احلاها نومة بس لو ماتحركتش بيبقى يوم ماطلعتلوش شمس وتفضل دماغى تودى وتجيب لحد ما تحن عليا وتتحرك ولو حركة صغيرة

الاثنين، 26 يونيو 2017

تويتات حامل 3

من خوفى عليك قررت اتابع الحمل مع دكتور هنا فى نفس البلد بتاعتى .. بس راجل عجيب اوى بيقولك من المدرسة القديمة .. الراجل مابيتكلمش ولا سمعنى صوتك ولا ورانى صورتك زى مابشوف فى الافلام  بجد حرمنى من حاجات كتير معاك رغم انه شاطر بس فعلا من منغصات الحياة بالنسبالى .. يعنى انت بالنسبالى هتبقى مفجأة فى كل شئ ..

الثلاثاء، 13 يونيو 2017

تويتات حامل 2

كنت مقررة انى لما ابقى حامل اكتب يومياتى مع البيبى .. بس لما حملت فيك ماعرفتش اكتبها واكرر التجربة مع ان الاحاسيس كتير اوى .. بس خفت الحقيقة .. وادينى وصلت للتامن ولسة بدأة اكتب .. معلش سامحنى بقى على اللى فات

الخميس، 8 يونيو 2017

تويتات حامل1

عرفت انى حامل فيك فى الشهر التانى ..احساس مختلف عن المرة الاولى اللى ربنا ماردش انها تكمل .. الفرح هنا مخلوط بالخوف من اى حاجة تحصل ممكن نقول ان التجربة الاولى عملالى رعب !

الخميس، 25 مايو 2017

# العجز

أخاف كثيرا من الشعور بالعجز .. من أن أقف مكانى مكبلة لا أستطيع الحركة ،لا استطيع التقدم ولا التراجع ولا التصرف ولا المنع.. فقط اقف مكانى أنظر لما يحدث والمرار يمﻷنى تاركة المشهد لغيرى ينهيه،يشوهه،يقتل أحلامى به ،ويتركنى مع نتائج لا مفر من مواجهتها ولا يد لى بها
اخاف كثيرا أن أرى حلمى امامى وقد قيدت وسلب منى حق تحقيقه أو الاقتراب منه .. انه العجز
أخاف كثيرا واغضب أيضا عندما أرى حبيب او صديق فى ضيقة وكل السبل للحل مغلقة ،أراه يتألم وما باليد حيلة .. انه العجز

اخاف كثيرا ان تحدث مشكلة ما بينى وبين من أحب ولا استطيع التصرف فلقد كسر ما كسر ويصيبنى الشك دائما فى امكان عودة المياه الى مجاريها .. اخاف خسارتهم.. انه العجز

أخاف كثيرا ان لا استطيع ان ارفع صوتى برأي لانى اخاف ان اغضب من احب ،اشعر بالضيق من صمتى ومن تقبلى ما أرفض ..انه العجز
اخاف كثيرا من عدم قدرتى على تطبيق افكارى وارأى فى عملى بسبب تدخل من يملكون الامر فى شكل وسايط او اوامر عليا رغم انه شئ يخصنى انا ولكنها ستكون حربا انا فى غنى عنها .. انه العجز
اخاف كثير من ضيق الحال الذى يفرض عليك التخلى عن الاحلام ومواجهة واقع غريب لم يرد لك فى بال.. انه العجز

شعور يولد احباط وغضب ليس له حدود

الأربعاء، 3 مايو 2017

القالك حد

يجب ان يوجد بحياتك اشخاص تستطيع ان تكون على طبيعتك امامهم دون تكلف
اشخاص يفهمون مزحك.. يتقبلون غضبك.. يستمعون اليك
اشخاص تسطيع ان تخرج مشاعرك امامهم دون خوف او حرج ، تستطيع ان تحزن  امامهم دون عمل حساب لتشفى.. ان تبكى امامهم وكرامتك محفوظة.. ان تفرح امامهم دون خوف على فرحتك هذه من الحسد
اشخاص سوف ينصرونك ظالما او مظلوما كنت، كما امرهم نبينا صلوات الله عليه
على الاقل شخص واحد
ان لم يكن لديك فلن اكون سلبية واقول لك انك شقى تعيس الحظ
فلنكن ايجابيين واقول لك احرص على البحث عنه كى يكون لك ركن هادئ بحياتك تستطيع ان تلجأ اليه متى احتجت ..
احرص عليه كى ترتاح