الاثنين، 30 يونيو 2014

#المستقبل











عزيزى د/نبيل فاروق قررت منذ كام يوم كده انى اعيد قراءة سلسلة ملف المستقبل..كنت بحبها جدا وشايفة انها انجح تجربة خيال علمى اتعملت فى مصر واعتقد انها الوحيدة اصلا.. ولو عندنا حبة امكانيات كان زمنا عندنا تاريخ لابأس به فى افلام الخيال العلمى... 

لفت نظرى يادكتور انك كاتب السلسلة فى ثمانينات القرن الماضى وجعلت ابطال سلسلتك يعيشون فى القرن الواحد وعشرين فى العشرين سنة الاولى منه  فتخيلت يا دكتور انه فى عام 2015 ستتصدر مصر المشهد العلمى وسوف نمتلك جهاز مجابرات علمية .. يتنقل افراده بالسيارات الصاروخية.. وسوف يكون عندنا مايسمى بالمجمع الفضائى هذا بخلاف تكنولوجيا الاتصالات الرهيبة واعتقد ان هذا هو الشئ الوحيد الذى تقارب فيه خيالك مع واقعنا ولكننا للاسف لسنا من اخترع تلك التكنولوجيا

قراءة هذه السلسلة وقت صدورها او حتى فى التسعينات  كان ممتع  لانه خيال خصب زرع فينا امل جميل
اما قرأته الان بالنسبة لى  يجدد ذكريات الطفولة ويصنع مرارة لاننا مازلنا يا دكتور (محلك سر) لم نتقدم وعشان على تقدم الاخرين

ويجعلنى اتصور رد فعل الاجيال التى بدأت تقرأ السلسلة فى ايامنا هذه .. اعتقد ان بخلاف من سيجعبه اسلوبك الادبى ورقيه بوجه عام سيكون شعوره العام هو السخرية فنحن الان يا دكتورنا العزيز فى 2014 ولم نمتلك اى تكونولوجيا خاصة بنا ونستورد كل شئ من طعام لغذاء لدواء لالعاب كل شئ كل مايمكن ان يحتاجه او حتى لا يحتاجه الانسان نحن تستورده .. ونختار اقلهم جودة ايضا

نحتاج سلسلة خيال علمى جديدة ترفع الحد الزمنى اكثر حتى يتجدد فينا الامل فانه سوف يكون لنا اسبقية فى اى شئ فى المستقبل
 

الجمعة، 27 يونيو 2014

على الهامش..18




فى مصر.. لما حد يديلك معاد ويتأخر عليه- سواء كان معاد شغل او معاد فسحة او راندفو- ماتضايقش ولا تتنرفز وخليك كول واعرف ان ده الطبيعى
احنا بلد المواعيد المطاطة .. بلد  الوقت ابو استك!
لو قالك حد ثانية وراجعلك اعرف انهم مش اقل من ربعاية
لو قالك حد انه نص ساعة بالكتير ويبقى عندك اعرف ان فيها ساعتين
لو قالك حد انه فى طريقه ليك اهو.. اعمل حسابك انه لسه خارج من بيته 
ولو بقى حد جاى يديلك معاد  اوعى تسمحله يقولك بعد الظهر ولا العصر ولا المغرب كل معاد فيهم  هيلطعك ساعة ساعتين منتظره .. ولو بقى حد  سولت له نفسه يديك معاد بعد العشا وماحددش الساعة اوعى تستناه  حفاظا على ضغطك ووقتك واعصابك دى فيها للفجر  !!

الجمعة، 20 يونيو 2014

عنها ..27









لحظاتى بدونك هى وقت ضائع..عمر لايحتسب.. لحظات من الضياع مابين حاضر لامعنى له وعالم من الذكريات انت كل تفاصيله

الثلاثاء، 10 يونيو 2014

عنها 26





هو انت ازاى كده؟!
ازاى فيك كل الحاجات دى؟!..ازاى لقيت كل اللى كنت بحلم بيه فيك؟
ازاى حنين كده؟ ازاى تجنن كده؟
ازاى بتقسى ساعات وعنيك تطبطب؟! ازاى بتعرف تعمل ده؟
ازاى بتحس باللى فيا من غير كلام؟ ازاى بتقرا اللى جوايا من نظرة عين ؟
ازاى بتقدر تطلع الضحكة دى من جوايا ؟!! طب عارف.. انا معايا ضحكتى دى من سنين.. دى اول مرة اسمعها كده !
ازاى بتقول الكلام معايا فى نفس الوقت؟ وازاى بقيت اقول نفس الكلام معاك فى نفس ذات الوقت ؟
ازاى بقيت سبب فرحى كده؟ طب ازاى خلتنى احبك كده ؟
هو انا ممكن احبك اصلا اكتر من كده ؟