الجمعة، 14 ديسمبر 2012

عن ..الربع جنية







من يومين كده كنت بحاسب واحد من الزباين وكان بقيله ربع جنيه,ودار بينا الحوار ده..

انا:ثوانى اجيبلك الربع جنيه الباقى
الراجل: خليه يادكتورة مش مهم
انا: لا ازاى ده حقك 
الراجل :مش مستاهلة ياستى ثم هو بقى لسه فيه حاجة اسمها ربع جنيه ده الجنيه نفسه خلاص الله يرحمه اقولك ولا تزعلى هاتيلى بيه اى حاجة مناديل مثلا..
انا:معلش المناديل بنص !
الراجل(وهو بيضحك): علشان تصدقى لما اقوك مش جايب همه ..اقولك هاتى فوار اهضم بيه اللى بيحصل ..واخده ومشى
طلعت انا بقى الربع جنيه من الدرج وفضلت ابصله..يااااااااااااه اد كده مابقاش ليك قيمة؟!
فين ايام زمان..انا فاكرة كوبس وانا صغيرة قبل مادخل المدرسة على طول.فاكرة لما بابا الله يرحمه كان بيدينى مصروفى اللى كنت ببقى مصممة انه يبقى ربع جنيه..حتى لما كنت باخد نص او جنيه كنت بصمم انه يتفك ارباع..ماكنتش بفرح الا لما امسك الورقة اللى ماعرف ان كان لونها ازرق ولا اخضر!
كنت بشوفها مختلفة عن باقى الفلوس وياسلام لو كانت عيدية..ربع جنيه جديد لانج والوانه زاهية كده وتشد..قمة الفرحة
كان بيجيب وقتها حاجات كتيرة..كان بيجيب كل الحاجات اللى انا بحبها على الاقل..بلونات..شيكولاتات..بومب..كل حاجة وخصووووصا البسبوسة ..

كنت انا واصحابى نروح لمحل الحلويات اللى فى اول الشارع وكل واحد معاه الربع جنيه بتاعه ونديهم للراجل اللى عارف طلبنا اليومى طبعا ..كل واحد قطعة البسبوسة المتينة :)

عدت الايام وفضلت معزتى للربع جنيه زى ماهى..احب ادى لاصحابى فى العيد ربع جنيه جديد مكتوب عليه كلمة حلوة واخد منهم بردو ربع جنيه مكتوب عليه كلمة حلوة..
فضلت معانا العادة دى لحد ما طلعولنا فى يوم بحكاية الربع جنيه المخروم..وبعدين سدوا الخروم وعملوا الربع جنيه المقروض الصغنن ده ..بهدلوه يعنى..وماكتفوش بده ..لا..وصلوا الناس لدرجة الزهد فيه حتى ولو كان حقهم !!
حطيت الربع جنيه فى الدرج تانى ولقتنى بقول ..ايييييييه كانت ايام
 

الثلاثاء، 30 أكتوبر 2012

عن.....مش عارفة!!






عن..انك تكون بتعيش علشان تشتغل

عن..الفرحة اللى بتحنسك تقرب منك تيجى تمسكها ولا كأنها كانت هنا

عن..الحلم اللى مش حلمك وانت اللى بتستعبط ولازق فيه

عن..الصداقة اللى قلبت حب وبعدين وقفت لاعارفة تكمل ولا ترجع زى ماكانت..باظت

عن..الاحلام اللى لسه ماتحققتش

عن..القعدة على لسان راس البر

عن..صفحات الكتاب اللى بتقلبها مش علشان خلصتها لا..علشان تحاول تخفى الصورة اللى عمالة تنطلك كل ماتقلب صفحة

عن..الرسالة اللى على موبايلك واللى مش راضى تمسحها وكل ماتقراها تبتسم وتدمع

عن..دقات القلب اللى بقت عملة زى دقات الساعة..وقت بيعدى وخلاص

عن ..لمعة العيون اللى مانت عارف تفسرها ان كانت دمعة حزن ولا فرح ..ولا تراب مالى الجو

عن..الحاجات المناسبة اللى بتيجى فى وقت مش مناسب

عن ..الحاجات اللى مش مناسبة وبتيجى فى وقت مناسب

عن.. اللايك اللى بتلاقيها على الفيس وبتبقى مش عارف  تفسرها بايه..يعنى كده اتصالحنا ولا لاء

عن..المفجأة اللى بتستناها ومابتجيش

عن..الحد اللى بيختاره قلبك  وكل الناس تقولك مش مناسب..حتى هو

عن..السؤال اللى بيفضل يزن فى دماغك..ياترى دماغه مشغولة بيك كده ولا انت بس اللى تاعب نفسك فى الفاضى

عن..انك تكونى بتحبيه وعارفة ان ده حب عمرك قلبك بيقولك كده بس الكل يلومك ويقولك ماينفعش ده اصعر منك..وكأنه ذنبك

عن..انه يكون حد وحش جدا واذاكى جدا وبرده انتى اللى تتلامى ..انتى اللى اخترتى

عن..انك تقررى تروحى وتقوليله بحبك لانك مش قادرة تستنيه وخايفة الوقت يعدى وهو   ساكت وخايفة ماتقوليش وتضيعى فرصة سعادتك..وبرده يفضل ساكت

عن..انك تكونى صح والكل بيلومك وبيقولك انك غلط فتشكى فى نفسك وتقولى اكيد انتى اللى غلطانة ازاى تكونى صح والكل غلط..بس غلطت فى اى

عن..انك تمشى تمشى تمشى لحد ماتنهجى من كتر التعب وتقف تاخدى نفسك تلاقيكى واقفة فى مكانك

 

 

الأحد، 21 أكتوبر 2012

عن .....انى لسه بعرف احلم!!







كنت حاسة انى بطلت احلم من فترة..

اه مابقولش ده..اه بغنى وبقول لو بطلنا نحلم نموت..

اه بتكلم عن الاحلام مع اصحابى و فى المدونات وسعات كمان بتاخدنى الجلالة وبتكلم عنها هنا فى المدونة..!

بس انا من جواية عارفة انى بطلت احلم..بطلت امنى نفسى بحاجات وفى الاخر مابتحصلش..

عارفة انه نصيب..وعارفة ان اللى حلمت بيه وسعيت له وماتحققش يبقى ربنا مش كاتبهولى..وعارفة ان ممكن يكون الغلط منى وانى انا اللى جايز اكون ماسعتش صح وماشتغلتش على حلمى صح وجايز كمان اكون سعيت للحلم الغلط من الاول!!

بس المحصلة ان غالبية احلامى ماتحققتش..وفى احلام منها خلاص ماعدش ينفع تتحقق..مش يأس بس فى نوعية احلام بتبقى مصحوبة بوقت لو عدى منك خلاص خلصت..
وفى نوعية تانية من الاحلام بتبقى مربوطة بالناس..ودى كتيرة عندى الصراحة  ودى بقى مشكلتها انها حتى لو بذلت فيها اقصى مجهودات علشان تتحقق فى اطراف تانية لازم تشاركك فيها  ودول فى حالتى يا اما مش بيعملوا اللى عليهم يا اما مش بيجوا اصلا..وفى الحالتين الحلم باظ..

المهم..انا بقى تعبت من كتر ما الاحلام دى مش بتتحقق وتقريبا علشان ابطل ازعل  ..بطلت احلم..

لحد ما جه اخى العزيز خالد زين صاحب مدونة سواح فى ملك الله واقترح عليا فى تعليق له على الفيس انى انزل كتاب زى مجموعة المدونين اللى ربنا وفقهم وعملوا ده..

ساعتها تنحت لشاشة الكوبيوتر ولقتنى وبصوت عالى بقول انا؟ انزل كتاب باسمى؟

هو ساعتها انشغل وقعد يدور فى المدونات على خطوات اصدار كتاب وانا سرحت بقى..

ياترى هيبقى اسمه ايه كتابى العزيز ده..ياترى هكتب فيه ايه..ولو جمعت كل اللى كتبته فى المدونة او حتى فى اجندتى ينفع يبقى كتاب..؟

طبعا اول حاجة فى الكتاب لازم اعمل اهداء..هعمل اهداء لروح ابى الحبيب ولامى واختى وامنية صحبتى واكيد للاستاذ خالد اللى طالع عينه وعمال يدورلى دلوقتى ده..

ياترى اختار شكل الغلاف ايه ولونه..اه لونه ده مهمة جداااا..لازم يبقى لون شبهى كده :)

ولا حفل التوقيع ..يوووووووووووه ده هيبقى حتة يوم ..اكيد كل اصحابى هعزمهم وهشوف كل المدونين ..هشوف سهاد ودعاء اللى متشحططة علشان اشوفهم ومش عارفة :) اخيرا هقابلكم يابنات ده حفل توقيع كتابى وممنوع اى اعذااار....

تقدروا تقولوا وبكل ثقة انى حلمت بكل التفاصيل.. ده انا جالى احساس بالخوف المصحوب بالفرحة كمان بغض النظر عن انى مش عارفة هكتب فيه ايه..

الحلم ده اخد منى طول الليلة دى وصحيت تانى يوم لقتنى منشكحة جدا...

اينعم بالليل عرفت ان المسابقة بتاعة النشر لمن يستحق خلصت...واينعم لما فكرت شوية لقتنى مش اد الحكاية لانى بكتب لنفسى اكتر وحاسة انى ماعنديش مادة تنفع للنشر
 كل اللى املكه حبة افكار فى الغالب غير مرتبة ولا تصلح انها تترتب اصلا لانها عبارة عن احاسيس ساعة ما بحسها بكتبها يبقى هرتبها ازاى؟؟؟

اينعم الحلم ماكملش..كالعادة

بس ساب فيا تأثير حلو ونجح انه يخلينى مبتسمة طول اليوم ده من برا ومن جوا كمان :)

احلى حاجة بقى..

انى طلعت لسه بعرف احلم...

الأربعاء، 17 أكتوبر 2012

عن..بيت البيوت..










كنت بتفرج على حاجة سورى تقريبا او حاجة تركى مدبلجة بالسورى غالبا..وكان فيه طفلة بتلعب لما سألها حد بتعملى ايه قالتله بلعب ((بيت بيوت))..

ساعتها سرحت-وانا بسرح كتير باين اليومين دول- وافتكرت ايام زمان..كنت بحب العب اللعبة دى انا واصحابى كتير بس ماكنش اسمها كده ..كنا مسمينها((سكنة)) -بضم السين- نخلص جرى ونط الحبل وكهربا ولما نحب نهدى بقى نقول يلا يا عيال نسكن..

كل واحدة من صحباتى بتجيب فنجان من فناجين مامتها اللى مستغنية عنها طبعا..وانا عندى الصنية وعندى الورد وعندى المية..وطبعا مفهومة ان المية بنملا بيها الفناجين علشان نشربها والورد علشان ناكله..ايون كنا بنقطع ورقه وناكله :)
وكان بيبقى التجمع عندى بسبب توفر المكان .. واقدملهم بقى-بما انى صاحبة البيت- الصنية عليها فناجين المية والورد ونفضل نشرب وناكل لحد مايجيلنا تخمة او يجى معاد مرواحهم..
ايااااااااام....

 

السبت، 13 أكتوبر 2012

نفسى ومانفسيش.!!!





كنت بقرا كتاب من فترة ل د/احمد خالد توفيق اسمه ESP
فى الكتاب البطلة عندها قدرة الاحساس الفوق طبيعية او الحاسة السادسة زى ماهى متعارف عليها

طبعا معظم الناس فاكرين ان عندهم الحاسة السادسة دى..وبيتعاملوا مع اللى حواليهم من هذا المنطلق..

الكل عارف اللى قدامه بيفكر فى ايه..الكل متوقع ردود فعل اللى حواليه..الكل موهوب والكل عنده مالايملكه الاخرون...
بارونويا مفهومة ومعروف وممكن التعامل معاها ...
 
لكن هنا بطلتنا كانت فعلا عندها الموهبة دى..كانت بتقرا افكار اللى قدامها وبمجرد سلام عادى ممكن تعرف هو كويس ولا وحش طيب ولا خبيث..

بعد ماقريت سرحت..ياترى لو اعرف اقرا افكار اللى قدامى..ياترى لو عندى موهبة اعرف بتعامل مع حد طيب ولا وحش..

الوجوه المبتسمة اللى بقابلها ليل ونهار دى وراها ايه؟؟
احساس حلو الحقيقة هيخلينى اتفادى الجرح والكدب والخيانات..

موهبة هتوفر عليا وقت كتير فى انى اعرف اللى بتعامل معاه من غير ماحتاج وقت لدراسته..هتعرفنى مين يستحق اثق فيه ومين لاء..
 كنز كنز بجد...حياتى هتتغير جدا..هتبقى احسن بمراحل.

وبعدين لقتنى سكت كده..
طب ياترى لو اكتشفت ان اعز الناس مش كويسين..ياترى لو قريت افكارهم وماعجبتنيش..
ياترى هحب اجرب؟ هحب اعرف؟؟

ياترى لو قريت افكار اللى قدامى هيفضلى  ناس ينفعوا يتصاحبوا؟؟
والسؤال الاهم بقى لو حد قرى افكارى هتبسط؟ ياترى هتفضل فكرته عنى زى ماهى؟

هى مش وحشة ..بس برده تفضل افكارى..حاجة انا حرة ارتبها انكشها..افكار تكون شريرة بطبيعة بشرية بحتة وبعدين ارجع انا لعقلى فى اخر لحظة ومانفذهاش..

افكار ماتمناش حد يعرفها غير ربنا..هو اللى قادر يهديها ويسامح فيها ..
وياسلام لو افكارى دى هى مشاعر ناحية حد وجنابه قراها قبل ماعرف جواه زيها ولا لاء..
يادى التسييح!!!!

لا لا انا كده تمام جدا وفلة على الاخر..
احمدك يارب على نعمة الستر..

السبت، 29 سبتمبر 2012

عن...عنها 1












قالتله..

عارف لما بسأل عليك رغم عدم سؤالك عليا بالايام والاسابيع بحس بايه؟!!

عارف بحس بايه لما بسأل رغم انى قايلة لنفسى مليون مرة انى مش هعمل كده؟!!

بحس انى بكره ضعفى..بكره اهتمامى..

بكره قلبى الاقوى منى واللى بيخلينى اعمل ده..

بكره عقلى العبيط الضعيف اللىى مش عارف يمشى كلمته عليا..مش عارف يمشى كلمته على حتة قلب لا لف ولا دار ولا عرف غيرك..

بكره نفسى..
بكرها علشان بعد كل ده مش عارفة تبعد!!!

الأحد، 23 سبتمبر 2012

عن....مش عارفة!



من رسائلى اليك..........



ياترى هنبقى شبه بعض..ياترى هيبقى بنا حاجات مشتركة ونبقى بنكمل بعض؟
ياترى هنبقى عكس بعض ..وتجذبنا الاختلافات..
 ياترى هنبقى مش طايقين بعض وتبقى الحدوتة ما محبة الا بعد عداوة؟

ياترى هتتأخر؟..
ياترى هتيجى!!!!

الثلاثاء، 18 سبتمبر 2012

مع نفسى 13






انا متصالحة مع الدنيا...ايووووووون زى ماقريتم كده بالظبط..

غريبة؟!
مع انى شيفاها عادى..جايز التعبير هو اللى غريب..متصالحة !

اصل الحكاية ماينفعش تتسمى حب..او هو حب بس مش حب  اوى يعنى..
ابسطهالكم..

انا بحب حاجات فى الدنيا ..بس مش بحب الدنيا نفسها..!!
يعنى مثلا بحب اغنى بصوت عالى..بحب اضحك بصوت عالى..بحب اتفرج على افلام اجنبى..

بحب اسمع قرأن مش لانه واجب لاانا بحب اسمعه علشانه هو وياسلام بقى لو بصوت عبد الباسط..مزاج 

بحب اسمع حمزة نمرة ومنير جدا..بحب اقرا..وبعرف اقرا اللى بحبه  وشايفه ان دى موهبة على فكرة:)
حاجات كتيرة بحبها فى الدنيا ..بس مش بحب الدنيا نفسها..مش مرتبطة بيها يعنى ومافيش حاجة لحد النهاردة مخليانى ماسكة فيها..ممكن اسيبها عادى..!
 مش يأس على فكرة بس هو احساسى كده..عارفين شبه ايه ..اتنين مش طايقين بعض بس مضطرين يتعاملوا مع بعض بس كل واحد منهم جواه اللى جواه!!

بس انا بقى طلعت احسن منها ولقيت فيها حاجات تتحب..مش عارفة بالنسبة ليها بقى....

هى حرة 

********************

على الهامش كده: زى النهاردة من سنتين كنت لسة ببدأ فى المدونة دى ..بصراحة مش مصدقة نفسى :)


الأحد، 16 سبتمبر 2012

عنهم 4....










عنهم النهاردة غريبة شوية ومحيرة بالنسبالى على الاقل لانى مش عارفة احددلكم مين بطلها!!

قصتنا النهاردة حصلت فى دولة الممالليك ..الدولة دى يا جماعة شأنها شأن اى دولة كان ليها وقت كانت فيه فى قمة مجدها وبعدين انحدرت وانتهت...

كان من احد اسباب انحدارها بقى هو اهتمام ملوكها وحبهم للجوارى!! وسيبانهم امور الحكم للوزراء ..

واحد بقى من الملوك دول هو (الملك الصالح اسماعيل ابن الناصر محمد قلاوون) ..

الراجل ده كان بيحب الجوارى جداا حتى كانت ليهم الكلمة العليا فى دولته..اخينا ده بقى كان اكتر اللى بيعجبوه الجوارى السود..

حظيت بحبه وقتها جارية سوداء كان اسمها(اتفاق)..

الجارية دى كانت بتجيد الغناء والعزف على العود ..فاخينا حبها واتجوزها..
 اخوه بقى الملك (شعبان) كان بيحبها هو كمان ..قوم ايييه لما مات الصالح اسماعيل سنة 746هجرية..خلفه اخوه شعبان واتجوز الست اتفاق فى نفس يوم وافاة زوجها اللى هو اخوه !!

لما اتخلع بقى الملك شعبان واتقتل فى سنة 747هجرية خلفه اخوه الملك المطفر (حاجى)..البيه ده بقى اتجوزهاليلة خلع اخوه !!!
ولما غنتله الست اتفاق انعم عليها باربعة فصوص وست لؤلؤات ثمنهم اربعة الاف دينار!!

وده كان تالت سلطان من ابناء محمد ابن قلاوون يتجوز اتفاق..

وكل مرة كان بيكتب كتابها قاضى.. مع علمه ببطلان العقد  لعدم تجاوزها فترة العدة

الست دى شافت عز فى عهد الملوك التلاته ماشفتهوش ولا واحدة تانية فى زمنها..

ها بقى يا جماعة...
تفتكروا  الاحق بالبطولة ودخول التاريخ الاخوة التلاتة ولا اتفاق؟؟؟!!!!
 

السبت، 15 سبتمبر 2012

عنهم3.....



يحكى انه فى عصر المماليك ..كان يوجد ملك اسمه الملك الناصر صلاح الدينى التانى ابن العزيز محمد ابن الملك الظاهر غازى..
كان هذا الملك ملكا على حلب او صاحب حلب زى ما بيذكر فى كتب التاريخ..

تولى الملك وعنده سبع سنوات بسبب سياسة التوريث الفاشلة واللى كل هدفها تخليد ملك لا يدوم!! ماعلينا نرجع للملك الناصر..

كبر الملك ده على حب اللهو تاركا امور الحكم والكلام الفارغ ده لوزرائه!!!

لما اجتاح المغول حلب سنة 657 هجرية تركها الملك وهرب لدمشق!!

ويحكى انه لما ذهب الاديب الاندلسى موسى العنسى الى دمشق وكان فيها هذا الناصر فذهب ليعزيه لان المغول امعنوا فى القتل وتعذيب اهل حلب ..

فأضرب الملك عن سماع حديثه واخذ ينثر فى ابيات يرثى فيها مملوك كان يحبه وقد مات فى تلك الكارثة!!
فقال:
والله لا ابكى لملك مضى        ولا لحال ظاعن او مقيم
وانما ابكى وقد حق لى        لفقد ماكنت به من نعيم

ثم بعدها نراه هائما على وجهه حتى لجأ الى هولاكو ملك المغول ...ومعه اخوه وبعض امراء البيت الايوبى
 وبصراحة الراجل عمل اللى عليه ورحب بيهم بل واحسن اليهم كمان...
 بس يافرحة ماتمت خدها الغراب وطار!!

وصل هولاكو وقتها اخبار معركة عين جالوت..اللى هزم فيها جيش قطز بقيادة بيبرس المغول هزيمة ساحقة..
اووووووووم ايه ..فى ثانية امر هولاكو بقتل كل العالم  اللى عنده دى واولهم بطلنا الهمام..الملك الناصر!!

الأحد، 9 سبتمبر 2012

عن...قالولى










قالولى هى الدنيا كده..يا تضحك فيها يا تعيط..مافيش حلول وسط..
 قولتلهم اومال التتنيح ده يبقى اسمه ايه!! حل ده ولا مش حل؟

***********





قالولى..لازم تلاقى حد تفضفضيله وتحكيله عن كل اللى جواكى..
قلتلهم طب لما الاقى الحد ده ويطلع فتان ..ويروح يسيح..
يبقى الحل ايه بقى!!!!!
**********************



قالولى..الصوت العالى يدل على ضعف الموقف..
قلتلهم ..طب نعمل ايه فى ناس مابتفهمش الا لما نزعقلهم..مابتسمعش الا لما نصرخ باللى جوانا
مابتحسش الا لما نلطشها ألم.!!!!!

**************************




قالولى لما تكبرى هتحققى كل احلامك...
قلتلهم ..هى تكبرى دى مالهاش حدود زمنية؟ فى المطلق يعنى ؟
ولا انا لسه ماكبرتش ؟؟!!!!!
*************************




قالولى كل اللى يضايقك طنشيه ولا كأنك شيفاه..

قلتلهم..علشان ماشفهوش لازم اغمض عينى...
ادينى غمضت عينى اهو..مشى ولا لسه..
لسه!؟

خلاويص؟!!!!!!!
*********************

الأربعاء، 5 سبتمبر 2012

مع نفسى 12




دخلت الفيس امبارح لقيت رسالة على البرايفت من صديق على الفيس بيقولى انا متردد من زمان ونفسى اسألك..هو انتى عندك كام سنة؟
فى الاول كنت ناوية اديله درس فى الاتيكيت وان ازاى ماينفعش تسأل بنوتة هذا السؤال...
بس لقتنى بجاوبه ...امبارح..كان عمرى 20 :p

*******************
كنت مع صحبتى فى قاعدة ولقينا واحدة تالتة بتسألها عن سنها..فصحابتى وبكل ثقة راحت قيلالها سن اصغر من عمرها الحقيقى بسنتين...
ميلت عليها وقلتلها لازمته ايه الكدب يابنتى مش مستاهلة..
قالتلى يا نور يا حبيبتى الحاجات دى اسمها كدب ابيض مابتضرش..
ورغم عدم اقتناعى بموضوع الوان الكدب دى بس لقتنى بسأل نفسى فى عقل بالى
ياترى هيجى اليوم واكدب انا كمان؟؟

*********************
مابحبش اعياد الميلاد..بتفكرنى ان فيه سنة عدت ولسه قدامى حاجات كتير ماعملتهاش
وان احتمال يبقى فيه سنة جديدة ماعرفش ايه هيحصل فيها..
وانا بطبعى مابحبش انتظار المجهول..

********************
الوقت بيعدى..والعمربيجرى..ولازم الحق اعمل حاجات كتيرة اوى..
لازم اجرى...
بس المشكلة انى مابحبش الجرى..وديما لما بجرى علشان الحق حاجة مابلحقهاش
 

الأربعاء، 29 أغسطس 2012

عنهم....2




وحكايتهم النهاردة بعنوان..الغباء العبقرى!!!

فى اوقات الواحد بيسمع فيها اراء او تعليقات غبية جدا غباء يصل لدرجة العبقرية!!
واليكم بعض منهم.....

**مس الاباما التى صارت ملكة جمال امريكا عام 1995
سألوها:اذا ماستطاعت ان تعيش للابد فهل تقبل؟ولماذا؟
الاجابة: لن اعيش للابد لانه لايجدر بنا ان نعيش للابد..لانه لو عشنا للابد فلسوف نعيش للابد..ولكن ليس بوسعنا ان نعيش للابد لهذا لن نعيش للابد..

**********
**النجمة بروك شيلدز

التدخين يقتل..واذا انت قتلت فقد فقدت جزءا مهما فعلا من حياتك!
***********
**ونستون بنيت-لاعب كرة سلة

لم يسبق لى ان اجريت جراحة ركبة فى اى جزء اخر من جسدى!!
************
**مرشح انتخابات فى تكساس

هذا الوغد المنحط يستحق ان يركله جحش حتى الموت وانا الرجل القادر على القيام بهذا العمل... 
**************

**ال جور-نائب الرئيس كلينتون

*نحن نتأهب لحادث غير متوقع قد يحدث او لا يحدث

*ليس التلوث هوما يؤذى البيئة..بل مايفعل ذلك هو الشوائب فى الهواء والماء..
****************

**كولونيل جيرالد ولمان-مدرب فى الجيش

نحن لا نفرق بين الناس..فقط نحن نستبعد نوعا بذاته من البشر..
***************

**بيل كلينتون

لو لم ننجح فنحن نجازف بالفشل!!!
**************
**ادارة التموين-جرينفيل-ساوث كارولينا

سوف تتوقف كوبونات الطعام الخاصة بك بدءا من مارس 1992 لاننا تلفينا مذكرة تقول انك توفيت..ليرحمك الله يمكنك تقديم طلب ثانى فى حالة تغير ظروفك..
****************

**جورج. و. بوش

ده بقى عبقرى جدا قال 3 جمل خرااااااااااافة

1\ ان لدى ارائى الخاصة..اراء قوية.. لكنى لا اتفق معها دائما

2\"البيت الابيض ..ابيض "   دى بقى قالها لما سأله طالب بيرطانى عن رأيه فى البيت الابيض..

3\ لولا اختراع الكهرباء ..لجلسنا نشاهد التليفزيون فى ضوء الشموع !!!!

-----------------------------------
من احدى مقالات الدكتور احمد  خالد توفيق
-------------------------------




نكتفى بهذا القدر من العبقرية مع وعد منى بالبحث عن المزيد منهم....اهم يضحكوا الواحد فى وقت زنقة :D

                    


السبت، 25 أغسطس 2012

عنهم.......



هذا الجزء من ال عن...(عنهم) هيتناول قصصهم..وهم هيكونوا شخصيات قابلتهم فى الحقيقة او فى الروايات او فى الكتب حكم قصة تخصهم او تخص غيرهم..
قصة لفتت نظرى وقررت اسجلها ...وياريت تبقوا تقولولى اى لفت نظركم فيها..اذا ده حصل يعنى....
1_





هو طفل يبلغ من العمر 6 سنوات تقريبا لم تكن له هوايات فى هذا العالم سوى الوقوف امام فاترينات محلات الهدوم الرجالى..مش علشان يتفرج على الهدوم نفسها ..وان كان اكتر ما يلفت نظره فيها هى البدل ..وانما علشان يتفرج على الموديل اللى لابس البدلة!!
كان دايما بيختارهم لابسين بدل..لانها بتدى احترام اكتر وبيبقوا شبه الحد اللى بيدور عليه
كانت بقى متعته انه ينزل مع مامته وهى نازلة السوق ويحب يقف ويقارن بين الموديلات دى مين شكله احلى وياترى يكون اشقر ولا اسمر...ده شكله قاسى وده شكله طيب...كانت متعة مابيبوظهاش الا ان امه مابترضاش تطول امام المحلات دى وبتحب اكتر محلات الاطفال...

دور كتيرولكن مالقاش اللى بيدور عليه واهى جت الفرصة اللى بيتمناها...والدته اتأخرت النهاردة عن معاد الانصراف من المدرسة والبواب مشغول مع اهالى زمايله بيكلمهم باحترام وبيطمنهم على ولادهم..قرر انه ينتهز الفرصة ويروح يدور على ضالته..
مشى لحد ما قابل اول محل رجالى وفضل يبص بتركيز لكل الموديلات المعروضةويقارن لحد ما لقى اللى بيدور عليه..دخل المحل بخجل وسأل البياع عن سعر الموديل ده..الراجل ابتسم واستغرب وقاله طيب فين باباك يا جميل علشان يقيس البدلة..
رد عليه الطفل بابا مات وانا مش عاوزالبدلة بس ..انا عاوز الراجل اللى لابس البدلة والبدلة علشان يبقى (بابا)...... انا بس عاوز اعرف سعره من حضرتك علشان اقنع ماما تيجى تشتريه
بصله الرجل باستغراب وعطف وقاله يا حبيبى بس ده ماينفعش اب انت محتاج واحد زينا بيتكلم وبياكل وبيمشى ..انسان يعنى
خرج الطفل حزين من المحل بعد مافقد امله فى انه يبقى عنده اب يحترمه البواب ويقف معاه كتير لما يجى ياخده اخر اليوم..اب يتباهى بيه وسط اصحابه اللى كلهم عندهم ابهات وهو لا..هو بس اللى عنده صورة لابوه متعلقة على الحيطة فى الصالون..اب مات فى الحرب زى ماقالتله امه..صورة مابتعملوش اى حاجةمن اللى نفسه فيها
مشى الطفل حزين وهو باصص فى الارض لحد ماخبط فى رجل واحد ماشى ..بصله وقاله معلش يا حبيبى..وكانه نجده نزلت من السما..بس هو ده..
راجل وفى ايده جرناله ومش معاه ست ولا طفل جميل جدا ..هو ده

مشى الراجل ومشى الطفل وراه ..دخل الراجل كافيه والطفل فضل وراه يبصله من برا لحد ما الراجل اخد باله منه وبصله بدهشة وندهله يدخل ...
قاله انت جيت هنا ازاى مش انت اللىخبطت فيك؟!
قاله اه اصلى مشيت وراك..
طب عاوز ايه اجيبلك اكل ولا فلوس؟
قاله لا مش عاوز  ..قاله انت صغير اوى انت مش عارف ترجع بيتكم ولا ايه
 هزالولد راسه ..قرا الراجل اسمه المدرسة على قميص الولد وقاله تعالى انا هوصلك.. فى الطريق سأله الطفل..
 هو انت عندك ست وطفل؟
ضحك الرجل وقاله قصدك زوجة يعنى لا ياسيدى ماعنديش انا مش متجوز..
 ابتسم الطفل  ببراءة وقاله طيب مش عاوز ست وطفل؟اندهش الرجل وسأله عن سبب سؤاله ده
حكى له الطفل القصةمن اولها فلمعت عيناالرجل بالتأثر ..وسكت شوية وبعدين قاله ندور على مامتك الاول اللى قلقانه عليك دلوقتى وبعدين نشوف الموضوع ده
فرح الطفل واعتبر دى موافقة ومشى معاه لحد ما وصلوا المدرسة
واول ما شافته امه فضلت تحضن فيه وتحمد ربنا ولما هديت اخدت بالها من الرجل اللى معاه ..شكرته انه رجلعها ابنها قبل مايستأذنها انه يمشى ..
نداله الطفل وقاله رايح فين انت وعدتى تفضل..
قاله روح دلوقتى وانا هبقى ازوكم فىالبيت ..وانصرف

سألته امه عن قصد الراجل ايه فقالها عن الاتفاق..
احتضنت ابنها فى حزن وقالته طالما قالك جاى فهيجى..

ونزلت كلمة النهاية على ظهر الطفل الحالم وامه الحزينة

دى كانت قصة فيلم تناولتها السينماالروسية من اكتر من25 سنة ونزلهاالاستاذ عبد الوهاب مطاوع فى كتابه(افتح قلبك)