السبت، 25 مايو 2013

عنها 5








فضلت قاعدة مستنياه  بعد ما جهزت كل حاجة..
عملت احلى عشا ممكن يتعمل فى بيت.. لبست فستان  رقيق جدا وكانت حريصة انه يبقى لونه ازرق زهرى..هو بيحب اللون ده..
وقفت ادام المراية  فترة طويلة  تحاول تظبط تسريحة شعرها  مرة ترفعه ..مرة تجيبه على جنب..
وبعديت افتكرت انه زمان قالها انه بيحب شعرها مفرود من غير اى حاجة فيه..
ابتسمت وسابته ..
كانت مصممة انها ترجع لحياتهم الحياة من تانى..
كانت واثقة ان لسه فيه حاجة ممكن تتعمل ..ان لسه فيه احساس ممكن يتحس
اه مش هيبقى زى اول ما اتجوزا...الحياة والروتين ليهم مفعول رهيب على كل حاجة حتى الحب..
بس اكيد محاولة الانعاش دى هتدب الحياة من تانى فى اى حاجة بينهم..
قادت الشموع واستنت لحد ماتسمع صوت مفاتيحه..
اول ماسمعتها جريت بسرعه تطفى الانوار وتشغل فيروز..انا لحبيبى ..
اول مادخل ماشفش حاجة الدنيا كانت ضلمة  مشى علشان يوصل لمفتاح النور كان هيتكعبل فى طرف السجادة..
قادت هيا النور بسرعة:سلامتك حبيبى
قالها: ايه ياستى  طافية النور ليه ..بتوفرى؟
قالتله : لا ابدا انا كنت عاملة عشا  وقلت يبقى على ضوء الشموع احلى
قالها: شموع ايه بس ..ثم انا اصلا اتعشيت مع مديرى فى الشغل وزمايلى 
قالتله: طيب مش مهم عشا انا كمان شبعانة هنسهر ونشوف اى فيلم
قالها: معلش حبيبتى والله ما اقدر انا راجع هلكااااااان وبحلم طول الطريق بالدش والسرير هموت وانام
وطبع بوسة سريعة على جبينها ودخل اودته..
هى ..قعدت على اقرب كرسى ليها وجواها سؤال واحد بس..
انا فتحت النور والله هو ليه ما شفنيش..

هناك 9 تعليقات:

Do3aa El_attar يقول...

الإجابة بسيطة

عشان سيادته أعمى :D

AhMeD RaDy يقول...

مش هقدر اقول انه اعمى زى دعاء .. بس المفروض تكون اختارت الوقت الصح اللى تعمل فيه كدا يوم اجازة مثلا .. دامهما جدا ..وعلى فكرة الانسانة اللى بتفكر كدا ... تاج يتشال على الراس ..

Unknown يقول...

شافها بس إستعبط عشان عايز ينام
بكره تندم يا جميل :)

سواح في ملك اللــــــــــــــــــه- يقول...

كثيرا من النساء لايخترن الوقت الملائم

وكثيرا من الرجال مايكون الزواج لديهم هو اخر محطات رحلة الحب

سواح في ملك اللــــــــــــــــــه- يقول...

كثيرا من النساء لايخترن الوقت الملائم

وكثيرا من الرجال مايكون الزواج لديهم هو اخر محطات رحلة الحب

افكار مبعثرة يقول...

يا نهاري على خيبة الامل
تصدقي اتغظت منه
بس نموذج واقعي و موجود اوي
يبقى يقابلها بقا لو عملت كده تاني
ههههه
تحياتي

أسماء فتحي يقول...

بتحصل كتييير يا شرين ده حال الشعب المصري
بس هى ممكن تكون اختارت فعلا وقت مش مناسب والأكيد ان الراجل المصري بقى مطحون في دايرة الشغل يصحى يروح شغله يرجع ياكل وينام ده غير ان الرجاله بطبعه مش رومانسيين يعنى الشموع واللبس والدلع مش اساسي بالنسبه لهم اتنى اكليه وجهزى الاكل وسيبيه ينام وانتى تبقى لووووز على الاخر وياسلام بقى لو مطلبتيش فلوس خالص تبقى شمعه فله منوره :)

تحياتى
كانت هنا ورحلت
Asmaa Fathy

جميله المصرى يقول...

حاجه تخنق جدااااااااااا

الاحساس نعمه

كتير رجاله كده مش بيفكروا غير فى نفسهم وبس

reemaas يقول...

الحلو بقى فى ردودكم ان كل البنات شايفينه اعمى
وكل الولاد شايفينه غلط وهى اختارات توقيت غلط
لو عاوزين رأى انتم الاتنين صح
ولو قريتم الرجال من المريخ والنساء من الزهرة هتلاقوا الحل