الأحد، 25 يناير، 2015

الرسالة 12 (رسايل الى مجهول)


















(12)
كتير بسمع ان حياة كل انسان ملك لشريك حياته من يوم مارتبطوا بس.. 

واللى قبله مايخصوش طالما ماتأثرش على حياتهم الجاية..

 بينى وبينك هو الكلام صح بس اوقات بحس انى نفسى احكيلك كل اللى فات..

 واوقات تانية بقول طب لو اتضايق او مثلا فضل فاكر او حتى حاسبك هتعملى ايه؟

ارجوك ماتعملش ده

الخميس، 22 يناير، 2015

عنها 37





فى لحظة ما قررت أن اكل برتقالة.. قمت ونقيت أحلى واحدة فى الطبق ومسكت السكينة وبدأت أقشرها..

اتبعت الطريقة المثلى _ان جاز التعبير_ فى تقشيرها بداية من احد اطرافها وصولا للطرف الاخر لأفاجئ بانها فاسدة.. لماذا وهى شكلها سليم؟! فتحتها  لاجد قلبها فاسد لابعد الحدود !

اتصلت بى صديقتى فى نفس اليوم وهى متوترة جدا.. زميلها بالعمل صارحها بحبه وبنيته للتقدم لاهلها ولكن عندما يحصل على عقد عمل جيد وهو يسعى لذلك..

سألتها طب وانتى فرحانة ولا زعلانة ولا مش فارقة..

قالت انا خايفة وبيدور فى دماغى مليون احتمال.. فرضا انه كان بيضحك عليا , ولا فرضا انه راح ومالقاش شغل.. طب فرضا ان جالى عريس فى الفترة دى اقبل ولا ارفض وانتظره؟!.. انا خايفة اعلق نفسى باحتمالات وانا عارفة حظى!

لا اعلم لماذا وقتها تذكرت حكاية البرتقالة الفاسدة..

وجدتنى اقول لها.. كل الاحتمالات ياصديقتى واردة..

أُقدر خوفك تماما ولكنك لن تعرفى اجابة سؤالك الا لو قررتى خوض التجربة.. لو تملككى الخوف ستبقين سالمة ولكنكى لن تعرفى ابدا..
يجب ان تقشرى البرتقالة حتى تعلمى ان كانت طيبة ام فاسدة.. او اقلعى عن اكل البرتقال

الأربعاء، 21 يناير، 2015

الرسالة 11 (رسايل الى مجهول)


















(11)
انا اه قولت انى هستناك طول العمر.. 

بس مش عاوزاك تعيش الدور .. 

ده بس كلام رومانسى اوعى تفتكر ان العمر طويل كده..

تعالى بقى

الأربعاء، 14 يناير، 2015

الرسالة 10 (رسايل الى مجهول)





















(10)
بيقولوا انى قيادية وبحب كل حاجة فى حياتى تمشى بارادتى انا ومابسمحش

 لحد يتحكم فى حياتى و...
 
احب بس اعرفك ان ده كلام فارغ..

 اه انا ممكن اعمل ده طول مانا لوحدى بس اكيد نفسى فى اللى يكون 

نصيبى انه  يكون هو صاحب الكلمة الاولى 

اى بنت مهما كانت قوية بتبقى نفسها شريك حياتها يبقى هو الاقوى ..

الخميس، 8 يناير، 2015

على الهامش.. 38











لما تلاقيها ضلمت دورلك على طاقة نور..

دورلك على حاجة بتحبها تعدلك مزاجك اللى حاجات كتير حواليك عكرته..

اقرالك كتاب حلو حتى ولو بتقراه لتانى مرة .. هيديلك فكرة جديدة او حتى يجددلك فكرة كانت جواك وتاهت فى وسط الافكار السخيفة اللى مالية دماغك واقتحمتها بدافع الظروف..

شوفلك فيلم حلو حتى ولو بتشوفه لعاشر مرة.. هيخليك تعيش لحظات حلوة تخفف شوية من سخافة يومك 

اخرج خروجة مع اصحابك واضحك والعب فيها من قلبك وانسى لساعات قليلة انك تانى يوم هتروح شغلك وتشوف رئيسك اللى نكد عليك من يومين

هات شيكولاتة حلوة واكسر الرجيم اللى ماشى عليه..

ساعد نفسك علشان ماتكتئبش..

دفى قلبك علشان البرد مايعشش..

الجمعة، 2 يناير، 2015

الرسالة 9 ( رسائل ال مجهول )






















(9)
طول عمرى نفسى حد يهدينى وردة تكون زاهية ولسه ماتفتحتش

 اوى..وياسلام بقى لو لونها احمر.. افضل ابصلها وانا مبتسمة طول الليل

  واحتفظ بيها بين صفحات اجندتى او اجمل رواياتى.. وكل ما اشوفها افتكر

 لحظة مادتهالى واحساسى بيها.. عاوزة اقولك انى جيبت الوردة دى لنفسى

 لما سيادتك اتأخرت فحاول تبتكر حاجة تانية بقى..