الأحد، 2 يونيو، 2013

عن ...ايه مواصفات فتى وفتاة احلامك؟




هو: عاوزها بيضا وحلوة ... مزة يعنى لو صح التعبير 
هى: عاوزاه واد حليوة ويا حبذا لو كان شبه مهند او حتى كريم
***

هو: عاوزها بنت مثقفة يعرف يتكلم معاها فى اى موضوع ويحس انها فاهمة
هى: عاوزاه بيعرف يختار لبسه وكلامه علشان تتباها بيه ادام عيلتها
***
هو: عاوزها من عيلة غنية وهتورث بعد عمر طال وياحبذا لو قصر 
هى: عاوزاه غنى يعرف يعيشها فى نفس مستواها او اعلى من مستواها حتى لو كانت بدون اى مستوى المهم يبقى غنى يجيبلها كل اللى بتحلم بيه يكون عنده بيت مستقل  وعربيه

***
هو: عاوزها حنينة طيبة ترعى بيته زى امه, بتطبخ زى امه, ست بيت زى امه
هى: عاوزاه بيصرف زى جوز بنت خالتها, حنين زى جوز اختها, طموح زى جوز صاحبتها
***

هو: عاوزاها بمية راجل تاخد بالها من البيت والعيال فى وقت انشغاله
هى: عاوزاه راجل يعتمد عليه يشيل همها اللى تعبت من كتر شيله لوحدها
***
هو: عاوزها هادية مش بتحب  الاختلاط ولا الظهور 
هى: عاوزاه بيحب التنطيط والسفر والجرى اللى مش عارفة تعمله طول ماهى فى بيت اهلها

***
هو: عاوزها تبقى شخصية قوية  ومتعلمة ومتدينة وطموحة..علشان تعرف تربى عياله على كده وتساعده انه ينجح
هى: عاوزاه شخص قوى ومتعلم وطموح علشان يساعدها انها تنجح اكتر ويشجعها تكمل احلامها
***
هو: عاوزها بنت حلوة اوى جميلة اوى بجسم فرنساوى علشان يفرح بيها ويجيب عيال قمرات زيها
هى: مش ناوية تخلف اول ماتتجوز وتلخم نفسها بعيال وتوظ شكل جسمها لسه بدرى
***
هو: عاوزها تبقى حلوة وصغيره ماتزيدش عن 22 سواء كان سنه 25 او حتى 35
هى: عاوزاه راجل يكون دكتور  هى مش اقل من بنات خالها اللى واخدين داكتره
***
هو: عاوزها متوسطة فى كل حاجة وراضى باى حاجة بس اهم شئ تكون رفيعة وتفضل كده هو بيكره التخن
هى: من غير شنب  ومن غير كرش ورومانسى ويفتكر كل الاعياد والمناسبات فى حياتهم
***
هو: عاوزها تكون خام بدون تجارب ويكون اول حب فى حياتها ماعندوش ثقة فى البنات من كتر ما صاحب
هى: عاوزاه راجل يعرف يعبر عن حبه مايبقاش خام ويتعلم فيها عاوزاه يعرف يهتم بيها ويلغى كل اللى قبله واللى طبعا مش هتجيبله سيرتهم
************************************

حاجات كتيرة وممكن تكون غريبة بيحلم بيها كل واحد فى التانى..بقدرالامكان بيحاول يلاقيها
ممكن تبقى غلط من وجهة نظرك.. بس اكيد هى صح من وجهة نظره ومش هيكتشف انها صح او غلط الا لو لاقاها وجرب يتعايش معاها..وبنى حياته عليها..
ممكن كمان مايلاقهاش وتخليه ظروف الحياه ينساها ويتعايش مع واقعه او يحاول يغير واقعه لحد مايبقى شبهها..
ايا كان الحال..للكل حق الحلم ولكل الاطراف الاخرى حق رفض مشاركته فيه ولكن لا يحق لحد تتفيه حلم حد

هناك 8 تعليقات:

mahmoud khalaf يقول...

هو: عاوزها هادية مش بتحب الاختلاط ولا الظهور

هو: عاوزها متوسطة فى كل حاجة وراضى باى حاجة بس اهم شئ تكون رفيعة وتفضل كده هو بيكره التخن

بيتهيألى ده كلام حد أنا عارفه صح؟

Gamal Abu El-ezz يقول...

تعرفى الى يجمع كل الصات الى الطرفين بيحبواها ايه

هو : إظفر بذات الدين تربت يداك
هى : من جائكم ترضون دينه فزوجوه

أظن مفيش أبلغ من الطلبين دول


شكرا لكى على هذا العرض الجميل

ابراهيم رزق يقول...

بصى يا نووووووووووووووووووووور

من حق الكل الحلم
و من حق الكل وضع شروط

و لكن اذا جاء النصيب
انحنى الجميع له

تحياتى

E73 يقول...

صح يا ريمى

سبحان الله مقالك دا جايلي في يوم حلمت فيه بحلم غرييييييب جدااااااا معكر مزاجي جداااااا

عارفة ماسورة العرسان لما تفتح مع بعضها وفجأة برضه بدون مقدمات تقفل مع بعضها

بتحصل كتير

بس متخيلتش انها تجيلي كمان في الحلم >_<

بتكون فترة عصيبة أساسًا وشدة أعصاب وحاجة مملة

اللهم اصلحنا وارزقنا الصالحين الذين ترضاهم لنا

reemaas يقول...

ابراهيم رزق

ماهو السؤال اللى هيطرح نفسه هنا اييييييييييييش عرفنا ان ده البيه النصيب بقى

reemaas يقول...

E73 ي

عارفاها انا الفترة دى فى الغالب كلهم بيترفضوا :)

reemaas يقول...

mahmoud khalaf

ههههههههههههه واحد منهم

reemaas يقول...

mahmoud khalaf

شوف هى بسيطة ازاى بس اللى بتقوله بقى صعععععب جدا يتعرف الايام دى