الخميس، 18 يوليو، 2013

NOW>>>> وتمشى مع نفسى 20 !






المفروض اصحى دلوقتى علشان اليوم خلاص بدأ ولو اتأخرت اكتر من كده هيخلص..
المفروض اتغدى دلوقتى علشان الحق انزل شغلى..
المفروض البس وانزل حالا معاد شغلى جه واللى ماسكة شفت الصبح لازم تمشى حالا بردو..
 المفروض افتح التليفزيون واتفرج على المسلسل اللى انا دبست نفسى وبتفرج عليه بقالى عشرومية يوم..
المفروض اقفل الدرج وامشى دلوقتى علشان معاد مرواحى من شغلى خلاص جه..
المفروض اقعد معاهم فى البيت حبة والعب شوية على النت او اشوفلى اى فيلم على اللاب والحق انام علشان الحق اصحى..
احساس فظيع بان فيه منبه فى دماغى واقفلى على راس الساعة وبيقولى على مفروضات كتير فرضتها على نفسى او اتفرضت عليا..مش هتفرق..
نفسى المنبه ده حجارته تخلص بقى..
***********************

امنيات كتير مفروض تتحقق دلوقتى..ده وقتها.. كل المعطيات بتقول ان ده وقتها
الجرس فى دماغى عمال يرن بيقولى كده بيقولى ان الساعة اللى ظبطه عليها من كام سنة خلاص بترن ولو اتأخرتى عن كده الامنيات دى هتقدم ومش هيبقى ليها معنى ولا طعم.. انجزى بقى ..اتحركى بقى..
ولا عارفة اتحرك ازاى ولا فى اى اتجاه..والمنبه عمال يرن لما صدعنى
خلاص تعبت يارب حجارة المنبه ده تخلص بقى...

السبت، 6 يوليو، 2013

مع نفسى 19..








حالة من التوتر الشديدة بين الاصدقاء على الفيس قدرت تقسم الاصدقاء عندى ل4انواع
. نوع وهو معارض ليا (يعنى مؤيد لمرسى)  النوع ده قرر انه ياخد جنب كده اللى هو مابيردش على اى ستيتوس مش بس السياسية لا ولو حتى عادية منعا للاستفزاز
وطبعا انا نفس الحكاية ولا حتى بيسلم فى الشات ..حالة من تجميد العلاقات والترقب الحذر والمراقبة بغيظ الى حين اشعار اخر.. عملا بالمثل يا نحلة لا تقرصينى ولا عاوز عسل منك..

. نوع تانى برده معارض ليا .. ده بقى لحقنا نفسنا من الاول  واشترطنا على بعض كل واحد رأيه فى صفحته ولما نتقابل مانتكلمش سياسة نهائى..ولو حصل غصب وجه سيرة او تلميح لاى تنتوفة سياسة تلاقى التانى برقله وقاله هااااااااا هتتلم ولا المك..الطيب احسن.. بس النوع ده بقى ناقصه يكون فيه اوبشن فى الفيس نمنع اننا نشوف كلام بعض من غير ما نبلك بعض لان كل واحد بيبقى ماسك نفسه بالعافيه انه يروح يضرب التانى بوكس على اساس انه بيفوقه من اللى هو فيه

.  نوع تالت بقى وده اللى خلاص مافيش فيه امل وللاسف الاعصاب اتهورت وحصل بلوك او انفريند وهذا السلاح الخطير مالجأتش ليه الا مرة واحدة لما الطرف التانى ماقدرش يمسك اعصابه وتحول الخناق لالفاظ نابية بقى وتشكيك فى الدين والولاء للوطن وحاجات كده تحس ان لو فى ايدك مسدس كنت ضربت نار  فالدليت ارحم..للاسف

. النوع الرابع وهو المؤيدين ليا (المعارضين لمرسى يعنى) ودول والحمد لله فى حالتى اكتر بكتييييييييييييييير من الثلاث انواع السابق ذكرها فعملولى حبة توازن والا الفيس كان هيبقى جحيم..ولهؤلاء اقول.. شكرا لانكم موجودين :)

*****************

لبعض الاصدقاء اقول ان الاراء السياسية ليست مبادئ او عقيدة راسخة لا تتغير واذا تغيرت نتهم صاحبها بالنفاق وحاجات كده وحشة كتير ..ابسلوتلى لاء يعنى ..يا اصحابى اللى عارفين نفسكم كويس الاراء السياسية هى مجرد اراء تتغير حسب المعطيات الجديدة وحسب نتائج الاراء القديمة ..ارااااااااااااء تختلف باختلاف طريقة تفكير البنى ادم واولوياته.. هنعمل ايه هى كده طبيعتها كده  !!

******************

انا نفسى قصير فى العناد.. يعنى لو بنتناقش فى موضوع فانا مع الطرف التانى لحد ما احس ان الموضوع قلب عند..عندى قدرة افضل اوضح فى رأى واسمع رأيه لحد ما احس ان الحوار خرج من نطاق النقاش لمرحلة( هو كده..لا هو كده..لا بقى هو كده ) فى الغالب انا بسكت او بنهى الحوار باى طريقة اعرف انهيه بيه حتى لو وصلت بيا انى اقول خلص الكلام.. فعلا فعلا نفسى قصير فى العناد

*******************

اول مره اكتب مع نفسى سياسية.. بس هعمل ايه ماقدرتش افصلها عن الواقع اللى احنا فيه..بامانة حاولت بس ماعرفتش