الثلاثاء، 30 نوفمبر، 2010

يا من احببتك





                                ليس من العدل....ان تقول بأنك تحبنى عندما اردتك صديقا
              
                    وكم غريبا ان تقول اننا اصدقاء!! بعد ان احببتك بصدق
                     
                    والاغرب من هذا كله ان لا اجدك!!!!!!!!!!

الاثنين، 29 نوفمبر، 2010

العمل التانى

وان شاء الله يارب تبقى اخر مرة لان كده هيبقى اوفر الصراحة

دى قصة صحبتى التانيةواللى حصلت بعد القصة الاولى بمافيش شهرين تقريبا ولقيت واحدة صحبتى  كانت مخطوبة مارتحتش فى خطوبتها دى فقررت انها تفركش
قوووووووم ايه اهلها يولوا دى اكيد معمولها عمل ازاى تسيب عريس زى ده هو حد لاقى عرسان لازم نوديها لشيخ


صحبتى رغم اعتراضها وافقتهم لانها كانت لسه عملة عملة وفاسخة خطوبة فمش معقوله هتعمل عامله تانيه وتقف ادمهم وتقولهم بلاش جهل


البنية سكتت وقالت هعمل اللى يقولوا عليه المهم انى ماكملش مع حد غصب عنى وقد كان
ماعرفش راحتله ولا جابوه البيت  وبينى وبينكم ماعرفش هو نفس الشيخ ولا لاء
الكدب خيبة يعنى


بس الكلام هو هواه بتاع تشرب اللبخة ولا البتاع اللى بيحضره ده ولو لامؤخذه رجعت دم يبقى العمل شرباه والبنت شربت واذا بمعدتها تتقطع من المغص الشديد وياخدها لدكتور باطنى يشوف اى اللى جرالها


الدكتور يعمل اشعه ويلاقى  فى معدتها قطع ازاز صغيرة  جدا عملت تهتك فى جدار المعدة ايه يا بنتى اللى جابلك الازاز تحكيله صحبتى اللى حصل وطبعا متخيلين رد فعل الدكتور


طبعا انا اول ماسمعت  رغم ان صحبتى كانت صعبانة عليا جدا كانت هتروح فيا الغلبانة بس لقتنى وبرد فعل تلقائى جدا بسقف وبقول ظهر الحق اخيرا فهممممممممت


هى استغربت وانا طبعا ماحكتش انا ايه اللى خلانى اقول كده
ده سرررررررررر


                                                               ويجعله عامر

السبت، 27 نوفمبر، 2010

والله مابتفرق معانا الشهادات

زمان لما كنا بنسمع عن السحر والشعوذة الاعمال او العمالات زى مابيقولها الناس البسيطة كان ديما ده مربوط عندنا بناس ماتعلمتش ناس بسيطة جدا وعقلها جايبه ان فيه حد ممكن يئذيها ويكرهلها الخير فيقفهولها بعمل ويروحوا بقى للراجل اياه او الست اياها فيفكوا العمل ده وبتقديم ماغلى او رخص من القرابين ابتداء من الفرخة لحد ماعقلك ييبك بقى ويعمل عمل معاكس  او اى تخريفة المهم انه يبطل العمل القديم
مسلسل قديم بنشوفه فى  الافلام والمسلسلات والجرايد يعنى مش جديد

الجديد بقى انى اكتشفت ان الحكاية دى مش مرتبطة بالشهادات خالص يعنى عن طريق حكايتين لاتنين من اصحابى  دكاترة يعنى وصلوا لاعلى درجات التعليم المتاحة

اول واحده جاتلى البيت تقولى اقولك على سر يا ريمو قولتلها  خير يارب قالتلى ماما مصممة اروح لشيخ علشان يعرف اى سبب تاخر الزواج ده قولتلها شيخ ايه يابنتى وهبل ايه دى قسمة ربنا  مال الشيخ ومالها  بلاش تخريف قالتلى بصى انا قلت اجرب يعنى والراجل بيستخدم القراءن فى العلاج وكده وبياخد اجر رمزى
رمزى اييه ورسمى اييييييييييه يابنتى عيب الكلام ده قالتلى بعد ماستفذتها برفضى طب ايه رائيك ان انا رحت فعلا وسقانى ترياق كده وقالى لو رجعتى دم يبقى العمل انتى شرباه ولو مارجعتيش يبقى العمل ماشية عليه


قلتلها يعنى كده كده فيه عمل ماعلينا وبعدين؟ قالتلى وقد كان يابنتى شربته من هنا و مغص بقى ودم كتير !!!!يخرب بيت شيطانك اكيد حاطتلك حاجة فيه يا دكتورة اخر زمن قالتلى لا انا شاربة عمل يابنتى الحمد لله بعدها حسيت انى ارتحت
اتغظت بقى وقولتلها وبتحمدى ربنا ليه بقى ماتشكرى عمك الشيخ


المهم يعنى بعدها بشهرين تقريبا اتخطبت ههههههههه رحت خطوبتها وماقلكوش بقى النظرات اللى بتحمل معنى شفتى مش قولتلك!!!! وطبعا انا استغفر ربى فى سرى وابتسم واسكت مانا لو اتكلمت  هبقى حاقدة وحاسدة وعندى حبة ضغائن


ثبت علينا العقل والدين يااااااااااااااااارب
                                                                    ويجعله عامر

                       ملحوظة

اه من حق هبقى احكيلكم حكاية صاحبتى التانيه ومفاجئتها البوست الجاى 

السبت، 20 نوفمبر، 2010

فكييرة

الوحدة زى ماهى احساس فظيع ومؤلم جدا فممكن كمان تكون سبب انك تحاول تعمل حاجة جديدة
حاجة تخرجك من المود وتشغلك وقتك اللى انت مش شاغله فى شغلك
يعنى على سبيل المثال المدونة دى انا عملتها فى يوم كنت مخنوقه فيه جداااااااااااااا
وزهقانة من الشغل ومن البشر اللى اعرفهم ومن المواقع اللى انا مشتركة فيها زى زوربيا والفيس بوك فقررت انى اغير 
من يومين بقى طقت فى دماغى فكيره مجنونة


هكتب مذكراتى
هههههههه
اه والله وبدءت فعلا اكتب احداث حصلالى فى اليوم وذكرى افتكرتها وحاجة زعلتنى وحاجة فرحتنى وحطتها جنب بعضها كده لقيتها  بداية مش بطالة
فضفضة وبفك عن نفسى وبقول كلام اوقات مابلاقيش  حد اقولهوله او بتكسف احكيه او مش عاوزة غيرى يعرفه
ولقيتها طريقة حلوة بصراحة اه والله ومنها برده ممكن تحاسب نفسك وتصارحها باعمالك طول اليوم


بس السؤال بقى


هل حتى واحنا بنكتب يوميتنا هنبقى صادقين فيها؟ولا هنجامل نفسنا ونخبى؟
                                                                         ويجعله عامر

الاثنين، 15 نوفمبر، 2010

ماتحبنيش بالشكل ده!!!




اولا كل سنة وانتم طيبين وعيد سعيد عليكم يارب انتم وكل اللى تحبوهم

جملة سمعتها ولفتت نظرى جدا"لو سمحتى لو بتحبينى انا عاوزك تحبينى بالطريقة الفلانية"
هو احنا ممكن نطلب من اللى بنحبهم انهم يحبونا بطريقة معينة؟
يعنى ممكن احب حد واعترض على طريقته فى اظهار الحب ده؟
امال ايه اللى حببنى فيه طالما طرقته مش عاجبانى او خنقانى ماعرفش الجملة استغربتها جدا
طيب هو ممكن حد يغير طريقة حبه؟ يعنى ده اوبشن موجود عندنا ممكن نغيره ونظبطه زى ما الطرف التانى عاوز؟
طب ممكن لو ماعرفش يغيرها ابطل احبه؟
اسيبه وانا عارفه انه بيحبنى بس طريقته مش عجبانى؟
بصراحة انتم مش هتطلعوا من البوست باى اجابة لو مستنينى اجاوب لانى فعلا محتارة فكل اللى هتلاقوه اسئلة اتمنى ان اللى يعرفلها اجابة يقول



الثلاثاء، 9 نوفمبر، 2010

هيا بنا نأكل


ثقافة الاكل فى بلدنا ثقافة عريقة جداوماقدرش اقول فى بلدنا بس لا اعتقد فى العالم العربى كله بس انا هخلينى فى بلدنا لان ده اللى شفته يعنى

مثلا لما يبقى فيه واحد تخين وواحد رفيع يتقال على التخين انه ابن عز,او مثلا الطريق لقلب الراجل معدته,وواجب الضايفة ده حاجة رغم انها حميمية وبتدل على الالفة لكنها عادة شرقية صميمة يعنى

كل دى مقدمة ممكن اقعد اكتب فيها يجى بلوجين تلاته لكن انا بصراحة وبينى وبينكم مش جاية اعرفكم اهميه الاكلة بالامثله والا مثال لا
انا كعادتى اللى ربنا مايقطعها جايه احكيلكم اخر مواقفى وطرائفى

مؤخرا رحت يوم الصيدلى زى عيد العمال كده بيحتفلوا بيه كل سنة تقريبا فى فندق شيراتون القاهرة

كان يوم ظريف ببروجرام اتضمن يجى خمستاشر كلمة لناس مهمه فى المجال وتكريم ناس اينعم مانعرفهاش بس اكيد يعنى تستاهل

ادونا فاصل كده ونزلوا البوفيه  اللى كان ترتيبه كالاتى

طربيزة كبيره على اليمين واختها على الشمال وفى اخر القاعه خاااااالص يجى اربع طرابيزات مرصوصه صف واحده

انا بقى وصحباتى ماعرفناش ان ده البوفيه الا لما شفناالقاعه اللى ماكنش فيها مكان لرجل لدرجة اننا كنا واقفين مرة واحدة كراسيها فضيت واتوزعوا على الاماكن السابق ذكرها بشكل منظم ورهيب

اوووم اييييييييه ,اخدنا بلنا انا والابرياء صحباتى ان ده مارثون اكل وكل واحد خارج ومحمل طبق  بيقع منه من كتر ماهو مليان

قلتلهم تعالوا نتفرج ورحنا على التربيزة اليمين ربع ساعه على ماعرفنا نوصلها  ونلاقيلكم ايييه....بح  اه والله اتمسحت بالاطباق اللى عليها وكذلك الشمال

سمسمة وطمطم صحاتى جاتلهم صدمه وقالوا نرجع نلحق كراسى بكرامتنا واهو يبقى لحقنا حاجة فى الليلة دى
قلتلهم لا انا لازم افهم لحقوا خلصم البوفيه ازاى دول وكان موجود ايه

على ماوصلنا ورا لكم ان  تتخيلوا ان المشهد بيتكرر ولكن بصورة اكبر
وكل واحد طالع ومعاه طبق يكفيه هو  وعيلته كلها وانتهى المولد او الفاصل وطلع دكاتره يكملوا محاضرات بس تقول لمين ......الناس مشيت

اخدوا غرضهم من الحفلة ومشيوا والباقى اللى قاعدين بيشتركوا فى صفة واحده الا وهى انهم مالحقوش البوفيه

وكنت انا وصحباتى منهم طبعا.......

وطلعنا بمعلومة المؤتمرات ماهى الا حفلات اكل كبيرة والاكل فرص وكل واحد وشطارته

                                                       ويجعله عامر



الأحد، 7 نوفمبر، 2010

هم فى عيون بعض

من فترة كده قريت باقى قصة فى مدونة الشحات ولفت نظرى فيهاانه جاب وجهة نظر الزوج والزوجة فى بعض فخلالنا نشوف كل واحد فيهم شايف نفسه وشايف الطرف التانى ازاى
وسمعت انا بقى حكاية من يومين ماشية على نفس الوتيرة للاسف

الحكاية باختصار تتلخص فى شاب عمره حوالى 29 سنة وسيم,طبيب,جراح,نايب فى احد المستشفيات الجامعية يعنى قيمة وسيمة اهو
البيه كأى شاب بيدور على عروسة فعجبته بنوتة فى كلية طبفراح فاتحها وهى طبعا طارت من الفرح ماهو لقطة بقى ومايترفضش

المهم الولد دخل البيت ولاى اسباب بقى الموضوع اتفركش ماكملش لحد هنا قصة عادية جدا اتنين حصل بينهم قبول بس النصيب لعب لعبته عادى جدا

الغريب بقى ان دى ماكنتش اجابتهم

اتسال الولد عن سبب عدم اكمال الحدوتة كان رده اصلى اكتشفت انها كانت بتحب واحد زميلها دكتور قبل كده وبينهم كلام

لسان حالى كان نفسى اقوله وانت ولا مؤاخذه مالك يعنى انت ليك تحاسبها من يوم ماعرفتها مش من كام سنة فاتوا

اتسالت البنت بقى ليه ماكملتش الحكاية تقولك ايه
اصله بلدى وعيلته يااااااى سوفاج    نو كمنت الصراحة

ليه بنلبخ فى بعض كده؟! ليه مايكنش الرد بمنتهى البساطة مافيش نصيب؟؟!
ليه لازم نطلع اى غلط فى الطرف التانى ونعيب فيه؟

اسئلة ماعتقدش انى هلاقيلها جواب

الثلاثاء، 2 نوفمبر، 2010

وانت ماااااااااااااااالك

   


اوقات كده بيجيلى حالة غيظ من الناس لما الاقيهم حشرين مناخيرهم فى تفاصيل حياتى

اوقات التدخل ده  بنحطه تحت مسمى انهم بيحبوك وعاوزين يطمنوا عليك بس مش فى كل الاوقات هينفع نضحك على بعض ونقول كده
لا
بمنتهى البساطة ده تدخل

لما تبقى حد مافيش بينا اتصالات ولا يحزنون وخلاص كنا زمايل ثانوى ولا اعدادى وجايز ابتدائى وتقابلينى صدفة والاقيكى بالاحضان امواااه امووواااه ايه يا ريمو يا حبيبتى لسه ماتجوتيش ؟...لا!طب ليه؟..وعشان ايه؟ وبترفضى ليه؟ولا ماحدش بيجى؟!!!!!!!يلا بقى اتجدعنى .....على الله التساهيل  لا ياحبيبتى العمر بيعدى

انتى ماااااااااااالك وايش عرفك بظروفى يابنتى طبعا ده بيبقى حاجة فى نفوخى نفسها تطلع بس للادب والبروتوكول بسكت

وبعد ما احاول اتناسى الهانم تطلعى طنط اللى بقالها قرن من الزمن مانعرفش عنها حاجة
جايز اخر مره كلمتنا من رمضان اللى قبل اللى قبل اللى فات صحيت من النوم  العصريه كده مالقتش وراها حاجة فهفينا عليا
تمسك الهانم سماعه التليفون وتكلم ماما ازى ريمو عامله ايه نفسنا نفرح بيها الا قوليلى يا حبيبتى هى لو جالها فلان ترضى بيه؟
طبعا ماما بمنتهى البراءة وايه اللى هيخلينا نرفض يا حبيبتى بس هو كلمك فى حاجة؟
لا ابدا!!!!!!!!!!!!!!!!!!!
امال بتتكلمى على اساس ايه
يعنى بقول لو
اسمه ايه ده بقىىىىىىىىىى

وكله كوم والتالته دى كوم
ازيك ياريمواخبارك ايه
فله يا توتا انى ايه اخبارك وخلاص خلصت السلامات وتمشى وتقابل اختى بعدها بنصايه كده ازيك يا اخت ريمو الحمد لله
الا قوليلى يا جميله هى صيدليه ريمو دى بتاعتها ولا حاة اسمها عليها بس
طيب يعنى انتى كنتى لسه معايا  مابتسألنيش انا ليييييييييييييييه؟
واساسا انتى مااااااااااااااااااااااااااااااااااااااالك؟

يا جماعه زمان كنا بنسمع حكمة انقرضت باين
  من تدخل فيما لا يعنيه سمع مالا يرضيه
ومالايرضيه هنا هتكون انت مالك والواحد مش هيفضل يقولها فى سره كتير فى مرة هتنطلق بقى واللى يحصل يحصل اهو انا حذرت

                                                              ويجعله عامر