الثلاثاء، 31 مارس، 2015

الرسالة20 (رسايل الى مجهول)


















(20)

انا مابحبش المشاكل والخصام على فكرة..

 يعنى لو حصلت مشكلة احب احلها على طول ..

 مانبعدش ونحاول نهدى كل واحد لوحده..

هنتعود على ده

الأحد، 29 مارس، 2015

# الأمانة







أن تكون أمين مع نفسك هذا كفيل بأن يجعلك امين مع الاخرين..
دى الصفة اللى حرص ونيس على زرعها فى اولاده واللى خلت ابنه لما راجع درجات الامتحان لقى انه زايد فى مادة  وان مجموع الدرجات غلط بالزيادة..راح بلغ مدرسته وماعملش حساب ان الدرجة دى ممكن تكون الفيصل بين ترتيبه من الاوائل او حتى تفصل بين نجاحه وسقوطه..
 ده كله فى وسط تربية قائمة على مبادئ زى اللى تغلبه العبه وان اللى يلاقى حاجة مالهاش صاحب حلال عليه والوسايط اللى بتدى مكان ناس تستحق لناس لاتستحق.. الخ من اللى بنشوفه واللى ولادنا وقبلهم احنا اتربينا عليه واللى بيعتبر اسهل طريقة لافساد الزمم وانشاء جيل من المرتشين..
الأخلاااااااااااااااق والتربية ياسادة

الجمعة، 27 مارس، 2015

عنها..41












تكلمنى عن السعادة..اوصفلك احساسى لما اصحى الصبح على صوتك او حتى رسالة منك

تكلمنى عن الفرح..هوصفلك احساسى كل ماشوفك وانت بتضحك

تكلمنى عن الامان .. احكيلك عن بصتك اللى بتقولى انا جنبك من غير ماتتكلم

تكلمنى عن النصيب.. احكيلك عن عمرى اللى فات واللى مافهمتش ليه عدا عليا كده الا لما ظهرت فى حياتى

تكلمنى عن الجنان.. هيكون هو احساسى انى مستعدة اعمل اى حاجة طقة طالما انت معايا

الثلاثاء، 24 مارس، 2015

# شريك الحياة






اتخض ونيس لما جاله حالة طلاق الزوج فيها عاوز يطلق مراته علشان اتغيرت بعد الجواز .. مش هى دى اللى اتقدملها وطلب اديها واتجوزها..التانية كانت واخدة بالها من نفسها وكانت ابيض من كده وعنيها لونها غير كده  وحاجات تانية كتير بقى ..
ونيس اتخض .. خاف لنادر خطيب هدى بنته يعمل معاها نفس الحركة 
جابهم ادامه وخلا هدى تلبس لبس بيت مبهدل وتنكش شعرها.. وبردو خلا نادر يلبس بنطلون بيجامة كستور وفانلة وينكش شعره وحاطهم ادام بعض وقالهم ده هيبقى شكلكوا وانتم صاحيين من النوم او بعد يوم شغل شاق برا البيت او جواه
وبعدين قعدهم على كنبه واحدة وقالهم كل واحد فيكم يشم رجل التانى ويتنفس فى وشه ..
ها .. بعد اللى شفتوه ده لسه مستعدين تكملوا مع بعض؟

بغض النظر.. النظرية صح
مش ديما هتلاقى شريك حياتك بعد الجواز متلمع زى الخطوبة
ومش هيفضل على حاله الحد السامبتيك الرشيق .. ممكن يبقى مرهق او مكتئب او يتخن او يخس  او يتغير شكله الخارجى لاى سبب وتحت اى ضغط
اسأل نفسك السؤال اللى ونيس سأله .. 
حابب تكمل؟

الأربعاء، 18 مارس، 2015

على الهامش..39









نفسى اعرف ليه نبيل فاروق زنق نفسه وزنقنا معاه الزنقة السودا دى؟!..

لما بدأ كتابة سلسلة ملف المستقبل اعتقد كان فى التمنينات.. ليه حدد ان كل التطورات اللى اعتبرها خيال علمى هتحصل بعد 30 سنة؟!..
 ليه اعتبر ان فى 2010 هيبقى فى السيارة الصاروخية والطاقة النووية والوقود الذرى والمخابرات العلمية وريادة الفضاء.. ليه خلانا نشوف الاقصر وهى عاصمة صناعية وسيناء متعمرة ومن اروع منتجعات الارض..
ليه كده؟!.. بوظ كل حاجة..
بقيت لما بقرأها اليومين دول فى اطار اكمالى للسلسلة اللى بدأتها وانا طفلة.. بفصل.. اه والله بفصل
 بركز فى الاحداث وبحلم بالحاجات دى الاقى التاريخ مكتوب اتغاظ واتفقع..
كان مفروض يقول 2060 مثلا او اى حاجة تطول مدى الأمل شوية..

الاثنين، 16 مارس، 2015

الرسالة 18 (رسايل الى مجهول)














(18)
متخيلاك واهلك بيتفقوا مع اهلى على الفرح.. العيليتين عاوزين فرح كبير.. 

انت تبصلى تلاقينى ساكتة فتسألنى  انتى عاوزاه ايه؟

اقولك نفسى فى فرح بسيط مايحضروش الا اللى نحبهم ويحبونا بس..

 منبقاش فرجة علشان انا بتكسف..

 وبعدها بفلوس الفرح الكبير نسافر اى مكان نقضى شهر عسل ماحصلش..

تبتسم وتقولى نفس اللى كنت بحلم بيه

الجمعة، 13 مارس، 2015

# مما قرأت









طالب فى المرحلة الثانوية فى احدى مدارس ولاية تكساس.. يدعى تيدى
تيدى ينتمى الى عائلة ثريةمعروفة بتأييدها للحزب الجمهورى الذى طالما حكم تكساس لسنوات طويلة, فجأة قرر الابن تيدى أن يعلن انتماءه للحزب الديموقراطى الذى شعر بالانتصار لانه خطف ابن واحدة من العائلات الامريكية مفرطة الجمهورية ..

والد تيدى شعر بالخيانة بسبب مافعله ابنه الذى فضحه وسط اصحابه فقرر ان يمتنع عن دفع نفقات الجامعة التى كان سينتقل لها ابنه العام المقبل..
 فجأة تحول الامر من خلاف عائلى خلف الابواب المغلقة الى قضية رأى عام .. هلى من حق الابن ان يخرج على الانتماء السياسى للعائلة فى مجتمع محافظ مثل تكساس  ..
بدأ الامر عندما استضافت اشهر محطة اذاعية الاب وابنه فى مواجهةة سياسية على الهوا  ليتحدث الابن عن حقه ويتحدث الاب عن صدمته فى الابن الذى خان مبادئ العائلة وان قرار الامتناع عن صرف نفقات التعليم هو ابسط رد..

انهالت المكالمات على البرنامج تؤيد الابن وتهاجم الاب النتن..
القى الابن بمفاجأة من العيار الثقيل عندما قال انه لايريد من ابيه نفقات تعليمه وقام وهو بطل المصارعة فى مدرسته بتأسيس موقع على شبكة الانترنت يحكى فيه قصته ويروج لمبادئه المناهضة للحزب الجمهورى ويطلب من الذين يقتنعون بقضيته ان يساعدوه على دفع نفقات تعليمه من خلال التبرع له بمبالغ مالية يحصلون مقابلها على اعلانات فى الموقع..
فى خلال ايام معدودة تمكن تيدى من جمع اربعة الاف دولار من مناصريه الذين كان على رأسهم جدته أم والده..
المثير فى الامر ان تيدى لا يزال يقيم فى منزل والده الذى لم يصعد الامر واكتفى بعقوبات اقتصادية على نفقات التعليم لا على "المم" والنوم ..
فى برنامج "انسايد إيديشن" ظهر الاب والابن وهما يجتمعان فى مطبخ منزل العائلة فى مماحكة سياسية يتحدى فيها الابن اباه من انه سيتكمن من اقناعه بتغيير انتمائه السياسى , بينما يؤكد الاب انها نزوة وستنتهى.. فيما تحاول الاخت الصغرى ان تقنع اخاها بأن يعيش عيشه اهله الجمهوريين,
انتهى التقرير بلقطة للاب والابن يتصارعان سويا وهما يؤكدان للبرنامج انهما برغم خلافاتهما السياسية لا زالا أعز صديقين وان السياسة لن تتمكن من تدمير محبتهما !

أبسلوتلى احنا عندنا أزمة

الاثنين، 9 مارس، 2015

عنها 40








ولسه بتسأل مين انا ؟!

انا الماضى ..انا الحاضر..انا الاتى
انا فرحك.. انا حزنك..انا دمعك وضحكايتك
انا حلمك.. انا حكايتك
انا قلمك.. انا خطك.. انا روايتك
انا سطورك..انا حروفك وشخبطك
انا علامات بترسمها تحت الكلام فى كُتبك
انا عروستك وبنوتك وكل نساء مملكتك..انا ملِكتك
انا نورك.. انا ضِلك وضُللتك
انا بيتك..انا سترك
انا خوفك ..انا امانك
انا سندك وساندة عليك.. انا مِنك

الأحد، 8 مارس، 2015

الرسالة 17 (رسايل الى مجهول)



















(17)

عارف نفسى تطلع راجل.. راجل بضل ..

 تحمينى وماخفش من اللى جاى وانت جنبى..

 انا اه جدعة ومعتمدة على نفسى بس زهقت 

وعاوزة اعتمد عليك بقى..