الجمعة، 27 سبتمبر 2013

عن...مساحتك وحيزك من الفراغ






كل واحد فينا بيشغل مساحة وحيز معين من الفراغ .. مش بس بيشغله بجسمه .. لا
كمان بتفكيره.. كل واحد فينا بيحتاج مساحة حوالين مساحته علشان يعرف يفكر ويتصرف بحريته من غير مايعمل حساب انه هيخبط فى حد..
يلف حولين نفسه لحد مايدوخ.. يصرخ لحد ما صوته يبقى مبحوح.. يرقص .. يتجنن..
هو حر .. طالما مش بيخبط فى اللى حواليه ومراعى حدود نفسه  وحدود مساحة غيره
 الكلام ده حلو اوى بس فى الغالب نظريا .. عمليا بقى فى حاجات بتخليه صعب التنفيذ وفى بلدنا الحاجات دى  بتندرج تحت مسميات غاية فى الروعة زى الصداقة والاخوة والعيلة ومن باب ان الناس عاوزة تطمن عليك وبتحب تعرف اخبارك وهكذا..

نضرب مثال على كده مثلا المدونات..
فى ناس كتيرة عاملة المدونة  مش من باب انها  تكتب اعمالها الادبية  وخلافه..
لأ من باب الفضفضة.. انها تكتب عن اللى مزعلها عن اللى خانقها عن اللى مفرحها..
تكتب مشكلة وحابة تاخد رأى ناس ماتعرفهومش فيها .. تفضفض  بسبب زعلها من ناس ماتقدرش تقولهم انها زعلانة منهم او تتحرج تقول على سبب زعلها
يعنى تخرج مشاعر  واللى ممكن جدا ماتكنش مرتبط بحد معين اكتر منها مشاعر هى حساها فى المطلق

زى ما قلت تفضفض..
تفضفض على سبيل ان المدونة دى من ضمن مساحتها الشخصية اللى رسمتها لنفسها..
 ومن هذا المنطلق فوجئت بناس اصحابى  مخبية مدونتها عن القريبين منها..
اللى مخبى عن خطيبته واللى مخبياها عن جوزها واللى مخبياها عن ابوها او اخوها..
اللى مخبى عن زمايله فى الشغل..

مش علشان هم بيعملوا او بيكتبوا حاجة عيب.. لاء خالص ولكن علشان يقدروا يكتبوا بحرية

يقدروا يكتبوا عن الرومانسية من غير ماحد يسألهم تقصدى بالكلام ده مين انتى فى حد فى حياتك..
يكتبوا مشاعر حزينة من غير ما يجى شريك الحياه ويقولها هو انا مزعلك فى ايه انا ماعملتش اللى انتى كاتبه عنه ده ..
يكتبوا عن خنأتهم من مدير شغلهم من غير ما واحد منفسن من زمايله يديله الاسفين التمام ويروح يدى لينك مدونته بمنتهى البراءة لمدير شغله

يكتب عن حبه الاول  من غير ما خطيبته تمسك فى خناقه وتقوله انت لسه بتفكر فيها..

وهكذا..

بصراحة مش عارفة احدد ان كان ده صح ولا غلط.. انا نفسى ايام ماكنت بحكى يومياتى القريبين منى عرفوا او خمنوا هى مين طنط حشرية :)
وعرفوا كمان من مدير المستشفى ايها ;)

عموما كل واحد فينا محتاج مساحته الشخصية.. وانا شايفة انه من حقه يدافع عن حدودها  باى طريقة تناسبه وبدون احكام من الاخرين 

الأربعاء، 25 سبتمبر 2013

على الهامش ...5









ساعات بتبقى محتاج بس طبطبة اكتر منها مساعدة او حل للمشكلة..
مجرد طبطبة تحس بيها انك مش بس نفسك اللى صعبان عليها !!

الثلاثاء، 24 سبتمبر 2013

على الهامش...4








لازم يحطوا قانون او بند فى الدستور او اى حاجة شبه كده تمنع الناس اللى بتفتى من ممارسة هذه الهواية القاتلة..الناس اللى فاهمة نفسها عارفة فى كل حاجة.. طب شغال .. دوا ما يضرش.. قانون ودين .. الناس بتوع كله دى لازم تقف عند حدها..
الناس دى خطر على الامن العام.. وعلى اعصابى انا شخصيا !!
ومن منطلق انه من امن العقاب اساء الادب .. لازم عقاااااااب

الاثنين، 23 سبتمبر 2013

على الهامش... 3







سمعت مرة  ان السعادة زى الفراشة .. احيانا علشان نعرف نشوفها لازم نقف ساكتين..
لو اتحركنا او حاولنا نمسكها.. هتطير!
 

السبت، 21 سبتمبر 2013

3 سنين !








بعد فترة خمول كبيرة وقبلها فترات خمول اكبر قررت اذ فجأة انى اكتب كل يوم تدوينة(اذا قدرت) جايز علشان حسيت انى محتاجة اكتب وجايز لانى وحشنى التدوين وجايز بردو علشان استعيد نشاط دعوة التدوين اليومى اللى كانت من سنتين  واللى كنت فيها فى قمة النشاط فلك ان تتخيل انك تكتب كل يوم تدوينة ولمدة شهر ومش اى شهر ده على ما اتذكر كان شهر رمضان! وما ادراك ما انشغالة شهر رمضان..

كانت ايام حلوة وحاسة انى محتاجة الحماس ده رغم انه كان ايامها احلى .. احلى بالناس اللى شاركو فيه والله معظمهم بقوا اصحابى وكتير منهم ماشاء الله بقوا كتاب وليهم  كتب حاملة افكارهم واساميهم.. يعنى تقدروا تقولوا عليا مصاحبة ادباء :)

كانت احلى كمان لانها كانت بطعم البدايات.. البدايات فى كل شئ.. من اول الكتابة اللى كانت بالنسبالة لى  خطوة رهيبة ماكنتش متخيلة انى هقدر عليها فما بالك بالالتزام لمدة شهر 30 يوم ب 30 تدوينة الى حد ما مختلفين  وكل واحدة منهم بمشاعر مختلفة ..وحلاوة انك تشارك غيرك كمان بافكارك وفى افكارهم.. كلنا كنا بنتابع بعض وبندى اراء فى كلام بعض البسيط منه قبل  العميق

المهم..

انا حبيت استرجع  شوية من الروح الحلوة دى .. وبقالى كام يوم اهو مواظبة ويارب اقدر اكمل وبشكر جدا كل اللى مهتم وبيتابع رغم انى مش بقدم يعنى الا حاجات بسيطة  من وجهة نظرى فضفضة .. 

جيت بقى اكتب تدوينة النهاردة اللى كانت عن السعادة ! لقتنى عينى كده رايحة على التاريخ

ايه ده! احنا فى سبنمبر؟! وكمان 21 منه؟!
من 3 سنين بالظبط اتعملت المدونة دى..
يعنى مدوونتى العزيزة (جفلت) 3 سنين..
3 سنين وانا بكتب فيها  يومياتى وارائى و احاسيس  مريت بيها او مر بيها ناس قريبين منى

3 سنين متابعة لناس وهم متابعين ليا 

3 سنين... فترة بردة غيرت فيا كتير واضافت ليا كتير كتير كتير
 3 سنين اقدر اقول بكل فخر ان مدونتى دى كانت من اهم احداثها ومن اقربها لقلبى
بلف بلف وبرجع ليها تانى .. بحسها الركن بتاعى .. وان اللى بيتابعنى او بيتكرم فيها ولو بتعليق صغير  .. كانه بيزورنى فى بيتى وجاي واديه مش فاضية :)

وللعلم احساسى بيها ده  ماكبرش الا باللى شجعونى اكملها واللى ديما بيشجعنى اكتب لو لقانى  ركنت
هم عارفين نفسهم واحد واحد طبعا بس احب بردو انور بيهم البوست ده  من باب  العرفان بالجميل  
وهبتدى طبعا بعروستنا الجميلة سهاد وصديقتى الجميلة جدا والمبدعة جدا جدا دعاء العطار وطبعا خالد سواح فى ملك الله واستاذنا ابو زياد :) وتامر المغازى
واخويا وصاحب لقب اكبر متابع واكبر المشجعين محمود 
 فيى غيرهم طبعا كتير  بس يمكن دول  نقدر نسميهم رفاق الدرب لو جاز التعبير :)

الناس دى انا برغى بقالى 3 سنين وهم متابعنى  تقريبا طول الفترة دى .. ياصبركم.. ربنا معاكم الحقيقة :D

بجد..
 
شكرا لانكم هنا  


الجمعة، 20 سبتمبر 2013

مع نفسى 23







*كتير بحس ان كلامى محتاج محامى يدافع عنه.. لما بكتب عن الحب او عن اى احساس تانى  الناس بتفتكر انى عايشة حالته.. اه صحيح ان الواحد بيعبر عن احساسه بالكلام بس مش شرط ديما يكون كده ممكن اكتب عن الحب وانا مابحبش عادى ممكن اكتب عن الخيانة او الفراق وانا ماحصليش كده المشكلة دى بدأت احس بيها لما ناس قريبين منى بدأوا يتعاملوا على اساس انى مخبية عنهم اخبارى...

حسيت وقتها انى محتاجة محامى!!

********

* انا نفسى اطير.. نفسى اطير قوى.. لما قلت كده لصاحبتى قالتلى خالى بالك لتقعى  .. 
بقيت عاوزة اضربها وقتها.. 
يابنتى يا حبيبتى الحقائق العلمية على عينى وراسى  بس لازم حبة خيال علشان حياتنا ماتبقاش زى الارض الناشفة المشققة..
وبالتالى انا عاوزة اطير واللى هيقولى حاسبى تقعى هزعله !!

**********

بما انى بحب الشيكولاتة اوى وبتحسنلى مودى بشكل خرافى .. فانا نفسى اكل شيكولاتة دلوقتى..
بس مش اى شيكولاتة لا... الشيكولاتة اللى كانت موجودة زمان دى .. اللى هى لما تيجى تفتحها تلاقى جواها ورقة صغيرة فيه حكمة  او نصيحة ليه

اهو انا عاوزة واحدة منهم دلوقتى !!
**************

سمعت مرة انك لو اتخنقت مرة واحدة كده بدون سبب يبقى فيه حاجة صغننة اوى حصلت لدرجة انك مش واخد بالك منها  وزعلتك ..عمالة انا انكش عنها ومش عارفة الاقيها..
شكلى محتاجة عدسة مكبرة!

الخميس، 19 سبتمبر 2013

على الهامش ..... 2









هو انهى  حاله احسن ..... اللى ماعندوش ذكرايات حلوة .. ولا اللى  عنده وراحت لحالها وكل مايفتكرها يبتسم ابتسامة حزينة!!

الأربعاء، 18 سبتمبر 2013

الخميس، 12 سبتمبر 2013

عنها .. 7









قالتله .. انا مخنوقة اوى 
قالها .. من ايه بس !
قالتله من المجتمع.. خانقنى ومكتفنى .. مش عارفة اعمل اى حاجة.. لا عارفة اسافر فى مكان احبه وقت ما احب.. ولا عارفة اتحرك ولا حتى افكر بصوت عالى فى اى حاجة تخطر فى دماغى.. ديما فيه اصول وقواعد ونظرة ناس بتحجمنى ولازم اعمل حسابها.. نظرة بتوقفنى مكانى!!

قالها : ممكن.. انتى بنت وطبيعى فى مجتمعنا فيه قيود على البنت..  بس القيود دى مش مصدرها الناس بس.. لو عاوزة الحقيقة انتى كمان مصدر  للقيود دى.. انتى كمان هماكى نظرة الناس وبتعمللها حساب وعاوزة تكونى فى نظرهم مثال التربية الاخلاق وبمقاييسهم.. 
انت كمان من الناس..
على اد ماهم مكتفينك وبيشدوا الحبل انتى بتشدى الطرف التانى. !