الأربعاء، 25 مايو، 2011

خلاااص .......انا هعترف

                       

                                        انا بكره جواز الصلونات

ايون ده اعترافى اللى بعد صمت طويل ومحاولات عديدة للتجمل ولان عيب البنوتة تقول كده......بس خلاص ماعنتش قادرة بجد ياجماعة انا بكرهه

مع احترامى لكل التجارب اللى نجحت بيه واللى بجد مش عارفة ازاى نجحوا

مع احترامى لكل الابهات والامهات اللى ماعندهومش الا كلمة واحدة"ماكلنا اتجوزنا كده"

مع احترامى لكل ده ورغم كل ده بكرررررررررررررهه

بعد تجارب عديدة حصلت معايا ومع مقربيين منى بقيت بكره كل تفصيلة فيه

بكره لما واحدة سمتها غادة عبد العال فى مدونة عاوزة اتجوز طنط حشرية واعتقد ان فى حياة كل بنت مننا طنط حشرية ومش بعيد بقت فى حياة الولاد كمان بكره لما تيجى او تتصل طنط حشرية بتاعتى وتقولى اخبارك ايه استعدى يا عروستنا جيبالك عريس

بكره لما البيه اللى بلغ من العمر جايز ال30 يبعت مامته او اخته الكبيرة تعاين العروسة فى الصيدلية وتديله رائيها لو اوك يجى الافندى ويشوفها لو مش اوك يبقى علبة مناديل اشتريناها ومش هتخسر

بكره لما البيه يتكرم وينزل يدور بنفسه ويقلوله فيه صيدلانية كويسه فى الصيدلية الفلانية يروح ويشوف ويقعدوا ومايحصلش نصيب اوم ايييييييه اوم يروح لصيدلانية اللى فى الصيدلية اللى جنبها ويسمعها نفس الاسطوانة !!!!!!!!!!
 وكأنه داخل محل ملابس جاهز بيقيس وينقى.....
وكأنه ماجاش على باله ان الاتنين ممكن يكونوا اصحاب وقعدين فطسنين على نفسهم من الضحك عليه

بكره قعدة الصلون وصنية الحاجة الساقعه اللى زهقت منها بجد

بكره القاعدة والاسئلة المحفوظة اللى كلهم تقريبا مسمعنها لبعض او فى كتالوج نازل بيها  بيتحفظ

بكره بعد العريس مايمشى ورغم انى اوقات ببقى ملانة ومافيش كلام يقوله بس بجد ببقى مش عاوزاه يمشى اوقات لانه اول مايخرج هتسأل السؤال الغريب ها موافقة ولا لاء؟

وكأن الموافقة ولا الرفض دول حاجة سهلة

بكره لما واحدة تدخل عندى وتقولى فى عريس وبيدور على عروسة وشارط انها تكون صيدلانية

ممكن حد يقولى هو شارط ده ليه؟؟؟؟؟؟؟؟؟؟

فاكرين مسلسل عاوزة اتجوز؟ كان مبالغ فيه صح؟ بس وربنا انا لو حكيتلكم على اللى بشوفه هتعرفوا ان  ده حاجة بسيطة خاااااااااااااااااااااالص


يعنى مثلا اى النظرية لما طنط حشرية تيجى تقولى انا جيبالك عريس فلة يعنى وبيصلى كمان ده على اساس ان الل بيصلوا دول عملة نادرة يعنى وان الصلاة دى مش واجب عليه وانه بيعملها تطوع مثلا

يعنى مثلا اى النظرية ان المحروس لما يقعد اول قعدة المفروض تبع قوانين جواز الصلونات بنكون فيها فكرة عن بعض يقولى انا سالت على مرتبك وعرفت انك بتاخدى كذا

يعنى مثلا اى النظرية ان الافندى بقعد اول قعدة ولسه اول مرة نشوف بعض ويقول هو انتى حبيتى قبل كده؟على اساس انى لو حبيت هقوله مثلا ولا هو برنامج اعترافات ليلية؟

يعنى مثلا اى النظرية من انها تبقى اول قاعدة والمفروض انه سائل وعارف هو جاى لواحدة بتشتغل ويقولها لو حصل نصيب هقعدك من الشغل ده مبدئيا قبل اى كلام
.
.
نو كومنت




والله انا مابقيت عارفه العيب فين

فياانا ولا فى الناس؟

انا لا نفسى احب ولا يحزنون رغم انى مش شايفة ان ده كتير يعنى بس والله مانا عاوزة كده حتى بامانة فقدت الامل فى الحدوتة الرومانسية دى


انا كل اللى بتمناه انى حد اتعامل معاه ويتعامل معايا عادى كاى اتنين فى الدنيا من خلال اى شكل تعامل يلاقى فيا حد بيدور عليه والاقى فيه حد يلفت نظرى وبس


اطلع بقى دكتورة يطلع هو زى مايطلع نبقى اتنين اختاروا بعض وقرروا  مش امة لا اله الا الله هى اللى بتختارلهم


عارفين نفسى فى اى كمان........


معلش استحملونى لحوحة انا وطلباتى كتير انا عارفة!!


نفسى الناس تبطل تقولى اتجدعنى عاوزين نفرح بيكى بقى


اتجدعن ازااااااااااااااااااااااااااااااااااااااااااااااااااااى 


اشد حيلى بانهى طريقة ولامؤاخذه يعنى




تقلت عليكم عارفة بس كنت محتاجة افضفض

هناك 14 تعليقًا:

FAW يقول...

والله إنتي عسل وضحكتيني جدا

طب والله إتجدعن دي بتتقال للولاد برضو , هي و جايبلك عروسة

بس بجد أنا مذهول من موضوع أنا عرفت مرتبك ده , إيه ده !!!!!!!!

تعرفي أنا مرة واحدة هي اللي قالتلي هي وبنت عمها لما كنت قاعد معاهم إني أسألها حبت قبل كده ولا لأ , قلتلها مش عايز أسأل , قالتلي لأ حقك تسأل وأصرت , قلتلها ماشي يا ستي , حبيتي قبل كده ؟ قالتلي لأ . . طبعا إنفجرت ضحك :)
عندك حق والله في الإعتراف بلا تجمل بلا نيلة

تحياتي

reemaas يقول...

طب دى اقل حاجة يامصطفى يعنى ده انا خايفة اقر واعترف بالباقى مش لحاجة بس لانى والله بحاول انسى

مش عارفة دى بجد طريقة تفكيرهم ولا بتيجى معاهم صدف ماهى لو طريقتهم تبقى مصيبة ولو صدف تبقى مصيبتيييييييييييييييين

سواح في ملك الله- يقول...

بصي يانور اصل دي طبيعة الدنيا
مش مهم الطريقة اللي بيتقدم لك بيها العريس
ممكن يكون كويس جدا بس خجول
وممكن يكون راجل بيعرف الاصول
يعني بيخش البيت من بابه
عشان تختاري صح
بلاش استباق الكراهية
وبلاش كمان استباق العيوب
انا ممكن اشوف انسانة جميلة في كل شئ ومع المعاشرة اعرف انها قد تكون غير كده خالص
وممكن العكس
اما حكاية انه عايزها صيدليه دي
هههههههه يمكن راجل صاحب عيا
او برشامجي هههههه بهزر معكي
ابعدي العواطف واختاري بمقاييس عقلك
هترتاحي

شيرين سامي يقول...

نور انت حكاية بجد مش بقولك بحس في مدونتك انت بالذات بصدق شديد و عفويه حلوه.
كل تساؤلاتك صح تعرفي أنا كمان كنت رافضه الصاونات ده و حصلت معايا مره مش قادره أقولك كنت قالبه وشي إزاي مكنتش حتى ببص لعريس الغافله و رغم كده كان عايز يكمل (مبيفهمش) طبعاً رفضته مش لعيب فيه بس حسيته غبي و طنط حشرية من ساعتها حلفت ماتجيبلي عريس :)
الناس بتوع شدي حيلك دول قصدهم تنمري على عريس أو أم عريس عشان يوقع كده و تبقي كسبتي الزبون :)
طبعاً ده تهريج و سيبك من الناس القديمه دي كلامهم كله محفوظ و قصدهم معروف.
فكرتيني مره واحد من الزباين دول جالي الصيدليه تعرفي عملت إيه...قعدت في المعمل :)
بصي من غير هزار الموضوع ده محير جداً لأن أنا ضد الجواز و خلاص و في نفس الوقت ضد النفور على الفاضي و المليان...يعني بتهيألي لو الواحده فتحت قلبها و سابت نفسها يمكن يظهر النسان المناسب لكن في بنات كتير بتسيطر عليهم فكرة الرفض قبل أي شئ أتمنى ماتكونيش منهم.
و ماتقلقيش على الحب عشان بيبقى أجمل بعد الخطوبه و الجواز.
سلام يا أجمل و أصدق بنوته

reemaas يقول...

ماهى مش بالايد احكم بالعقل اولا يا خالد لان العاطفة ماعتقدش ليها دخل انا بيبقى ادامى مواصفات وشكل خارجى مطالبه انى اتعامل معاهم اقبلهم او ارفضهم وموضوع العشرة هيجى بعدهم اكيد طالما ماكنتش اعرفه

reemaas يقول...

والله ياشرين مانا رافضة لمجرد الرفض بدليل انى اتهفيت فى عقلى وسمعت كلام الناس وحكمت خارجيا مرة وقلت كل الموصفات شغاله اهى طب وماله واتخطبت وكان فعلا شخص مش ووحش بس ماتفقناش نهائى وكانت اسوء ايام عشتها بسبب الخلافات مش بسبب انه وحش الحق يتقال

مصطفى سيف يقول...

جواز الصالونات مش وحش اوي كده
وبعدين اي جواز في الدنيا اللي بيحدد في نجاحه من فشله العشرة وطرق حياة كل واحد في الطرفين وصفاتهم الشخصية ومدى توافقهم يعني مش الحب بس
معاكي الحب اهم عامل لكن الحب وحده لا يكفي
بالتالي جواز الصالونات مقبول لو هيبقى وراه خطوبة يتعرف فيها الطرفين على بعض وتكون فترتها كافية علشان يعرفوا بعض اكتر
اما نجاح الزواج معتمد اكتر على العشرة ساعات ومش ساعات اغلب الاحيان العشرة هي اللي بتولد الحب
تحياتي ليكي

reemaas يقول...

ماهو يا مصطفى ان الصالونات ترقى لخطوة الارتياح والخطوبة هى دى الازمة بعد كده كله يتشابه

حَـبآيـۃْ.بـטּـدۉڷ يقول...

عَجبتنِي طَريقة سَردِكْ ..

حَسِّيتكْ إنتِ اللي بتتكلمِّي .. :DD

عَارفَه .. مَحدشْ هَيتغيرْ ..

هيفضَلوا كِده بتفكيرهمْ ده ..

بِعقلهُمْ .. كِده زي مـآ هُمَّـآ ..

أحسنْ حاجَه إنِّكْ عارفَه إنتِ عايزَه إيهْ
ورَآفضَه إيهْ .. :)
:)

reemaas يقول...

حَـبآيـۃْ.بـטּـدۉڷ


اولا اول مرة نورينى ودى حاجة بسطانى

ثانيا والله بحاول اعمل ده لسبب بسيط جد انى حاولت ماعملش ده فمعرفتش


بس اوقات الزن والاسئلة اللى مالهاش اابات عندى وتكرار الماسى بيجيب للواحدة احباط واكتئاب وبما انى مش شخصية مكتئبة فى الاصل يعنى فالحالة دى بتبقى رخممممممممممة الى ابعد الحدود

الله المستعام بقى

موناليزا يقول...

نفس سؤالى برضه
أشد حيلى ازاى يعنى ؟؟
يعنى اعمل ايه
واستنتجت انها ممكن تكون تقصد انى اكتب ورقة واعلقها على ضهرى أو على وشى واكتب عليها "مطلوب عريس":)

reemaas يقول...

مانا بردو جت فى دماغى كده يا موناليزا

تفتكرى احنا ظالمينهم؟!!!!!!!!

نورتينى

eng_semsem يقول...

جواز الصالونات ليس سيئا لهذه الدرجه ان وجدت الظروف المناسبه للتعارف واما الزواج بعد قصة حب وتعارف لا يمنع وجود الخلافات بعد ذلك اما الاسئله المستفذه التى ذكرتيها فاحيانا يجد الرجل مثلها ويسمعها فله نصيب من ذلك ايضا
وانا لا اجد في صراحتك عيبا تكلمي كيفما تشائين ونحن نسمعك

reemaas يقول...

eng_semsem

منورنى وميرسى جدا على حسن الاستماع


هو مش سئ لانه نجح مع ناس ولكن مش عارفة اتاقلم معاه العيب فين بقى صدقنى مش قادرة احدد

جواز قصة الحب هيظل امنية والمشاكل كده كده موجودة ورغم ذلك انا ماعنتش حاطة امل على الامنية دى كتير صدقنى .