الأربعاء، 27 فبراير 2013

S.M.S 3








لما يبقى جواك زحمة ودوشة ساعات بيبقى مفيد انك تدخل نفسك فى زحمة اكبر..انك تعمل دوشة اكبر حواليك بس..علشان تلغوش على اللى جواك

الجمعة، 22 فبراير 2013

بعيدا عن السياسة...








ساكتة انا ومابتكلمش عن مرسى ولا عن حكومته ومش راضية اتفتح فيهم واقول يابت مش طالبة نكد..يابت مش طالبة هبل..يابت يعنى هتبقى تسمعى تصريحاتهم وكمان هتردى عليها ؟! لا لا ده كتير..وكل ماسمع حاجة بالصدفة  ولا تحصل كارثة اقول منكم لله  ..

لحد من يومين كده كان عندى مشوار فى المنصورة صحيتله على 9 كده والاقيلكم خير الله ام اجعله خير المية مقطوعة..طب انا اخرج ازاى كده استناها..بقت 11 ولسة المية مقطوعة مابدهاش بقى امرى لله لبست وخرجت على الموقف مافيش عربيات ..نستنى عربية فين وفيييييين على ما جت واحدة السواق نزل منها ولا رئيس الجمهورية وبصوت جهورى الكراسى هنحملها اربعات يا استاذة اللى عاجبه يتفضل واللى مش عاجبه طريقه اخضر مش طالبة خنقة على الصبح!!
وطبعا مش عاوزة حد فيكم يتفزلك ويقولى كنتم خدوه للقسم ولا اشتكوه لبتاع الكارته بصفته مندوب مجلس المدينة فى الموقف لانى هرد عليه واقوله العسكرى كان واقف مع السواقين مظبطينه بشاى وفطار وكان سامع السواق اللى سابنا بعد ما اعلن تهديده وراح ادى المعلوم لبتاع الكارته! 
كان الحل يا نرجع بيوتنا وفى ستين داهية مصالحنا يا كل واحد فينا يظبط 3 ركاب وزنهم مايزيدش عن 65 كيلو علشان نعرف نقعد قاعده بنت ناس..

المهم..ركبنا بطريقة سحرية ماعرفش ازاى واتحركنا للمنصورة..وصلت للمكان اللى فيه مصلحتى بعد حوار مع سواقين التاكسى اللى بيحاولوا يقلدوا تكسيات القاهرة ويرفعوا اجرتهم وناسين انهم مش فى القاهرة اصلا..
وصلت ونزلت الاسانسير وضغطت على السادس  وهووووووووووب بين التالت والرابع النور قطع 

انا اصلا مابحبش الاسانسيرات وما مبحبش الاماكن المغلقة بتخنق فيها..كان معايا طنط كده تقريا معدية ال60 الست بدات تتوتر وانا مش ناقصة ..حاولت اهديها واقولها اكيد خمس دقايق وهيرجع احنا فى محافظة كبيرة اكيد مش هعملوا هنا الاستهبال اللى بيعملوه فى البلد..
قعدنا انا وطنط فى الارض بعد اول ربع ساعة ..لحد ماسمعنا البواب بيصرخ فى حد فى الاسانسييييييييييييير...رديت انا اه ياعم احنا هنا اهو اتنين اى الموضوع؟
 ماتخافيش يا ابلة النور معاه شوية ويجى اطمنى..
طييييييب..
عدى نص ساعة ..
الراجل طلع تانى :انتم كويسييييييييين
اه عايشييين
طب بقولك ايه يا ابلة معاكم مية  واكل؟
لا يا عم ماعملناش حسابنا 
طنط: بس يابنى كلم حد انا عندى ضغط وسكر ومعاييش ميية اخد حباية الضغط حرام عليكم
ساعتها افتكرت فيلم بين السما والارض وابتسمت
 فين وفييييييين بعد ساعة وربع لقينا الاسانسير اترج وراح طالع نزلنا فى الرابع وطنط مصرة انها هتروح علشان حاسة انها هتودع..
سلمت عليها وكانت فرصة سعيدة ! وطلعت على السادس موتورجل بقى
لقيت البنت بتاعة الاستقبال سألتها على اللى كنت ريحاله قالتلى ده لسه نازل مروح من ربع ساعة
يالهوى يعنى مش راجع تانى ؟!!
لا خلاص بقى الساعة بقت 2
ياسلااااام
قضيت كام حاجة وعلى 6 كنت رايحة الموقف علشان اركب تانى ..
اخدت الكرسى الامامى كله علشان اخد راحتى واحس ببقايا ادميتى بقى وهووووب راح النور فى الموقف قاطع..
العربية اتحركت وفضل النور قاطع طوووووووووول الطريق ..الموضوع كان فى الاول هدوء لكن بعد كده بقى مخيف  وسخيف..احنا فى انهى زمن علشان تعيش بلاد كاملة ساعة واكتر فى الضلمة كده؟
يارب نوصل على خير..يارب مافيش حد يطلع علينا يثبت العربية.. يارب العربيات اللى قدمنا تقلب نور بس مش تعمينا بيه
وصلت والنور لسه قاطع
طلعت الكشاف الصينى اللى اشتريته اخر الصيف اللى فات  وشغلته
وصلت بيتنا فى الضلمة 
لقيت ماما مستنيانى وخايفة حبيبتى انتى رجعتى كده ازاى
ربنا سترها يا ماما
انا كلمت بتوع الكهربا والله يابنتى  قالولى ده عمومى
قلتلها اه شكل المحافظة كلها نورها قطع
قالتلى:كلمت بقى بتوع المية وماحدش بيرد
ليه يا ماما هى المية لسه قاطعة من الصبح؟؟؟!!!!!!!!!!!!!!!!!!!
اه يابنتى

ربنا يسلط عليك باسم يوسف يا مرسى انت وحكومتك
حسبى الله ونعم الوكيل

الاثنين، 18 فبراير 2013

عن..عنها 2








عارف..كنت زمان بخاف اعاتبك لاخسرك..
عارف..كنت بخاف اخاصمك لاماتصالحنيش واخسرك..
عارف..كنت بخاف ازعق معاك رغم انى بيبقى نفسى اصرخ فيك مش بس ازعق بس كنت بخاف اخسرك..
عارف..كنت بخاف ماردش عليك لما تتصل لانى كنت ببقى زعلانة جدا ومش طايقة لامبالاتك بس كنت بخاف تتقمص و اخسرك..
عارف..كان بيبقى نفسى الومك لانك مش مهتم واتغيرت بدون سبب حتى مش بتتصل الا لما تبقى فاضى بس  كنت بخاف اخسرك..
ماكنتش عارفة انى كده كده هخسرك..
ماكنتش عارفة انك كده كده  ومن غير كل ده كنت ناوى تخسرنى...
اااااه لو كنت اعرف...
*******************************


ملحوظة : حاجة مالهاش علاقة بالتدوينة يا جماعة ماتعرفوش لو عاوزة اغير شكل المدونة او الخلفية بحاجة غير التصميمات الثابت ممكن اعمل اى؟؟؟

الثلاثاء، 12 فبراير 2013

مع نفسى 16







الفترة اللى فاتت كان فيها حاجات حلوة وحاجات كويسة وحاجات مش ظريفة وحاجات وحشة... حاجات حاجات ..كانت فترة زحمة الحقيقة مع واحدة زى حلاتى مش واخدة على الزحمة دى  فحاسة انها مصدعانى وعاوزة اركنها على جنب واحط نقطة..ومن اول السطر
***************
انا مابحلمش..ايون لما بنام مش بحلم او علشان اكون حقانية مافتكرش انا حلمت ايه ومابعرفش ان كنت حلمت ولا لاء
وبتغاظ جدا من الناس اللى بتحكى عن الحلم بتفاصيله لا وايه بيبقوا زعلانين كماان لما يكونوا بيحلموا حلم  وحد يصحيهم قبل ما يجيبوا اخره او يعرفوا نهايته...ببقى عاوزة اقولهم ياسلااااااااااام على اساس انكم بتتفرجوا على فيلم !!

*****************
قضيت انا يوم حلو من كام يوم..اكتشفت فيه اننا مش محتاجين معجزة علشان نفرح وان زى ما ممكن حاجات صغيرة تتراكم على بعضها وتزعلنا او تضايقنا ممكن بردو حاجات اصغر منها تفرحنا وببساطة كده..
*****************
 

الخميس، 7 فبراير 2013

S.M.S 2







ماتحاولش تملا الفراغ اللى جواك بحاجة مش مناسبة..لو اصغر هتفضل محسساك انك جواك فاضى ولو اكبر هتخنقك..
استنى الحاجة المناسبة ليك انت اللى تكملك انت..ايا كانت هى ايه..

الثلاثاء، 5 فبراير 2013

عن ..الشتا






عن كوباية النيسكافيه السخنة..

عن الشرابات والجوانتيات ام الوان زاهية..

عن لبس الشتا اللى بيحسسك بالهيبة..

عن تخزين الهدوم الصيفى وتنزيل الشتوى ..

عن لمة العيلة على سرير واحد والفرجة على التليفزيون..

عن تمن الفول وتمن اللب اللى بتشتريه وانت مروح علشان السهرة تحلى..

عن شربة العدس بنكهتها الشتوية جدا..

عن ازاز الشباك اللى بيتكثف عليه البخار وبتلاقى نفسك بترسم عليه اول حرف من اللى بالى بالك..

عن ليلة راس السنة ..

عن الوقوف ورا الشباك والفرجة على المطر والدعوة المستجابة وقتها..

عن احساس الدفا بعد التكتكة..

عن الالوان اللى كل ما بتغمق كل ما بتدفيك..

عن الوضوء بمية ساقعة علشان تكسب ثواب..

عن التمشية على الكورنيش تحت المطرة الخفيفة وريحة المطر اللى بتملى بيها صدرك فى شهيق  بتحاول تحتفظ بيه جواك على اد ما تقدر..

عن الايس كريم اللى بيحلالك تشتريه فى عز البرد..

عن الكوفية اياها..

الجمعة، 1 فبراير 2013

عن مكانى اللى باظ







بحب انا جدا اتامل البحر او النيل وده على حسب مودى.. اوقات ببقى فى مود احب اشوف فيه البحر بموجه العالى وهو فى عز ثورته..وفى مود تانى بحب اشوفه وهو هادى كده وصافى ومش مزعبب
وعندى مود بحب فيه  اشوف النيل وهدوؤه وسكونه وتقله ورتابته وملله لو جازلى التعبير...انا حاليا بقى فى مود النيل...
شفت مشهد فى التليفزيون بينقل البطل  وهو واقف فى مكان على النيل فى القاهرة وقاعد على سور منخفض  كده وشه للنيل الهادى وضهره للناس والزحمهة ..ضهره للدنيا كلها..
 اتمنيت وقتها الاقى مكان زيه بس اجيب القاهرة منين انا دلوقتى؟!!
طب انا احير نفسى ليه مانا عندى نيل فى المنصورة بردو..نزلت اتمشى على المشاية وادور على المكان اياه..لقيت زيه بس للاسف...مكان مشوه

سور عالى ماينفعش يتقعد عليه..ولو قضتها واقفه هلاقى تحت نظرى زباله ..زبالة ..زباله..على طول المشاية زبالة.. مشيت على امل انى الاقى مكان خالى منها..على الفاضى !
ذنب الناس اللى رمت الزبالة ولا ذنب الحكومة اللى مابتشلش الزبالة واللى مابتمنعش رميها..البيضة الاول ولا الفرخة...مش فارقة معايا وقتها المهم ان المنظر باظ ولو غضيت النظر والشم فاستحالة هغض السمع عن اللى يمشى ويلاقى بنت واقفة لوحدها مش ماشية مع محرم او مع شلة بنات خارجين مع بعض يحموا بعض اكتر منهم يتسلوا
باظت القاعدة وباظت الواقفة واخدتها من قاصرها وحطيت نفسى فى تاكسى  مشغل نشرة الاخبار !!
وروحت ....