السبت، 25 مايو، 2013

عنها 5








فضلت قاعدة مستنياه  بعد ما جهزت كل حاجة..
عملت احلى عشا ممكن يتعمل فى بيت.. لبست فستان  رقيق جدا وكانت حريصة انه يبقى لونه ازرق زهرى..هو بيحب اللون ده..
وقفت ادام المراية  فترة طويلة  تحاول تظبط تسريحة شعرها  مرة ترفعه ..مرة تجيبه على جنب..
وبعديت افتكرت انه زمان قالها انه بيحب شعرها مفرود من غير اى حاجة فيه..
ابتسمت وسابته ..
كانت مصممة انها ترجع لحياتهم الحياة من تانى..
كانت واثقة ان لسه فيه حاجة ممكن تتعمل ..ان لسه فيه احساس ممكن يتحس
اه مش هيبقى زى اول ما اتجوزا...الحياة والروتين ليهم مفعول رهيب على كل حاجة حتى الحب..
بس اكيد محاولة الانعاش دى هتدب الحياة من تانى فى اى حاجة بينهم..
قادت الشموع واستنت لحد ماتسمع صوت مفاتيحه..
اول ماسمعتها جريت بسرعه تطفى الانوار وتشغل فيروز..انا لحبيبى ..
اول مادخل ماشفش حاجة الدنيا كانت ضلمة  مشى علشان يوصل لمفتاح النور كان هيتكعبل فى طرف السجادة..
قادت هيا النور بسرعة:سلامتك حبيبى
قالها: ايه ياستى  طافية النور ليه ..بتوفرى؟
قالتله : لا ابدا انا كنت عاملة عشا  وقلت يبقى على ضوء الشموع احلى
قالها: شموع ايه بس ..ثم انا اصلا اتعشيت مع مديرى فى الشغل وزمايلى 
قالتله: طيب مش مهم عشا انا كمان شبعانة هنسهر ونشوف اى فيلم
قالها: معلش حبيبتى والله ما اقدر انا راجع هلكااااااان وبحلم طول الطريق بالدش والسرير هموت وانام
وطبع بوسة سريعة على جبينها ودخل اودته..
هى ..قعدت على اقرب كرسى ليها وجواها سؤال واحد بس..
انا فتحت النور والله هو ليه ما شفنيش..

الجمعة، 24 مايو، 2013

ثم نسيوا !!!








ثم كانت مرة مصر
اللى شافت الف عصر
هى شمس ف كل عصر
ثم علمى ..ثم نهر
*****
ثم زعلت
ثم حزنت
ثم رااحت
ثم رجعت
*****
ثم خافت م الاعادى
ثم قالت فين ولادى؟
ثم قولنا فى فساد
فيكى ظلم للعباد
*****
ثم زاد الظلم حبة
ثم راحت المحبة
والفساد؟!!
برضه زاد..ثم زاد..ثم زاد
*****
ثم جيت للقرب طالبة
انتى كارهة ولا حابة؟
ثم حبسوا صوتنا فيكى
ثم زاد الخوف عليكى
ثم دوبنا شوق اليكى
*****
ثم قامت مرة ثورة
ثم قالوا دى مؤامرة
ثم قالوا بلدنا حرة
ثم خانوا..الف مرة
ثم قالوا ..ثم نسيوا
*****
ثم عادوا..ورجعوا نسيوا
ثم كدبوا..ثم كدبوا..ثم كدبوا
*****
ثم ننكر..ثم نرجع تانى نكدب
ثم اثبت..ثم ارجع
ثم حقك..ثم حقى
ثم فاكر؟؟ولا ناسى
ثم عقلى مش ف راسى
ثم ضاع فى الزحمة حلمى
ثم لسه عاوزها سلمى
ثم سال لوطنا دمى
ثم نسيوا..ثم نسيوا..ثم نسيوا
*****
ثم غيرة..ثم حيرة
ثم فين الحق فين؟؟
ثم قسم ثم فرق
زى نهج المعتدين
*****
ثم فوقنا
ثم روحنا
للمكان الاولانى
ثم اصبح لما كانوا
ثم نسيوا ونسيوا تانى
*****
ثم اصحى ..ثم فوق
ثم اهدى..ثم روق
ثم حط مصر فوق
مصر غالية
مصر عالية
مصر مش سلعة فى سوق
*****
ثم دمك ياشهيد
ثم نسرك ياعميد
ثم ليه قاعد مكانك؟
ثم ليه ناسى وبعيد؟
ثم ليه تكتيفه ميرى؟
ثم ليه حقى لغيرى؟
ثم ليه حالف ماردش؟
ثم نازل من جديد
*****
ثم عزمى من حديد
ثم شمسى راح تقيد
م للقناطر للصعيد
ثم حلمك هو حلمى
ثم دمك هو دمى
حتى امك هى امى
هوا ده عهد الشهيد
مصر مش دولة عبيد
*******************

الكلام ل هديل عبد السلام من كتاب شاى بالبن
حسيتها تأريخ لكل حاجة ووصلنى جدا وحبيت تبقى عندى ابصلها كل شوية
الغريب بقى انك لو قريتها من سنين هتحسها بردوا لايقة على حالنا
مش عارفة احنا اللى حالنا مابيتغيرش وبنعيش فيلم كل مانحس انه خلص يرجع يتعاد تانى؟
ولا احنا اللى مابنتعلمش من اخطائنا و...
وبننسى.....؟ 

السبت، 18 مايو، 2013

اول حب ....









سرح صديقى العزيز لدقائق ثم ارتسمت على وجهه ابتسامه ..وقال لى :
عارفة انا اول مرة حبيت ازاى ؟
قلتله: وهى دى فيها ازاى اعتقد الحب بيجى كده من غير ازاى..

صديقى: هو ممكن تقولى ان ده اللى حصل بس بطبيعة الحال انا ماكنتش فى سن يسمح بانى افكر كده..انا كنت ايامها 11 سنة كنت فى خامسة ابتدائى وهى كانت زميلتى
كانت اول حب فى حياتى..واستمر من خامسة ابتدائى لحد تاية كلية

انا: (لفت نظرى طبعا طول المدة والسن الصغيرة دى)..لا لا انا عاوزة تفاصيل  احكى..
صديق :كانت زميلتى فى المدرسة..اسمها (نوران) كنت بفضل باصصلها كتير ومركز معاها اوى لحد ما ده لفت نظر صديقى (حسام) واللى كنا بنعتبره صايع الشلة..
لقيته فى مرة سألنى انت مالك بتبص للبنت دى اوى كده ليه؟!
قتلته مش عارف ! جايز علشان شاطرة!
قالى يمكن!!
بعدها بكام يوم جدى سمحلى اخيرا اتفرج على ال TV شفت فيلم شارع الحب..
عجبتنى اوى قصة الحب اللى بين عبد الحليم وصباح..
رحت حكيت ل(حسام ) على الفيلم.. وقلتله عارف يا (حسام) انا عاوز احب (نوران)
زى ماعبد الحليم حب صباح...
قالى طب ماتحبها..
قلتله عادى كده!!
قالى اه طبعا عادى..
قلتله خلاص..انا بحبها!!
قالى شفت سهلة جدا اهى ....
قلتله اه يا اخى ده الحب ده طلع حاجة سهلة اوى...
ومن يومها وانا بحبها..كانت بلدنا الصغيرة دى كلها عارفة انى بحبها..
لدرجة ان عمى مرة قالى انا سامع انك بتحب يامفعوص انت..
قلتله مين قالك؟! 
قالى سمعت على القهوة !!!
فضلت احبها تقريبا 10 سنين..

قلتله: يااااااه وعلى كده كنتم بتتكلموا ازاى وبتتكلموا فى ايه فى السن ده؟

قالى: لا احنا ماكناش بنتكلم..  
قلتله: ازاى يعنى ..كل ده من بعيد لبعيد كده؟!
قالى: اه.. انا اصلا كنت بخاف عليها اوى..عارفة
واحنا فى ابتدائى كانت عنيا بتروح على المكان اللى هى فيه تلقائى كده..ماكنتش عارف اى الاحساس الغريب ده حتى بعد كلام (حسام) اللى حسسنى ان الحب اسهل من حقنة التطعيم
عارفة.. مرة الاستاذ ادانا واجب وكنا فى اول الترم..وانا كنت مركز معاها اوى لان هى اللى كانت قامت تشرح اللى فهمته وطبعا انا كنت مركز معاها هى فى كلامها وازاى بتنطقه وماليش دعوه باللى بتشرحه..يومها حليت الواجب ده كله غلط..وانضربت مرتين مرة علشان الواجب اتحل غلط ومرة علشان حليت حاجة غير اللى كانت مفروض نحلها اصلا :)

فضلت ال3 سنين بتوع اعدادى ماشفهاش ..لحد اخر السنة بتاعة 3 اعدادى شفتها..كانت يوم وفاة والدها...
بعدها شفتها ..كنا فى اول حصة فى درس الفرنساوى فى اولى ثانوى...يااااااه ماقولكيش..من خجلى كنت هسيب الدرس واطلع اجرى...

يومها كنت فرحان اوى ومتلخبط اوى وزعلان اوى فى نفس الوقت
قلتله: طب فرحان ومتلخبط وفهمتها ليه بقى زعلان

قالى: اصل كان عندنا يومها ماتش وانا كنت بقف جون..كنت مبهدل جدااااااا
اما هى فكان شكلها زى ماهو ..طولت بس شوية
استمرت حدوتة النظرات من غير مابنتكلم.. نظرات مفهمة اللى حوالينا كل حاجة من غير ماحد فينا حتى ينطق بحرف
كنت بغير عليها اوى..حتى من الاساتذة.. وماعرفش هى فهمت ده ازاى .. لقتها حولت كل دروسها عند مدرسات وسابت المدرسين..
كانت هى رائد الفصل وماسكة الغياب وفى يوم بتاخده فواحد من الفصل ضحكلها وانا يومها زعلت جدا.. سابت الغياب تانى يوم علشان انا مازعلش

كانت بتتكسف لما تشوفنى اوى وتحاول تستخبى منى ..
كان وشها بيحمر جداااااا ..كانت جميلة اوى
مش بس شكلا...كانت جميلة فى كل حاجة..
كان حبنا زى ماقولتلك باين لك الناس من خجلنا ده..واللى فضحنا اكتر استاذة عندنا 
كانت قريبة منى وحكتلها..وسبحان اللى تانى يوم لقيت  هيئة المدرسين كلها عارفة...

يعنى مثلا فوجئت ب(ابلة مها) بتاعة الفزياء مرة وانا معدى من قدام فصلها بتقولى احسب الازاحة ما بين فصل 1_7 و 1_5   عند الحركة التى يحدثها (مصطفى ) - ده صديقى-
طول ماهو عمال يطنط قدام الفصل...!!!!

مرة  (نوران) كانت بتعمل بطاطس وصابعها اتعور وجت وهى ربطاه
قلتله:طب وانت عرفت ازاى انها كانت بتعمل بطاطس؟!!! انت بتخم يا (مصطفى) انتم كنتم بتتكلموا

هو: ضحك وقالى لو صبر القاتل على المقتول..
انا كنت رايح اجيب الغياب من فصلهم وكانت عليهم(ابلة منى) ودى رويتر اللى فضحتنا بالمناسبة.. قالتلى ينفع كده ياعم الفرعون العاشق الست كليوباترا بتاعتك قطعت صوابعها علشان تعملك بطاطس..
قلتلها بطاطس ايه؟؟ قالتلها ارفعى ايدك يا (نوران ) وشفت اديها يومها وهى مربوطة..

مرة تانية كنا فى درس الفرنساوى والابلة سألتها بخبث الا (مصطفى) محترم كده على طول يا (نوران) طبعا البنات اتهامزوا والغمزات اشتغلت ..والله يسهلوا طلعت ماتعرفيش منين..
كنت الولد الوحيد طبعا فى المجموعة طبعا بعد محايلات..
 كانت (نوران) ترد وتقول اه محترم بصوت نحسى انها هيغمى عليها من الكسوف اصلا..

فالابلة تقولها يعنى نجوزهولك؟

(نوران) يومها ردت رد استفزنى اوى.. احنا اصلا لسه صغيرين مافيش كلام من ده..

يومها انا اتغظت جدا..بس الابلة ماسكتتش قالتلها طيب لما تكبروا ياستى ؟

راحت (نوران ) مجاوبة اجمل اجابة فى الدنيا
((((اصلا هو جدع))))
ياااااااااااااه على ده احساس

وفضلت احبها من بعيد لبعيد كده..كنت بروح المدرسة مخصوص علشان اشوفها..ولما مش بلاقيها كنت بنط من على السور واروح اذاكر..
 كانت بتنور المدرسة بضحكتها وبكسوفها.. كنت بروح الدرس اللى بتكون فيه بغض النظر عن كفاءة المدرس..
لحد ماجت الكلية..واتفرقنا..

ماشفتهاش سنتين..
 شفتها بعدها مرة فى القطر..قلت لنفسى بس هى دى فرصتى..
رحت قعدت جنبها لحد مواصنا بلدنا..تقريبا نص ساعة..
فضلت احاول انطق طول الفترة دى..مش فاهم لحد دلوقتى لسانى اتخرس ليه؟!!!!

عدا على ده حوالى 6 او 7 شهور..
 ماشفتهاش ولا اعرف عنها اى حاجة طول السنتين دول..

ساعات بقول لنفسى حدوتة وانتهت ..بس مش عارف انساها.!!
بس.

قلتله: بس ايه؟! خلصت كده؟! طب ماتحاول تكلمها..
قالى: هكلمها فين هى خلصت وانا لسه بدرس..ثم تفتكرى لو جاتلى الجرأة وكلمتها الحكاية دى ممكن تكمل؟

********************

لحد هنا خلصت الحدوتة..وبصراحة ماعرفتش انصح صديقى بايه؟..هل يكلمها ويحط نهاية لحكايته دى..بغض النظر هلى هى لسه على مشاعرها ولا الايام والبعد غيرها؟
بغض النظر هيرتبطوا فعلا ولا الظروف مش هتسمح؟
ولا يسكت ويخليها ذكرى جميلة فى البوم ذكرياته..كل مايفتكرها عنيه تلمع نفس اللمعة اللى كان بيحكيها بيها؟؟؟
ديما بتحيرنى النهايات المفتوحة...

**************************************

القصة اهداء لصاحبها..دونتها علشان وصلنى احساسه بيها جدا وغيرت اسامى الابطال كلها علشان التسييح :)     


           

الأحد، 12 مايو، 2013

عنها..4









قالت له : انا دلوقتى نفسى ابقى ام اكتر بكتير من انى احب واتجوز اللى بحبه!!
حتى انى بحس ساعات انى ممكن اتجوز  علشان السبب ده...

قال لها باستغراب واستنكار شديد: انتى اتجننتى؟!!هى دى فكرتك عن الزواج الناجح..ده مش سبب نهائى انك تربطى حياتك ببنى ادم طول عمرك..

قالت له : اصلك مش فاهم..دى مشكلة اللى اتأجلت احلامه فى فتره محدده من حياته  علشان تحتل فترة تانية ليها احلامها..فى زحمة وكومة من الاحلام الغير محققة..
والاولويات اصبحت مختلفة.....