الأحد، 29 ديسمبر، 2013

مع نفسى..27







*أول ما بدأت اكتب البوست ده كان فى يوليو 2011 وكان  اسمه تخاريفى.. وفعلا حمل الاسم ده  اول وتانى بوست.. لحد ما اعترض ابو زياد وسواح فى ملك الله  ومصطفى سيف واستاذ فاروق فهمى  وقالوا ده مش تخاريف دى فضفضة.. فكرت شوية ولقيتهم عندهم حق  وعلشان كده غيرته



* وأنا بكتب البوست ده من فترة ماتخيلتش انى هحب الاسم كده وهيبقى اسم كتابى الاول



*وانا بكتب البوست ده كان مجرد فضفضة بخرج فيها أفكار خاصة بيا أنا ..ماتخيلتش فى يوم انى هعرضها على الملأ وتبقى قابلة للمناقشة والنقد او حتى الاعجاب

*وانا بكتب البوست ده ماتخيلتش انى ممكن أسيب بصمة بأى مشاركة فيه فى أفكار حد لدرجة انه ياخد جملة منهم ويعملها ستيتوس عنده.. وكأنه بيقولى عجبنى كلامك ده  أو كأنه بيقول كلامك ده بيدور فى دماغى او انتى بتتكلمى بلسانى انا

*رغم انى بحب كل جزء فى كتابى ومعتزة بيه رغم الاخطاء اللغوية الكتيرة واللى بعتذر طبعا للكل عنها وان شاء الله ماتتكررش .. لكنى بعترف ان أقرب جزء فيها ليا هو جزء مع نفسى.. رغم ان اليوميات عجبت كتير وجزء عنها عجب ناس كتير بردو
بس اليوميات دى مواقف اتولدت من واقع  ساخر .. وعنها  كلام ممكن يكون خيالى او اتولد من واقع ناس غيرى .. لكن مع نفسى دى كانت  حاجات بحبها او بكرهها او فكرت فيها.. كانت باختصار.. أنا

*مش عارفة هلاقى كلام تانى أقوله مع نفسى ولا لاء.. ماعرفش هكمل فى كتابة البوست ده ولا ال 27 هتبقى اخر مع نفسى.. حقيقى مش عارفة لكن اتمنى انها ماتخلصش 

الأربعاء، 25 ديسمبر، 2013

عنها .. 15






ويشهد الله اننى من يوم أن أحببتك  لم أتوقف عن الابتسام
أصبحت السعادة أسلوب حياة.. ولحظات الضيق أوقات وتمر وكأنها لم تكن
 

السبت، 21 ديسمبر، 2013

على الهامش .. 15








فى اشخاص ممكن نقابلهم فى حياتنا ممكن مايستمروش فيها..
بنبقى متأكدين انهم مش هيدوموا لينا..مش هيبقوا بتوعنا..
بيبقوا زى النسمة اللى بتعدى فى حياتنا فتردلنا الروح..
بيبقوا طبطبة ربنا علينا 

الأحد، 15 ديسمبر، 2013

عنها..14











اه بحب عنيك جدا..
مش بس لانهم حلويين.. دى خلقة ربنا يعنى ^_^
ولكن علشان عيون صافية.. عيون رايقة
عيون بيبان فيها حبها وغيظها وفرحها وزعلها..
علشان عيون ليها شخصية.. بتعرف توصل الرسالة اللى عاوزاها
علشان عيون حنينة.. ليها نظرة بحسها بتحضنى وبتطبطب عليها
علشان عيون ذكية .. وانا بعشق الذكاء
علشان عيون بتشوفنى بطريقة حلوة اوى.. بتخلينى بحب نفسى

بحب عنيك جدا





الأربعاء، 11 ديسمبر، 2013

عنها.. 13







سألها: هو انا بوحشك؟باجى على بالك كتير وكده؟
بصتله وابتسمت:
انت عارف انا بفكر فيك من امتى؟ مش من يوم ماعرفتك ولا من يوم مابتدت حكايتنا..لاء
انا اعرفك من يوم ما وعيت على الدنيا وعرفت ان فيها حاجة اسمها حب.. من يوم ماعرفت ان ليا نص تانى ربنا كاتبهولى فى يوم من الايام ..
واستنيتك كل  العمر ده.. كان ناقصنى بس الصورة اللى هركبها على حلمى
وقد كان
على اد الفترة اللى استنيتك فيها .. بتوحشنى
حتى وانت معايا بتوحشنى 

الجمعة، 6 ديسمبر، 2013

عنها .. 12











ومن بداية الحكاية حاولت اعمل مش فاهمة.. حاولت ابعد.. حاولت اهرب
قررت يجى 100 قرار..
خليكى قوية. ماتضعفيش .. ماتقربيش.. ماتسمعيش .. ماتحسيش ..ماتفرحيش
مافيش فايدة..
كان يكفى بس وجودك.. علشان تفشل كل المحاولات وتبوظ كل القرارت
انا فرحانة !

الخميس، 5 ديسمبر، 2013

عنها 11




اسفة

فى حياتى كلها ماتخيلتش انى ههتم بزعل حد كده .. ولا عمرى حسيت انى لما بكون سبب فى فرحة حد هبقى انجزت كده..
عمرى ما دورت على طرق علشان اصالح حد زعلته.. كنت دايما شايفة ان مجرد الاعتذار كاف..
معاك .. كل ده اختلف زى ما اختلفت حياتى كلها من يوم ما ظهرت فيها .. بقيت بحس انك طبطبة ربنا عليا.. زعلك بيوقفنى عاجزة بحس انى مش بس عاوزة اصالحك او ارسم الابتسامة الصافية تانى على ملامحك .. لاء.. مش كفاية .. انا عاوزة امحى من ذاكرتك اى لمحة حزن .. ماتفتكرهاش اساسا.. بس ياريت كان ده ممكن.. ياريتنا نقدر نمحى اخطأئنا ولا كأنها حصلت 

الثلاثاء، 3 ديسمبر، 2013

اخيييرا :D










وبعد تفكير وكتابة وبعد وقت طويييل .. اخيرا الحلم اتحقق وقبل نهاية 2013 !
وللى مايعرفش فده بالنسبالى كان مهم جدا :)

اخيرا بقى فيه كتاب الكترونى يحمل اسم اعز التدوينات لقلبى
اخيرا بقى فيه كتاب الكترونى بغلاف تصميمه شبهى :)
اخيرا بقى فيه كتاب شايل اسمى  وحبة افكار بتوعى :))

وبهذه المناسبة المزقططة السعيدة احب اشكر كل من
1/ خالد زين صاحب مدونة سواح فى ملك الله.. انت اللى طلعتها فى دماغى ياخالد من سنة ونص تقريبا
2/ دعاء العطار ... يا دودو الكتاب ده ليكى فيه زى على فكرة :)
3/ ابو زياااااد انت اللى كنت مشجعنى اعمله ورقى وكان نفسى الصراحة .. يلا الطالعة الجاية بقى  :)
4/ سهااااد .. تشجيعك ليا مالوش حل يابنتى :)

4/ محمود .. متابعتك ليا كانت دافع قوى جدا جدا على فكرة :)
5/ كل الناس اللى كانت بتعجبهم تدوينات مع نفسى .. انتم السبب فى اختيار الاسم :)

6/ ديارا المصرى مصممة الغلاف .. مطلعاه شبهى اوى ياديارا تسلم ايدك :)

7/ رشا نعمان .. مساعدتك ليا النهاردة فى رفعه على الجودريدز  بتعنيلى كتير جدا وان شاء الله بداية صداقة حلوة :)

8/ كل الناس اللى متابعنى وشايفين ان منى امل :D

 يارب ماكنش نسيت حد :)

يارب يعجبكم يارب :)

ده لينك  التحميل 


وده لينكه على الجودريدز

الجمعة، 29 نوفمبر، 2013

على الهامش ...14









عن حلمك اللى بتلاقيه مرة  واحدة قدامك بدون مقدمات.. 
فجأة بيتجسد قدامك بكل تفاصيله..
بس المشكلة انه اتكتب عليه يفضل كده ممنوع من الصرف.. 
واتكتبت عليك حيرة.. تعيشه وتفرح بيه وانت عارف ان مالوش نهاية؟ ! ولا تتفرج عليه من بعيد  بابتسامة اللى بيشبه علي حلمه 

الخميس، 21 نوفمبر، 2013

عنها... 10










عنيدة انا كثيرا.. ولكنى معك سهلة القناع !
عصبية انا سريعة الانفعال .. ولكنى معك هادئة وكأنى ذات بال خال !
قليلة الكلام انا عن ذاتى , عن مشاعرى .. لكنى معك ثرثارة احب ان احكيك عنها وكأنها حكايات اقصها عليك وبالتفاصيل !
معك.. او بك .. اكتشفنى من جديد

الأحد، 17 نوفمبر، 2013

عنها ...9







عندما اكتب عنك اختار قلم بلا ممحاه حتى لا اتراجع فى وصف احساسى..حتى لا تخوننى قواى ولا تخوننى شجاعتى.. حتى لا انكر حبى او غضبى..حتى لا اجمل كلماتى ولا انمقها..
اريد ان اكون معك بعفويتى.. دون زينة
اريد ان اكون انا..

الخميس، 7 نوفمبر، 2013

مع نفسى ... 26









فكرة الموت مش جديدة عليا .. عارفة ان فيه حاجة اسمها موت من وانا صغيرة .. اشوف الناس زعلانة وبيبكوا او لابسين اسود واسأل مالهم ترد عليا  اصل طنط فلانة او عمو فلان راح عند ربنا.. كانت الجملة شيك بس ماكنتش فاهمة هم ليه زعلانين.. عند ربنا يعنى راحو فى مكان حلو!
كبرت شوية وعرفت ان اللى بيروحوا عند ربنا دول معناها انهم ماعدوش موجودين بينا .. وان الناس بتزعل على الفراق.. وبدأت انا كمان ازعل على فراق جدى ومن بعده جدتى .. بس فضلت الفكرة عندى مش مخيفة اوى.. بنزعل وبننسى وبتفضل ذكريات حلوة 
لحد ما ربنا اختبرنى فيك انت..
ان جيت للحق فكرة ان الناس تمرض وتموت كانت واردة للكل بس ماجاش فى بالى خالص انك انت اللى يحصلك كده .. او بمعنى اصح ان انا اللى يحصلى كده فيك
كان شعرك ابيض من يوم مانا وعيت على الدنيا بسبب عامل وراثى فى العيلة عندك.. فكان بالنسبالى بابا ده مابيكبرش ..ثابت.. مافيش عوامل زمن بتأثر فيه!
كنت لما بتتألم فى ايامك الاخيرة مش بتبين.. او مش بتبين ليا انا بمعنى اصح..فكان بالنسبالى بابا ده مابيعياش او لو حصل ده مش بيتألم !
اى حاجة انت تقدر تتغلب عليها .. وبهدوءك المعروف عنك.. مافيش مشكلة مابتتحلش .. مافيش ازمة نقف قدامها..  وحتى لو ماعرفناش نقف ووقعنا .. علمتنى نبتسم ونقول مايقع الا الشاطر ونقوم ننفض هدومنا ونكمل..
وفجأة مشيت.. ماوقفتش المرة دى.. سيبتنى مع الحاجات اللى انت علمتهالى ..
اختبار صعب الحقيقة.. اتعلمت منه ليه الناس فعلا بتزعل رغم انك اكيد فى مكان احسن
بس الفراق هو المشكلة..
وحشتنى اوى
الله يرحمك

الأحد، 3 نوفمبر، 2013

على الهامش .. 11








يعتبر الفضفضة بالهموم..التعبير عن المشاعر بصدق حزن كان او فرح او حتى حب..الدموع والبكاء... تصرفات ليست بالرجولية!
ياسيدى انت فاهم الرجولة غلط !

السبت، 26 أكتوبر، 2013

مع نفسى ..... 25





عدت سنة ... زى النهاردة  من سنة وزى كل سنة اتمنيت كذا امنية وانا بطفى شمعة عيد ميلادى
بس يمكن السنة اللى فاتت اتمنيت اوى .. اتمنيت بكل ما فيا من قوة ماعرفش يمكن هما هماهم الامانى ماتغيروش بس حسيت انى نفسى يتحققوا اوى وبصراحة جالى احساس ساعتها انهم هيتحققوا جايز من كتر ماكان نفسى فى كده وجايز من منطلق انك لو امنت بحلمك اوى هيتحقق.. بس للاسف ربنا مااردش.. وبصراحة بردو  خايفة اتمناهم تانى لمايتحققوش..
بس مافيش ادامى حل تانى 
يااااااااااااااااااااااارب يتحققوا السنة دى 
يارب..
**********

زى النهاردة من سنة نويت انى اعمل حاجات معينة فى حياتى فى السنة الجديدة من عمرى اممممممم هم بالظبط 3 حاجات 
1/ اتعلم سواقة
2/اخرج الكتاب بتاعى للنور
3/اقرا كل الكتب اللى عندى على اللاب 
ماعمتلش منهم تقريبا الا حاجة واحدة.. الكتب اللى عندى على اللاب  اينعم ماخلصتهاش كلها بس تقريبا قرأت اكتر من 100 كتاب فى خلال السنة دى .. سعيدة بالانجاز ده وهتكلم فى تدوينة تانية عن اهمهم بالنسبالى..
بالنسبة للكتاب اينعم مش هعرف انزله ورقى بس نويت انزله الكترونى وبشتغل على ده حاليا
ان شاء الله هقدر اكمل باقى الكتب واتعلم السواقة :)
*********

مش عارفة انوى اعمل حاجة السنة دى ماعرفش ليه .. جايز لانى ماخلصتش حاجات السنة اللى فاتت؟!
هعتبر دى الاجابة وهخلصهم واشوف فى خلال السنة الجديدة المستجدات ان شاء الله :)

الخميس، 24 أكتوبر، 2013

على الهامش .. 11









قاعدة لازم ناخد بالنا منها .. ارصدتنا فى قلوب الناس ايا كان الناس دول مين(ماعدا الام و الاب والابناء لانها بالفطرة ) هى كأى ارصدة اخرة قابلة للنفاذ مش لازم نعتمد عليها من غير ما نزودها  علشان مانجيش فى يوم ونحتاجها ونلاقى رصيدنا نفذ

الاثنين، 21 أكتوبر، 2013

مع نفسى ... 24









النظرية بتقول.. السعادة قرار.. قرر انك تبقى سعيد هتبقى سعيد!
مش عارفة كنت الاول معترضة على ده لسببين الاول .. انى كنت حاسة ان لما تيجى فرحة او سبب للسعادة حقيقى هتلبخ ومش هعرف افرح اوى 
التانى.. انى كنت حاسة انى هبقى بكدب على نفسى.. او بمعنى الطف شوية بستعبط
 بس بما ان الحاجات المفرحة مش عاوزة تيجى .. او بتيجى وبتمشى ولا كأنها جت .. او يمكن جت وانا ما اخدتش بالى.. وحيث ان انا زهقت من عدم وجود الحاجات المفرحة..
وبما ان الكل حوليا بيستعبط ...
خلاص انا كمان هستعبط .. جايز !!
انا سعيدة :D
*************

نفسى يبقى معايا عصايا سحرية.. مش علشان اخلى العالم وردى ولا علشان السلام العالمى يعم البلاد.. لا لا ولا علشان اجيب رئيس للبلد... اى الافكار السودوية الحمصية دى !

انا لو معايا العصايا دى هبقى انانية جدا هحقق احلامى اللى واقفة مكانها .. او جايز هحرك نفسى شوية على اعتبار ان انا اللى واقفة مكانى..
 ممكن كمان ابرمجها على الكلمة السحرية اللى حفظاها من  رفعت اسماعيل ( ابرا كادبرا)
واقولها بقى لما حد يغيظنى واسلط عليه العصاية  فيختفى .. ياسلااااااااااااام
ممكن استخدم كمان نفس الكلمة مع تغيير تون الصوت لأحن شوية واخلى اى حد واحشنى يظهر ادامى فى التو واللحظة..

الخميس، 17 أكتوبر، 2013

علشان انت بنى ادم !









زهقان؟ مخنوق؟ مش لوحدك على فكرة .. مصر كلها كده مش بس علشان حال البلد  لا خالص ابسلوتلى يعنى.. ده انا حتى حاسة اننا اتعودنا على مصر كده لو رجعت لحالة الاستقرار وفى ظل ان الكورة انضربت  فهنعمل ايه ؟!
عموما هى حالة عامة وليها اسباب كتير سياسة ممكن .. حال واقف تمشى.. روتين حياة اساسى..
اللى فى ايدك مش عاجبك وكان ممكن يبقى احسن .. انت مظلوم.. انت ياعينى..
Bla..Bla..Bla

كلنا عارفين الكلام ده طالما حاملين لقب بنى ادمين..انا عن نفسى ماشفتش عصفور زهقان وسايب بيته علشان يغير جو..ولا حصان ولا حتى حمار مثلا قال لمراته تعالى ناخد اجازة من بعض علشان نجدد حياتنا الزوجية !
كل دى حاجات بتاعتنا احنا ولا ننافس فيها اى كائن اخر

السبت، 12 أكتوبر، 2013

على الهامش ... 10









كم اكره من يتعامل بقسوة مع الاخرين مبررا هذا بان فيه خيرا لهم..لا تبرير للقسوة فلا تصنعوا من انفسكم اوصياء تعرفون اين الخير..
انتم قساة القلوب وفقط.

الأربعاء، 9 أكتوبر، 2013

عن... الشيزوفرينيا











* عن الاخ اللى بيزعق لاخته علشان حبت وهو بيحب ومعرفها عليها كمان..!

* عن الاب اللى هارى نفسه سجاير وضرب ابنه اللى عنده 15 سنة علشان شم ريحه دخان منه!

*عن صاحبنا اللى متجوز من كام سنة وعنده اطفال وكاتب على اكونت الفيس !single

* عن صاحبتنا اللى عاملة اكونت على الفيس عايشه بيه حياتها واكونت لاخوها وخطيبها وباقى العيلة الكريمة!

* عن صاحبنا اللى شايل موبايليين موبايل للشغل والبيت ومبايل للحب والعواطف!

*عن صاحبنا اللى كل اسامى الناس اللى على موبايله رجاله بس لو جيت للحق مش كلهم رجاله واللى دايما  موبايله خالى من ذاكرة الاتصالات والرسايل!

* عن صاحبنا اللى بيشترط ان البنت اللى هيرتبط بيها وتشيل اسمه ماتكنش حبت قبل كده واحيانا ماتكنش حبته هو شخصيا قبل كده!

*عن صاحبتنا اللى مقطعة فروة طوب الارض وزعلت جدا لما عرفت ان صاحبتها جابوا سيرتها وهى مش موجودة!

الثلاثاء، 8 أكتوبر، 2013

على الهامش...9








فى كلمات تبان انها عكس بعض او بينها فرق كبير فى المعنى زى مثلا.. الصراحة والوقاحة ,
المجاملة والنفاق.. خفة الدم والاستظراف.. الكرامة والغرور..
 وهكذا..

الفرق كبير فى المعنى .. لكن فى التصرفات..الفرق شعرة !

الأحد، 6 أكتوبر، 2013

عنها... 8









اهو ده اللى صار وادى اللى كان...

انت ضعفت.. ماحربتش علشانى..علشانا 
استسلمت عند اول مطب.. ورفضت تحارب وحكمت على محاولتك من قبل ما تحاولها بالفشل !
قلت لنفسك ايه اسهل؟ انك تحارب افكار مجتمع..تحارب افكار اهلينا؟تقولهم انك عارف وجه اعتراضهم بس ده ولا فارق معاك؟ انك اختارت بعقلك قبل قلبك؟
لا.. ده اختيار صعب انت مش اده..
الاسهل انك تبعد..
والنكتة لما جيت وقلت انا ببعد علشانك..

وزعلان انى بقول جبان؟!

مالكش حق تلوم عليا.

السبت، 5 أكتوبر، 2013

الأربعاء، 2 أكتوبر، 2013

على الهامش...7








فى اوربا والدول المتقدمة.. الحب مالوش سن يعنى ممكن تلاقى حد عندى 10 ولا 15 سنة وبيحب .. حاسس انه متعلق بحد ..والاهل بيحترموا ده بغض النظر عن التفاصيل.. مابيقلوش له انت لسه عيل..

ممكن بردو تلاقى حد معدى الستين  ولا السبعين ولا حتى التمانين وبيحب كتوكوتة كده اده فى السن ..وبيقرروا انهم ..يكملوا حياتهم مع بعض.. يفتحوا صفحة جديدة ..
ماحدش بيقولهم عيب على شيبتكم ولا اللى ادكم يفكر فى اخرته ولا هم اصلا بيفكروا فى العمر اللى لسه مش باقى فيه اد اللى راح!
ممكن بردو ا تلاقيهم متجوزين من زمان وكبروا فى السن ولسه بيقولها بحبك من غير ماتقوله هى يا راجل احنا كبرنا على الكلام ده..
وتلاقيها هى بتقوله بحبك من غير ما يقولها اعقلى بقى يا وليا انتى احفادك قربوا يتجوزا !

الثلاثاء، 1 أكتوبر، 2013

على الهامش 6








فى الافلام الامريكانى كل الناس اصحاب البيوت الفخيمة واصحاب البيت الاوضة وصالة بيشيلوا مفتاحهم تحت الدواسة اللى ادام الباب او على عقب الباب من فوق .. او تحت الزهرية اللى محطوطة فى اي حتة ادام الباب بردو.. مش فاهمة ايه الفكرة اللى المفروض توصل هنا..
انهم عايشين فى امان ؟!... ماعندكوش حرامية؟ الحرامية بتوعكم تخصص بنوك وبيدخلوها من بلعات المجارى اللى انضف من اجدعها شوارع عندنا؟!!

ده احنا ناقص نحط بيوتنا فى قفص حديد وبردو بنتسرق!!
وبعدين هم الحرامية الامريكانى مابتفرجوش على افلام امريكانى ولا ايه ؟ 
عزيزى الحرامى الامريكانى المفتاح  فى الاماكن السابق ذكرها على فكرة .. تعامل بقى 

الجمعة، 27 سبتمبر، 2013

عن...مساحتك وحيزك من الفراغ






كل واحد فينا بيشغل مساحة وحيز معين من الفراغ .. مش بس بيشغله بجسمه .. لا
كمان بتفكيره.. كل واحد فينا بيحتاج مساحة حوالين مساحته علشان يعرف يفكر ويتصرف بحريته من غير مايعمل حساب انه هيخبط فى حد..
يلف حولين نفسه لحد مايدوخ.. يصرخ لحد ما صوته يبقى مبحوح.. يرقص .. يتجنن..
هو حر .. طالما مش بيخبط فى اللى حواليه ومراعى حدود نفسه  وحدود مساحة غيره
 الكلام ده حلو اوى بس فى الغالب نظريا .. عمليا بقى فى حاجات بتخليه صعب التنفيذ وفى بلدنا الحاجات دى  بتندرج تحت مسميات غاية فى الروعة زى الصداقة والاخوة والعيلة ومن باب ان الناس عاوزة تطمن عليك وبتحب تعرف اخبارك وهكذا..

نضرب مثال على كده مثلا المدونات..
فى ناس كتيرة عاملة المدونة  مش من باب انها  تكتب اعمالها الادبية  وخلافه..
لأ من باب الفضفضة.. انها تكتب عن اللى مزعلها عن اللى خانقها عن اللى مفرحها..
تكتب مشكلة وحابة تاخد رأى ناس ماتعرفهومش فيها .. تفضفض  بسبب زعلها من ناس ماتقدرش تقولهم انها زعلانة منهم او تتحرج تقول على سبب زعلها
يعنى تخرج مشاعر  واللى ممكن جدا ماتكنش مرتبط بحد معين اكتر منها مشاعر هى حساها فى المطلق

زى ما قلت تفضفض..
تفضفض على سبيل ان المدونة دى من ضمن مساحتها الشخصية اللى رسمتها لنفسها..
 ومن هذا المنطلق فوجئت بناس اصحابى  مخبية مدونتها عن القريبين منها..
اللى مخبى عن خطيبته واللى مخبياها عن جوزها واللى مخبياها عن ابوها او اخوها..
اللى مخبى عن زمايله فى الشغل..

مش علشان هم بيعملوا او بيكتبوا حاجة عيب.. لاء خالص ولكن علشان يقدروا يكتبوا بحرية

يقدروا يكتبوا عن الرومانسية من غير ماحد يسألهم تقصدى بالكلام ده مين انتى فى حد فى حياتك..
يكتبوا مشاعر حزينة من غير ما يجى شريك الحياه ويقولها هو انا مزعلك فى ايه انا ماعملتش اللى انتى كاتبه عنه ده ..
يكتبوا عن خنأتهم من مدير شغلهم من غير ما واحد منفسن من زمايله يديله الاسفين التمام ويروح يدى لينك مدونته بمنتهى البراءة لمدير شغله

يكتب عن حبه الاول  من غير ما خطيبته تمسك فى خناقه وتقوله انت لسه بتفكر فيها..

وهكذا..

بصراحة مش عارفة احدد ان كان ده صح ولا غلط.. انا نفسى ايام ماكنت بحكى يومياتى القريبين منى عرفوا او خمنوا هى مين طنط حشرية :)
وعرفوا كمان من مدير المستشفى ايها ;)

عموما كل واحد فينا محتاج مساحته الشخصية.. وانا شايفة انه من حقه يدافع عن حدودها  باى طريقة تناسبه وبدون احكام من الاخرين 

الأربعاء، 25 سبتمبر، 2013

على الهامش ...5









ساعات بتبقى محتاج بس طبطبة اكتر منها مساعدة او حل للمشكلة..
مجرد طبطبة تحس بيها انك مش بس نفسك اللى صعبان عليها !!

الثلاثاء، 24 سبتمبر، 2013

على الهامش...4








لازم يحطوا قانون او بند فى الدستور او اى حاجة شبه كده تمنع الناس اللى بتفتى من ممارسة هذه الهواية القاتلة..الناس اللى فاهمة نفسها عارفة فى كل حاجة.. طب شغال .. دوا ما يضرش.. قانون ودين .. الناس بتوع كله دى لازم تقف عند حدها..
الناس دى خطر على الامن العام.. وعلى اعصابى انا شخصيا !!
ومن منطلق انه من امن العقاب اساء الادب .. لازم عقاااااااب

الاثنين، 23 سبتمبر، 2013

على الهامش... 3







سمعت مرة  ان السعادة زى الفراشة .. احيانا علشان نعرف نشوفها لازم نقف ساكتين..
لو اتحركنا او حاولنا نمسكها.. هتطير!
 

السبت، 21 سبتمبر، 2013

3 سنين !








بعد فترة خمول كبيرة وقبلها فترات خمول اكبر قررت اذ فجأة انى اكتب كل يوم تدوينة(اذا قدرت) جايز علشان حسيت انى محتاجة اكتب وجايز لانى وحشنى التدوين وجايز بردو علشان استعيد نشاط دعوة التدوين اليومى اللى كانت من سنتين  واللى كنت فيها فى قمة النشاط فلك ان تتخيل انك تكتب كل يوم تدوينة ولمدة شهر ومش اى شهر ده على ما اتذكر كان شهر رمضان! وما ادراك ما انشغالة شهر رمضان..

كانت ايام حلوة وحاسة انى محتاجة الحماس ده رغم انه كان ايامها احلى .. احلى بالناس اللى شاركو فيه والله معظمهم بقوا اصحابى وكتير منهم ماشاء الله بقوا كتاب وليهم  كتب حاملة افكارهم واساميهم.. يعنى تقدروا تقولوا عليا مصاحبة ادباء :)

كانت احلى كمان لانها كانت بطعم البدايات.. البدايات فى كل شئ.. من اول الكتابة اللى كانت بالنسبالة لى  خطوة رهيبة ماكنتش متخيلة انى هقدر عليها فما بالك بالالتزام لمدة شهر 30 يوم ب 30 تدوينة الى حد ما مختلفين  وكل واحدة منهم بمشاعر مختلفة ..وحلاوة انك تشارك غيرك كمان بافكارك وفى افكارهم.. كلنا كنا بنتابع بعض وبندى اراء فى كلام بعض البسيط منه قبل  العميق

المهم..

انا حبيت استرجع  شوية من الروح الحلوة دى .. وبقالى كام يوم اهو مواظبة ويارب اقدر اكمل وبشكر جدا كل اللى مهتم وبيتابع رغم انى مش بقدم يعنى الا حاجات بسيطة  من وجهة نظرى فضفضة .. 

جيت بقى اكتب تدوينة النهاردة اللى كانت عن السعادة ! لقتنى عينى كده رايحة على التاريخ

ايه ده! احنا فى سبنمبر؟! وكمان 21 منه؟!
من 3 سنين بالظبط اتعملت المدونة دى..
يعنى مدوونتى العزيزة (جفلت) 3 سنين..
3 سنين وانا بكتب فيها  يومياتى وارائى و احاسيس  مريت بيها او مر بيها ناس قريبين منى

3 سنين متابعة لناس وهم متابعين ليا 

3 سنين... فترة بردة غيرت فيا كتير واضافت ليا كتير كتير كتير
 3 سنين اقدر اقول بكل فخر ان مدونتى دى كانت من اهم احداثها ومن اقربها لقلبى
بلف بلف وبرجع ليها تانى .. بحسها الركن بتاعى .. وان اللى بيتابعنى او بيتكرم فيها ولو بتعليق صغير  .. كانه بيزورنى فى بيتى وجاي واديه مش فاضية :)

وللعلم احساسى بيها ده  ماكبرش الا باللى شجعونى اكملها واللى ديما بيشجعنى اكتب لو لقانى  ركنت
هم عارفين نفسهم واحد واحد طبعا بس احب بردو انور بيهم البوست ده  من باب  العرفان بالجميل  
وهبتدى طبعا بعروستنا الجميلة سهاد وصديقتى الجميلة جدا والمبدعة جدا جدا دعاء العطار وطبعا خالد سواح فى ملك الله واستاذنا ابو زياد :) وتامر المغازى
واخويا وصاحب لقب اكبر متابع واكبر المشجعين محمود 
 فيى غيرهم طبعا كتير  بس يمكن دول  نقدر نسميهم رفاق الدرب لو جاز التعبير :)

الناس دى انا برغى بقالى 3 سنين وهم متابعنى  تقريبا طول الفترة دى .. ياصبركم.. ربنا معاكم الحقيقة :D

بجد..
 
شكرا لانكم هنا  


الجمعة، 20 سبتمبر، 2013

مع نفسى 23







*كتير بحس ان كلامى محتاج محامى يدافع عنه.. لما بكتب عن الحب او عن اى احساس تانى  الناس بتفتكر انى عايشة حالته.. اه صحيح ان الواحد بيعبر عن احساسه بالكلام بس مش شرط ديما يكون كده ممكن اكتب عن الحب وانا مابحبش عادى ممكن اكتب عن الخيانة او الفراق وانا ماحصليش كده المشكلة دى بدأت احس بيها لما ناس قريبين منى بدأوا يتعاملوا على اساس انى مخبية عنهم اخبارى...

حسيت وقتها انى محتاجة محامى!!

********

* انا نفسى اطير.. نفسى اطير قوى.. لما قلت كده لصاحبتى قالتلى خالى بالك لتقعى  .. 
بقيت عاوزة اضربها وقتها.. 
يابنتى يا حبيبتى الحقائق العلمية على عينى وراسى  بس لازم حبة خيال علشان حياتنا ماتبقاش زى الارض الناشفة المشققة..
وبالتالى انا عاوزة اطير واللى هيقولى حاسبى تقعى هزعله !!

**********

بما انى بحب الشيكولاتة اوى وبتحسنلى مودى بشكل خرافى .. فانا نفسى اكل شيكولاتة دلوقتى..
بس مش اى شيكولاتة لا... الشيكولاتة اللى كانت موجودة زمان دى .. اللى هى لما تيجى تفتحها تلاقى جواها ورقة صغيرة فيه حكمة  او نصيحة ليه

اهو انا عاوزة واحدة منهم دلوقتى !!
**************

سمعت مرة انك لو اتخنقت مرة واحدة كده بدون سبب يبقى فيه حاجة صغننة اوى حصلت لدرجة انك مش واخد بالك منها  وزعلتك ..عمالة انا انكش عنها ومش عارفة الاقيها..
شكلى محتاجة عدسة مكبرة!

الخميس، 19 سبتمبر، 2013

على الهامش ..... 2









هو انهى  حاله احسن ..... اللى ماعندوش ذكرايات حلوة .. ولا اللى  عنده وراحت لحالها وكل مايفتكرها يبتسم ابتسامة حزينة!!

الأربعاء، 18 سبتمبر، 2013

الخميس، 12 سبتمبر، 2013

عنها .. 7









قالتله .. انا مخنوقة اوى 
قالها .. من ايه بس !
قالتله من المجتمع.. خانقنى ومكتفنى .. مش عارفة اعمل اى حاجة.. لا عارفة اسافر فى مكان احبه وقت ما احب.. ولا عارفة اتحرك ولا حتى افكر بصوت عالى فى اى حاجة تخطر فى دماغى.. ديما فيه اصول وقواعد ونظرة ناس بتحجمنى ولازم اعمل حسابها.. نظرة بتوقفنى مكانى!!

قالها : ممكن.. انتى بنت وطبيعى فى مجتمعنا فيه قيود على البنت..  بس القيود دى مش مصدرها الناس بس.. لو عاوزة الحقيقة انتى كمان مصدر  للقيود دى.. انتى كمان هماكى نظرة الناس وبتعمللها حساب وعاوزة تكونى فى نظرهم مثال التربية الاخلاق وبمقاييسهم.. 
انت كمان من الناس..
على اد ماهم مكتفينك وبيشدوا الحبل انتى بتشدى الطرف التانى. !
 

الجمعة، 23 أغسطس، 2013

مع نفسى 22










عن فستانى وانا صغيرة واللى لسه امى محتفظة بيه لحد النهاردة وكل ماتشوفه وتبصلى وانا كبيرة كده وتبتسم

عن البوم صورى وانا صغيرة ..اللى فيه صورتين حبانى فيهم اوى صورة وانا بعيط علشان خايفة من الراجل اللى بيصورنى واللى بيعمل قرد علشان يضحكنى والصورة تطلع حلوة.. وصورة وانا مع بابا فى سبوع اختى..( كنت طفلة حلوة على فكرة)

عن البوم صور الجامعة واللى فيه اجمل شلة اصحاب ماعرفش عن كتير منهم دلوقتى حاجة 

عن الشاليموه اللى مربوطة فى بعضها واللى محتفظة بيها من ايام الجامعة وماحدش عارف انها بتاعة مى صاحبتى اللى كانت عندها هواية عمل اشكال من الشليموهات لحد ماسميناها مى شاليمو

عن اخر يوم امتحانات فى الكلية والبلطو اللى خليت كل اصحابى يمضولى عليه ويكتبولى عليه كلام للذكرى  :) 

عن حفلة التخرج والكعب اللى كانت هيتكسر وانا بستلم شهادة التخرج

عن الميدالية اللى فقدت بريقها ولسه محتفظة بيها  وكانت اول هدية عيد ميلاد من اصحابى

عن دوشة .. الدبدوب الجميل الكبير اللى استنيت حد يهدينى بيه ولما ماحدش عملها اشتريته من اول  مرتب ليا وبقى صديقى الصدوق  وكاتم اسرارى

عن اول يوم شغل ليا فى صيدلية او اول يوم شغل ليا فى المستشفى الحكومى

عن اول عريس اتقدملى ولبختى يومها ..

عن ناس كنت فاكرة انى نسيتهم للابد وتيجى حاجة تفكرنى بيهم 

عن ناس كتير كل ما افتكرهم ابتسم واقول ايييييييييه كانت ايام

عن ناس كل مافتكرهم ادمع واسكت

عن حاجات كنت فاكرة انى هعملها وماعملتش منها اى حاجة

عن كتاب اقرر انى اقراه مرة تانية والاقينى كاتبة على الهامش بتاعة اى حاجة وتعجبنى واحاول افتكر انا كتبتها ليه..

عن اجندة الاهداءات اللى لقتها فجأة وانا برتب الكومدينو بتاعى ولقيت فيها كلمات من اصحاب وزمايل ومدرسين ليا من ايام ثانوى

عن رسالة على موبايلى حلوة  ومر عليها سنين ومش عاوزة امسحها

عن ارقام على موبايلى الاقيها وانا بدور وافتكر اصحابها اللى ماتكلمناش من سنين

عن قصص حب لاصحابى كنت طرف فيها ومعظمها باظ..

عن سنين كتير بتعدى وسيبالى ذكريات 


السبت، 10 أغسطس، 2013

مع نفسى ... 21








بقالى فترة كبيرة مش مبسوطة مش عارفة علشان الروتين ولا علشان حال البلد ولا علشان الاحلام الكتير اللى متكربسة ولا بيتحقق منها حاجة ولا علشان كل ده مع بعض..
المهم انى مش مبسوطة
وبصراحة انا زهقت من الحالة دى وعاوزة اخرج منها فقررت انى اعمل حاجة تفرحنى جايز افلح..
فكرت ..فكرت.. اعمل ايه
اوك ارتب افكارى الاول واكتب الحاجات اللى بتفرحنى  واهو تبقى مرجع لما اتزنق "وانا زنقاتى كتير" ممكن ارجعله وافكر نفسى
 1/ببقى مبسوطة لما اكل شيكولاتة.. دى اول حاجة جت فى دماغى الصراحة :)

2/ لما بقعد فى موكا  واشرب بوريو من عنده وحط كذا خط تحت من عنده دى  او اخد البتاع اللى مش عارفة اسمه ده واللى بيبقى فيه ايس كريم وطالع منع اربع انواع من الشيكولاته :) وعلى فكرة لما اجى اطلبه بقوله كده ههههه

3/ اقرأ حاجة لاحمد خالد توفيق الحقيقة الراجل كلامه بيظبطنى ويسلام بقى لو حاجة فيها رفعت اسماعيل :) ولو مخنوقة اوى يا حبذا لو حاجة انا قريتها قبل كده وضامنة مفعولها زى مثلا اسطورة البيت i love it :)

4/ اكتب تدوينة من تدوينات مع نفسى  ماعرفش بحس انى بفضفض فيها 

5/ انزل اشترى لبس .. وبما انى بتخنق كتير فبشترى لبس كتير .. الحكاية دى مبوظالى مزانيتى على الاخر بس مش مشكلة  المهم انى ببقى مبسوطة

6/ اشترى رواية جديدة وتكون حلوة 

7/ اشوف فيلم اجنبى حلو والحكاية مابتخرجش عن فيلمين يا اما Definitely may be or The Holiday او حاجة لحلمى 

8/ افتكر اى ذكريات حلوة بس الحل ده مش بعتمد عليه كتير لان فى الغالب بتقفل الذكرى دى بحاجة مش حلوة او حتى بتسلمنى لذكرى مش حلوة فيعتبر ده حل مش مضمون عواقبه اوى فبلاها احسن

9/ لو كل ده  بقى مافلحش او كان حل مؤقت فكده بعرف ان مافيش حل ..غير النوووووووووووووووووم