الثلاثاء، 31 مايو 2011

كبريائى

ده او بوست ليا فى حملة التدوين كل يوم طول شهر 6 تفتكروا هقدر اكمل؟
                                      هنشوف........


                                          كبريائى
                                     _________

قابلها صدفة بعد ان تركها طويلا.........

قال:  اعذرينى لقد اصبح لى حبيبة اخرى وقلبا اخر ومستقبلا اخر
             فماذا عن حياتك انتى؟

          فأغمضت عيناها حتى تخفى دموعها ومر شريط ذكرياتهم سويا امام عينيها
          تذكرت كيف كانت بجانبه لحظة بلحظة بأوقات حزنه قبل فرحه
          بلحظات يأسه قبل نجاحه
          كيف رفضت كل رجال  العالم من اجل ان تظل معه.......ومازالت تعشقه بصدق

         استجمعت قواها وقررت الحفاظ على بقايا كبريائها ونظرت اليه بكل ابتسامة

وقالت: اعذرنى سيدى وهل اعرفك؟؟!!!!

الاثنين، 30 مايو 2011

سؤالى




بما انى قاعدة زهقانة ففكرت انقل فكرة الاستفتاء اللى بنعملها عندنا فى الجروب هنا هتبقى على هيئة سؤال هطرحه وعليكم بقى تجاوبوا ونناقش اهو نتعرف على اراء بعض ويبقى فى ترابط بين المدونات

السؤال هيتم تمريره بمعنى بعد ماتقول سؤالك فى اى مجال تحبه سواء سياسه او امور حياتية  هتقول مين اللى حابب يسأل بعدك وممكن ترج السؤال لحد سال عادى يعنى

                                                    سؤالى
                                              ____________
هل انت مع بناء الكنائس امام المساجد ولا ضد ده؟ هل شايف ان ده بيقرب الناس من بعضها ولا بيقلل من حرية العبادة؟

السؤال نمرره لخالد صاحب مدونة سواح فى ملك الله ولشرين صاحبة مدونة حدوتة مصرية

الأربعاء، 25 مايو 2011

خلاااص .......انا هعترف

                       

                                        انا بكره جواز الصلونات

ايون ده اعترافى اللى بعد صمت طويل ومحاولات عديدة للتجمل ولان عيب البنوتة تقول كده......بس خلاص ماعنتش قادرة بجد ياجماعة انا بكرهه

مع احترامى لكل التجارب اللى نجحت بيه واللى بجد مش عارفة ازاى نجحوا

مع احترامى لكل الابهات والامهات اللى ماعندهومش الا كلمة واحدة"ماكلنا اتجوزنا كده"

مع احترامى لكل ده ورغم كل ده بكرررررررررررررهه

بعد تجارب عديدة حصلت معايا ومع مقربيين منى بقيت بكره كل تفصيلة فيه

بكره لما واحدة سمتها غادة عبد العال فى مدونة عاوزة اتجوز طنط حشرية واعتقد ان فى حياة كل بنت مننا طنط حشرية ومش بعيد بقت فى حياة الولاد كمان بكره لما تيجى او تتصل طنط حشرية بتاعتى وتقولى اخبارك ايه استعدى يا عروستنا جيبالك عريس

بكره لما البيه اللى بلغ من العمر جايز ال30 يبعت مامته او اخته الكبيرة تعاين العروسة فى الصيدلية وتديله رائيها لو اوك يجى الافندى ويشوفها لو مش اوك يبقى علبة مناديل اشتريناها ومش هتخسر

بكره لما البيه يتكرم وينزل يدور بنفسه ويقلوله فيه صيدلانية كويسه فى الصيدلية الفلانية يروح ويشوف ويقعدوا ومايحصلش نصيب اوم ايييييييه اوم يروح لصيدلانية اللى فى الصيدلية اللى جنبها ويسمعها نفس الاسطوانة !!!!!!!!!!
 وكأنه داخل محل ملابس جاهز بيقيس وينقى.....
وكأنه ماجاش على باله ان الاتنين ممكن يكونوا اصحاب وقعدين فطسنين على نفسهم من الضحك عليه

بكره قعدة الصلون وصنية الحاجة الساقعه اللى زهقت منها بجد

بكره القاعدة والاسئلة المحفوظة اللى كلهم تقريبا مسمعنها لبعض او فى كتالوج نازل بيها  بيتحفظ

بكره بعد العريس مايمشى ورغم انى اوقات ببقى ملانة ومافيش كلام يقوله بس بجد ببقى مش عاوزاه يمشى اوقات لانه اول مايخرج هتسأل السؤال الغريب ها موافقة ولا لاء؟

وكأن الموافقة ولا الرفض دول حاجة سهلة

بكره لما واحدة تدخل عندى وتقولى فى عريس وبيدور على عروسة وشارط انها تكون صيدلانية

ممكن حد يقولى هو شارط ده ليه؟؟؟؟؟؟؟؟؟؟

فاكرين مسلسل عاوزة اتجوز؟ كان مبالغ فيه صح؟ بس وربنا انا لو حكيتلكم على اللى بشوفه هتعرفوا ان  ده حاجة بسيطة خاااااااااااااااااااااالص


يعنى مثلا اى النظرية لما طنط حشرية تيجى تقولى انا جيبالك عريس فلة يعنى وبيصلى كمان ده على اساس ان الل بيصلوا دول عملة نادرة يعنى وان الصلاة دى مش واجب عليه وانه بيعملها تطوع مثلا

يعنى مثلا اى النظرية ان المحروس لما يقعد اول قعدة المفروض تبع قوانين جواز الصلونات بنكون فيها فكرة عن بعض يقولى انا سالت على مرتبك وعرفت انك بتاخدى كذا

يعنى مثلا اى النظرية ان الافندى بقعد اول قعدة ولسه اول مرة نشوف بعض ويقول هو انتى حبيتى قبل كده؟على اساس انى لو حبيت هقوله مثلا ولا هو برنامج اعترافات ليلية؟

يعنى مثلا اى النظرية من انها تبقى اول قاعدة والمفروض انه سائل وعارف هو جاى لواحدة بتشتغل ويقولها لو حصل نصيب هقعدك من الشغل ده مبدئيا قبل اى كلام
.
.
نو كومنت




والله انا مابقيت عارفه العيب فين

فياانا ولا فى الناس؟

انا لا نفسى احب ولا يحزنون رغم انى مش شايفة ان ده كتير يعنى بس والله مانا عاوزة كده حتى بامانة فقدت الامل فى الحدوتة الرومانسية دى


انا كل اللى بتمناه انى حد اتعامل معاه ويتعامل معايا عادى كاى اتنين فى الدنيا من خلال اى شكل تعامل يلاقى فيا حد بيدور عليه والاقى فيه حد يلفت نظرى وبس


اطلع بقى دكتورة يطلع هو زى مايطلع نبقى اتنين اختاروا بعض وقرروا  مش امة لا اله الا الله هى اللى بتختارلهم


عارفين نفسى فى اى كمان........


معلش استحملونى لحوحة انا وطلباتى كتير انا عارفة!!


نفسى الناس تبطل تقولى اتجدعنى عاوزين نفرح بيكى بقى


اتجدعن ازااااااااااااااااااااااااااااااااااااااااااااااااااااى 


اشد حيلى بانهى طريقة ولامؤاخذه يعنى




تقلت عليكم عارفة بس كنت محتاجة افضفض

الجمعة، 20 مايو 2011

ابيض.............



لما كنت صغيرة كنت ديما برمى قلم الالوان الابيض من علبة الوانى لانه بايظ

ايوة بايظ مابيلونش!

لما كبرت عرفت انه اصدق الالوان وانقاها مابيغيرش ولا بيزيف ولا بيجمل...

مابيكدبش____________

الاثنين، 16 مايو 2011

كم جميل

        


                   كن صديق...   

            كم جميل لو بقينا اصدقاء...فان كل امراءة تحتاج الى كف صديق

                  كن صديقى...

           هواياتى صغيرة........واهتماماتى صغيرة

           وطموحى..
           ان امشى ساعات معك تحت المطر...عندما يسكننى الحزن ويبكينى الوتر

           فلماذا تهتم بشكلى ولاتدرك عقلى؟؟؟؟؟؟!!!!!!!!

               كن صديقى...

           انا محتاجة جدا لميناء سلام..
            
           وانا متعبة من قصص العشق واخبار الغرام....

           فتكلم......تكلم.........................تكلم

           لماذا تنسى حين تلقانى نصف الكلام؟؟؟؟!!!!!!

           كن صديقى...
                             .ليس فى الامرة انتقاص للرجولة غير ان الشرقى لايرضى 

                              بدورغير ادوار البطولة!!! 

السبت، 14 مايو 2011

خلي بكرة أحلى

               
 سمعت الاعلان ده بعد ماسمعت احداث البلطجة اللى حصلت امام ماسبيرو

ماعرفش حسييت انه جاى فى وقته

بغض النظر عن كوكاكولا يعنى

شفتوا الغيوم وهى بتنزاح؟

اتفرجوا معايا
       





الأربعاء، 11 مايو 2011

مجرد كلمة

                                            
                                             

                                               الحب
                                             ******
كلمة قليلة الحروف ولكنها احد اسرار الحياة,فالكل يبحث عنها ويتمناها والكل يكتب عنها ويتغنى بها 

كلمة متواجدة فى قاموس حياتنا اليومى بشكل مختلف فى منا اللى بيحكى عنها وفيه منا اللى بيسمع عنها

واد ايه غريبة تعبيرات الوجوه وهى بتتناولها من فرحان بيها لزعلان منها لمجروح بسببها لملهوف عليها لمترقب نتيجتها

كلمة فى كتير بيسعوا وراها علشان تبقى متواجدة فى حياتهم وكتير بردوا منتظرين الصدفة اللى هتجمعهم بيها

كلمة ممكن تبقى بداية السطر لقصة وحياة وممكن بردو تبقى نقطة ونهاية امل 

كلمة بيعتبرها معظم دكاترة الامراض النفسية مفتاح لحل مشاكل روادهم فبسؤالهم اثبتت الدراسات ان الحب اساس لمشاكل نفسية كثيرة

فهناك من يحب نفسه زيادة عن اللزوم وهناك من لايحب نفسه اطلاقا
هناك من يعانى من عدم وجود حد يحبه وهناك اللى مش عارف يحب حد
 هناك من يحب من لايحبه وهناك من تالم بسبب من احب

كلمة اختلفت انواعها وطرق التعبير عنها 

واختلفت ايضا تفسيرتها وتعريفاتها


ورغم كل ذلك تظل مجرد .....كلمة

الجمعة، 6 مايو 2011

:)




اعترف بانى فى وقت كتابتى لتلك الكلمات ابتسم!

نعم ابتسم ..وانا اتخيل ملامح وجهك وانت تفكر وتفكر فى محاولة يائسة لفهمى

فى محاولة لمعرفة ان كنت حقا سامحتك ,ام اننى نسيت المى وغضى منك,ام اننى شفيت من جراحى بتلك السرعة!!!!!!!!!

ابتسم وانا اتخيل مدى حيرتك .....وانا اتصور كم الاسئلة التى تدور فى رأسك


اتخيلك وانت تقول لنفسك لقد جرحتها وحطمت املها وهدمت جميع احلامها!!!

فكيف استطاعت ان تقف مرة اخرة بذلك الشموخ وتلك الابتسامة وهذا الهدوء

هل تتصنع كل تلك الاشياء؟ ام انها فعلا نسيتنى ولا تتذكر؟ام انها حلاوة روح ليس اكثر؟؟!!!!!!

الاجابة ابسط مما تتخيل................انه صمتك

نعم ان صمتك وقت الازمة اعترف انه كاد يقتلنى فلقد تركتنى لتكهناتى ووساوسى

تركتنى اخمن لماذا النهاية كانت هكذا,تركتنى انا اضع لك الاسباب والاعذار والمبررات وصمت,تركتنى انا افسر صمتك هذا حسب حالتى 

فاوقات افسره على انه هروب واوقات افسره على انه لا مبالاة واوقات افسره على انه ندم واحساس بالذنب او قلة حيلة او عدم قدرة على حل المشكلة

او....او.......او اسباب كثيرة جدا وجدتها تحليل منطقى لهذا الصمت وكل سبب منها كان يحزننى ويقتلنى  وكنت احاسبك على 

واذ فجاءة وجدت لى اسباب انا الاخرى للبعد وبدأت هذه الاسباب تذداد يوما بعد يوم

اسباب جعلتنى اتأكد انى لست الخاسرة وان قضاء الله دائما وابدا فيه خير

اسباب جعلتنى اتأكد ان عقلى مازال يعمل بشكل سليم وان قلبى مازال يدق بانتظام

وان غيابك ترك فراغ فى الوقت ليس اكثر


اسباب..........ولكن اعذرنى فلن ابوح لك بها  فلقد تعلمت منك ان من حق كل انسان الاحتفاظ باسبابه لنفسه

وسوف اترك لمخيلتك العنان لكى تتخيل ماهى تلك الاسباب:)