الخميس، 6 يونيو، 2013

مع نفسى 17






ملاحظة فى الناس حاجة غريبة اوى..لما مابيعرفوش اخبارك سواء انت مخبيها او ماعندكش اخبار اصلا تستاهل حد يعرفها بيألفوا.. اه والله بيألفوا اخبار عنك  تبدأ بالمقولة الشهيرة تلاقيها مشغولة فى كذا او عندها جديد كذا..ثم بتختفى كلمة تلاقيها الافتراضية وتصبح واقع وانت اللى مخبيه!
******

اوقات كتير بنصدق الكدب اللى بيتكدب علينا مش علشان احنا هبل لاء ابسلوتلى..بس علشان مابنتخيلش ان فى حد قادر يكدب متقن اوى كده!

******

اوقات كتير بيبقى فيه رسايل بين السطور بنعمل مش شايفنها علشان مانتوجعش او مايخلصش الحلم اللى عايشينه..الغريب بقى انها لما بتظهر او بتبقى علنية كده وواضحة زى الشمس بنتصدم ونزعل وكأننا ماكناش عارفين!
*****
رغم انى خلصت مذاكرة ودراسة من زمان بس ديما عندى احساس ان عندى امتحان ومش مذكراله كويس ومش داخله بكل المنهج..لدرجة انى بحلم بده !
 

هناك 10 تعليقات:

mahmoud khalaf يقول...

طب خدى بالك الامتحانات السنة دى كلها صعبة يعنى ذاكرى كويس
ههههههه

زينب علي يقول...

لما بيخلينا نصدق الكدب بتاعهم علينا او حتى نشك بنفسها ونستجوبا لنكون مش فاهميها ... هو قمة ثقتهم باللي يقولوه ولو كان الواقع بيشير للعكس ... المهم ان كلامهم بس هو الصح!

---

يمكن مناخدش بالنا لاننا مش متوقعين كدا او نكون حابين نكمل الحلم ونكدب على نفسنا!!

اللي بيألم ان بعد كدا نبقى شكاكين اوي فكل حاجة للأسف ولا نعرف نرتاح بواقع ولا سطور ...

Gamal Abu El-ezz يقول...

تصدقى لو قولتلك انى لسه متعرض لكدبه النهارده لكن مش عارف مين مصدرها

مفروض إننا منتكلمش فى حق حد ولا نفترض عليه اشياء سواء هتتحول لحقيقه أو هتفضل افتراض

لكن للأسف بقت طبع فى المصرين

Casper يقول...

انا متفق جدا مع المثل القائل " اللى ميعرفش يقول عدس" عشان كده غيرنا بيحاول يألف اخبار لدرجة ان احنا كمان بنصدقها

E73 يقول...

بالنسبة للأولى عاوزة اقولك ان فعلا دا بيحصل لدرجة ان حد "من العيلة" بيقول لمراته وانا قاعدة معاهم "مش تباركيلها!!" هي سألته على ايه؟ وأنا نفسي كنت مستغربة ومنتظرة اسمع اجابة السؤال

هو بيقولها مش هي اتخطبت

>_< الكلام دا بيقوله قدامي وانا قاعدة معاهم

قلتله يا عمو محصلش

قالي مش كان فيه موضوع؟ قلتله لأ مكنش فيه حاجة أصلا

بيقولي أصل اللي بيتخطبو بيبان عليهم

فانا كررت تاني انه محصلش وزوجته حاولت تكسر حرج الموقف وقالتلي فال خير قلتلها ان شاء الله

دا بالنسبة للأولى اما التانية ففعلا بتحصل

التالتة كمان بتحصل والأمر بقى بعد الصدمة دي ترجعي تقولي طيب وماله وتلتمسي اعذار برضه >_<

بالنسبة للرابعة عايزة اقولك انا برضه بيحصل معايا كدا لدرجة اني بنام وبحلم بامتحانات الاعدادية تخيلي!!

يعني لا الثانوية ولا الجامعة ولا الدبلومة أبسلوتلي :D لأ وايه امتحان الدرس كمان مش آخر السنة

افكار مبعثرة يقول...

ازاي قدرتي توصفي حاجات حاساها و اوي كمان كده؟
اول جزء ده بالذات انا نفسي اما بسمع حد بيقول اخباري المتالفة بفتح بقي من الدهشة و اقول لا والله مش تقولولي طيب عشان اعمل حسابي هههههه
و الجزء بتاع بين السطور مش عارفة ليه الصراحة بتصدم رغم اني ببقا عارفة و حاسة و عاملة مش واخدة بالي معرفش الصدمة عشان الحقيقة اللي بهرب منها جت بسرعة ولا عشان من كتر ما بهرب من الحقيقة صدقت انها مش موجودة اصلا
كله كوم بقا و موضوع الامتحان ده كوم تاني انا ساعات بقوم مفزوعة من النوم لاني قعدت اجري ف الحلم عشان الحق الامتحان و ملحقتوش ف الاخر و بقوم مقهورة تخيلي :))))
تحياتي

أم .. بوبة " يوميات فرن بالكهربا " يقول...

أنا مخلصة تعليم من حوالى 10 سنين ولسه بحلم بنفس الحلم ده ,, مع الفيزيا فى ثانوى .. والإيطالى فى الكلية ,, دايما بيجلى الإمتحان فى المادتين دول :)

غير معرف يقول...

متهتميش بالناس لو اهتميتى بالناس وكلامهم هتنسى اى خير بتعملية
ووووووووووووووووووووووووووووووو
اما الامتحانات دى هههههههههههههههه كتير بحلم امى دخلت امتحان ومرة بحل ومرة لا ربك يسترها الحلم الجاى يكون الامتحان سهل عشان بصحا متازمة خالص هههههههههههههههه

الازهرى يقول...

وأحيانا
بنصدق الكدب

ونفضله عن الصدق
علشان مش قادريين نعيش معاه

تحياتى دوما

doaa elattar يقول...

نووووري

" تبدأ بالمقولة الشهيرة تلاقيها مشغولة فى كذا او عندها جديد كذا..ثم بتختفى كلمة تلاقيها الافتراضية وتصبح واقع وانت اللى مخبيه!"

ههههههههه ضحكتيني يانور وهكذا تكون الإشاعات

ـــــــ

"اوقات كتير بنصدق الكدب اللى بيتكدب علينا مش علشان احنا هبل لاء ابسلوتلى..بس علشان مابنتخيلش ان فى حد قادر يكدب متقن اوى كده!"

إحنا مش بنصدق تؤ إحنا بنندهش انت ازاي مصدق نفسك كده ؟

ـــــــــــــ
"الغريب بقى انها لما بتظهر او بتبقى علنية كده وواضحة زى الشمس بنتصدم ونزعل وكأننا ماكناش عارفين!"

آه يانووور .. لأننا مش عايزين نعرف أو عارفين وبنستهبل .. بس لما تبقى علنية بتبقى عاملة زي حد ضربك قلم انتي كنتي متوقعاه ومع ذلك وجعك

ـــــــــــــ

"رغم انى خلصت مذاكرة ودراسة من زمان بس ديما عندى احساس ان عندى امتحان ومش مذكراله كويس ومش داخله بكل المنهج..لدرجة انى بحلم بده !"

هههههههههههه حبيبتي يانور .. ده إحساسي الدائم وبرضه بحلم بيه زيك .. الله يخرب بيت التعليم اللي ربى لنا الرعب :D