الاثنين، 27 فبراير 2012

بعيدا عن السياسة



ياخالة قمر ياللى عجينك خمر ياللى
 قومى قرصيه
واساعدك فيه
ادينى رغيف
ابيض ونضيف
قومى اخبزيه
كسلانة ليييييه

كانت من احلامى قبل الثورة انى بلدى تبقى نضيفة ,من غير زبالة فى الشوارع
ولسه ده حلمى لحد دلوقتى ...
نفسى امشى مالقاش اكوام زبالة جنب جنينة ولا جنب جامع ولا مكان غير مكانها الطبيعى اللى هو صندوق الزبالة
نفسى اركب عربية ومالقاش حد بيرمى كيس الشبسى ولا المنديل ولاالكانز من الشباك
فى بلد معينة بعدى عليها وانا فى العربية فى طريقى للمنصورة البلد دى اهلها بيعملوا حاجة غريبة
بيحطوا اكياس زبالتهم على الرصيف اللى قاسم الطريق الرئيسى لحارتين رايح جاى
طول مانت ماشى بطول البلد الفاصل مرصوصة عليه الاكياس بدقة عجيبة
الحال ده من زمن على فكرة ونفسى افهم ليه؟!
ياخالة قمر ياللى
ياللى وحشانى
ضمينى تانى
بجناح حنانك
راح فين زمانك
زعلانة منى؟
كان غصصب عنى
وانا اعمل اييييه!!!
بحلم ان الناس تفهم الفرق بين عضو مجلس الشعب والمجلس المحلى
نفسى يبطلوا يحلموا ان عضو مجلس الشعب هو اللى هينضف الشوارع وينور العواميد ويشغل الناس
هو اللى هيزود حصة البلد من انابيب الغاز ولا هو اللى هيخلى اللى بيوزع العيش يعدى فى معاده
نفسى الشباب اللى قام بالثورة واتقسم لانه معملش حزب يجمعه يرشح نفس للمجالس المحلية
علشان تظبط البلد لازم نبتديها من تحت مش من فوق
ياخالة قمر
ايدك معايا
غنى غنايا
القمح جالك
فرح عيالك
قومى اطحنيييه
فيلم ايرانى اخد اوسكار؟
طب يعنى الحكاية مش حكاية احقاد بقى ولا اننا عالم تالت او عرب او مسلمين وهم بقى بيحقدوا علينا وحالفين لنطول السما ولانطول الاوسكار
بحلم انى اشوف فيلم مصرى مفهوم مش على طريقة يوسف شاهين
يدخل وياخد اوسكار ...
بحلم انى اشوف فيلم اكشن مصرى يبهرنى
انى اشوف فيلم خيال علمى مصرى ...
بحلم انى اشوف فيلم رومانسى مصرى يأثر فيا زى تايتنك مثلا
بحلم بده وليه لاء
ياخالة قمر كسلانة ليييه
بحلم ان كل طالب فى مصر يقعد فى الحصة وهو معاه لاب توب بتنزل عليه المناهج اول كل سنة دراسية ,وماتتحزفش المناهج بتاعة السنين اللى عدت بحيث انه يقدر يربط اى معلومة بحاجة هو درسها من قبل
خيالى الحلم؟
ماعتقدش..هيبقى ارخص من طباعة الكتب كل سنة وبعدين بيعها لمحلات اللب والسودانى

بحلم ان المدرس فى المدرسة الحكومية لما يجى يدى معلومة للطلبة مايقلهمش قولوا ورايا يا عيال وبصوت واحد ثورة عرابى قام بها احمد عرابى فى 1919 ..وانت بقى لسوء حظك تعدى جنب المدرسة وتسمع صوت 60 طالب طالع من شباك الفصل بيرددوا المعلومة ورا الاستاذ

ليه مايقعدش بهدوء وبصوت واطى وبدون استذاف للحناجر ويحكيلهم اللى حصل فى الفترة دى ويطلب منهم هم يدورا على المعلومات الثابته على النت مثلا ويناقشهم فى نتايج بحثهم ده فى الحصة الجاية ويبقى ده الواجب بتاعهم ويبقى كده علمهم يدوروا على المعلومة بدل ما بيحفظوها

ياخالة قمر ياللى
تسلم اديكى 
واللى يناديكى 
ردى عليييه


دول حلمين من احلامى وحاسة انهم مش معجزات يعنى
ولا انا بحلم بالمدينة الفاضلة ولا انا مش واقعية ومش عايشة عيشة اهلى
لا
دى اقل اقل الحاجات اللى يستحق يعيشها اهلى
واللى نفسى الاقى ناس فكرت فيها وقاعدة بتجهز ليها دلوقتى

وكل ده بعيدا عن السياسة
نفسى كل واحد فيكم يحط حلم او حاجة نفسه يشوفها بعيدا عن السياسة حتى لوكانت مجنونة 
ممكن نخرج بمجموعة احلام اكيد قابلة للتحقيق
   
     

الجمعة، 24 فبراير 2012

طعم الحنين.........





ما زالت رائحتك فى  الهدية......

*************


نعم رغم البعد..رغم القسوة..رغم كل اسباب الفراق التى لا اسباب لها
مازلت اشتاق اليك..

**************


ليس معنى انى مشتاقة اليك انى لن لا استطع ان اكمل حياتى بدونك
فقط هى الذكريات التى احن اليها..

******************

ومهما مرت بيا الايام يبقى حضنك هو ملاذى الاول ...
كم اشتاق اليه

****************

كم اشتاق لاهتمامك بى عندما كنا مجرد اصدقاء


*****************

احن الى تلك الايام التى كان شاغلنا الشاغل بها
هنلعب ايه النهاردة؟! 

************

عندما استعيد شريط حياتى معك..اتمنى لو عدت الى نقطة البداية
حتى ابدأها معك من جديد

الاثنين، 20 فبراير 2012

يا هذا.........




انا انثى...
بكل ما تحمله الكلمة من رقة وعذوبة وضعف وقوة وحيلة ومكر وذكاء وحنان

انا شرقية...
بكل ما تحمله الكلمة من عزة وكرامة واباء وترفع وطبيعة ملكية

انا مسلمة...
بكل ماتحمله الكلمة من ادب وحياء وطاعة وسكينة وحفظ للنفس وللبيت وللزوج ومن قبلهم لله

فمهما حاولت ان تبحث بين الغربيات عن جميلة الجميلات فاعلم انك لن تجد مثلى

فانا ياهذا..
انثى ..شرقية..مسلمة
وافتخر

الجمعة، 10 فبراير 2012

مع نفسى7



*كنت برغى مع واحدة من صحباتى واتكلمنا عن احلامنا فحكتلها انا نفسى اعمل كذا
قالتلى يااااه يانور مش كبرنا على الحاجات دى؟!
قولتلها اه كبرنا بس انا لسة ما حققتوش اعمل ايه!
قاتلى انسيه بقى طالما ماتحققش فى وقته مالوش معنى بقى اكسباير..
اكسباير؟!!

حتى الاحلام فيها تواريخ صلاحية..
على كده انا معظم احلامى مابقتش صالحة للاستهلاك الادمى..!!
**********************************

*امبارح كنت بكلم صحبتى على الفون وبسألها عن حالها قالتلى زهقانة وملل ماهو ده المود اللى ماشى اليومين دول
ضحكت وقلتلها اه شكله بقى موضة ...انا بقى حاسة انى بسف!
قالتلى بتسفى ازاى مش فاهمة؟
قلتلها فاكرة حلمى وهو بيقول انا بتسف يا معتز اهو انا حاسة انى بسف واللى بقوله بعيده ومن غير اجادة التكرار حتى
انا بسف بكل معنى الكلمة .....
***********************************

*كل ماحاول انسى الاقينى بفتكر اللى بحاول انساه!...مشكلة!
****************************

*نفسى افهم ليه لما حد يطلب من حد حاجة يعملها ويقوله ان شاء الله يفهم او حتى يشك انه بيسوف ومش هيعملها؟!!
الحكاية دى بتغيظنى جدا

**************************
*طبيعة شغلى مخليانى عاملة زى ام العروسة فاضية ومشغولة...
بشتغل عدد ساعات كبير ومن غير اجازات ورغم كده عندى وقت فراغ كبير بيخلينى افكر كتير....
ودى مشكلة......
محتاجة شغل تانى وقت الشغل يشغلنى..!

الاثنين، 6 فبراير 2012

يا رتنى قنفد.......



اولا بعتذر جدا عن عدم متابعتى لكتابتكم الفترة اللى فاتت بس بجد ماكنتش قادرة اقرى اى كلمة او اتقبل اى رأى .....فقلت ابعد يمكن اهدى....وبعدين زهقت.....فقلت اكتب يمكن ابقى احسن..

--------------------------------------------

لما بركز فى الناس وافعالهم وكلامهم وردود افعالهم بحتار جدا الحقيقة..
ماببقاش عارفة اتصرف ازاى اتعامل معاهم بنية صافية ولا بحذر

طب اقرب منهم واتفاعل والحياة حلوة بقى ويامحلى اللمة؟ مانا لما بعمل كده بتصدم فى تصرفاتهم وفى كدبهم ونفاقهم الغير مبرر مش بس معايا لا مع بعضهم وببقى شاهدة على ده وهطق منه 

طب ابعد واعيش فى حالى ماليش دعوة بحد وخراب يادنيا عمار يادماغى؟

حاولت اعملها بس مانفعش الدنيا بتبقى اكتر ملل من مللها الطبيعى ..ده غير انى اجتماعية بطبعى

هل اتعامل مع الناس بمبدئ كل الناس خير وبركة الى ان يثبت العكس؟طب ماهو فى كل مرة بيثبت وبطلع مغفلة من العيار التقيل..
ولا اتعامل من منطلق انهم كلهم مخادعين ونيتهم هباب وبتوع مصالحهم الى ان يثبت العكس؟
مش عارفة بس الحياة هتبقى سودا اوى فى الوقت ده

اوقات الواحد بيتخنق وبيبقى فى حاجةكاتمة على نفسه ونفسه يبوح بيها ..ياترى يبوح بيها فعلا ويشارك حد معاه همه ولا يكتم سره جواه من منطلق انه طالما انا مش قادرة اكتم سرى يبقى ازاى اطالب غيرى انه يكتمه؟

الموضوع محير وكل مابركز فيه بحتار اكتر..

من فترة قريت قصة عن مجموعة من القنافد فى ليلة من الليالى اشتد عليهم البرد جدا فقربوا من بعض اوى طلبا للدفئ فلما تلاصقت المتها اشواكها ولما بعدت عن بعض لتجنب الالم بردت تانى..فرجعت تانى تقرب وظبطت المسافات بحيث تحس بالدفا من غير الم

لفتت نظرى القصة دى جدا ..ولقتنى بردد يارتنى قنفد!

يارتنى ما ركزت كده.......

الجمعة، 3 فبراير 2012

عدى النهار



من وقت الليلة الحزينة مش عارفة انطق
ولا عارفة اتكلم ولا ارد ولااسمع كلام 
جوايا فاضى 
فاضى جدا لدرجة رهيبة
بس العجيبة بقى ان كلمات الاغنية دى واول مقطع منها تحديدا عمال يتردد فى دماغى

مش عارفة ليه