الأربعاء، 30 سبتمبر 2015

# انتى _راجل








امبارح كتبت على الفيس الستيتس الاتى

" مش معنى انها جدعة وبتعتمد على نفسها تبقى راجل"

الجملة دى قرأتها فى كتاب ممنوع الضحك ل حنان لاشين . لفتت نظرى لاسباب ماركزتش فيها وقتها فكتبتها على الفيس ..
فوجئت انها اخدت لايكات كتير وانا اصحابى على الفيس مش كتير اوى فاللايك عندى لما تكتر بتبان

لما ركزت في اللايكات دى لقيت معظمهم من المتزوجات.. ماعدا 3 بنات بس والتلاتة بنات بيشتغلوا وعندهم كيان مستقل ماديا 
اول كومنت لواحدة من المتزوجات وكان تعليقها"اكييييييييييييييد"
تانى كومنت لمتزوجة اخرى 
"لا راجل وبشنب كمان ماقدرش اقولك شنبى وصل لفين دلوقتى"
لو حبيت اوضح الفرق فى الحرقة بين التعليقين هنلاقى التانية متزوجة  فترة ضعف الاولى تقريبا.. 

نلاحظ هنا ايه بقى.. ان الاحساس ده قائم ومتغلغل ويزداد بطول مدة الزواج !

لما فكرت لقتنى انا نفسى عندى الاحساس ده.. وعلشان كده فى الاصل لفتت نظرى الجملة

السؤال هو ليه بقى؟!!!
ليه الاحساس ده واصل لكل بنت اتعودت تشيل مسؤولية؟ 
يمكن علشان المجتمع اتعود لما يشوف بنت بتشتغل اول ماتتخرج وبتتحمل مصاريفها وممكن تشارك فى مصاريف بيت اهلها وبالتالى فى مصاريف بيت زوجها بعد الجواز انه يوصفها بالراجل
ليه الجدعنة صفة رجولية فقط
الجدعنة والاعتماد على الذات واعتماد الاخر عليك دى صفات اعتقد لا تلغى من انوثة المرأة شئ
ممكن جدا تبقى بنت جدعة ورقيقة ايه التضارب فى كده؟!!

حاليا البنت مابقتش بتفرح اوى لما حد بيوصفها انها جدعة لانه فى الغالب هيبقى مطلوب منها حاجة بعدها او هيتقالها بعدها الجزء التانى المحفوظ من الصفة "وبمية راجل"

المشكلة بتتطور عند الاخر لما بيتعود من البنت على "الجدعنة" .. بينسى اوقات انه بيتعامل مع انثى
المشكلة بتتفاقم اكتر لما الاخر ده يكون الزوج 
لما الزوج بيتعامل مع جدعنة مراته وبينسى انها مراته اللى محتجاله جدا ومحتاجة تعتمد عليه بيوصلها لدرجة المرارة اللى لمستها فى التعليقات دى 

فى بعض الزوجات بيتعمدوا انهم يخفوا جدعنتهم دى فى الاول تحت بند (علشان مايتعودش على كده)

فى البعض الاخر بتتعود مع الوقت على جدعنتها دى وبتبطل تعتمد عليه وبالتالى الحياة الزوجية بتفقد بند رئيسى لانجاحها لان بيكون فيه قوتين متضاربين فى البيت

وفى البعض وده الغالب بتكمل بجدعنتها والتجاهل لانوثتها وضعفها وده بيخلق جواها تراكمات نفسية ومرارة بتبان حتى فى التعليقات على الفيس !!

ولهذا ادعوا كل امرأة لرفع الشعار الاتى

# انا جدعة اه بس مش راجل انا بنت

 

الاثنين، 28 سبتمبر 2015

# المظاهر







يتعرض ونيس وعائلته اليوم للمظاهر الخادعة, وادعاء حجم او شكل اجتماعى  مخالف للحقيقة!

حدث ذلك من خلال خليل جاره الرذل اللى جايله عريس لابنته.. يستعير من ونيس فى البداية طقم الصينى الخاص بزوجته لزوم الضيافة..ثم تبع ذلك استعارة كل عفش بيته تقريبا وصولا لصورة جد ونيس لمجرد انه يرتدى فى الصورة بدلة تشريفة عليها نياشيين ملكية.. لزوم الوجاهة
يريد خليل ان يبهر العريس المنتظر بالولائم اللى تأكل حى بحاله.. حتى يستطيع ان يطلب منه شبكة وشقة وفرح يليقوا بمقام ابنتهم العالى!
يستقبل خليل العريس اللى جاى لابس اللى على الحبل ولكنه جاى بطوله!
يفاجئ ونيس اللى حضر المقابلة بان العريس الغنى ابن الذوات ماهو الا موظف كحيان غلبان عنده فى الشركة ولكنه ايضا يتظاهر بما لا يملك ليبهر اهل العروسة!!

يغادر ونيس المكان لشقته ليفاجئ بابنه يرفض الذهاب لمدرسته لان زملائه شافوا الشقة بتاعته من غير عفش.. اكيد هيفضحوه فى المدرسة..

يتألم ونيس لان داء المظاهر وصل لابنائه!!


يربى ونيس ابنه على عدم التعلق بالمظاهر وانه فرضا ان هذه عيشتهم مش مجرد ظرف طارق, يجب ان يثق فى قيمته وقيمة اسرته  كبشر وليس بقيمة العفش الذى يمتلكونه..

الاخلاق يا سادة  

الجمعة، 25 سبتمبر 2015

رسالة 32 (رسايل الى مجهول )

















(32)


انا اه رومانسية بس مش بعبط..

يعنى مش هقولك ليل نهار نحب فى بعض بس يبقى لينا حاجات حلوة تحسسنا ان الحب موجود.. 

مش بس العشرة لا .. وكمان فيه مشاعر حلوة عايشة على طول عمرنا..

ومهما كانت مشاغلنا لازم نلاقى وقت لينا احنا 

علشان نعرف نكمل

الخميس، 17 سبتمبر 2015

#انجاز







أخيرا انتهيت من مسلسل ونيس بأجزائه الثمانية

اخدت فيها اكتر من سنة اولا لاسباب خاصة بيا انا وثانيا وهو الاهم.. لانه مسلسل ممتع لايمتلك احداث متلاحقة تجعلك تلهث حتى تعرف نهايته..
لا ده مسلسل فكرة .. والفكرة لاتنتهى .. 
ليس مسلسل يمثل قصة من الحياة..
انما مسلسل يشكل حياة بأكملها.. 
حياة قايمة على القيم والمبادئ والاحترام والحب بصورة بسيطة تتخذ منهم اسلحة تواجه بها متغيرات الحياة وضغوطها..
شخوصه ليست مجرد شخصيات تؤدى دور ..لكنها شخصيات  تُشعرك انك عايش معاها تعرفها ومريت بكل مراحلها وافكارها..
ولمن كان يتابع المسلسل من عام 94 فى شخصيات كبرت معاها ووصلت معاك لواقع عايشه بقالك اكتر من عشرين سنة..
فكرة الاجزاء اللى على مدار سنين دى خلقت اجيال احترموا الفكرة  وارتبطوا بيها

ونيس: ذلك الرجل الذى لاتتعامل معه كأنه بطل عمل والسلام.. دى شخصية بكل افكارها ومبادئها وأخطائها وافراحها.. شخصية تتمنى انها تكون احد افراد عائلتك او احد اصحابك لتأخذ منه تلك الطاقة الايجابية التى يتمتع بها
انه مواطن ايجابى.. ابن ايجابى.. زوج ايجابى.. اب ايجابى.. جد ايجابى.. جار ايجابى.. صديق ايجابى
 انه انسان ايجابى

هذه اليوميات المجسدة جعلتنى اقف عند كثيرمن المواقف بها.. اوحتلى بكثير من الافكار وكثير من التدوينات بل اوحتلى بفكرة اليوميات نفسها واهميتها لنفسى واولادى فيما بعد

مجموعة من المبادئ مجسدة ة..التجارب الانسانية التى تجعلك فخور انها بمكتبتك وانك شاهدتها وقت ما ولم تضيع دقيقة من عمرك وانت تشاهدها بالعكس
انت كسبت

الخميس، 10 سبتمبر 2015

# فيها_حاجة_ .......








الصدفة الجبرية خلتنى اشوف جزء من حلقة وائل الابراشى امبارح.. هتقولى ليه جبرية؟! هقولك لان برنامج العاشرة مساء ده شئ مقدس فى بيتنا !!! ماعلينا

كان مستضيف الفنانة شمس(الكويتية).. هتسألنى بردو ليه حطيتى كويتية بين قوسين هقولك لانها تنازلت عن جنسيتها الكويتية  بسبب انها تطالب بحريتها انها تقول اللى هى عوزاه وده ماعجبش السلطات هناك..!

وراحت السعودية.. اللى منحوها الجنسية السعودية ولكنهم حاربوها وسحبوها منها او هى تنازلت عنها ماعرفش.. المهم لانها بردوا اتكلمت فى مجال الحريات للمرأة وانها من حقها تسوق السيارة وزى ماهو معروف ده من الكبائر هناك.. المهم الست حاليا تحمل جنسية بريطانية على ما اتذكر.. وقالت ان البلد اللى تعطينى حريتى امارس حياتى كما احب طالما لا اؤذى احد فهى بلدى..

قالها وائل طيب انتى مادفعتيش عن حقك فى وطنك ليه جايز تاخدى حقوقك والدنيا تتغير اديكى شايفة مافيش حاجة بتدوم..

قالتله الاتى
اولا:  انت بتقارن مصر بالدول الخليجية؟! دى مقارنة  غير عادلة.. انتم هنا عندكم قاعدة حضاريه ممكن تتأملوا بسببها فى تغيير ما قادم..
عندكم حضارة تقدر تستوعب التغيير ولما تثور فيها ممكن تلاقى نتيجة.. انما  احنا فى الخليج مجتمع بدوى لا حضارة له وانما مجتمع تمدن بسبب البترول!!
وبالتالى عاداته وتقاليده تعتبرها جزء من دينه

ثانيا: انا ليه احارب واستنى اولادى اللى يعيشوا فى نتيجة التغيير طيب وانا؟! امتى اعيش!!


وائل قالها انتى على كده بتحبى مصر اوى :)

قالت انتم بلد عظيم يا استاذ وائل .. كفاية انك هنا ممكن تعيش سواء معاك 10 جنية أو 1000 جنية  فى كلا الحالتين مش هتبات جعان.. 
ثم انتم بلد مرت عليها مصايب كتييير انتم اكتر بلد اتسرقت واتنهبت ومع ذلك لحد النهاردة بتعافر ولسه ما اعلنتش المجاعة ولا اعلنت الفقر..
 لسه واقفة ..!!

***************

مش عارفة انا فضلت اسمع حوارها ومش عارفة اعلق.. كل رد فعلى انى ابتسمت
ابتسمت ابتسامة مريرة ساخرة

ولقتنى بدندن اللحن الشهير
فيها حاجة .....

كمل انت بقى لو تعرف

الأربعاء، 2 سبتمبر 2015

# سقطت_الاندلس








لقد سرق أحفاد ونيس !!
لقد جلست بنات بنته على كافيه وشربوا الشيشة!!

كانت صدمة كبيرة للجد الذى حرص طوال حياته على تربية اولاده لكى يكونوا أبا صالحا وأما فاضلة.. كانت صدمة كبيرة حتى انه لم يلتفت للعقاب الذى وقعه أباؤهم الذين هم أولاده عليهم.. 
لم يستطع أن يستوعب أن الحرمان من الفسح والمصروف ومشاهدة التليفزيون يصلحوا كعقاب لهذه الافعال المشينة ..
وقف بملئ صوته يصرخ فيهم ويقول هكذا سقطت الاندلس.. هكذا ضاعت.. بممارسة اللهو وعدم تربية الاولاد على الامانة ظهر جيل عابث فاسد يسرق وينهب ويغرق بالملذات فسقطت الاندلس..
سقطت بعد 800 سنة كانت جنة في يد المسلمين
سقطت بعد 800 سنة وسقط احفاد ونيس بعد 15 سنة فقط هى عمر اكبر أحفاده!
لا اعلم ما الذى استوقفنى امام هذا المشهد؟!

هل تأثر الاحفاد بكلمات الجد ؟!
من مِن اطفال اليوم يعلم أساسا ماهى هى الاندلس وكيف كانت ولا لماذا ولا كيف أصبحت الان ولا كيف اصبحنا بعدها؟
 
هل خوف الاحفاد من ردة فعل جدهم وحزنهم على  سقوطهم من نظره اكثر بكثير من حزنهم على العقاب الموقع عليهم؟!
فى الحقيقة انهم غضبوا من العقاب ولم يحزنوا.. فهم رأوا ان الكثير يسرق ولم يُعاقب .. جت عليهم؟!

ام ان اكثر ما لفت نظرى فى المشهد هو التشبيه بين سقوط الاحفاد وسقوطالاندلس؟!

صحيح وما الفارق.. الم تسقط الاندلس بالتساهل مع صغار الاخطاء واعتبارها دلع عيال؟ الم تسقط لانهم لم يستطيعوا انشاء جيل على القيم وعلى المبادئ فاخرجوا للامة الاسلامية ملوك لهم تصرفات الرعاع.. ملوك تكالبوا على السلطة وجمع الاموال حتى ولو بنهبها.. حتى اصبح الاخ يحارب اخيه ويتحالف مع الاعداء عليه ليحصد مكاسب اكثر!!

كانت هذه النتيجة وقتها .. فما المانع ان تتكرر الان ؟!

لقط سقطت الاندلس بعد 800 عام ولو لم ننتبه ستسقط مصر ايضا لاننا لم ننشئ اجيال تحافظ على قيم ومبادئ وقدوة تراها اماما فتتعلم ..
هل انتم قدوة؟!
 
نحن لم ننشئ أجيال لتقود..