الثلاثاء، 27 مارس 2012

سمك..لبن..تمر هندى



ركزوا معايا علشان فى احتمال لا بأس به انكم تتلخبطوا او تضيعوا منى هى حبة نقط كده عملالى زحمة فى دماغى وهعرضها بنفس زحمتها........
________________
*قمنا بثورة علشان الحزب الوطنى وقادته كانوا فاكرين مصر عزبة واحنا ضيوف عليهم

*جه الجيش حما الثورة دى فنجحت بالناس وبيه
*الاخوان شموا نفسهم سياسيا وقرروا ياخدوا حقهم المهضوم بقاله سنين ويظهروا على الساحة
*الاخوان قرروا ياخدوا الساحة كلها
ا*الاخوان والجيش ايد واحدة
*الجيش طمعان فى السلطة
*الاخوان والجيش متخانقين
*الاخوان لن يدخلوا السباق على الرياسة
*الاخوان  يكتسحوا الانتخابات النقابية
* فصل ابو الفتوح من الاخوان علشان خالفهم وهيرشح نفسه للرياسة
* نجيب عصام شرف علشان ده ابن الميدان وحليف الثورة
*نمشى عصام شرف علشان ده وحش ومش عارف ياخد قرار
*الاخوان يكتسحوا الانتخابات البرلمانية
*النور يساند الاخوان
*النور على خلاف مع الاخوان
*ابو اسماعيل مرشح السلفيين ولكن السلفيين مش مرشحينه
*كمال الجنزورى بيايده الجيش والاخوان
*الاخوان مش عاوزين الجنزورى وعاوزين رئيس حكومة منهم ويا حبذا لو كان الشاطر
*الاخوان عاوزين ينزلوا مرشح للرئاسة وياحبذا لو كان الشاطر
*تفصيل قانون يعفى الشاطر من الاحكام السابقة علشان يعرف يترشح..
*الاخوان مش هينزلوا مرشح للرياسة..بس لو عمر سليمان نزل هينزلوا..
*الاخوان والسلفيين ايد واحدة
*انسحاب كل القوى السياسية من اللجنة التاسيسية للدستور ماعدا الاخوان والسلفيين
*جماعة الاخوان دى جماعة دينية وليس لها اى علاقة بحزب الحرية والعدالة السياسى دى فى طريق وده فى طريق
*المرشد العام يطلع ببيان يقول لازم حكومة الجنزورى تمشى بصفته رئيس جماعة الاخوان اللى مالهاش دعوة بالسياسة
*حزب الاغلبيه وهو الحرية والعدالة يضرب برأى الشعب اللى جابه مجلس الشعب  عرض الحائط ويمشى خطة 50%
*حزب الاغلبية وهو الحرية والعدالة يضرب بانسحاب كل الناس معاداه عرض الحائط ومصر يعقد اجتماع اللجنة بكرة......
*المرشد العام لجماعة الاخوان الدعوية اللى مالهاش علاقة بالسياسة يعقد اجتماع لمجلس شوراه علشان يحددوا هيقابلوا انسحابات الاحزاب من الجمعية ازاى واذا كانوا هينزلوا بمرشح ولا لاء واى علاقة عمر سليمان بالحدوتة.........بالمناسبة الاجتماع ده سرى!

*رأى لا بأس به شايف ان الاخوان هينزلوا فى انتخابات الرياسة لان فى احتمال لا بأس به ان طعون مجلس الشعب تتقبل ويتم حله ويبقوا كده خرجوا من االعبه البرلمانية فيلحقوا اللعبة الرئاسية

*عندما سمعت خطاب الاخوان اللى بيفكروا فيه الناس باللى عملوا فيهم عبد الناصر والجيش فى 54 ماعرفش ليه افتكرت اليهود وهم بيفكروا العالم بعمايل هتلر والهولوكست ..وماحدش يتفزلك ويقولى اذاى تجرؤى وتشبهى الاخوان باليهود ولا عبد الناصر بهتلر انا بشبه المشهد بس


                                                              والبقية تأتى...بس خلاص

الجمعة، 23 مارس 2012

مع نفسى8


حاجات صغيرة ممكن تفرحنا..حاجات ابسط مما نتخيل
حاجات من كتر ماهى صغيرة وبسيطة 
محتاجة عدسة مكبره علشان نلاقيها!
*******************

لما قريت اخر تدوينة لTimo
سألته سؤال وحساه عمال يدور ويزن فى دماغى..
 ليه كل الالوان لما هى لونها ازرق؟!!
*******************

(:(

حاسة انى بقيت عاملة كده!!
*********************

نفسى اتعلم اخبى اللى جوايا ومابينش انفعالاتى من نظراتى
مش طالبة فضايح وتسييح خالص!
*******************

يانور انتى صبورة..!!
بسمعها كتير الكلمة دى فى الفترة اللى فاتت
مدينى احساس انى شايلة جبال وانا مش حاسة!!!
******************

ساعات بيبقى نفسى اقفل موبايلى واجرب الحياة من غيره..
ياترى هتختلف؟!!!
********************
من التجربة طلعت بنتيجة
ممكن تنهى وجود ناس فى حياتك..مش لانهم مش كويسين او اذوك
لكن بس لانهم مالهومش دور فى حياتك!!!!
******************

ديما بسمع ان سر جمال المراءة فى غموضها..
وبصراحة مش عارفة ازاى بتبقى غامضة.
خمنت ان ده من خلال النظرات اللى مش مفهومه ومابتدلش على شئ او من خلال صمتها
حاولت اعمل الحاجتين من باب التجمل ..والتغيير
كل ما احاول ..احس انى بقيت اوضح..
لحد ماقربت ابقى شفافة!!!!
 

السبت، 17 مارس 2012

عن..المسبسباتى ابو عيون جريئة




انا بحب الرجل اللى بيبقى واخد باله من شكله وماعتقدش ان ده عيب فى الرجل بالعكس

المظهر الخارجى مهم جدا وبيترك انطباع لو بتعرف حد لاول مرة...
وده للرجل والمرأة ...

بس لما المرأة تاخد بالها من نفسها اكتر من االازم ده ممكن يتقبل عن الرجل
او انا اعتقد ذلك....

فاكرين اخو صحبتى اللى انا سيحتله البوست اللى فات؟
الولد ده زى اخويا الصغير وبعزه جدا وشيفاه ظالم نفسه باللى عامله فى نفسه

دخل عندى الصيدليه امبارح واخته كانت قاعدة معايا...

قعد وفى وسط ماحنا بنتكلم اخته هرجت معاه باايدها فى شعره كده
الواد كانه اتكرهب وقعد يتشال ويتحط ويقولها انتى عارفه انا بقالى اد ايه بظبط فيه..
 بينى وبينكم انا استغربت الانفعال جدا  بس اخته وضحت الموقف بان شعره من المقدسات وبانه بيقعد ساعة ممكن يظبطه ادام المرايا من جيل وخلافه!!!

ماعرفش ليه وقتها افتكرت قصة كنت قريتها ماعرفش فين عن الزعيم الراحل عبد الناصر
انه كان بيقرا فى يوم مجلة  ترفيهية وكانت عاملة مسابقة اختيار اجمل شاب صاحب اجمل عيون وكان متقدم عدد من الشباب فى الوقت ده ومنزليين صورهم..
امر عبد الناصر المخابرات وقتها بجمع كل هؤلاء الشباب وحلق شعورهم زيرو ثم تجنيدهم وارسالهم للجبهة بلا نقاش.......

افتكرت القصة دى وانا شايفة حرقة دم اخو صحبتى ولقتنى برد بصوت عالى

الله يرحمك يا ناصر..........

 

الاثنين، 12 مارس 2012

سكوووت .....هتكلم

اولا وقبل اى كلام بعتذر جدا عن تقصيرى الفظيع فى الردود الفترة الاخيرة بس انا مطحونة اخر حاجة
البنات اللى معايا فى الصيدلية جتلهم شوطة واتخطبوا مرة واحدة و"خواطيبهم " طلبوا منهم اذ فجأة يسيبوا الشغل ..وقد كان..وانا بقى قاعدة طول النهار والليل هناك وبرجع البيت مقتولة انام واصحى علشان نعيده من الاول...........فسامحونى وادعولى يا اما الاقى بنت تشتغل او اتخطب ونقفلها بقى.....



نرجع لموضوعنا

فى الفترة العصيبة السابق ذكرها وبسبب الضغط الشديد ده مابقاش فيا حيل اتكلم فبسمع اكتر
ولقد استغل مجموعة من اصحابى تلك الفترة اسوء استغلال واسمعونى وافرغوا عندى كل احزانهم ومشاكلهم ومواقفهم ..لدرجة انى قربت افرقع الحقيقة..بسمع حكايات غريبة لدرجة انى مش عارفة ارد...جايز لانى تعبانة بس الاحتمال الاكبر انه كلام مايتردش عليه فبكتفى بالاندهاش وفى الغالب اللى بيحكوا مابيبقوش طالبين اراء ..لا دول طالبين ودان بس

لكنى فرقعت وقررت انى ارد هنا..علشان اهدى وعلشان هنا هم مش هيعرفوا رائ فيهم لانهم مايعرفوش هنا اصلا.........

*بالنوسبة لصديقتى العزيزة اللى شاكة فى جوزها...ايون شكك فى محله وده من بدرى انتى لسه واخده بالك؟

*بالنوسبة لصديقتى العزيزة اللى اتصدمت انها اتفهمت غلط لما زودتها فى الهزار ..ماطبعا لازم تتفهمى غلط انا لو ماكنهم افهمك ستين غلط يعنى

*بالنوسبة لصديقتى العزيزة اللى صعبان عليها حال اللى كانت مرتبطة بيه وحاسة انه محتاجها دلوقتى..يؤسفنى اقولك انى دى تلاكيك يا هانم ...

*بالنوسبة لصديقتى الانتيم اللى حاسة ان كل الناس عنيهم عليها علشان لسه مارتبطتتش وحاسة انهم بدأوا يستقصدوها.....خدى بالك الحكاية كده هتقلب معاكى على عقدة نفسية لان ماحدش مركز معاكى اوى كده الا انتى تقريبا.. واحب ابشرك ان دى مشكلة نص بنات مصر مش انتى بس يعنى..

*بالنسبة لصديقى العزيز اللى ماعرفش ايه اللى فكره بيا الايام دى..اسعدنى سؤالك واسعدنى انك لسه فاكرنى من ايام الكلية واحب اسجل استغرابى الشديد من المكالمة اللى ماكنش ليها اى تلاتين لازمة يعنى..

*بالنسبة لاخو صديقتى العزيز..يابنى انت صعبان عليا بجد والله العظيم يعنى انت لو ركزت مع نفسك شوية وسيبتك من اجندة البنات اللى هتهبلك دى ممكن تبقى حاجة فى يوم من الايام..

*بالنسبة للاخ اللى كانت مرتبطة بيه صديقتى وحاسة انه محتاجلها "بتاعة التلاكيك لو كنتم نسيتوا" شوف البنية بتفكر ازاى ! وماتعرفش ياعينى ان نفسيتك وتغييرك ده بسبب انك بتحب صحبتها ومش عارف تعمل ايه.....بزمتك مش مكسوف من نفسك

*واخيرا فى وسط هذا الكم من العلل والحكايات الغريبة والعقليات الاغرب واللى محتاجة فرمطة من اول وجديد جاتلى هدية رائعه من حد اروع قدرت ترسم على وجهى بسمة بجد ..من كل قلبى بجد شكرا..بقولها هنا لانى يمكن ماعرفتش اقولها من اثر المفجأة بشكل يليق بالاحساس اللى سابته جوايا.....شكرا جدا جدا جدا

استريحت
  

الجمعة، 2 مارس 2012

عن..المطر



وطبعا كلامى عنه من وحى الجو الفظع اللى عيشينه اليومين دول..

المطر ديما مرتبط عندنا بالخير يمكن علشان احنا بلد زراعى ومطر يعنى ارض مروية ومحصول مزهزه..

المطر مرتبط عندنا بابواب السما المفتوحة وده بيخلينا كلنا تقريبا بنرفع اديناوندعى بكل احلامنا اثناء المطر..ويمكن النظرية المتفائلة دى هى اللى استفذت احدهم علشان يقول مقولته الشهيرة "طالما قبلت بخير المطر لازم تقبل بطينه!" اعتقد كان قصده اننا لازم نقبل بسلبيات الحاجة زى ما بنفرح باجابيتها..واعتقد معاه حق

المهم ان المطر مرتبط عندنا بالخير والرخاء ديما ..
المطر مرتبط عندنا بالغسيل..غسيل الارواح والهموم  ..والذنوب ان اقتضى الامر..ويمكن ده السبب الرئيسى  وراء خروج احدهم على غير الطبيعى والسير تحت المطر..ان سألته هيقولك انه بيحس براحة..بيحس ان المطر مش بس بيغرقه مية من برا لاء..ده بيدخل جوا نفسه وبيغسل قلبه ومشاعر وبيخفف عنه احساسه الوقتى بالالم او الحزن او اى مشاعر سلبيه عنده وقتها..ولو جينا للحق ساعات بتمنى انى امشى تحت المطر من هذا المنطلق عله يغسل بعض همومى..كمان ساعات بتمنى ان فيه ناس معينة فى حياتى تمشى تحت المطر..عله يغسل نواياهم....

المطر بيخلق حالة رومانتيكيه لاشك فيها ..ولا شك كمان اننا كلنا نفسنا نعيشها ..ولما بقول حالة رومانتيكيه فالمقصود بيها الومانسية بكل انواعها من حاله حب لحالة ذكريات الحب لحالة الشفافية المصحوبة للمطر وكانك بقين مصنوع من بلور نقى كل مشاعرك باينه للى واقف جنبك ..لو كان واقف جنبك حد..

واحد عوامل زيادة الحالة دى  اعتقد هى السينما مصرية كانت او اجنبية..مين فينا ماشفش مشهد رومانسى فى احد الافلام لما البطل يجى يصرح بحبه للبطلة وتهطل الامطار بغزارة من حيث لا تدرى!..

اعتقد ان الافلام هى سبب ترسيخ المشهد ده فى نفوسنا ومش بس كده اعتقد كمان انها ليها اليد العليا فى تجسيد المشاعر السلبية ناحية المطر..اه مشاعر سلبيه ..ماننكرش ان فى ناس بينتابها حالة اكتئاب مع المطر او مع الشتا بوجه عام..مش عارفة بسبب الجو المغيم ولا بسبب ايه المهم ان دى حالة بتيجى لكتير من الناس..وليها اصل سنيمائى كمان فالمخرجين والمؤلفيين مصرين على ربط الاحداث الكارثية فى رواياتهم من فشل وفراق وخيبة امل وخيانة بالمطر ..تلاقى البطل ماشى فى طريق لوحدة ويأتيه المطر من حيث لا يحتسب برده..واعتقد كلنا فاكرين عبدالحليم حافظ فى الخطايا وجئت لا اعلم من اين ولكنى اتيت...
الحقيقة مش عارفة احدد هل المشاهد دى هى السبب فى الاحاسيس دى  بما اننا متربيين عليها تقريبا ولا العكس  واننا مصدر ايحاء للمؤلفين علشان كده جتلهم الافكار دى..محيرانى الحكاية دى بصراحة ياترى البيضة الاول ولا الفرخة؟!

وبناء عليه فكل واحد فينا له وجهة نظره فى المطر وله احساسه الخاص جدا تجاهه ويمكن له ذكرياته وحكاياته اللى مرتبطة بيه..كل واحد فينا المطر بيأثر فيه بطريقة ما..
فسبحان الذى خلق المطروسيره لنا..