السبت، 13 أكتوبر، 2012

نفسى ومانفسيش.!!!





كنت بقرا كتاب من فترة ل د/احمد خالد توفيق اسمه ESP
فى الكتاب البطلة عندها قدرة الاحساس الفوق طبيعية او الحاسة السادسة زى ماهى متعارف عليها

طبعا معظم الناس فاكرين ان عندهم الحاسة السادسة دى..وبيتعاملوا مع اللى حواليهم من هذا المنطلق..

الكل عارف اللى قدامه بيفكر فى ايه..الكل متوقع ردود فعل اللى حواليه..الكل موهوب والكل عنده مالايملكه الاخرون...
بارونويا مفهومة ومعروف وممكن التعامل معاها ...
 
لكن هنا بطلتنا كانت فعلا عندها الموهبة دى..كانت بتقرا افكار اللى قدامها وبمجرد سلام عادى ممكن تعرف هو كويس ولا وحش طيب ولا خبيث..

بعد ماقريت سرحت..ياترى لو اعرف اقرا افكار اللى قدامى..ياترى لو عندى موهبة اعرف بتعامل مع حد طيب ولا وحش..

الوجوه المبتسمة اللى بقابلها ليل ونهار دى وراها ايه؟؟
احساس حلو الحقيقة هيخلينى اتفادى الجرح والكدب والخيانات..

موهبة هتوفر عليا وقت كتير فى انى اعرف اللى بتعامل معاه من غير ماحتاج وقت لدراسته..هتعرفنى مين يستحق اثق فيه ومين لاء..
 كنز كنز بجد...حياتى هتتغير جدا..هتبقى احسن بمراحل.

وبعدين لقتنى سكت كده..
طب ياترى لو اكتشفت ان اعز الناس مش كويسين..ياترى لو قريت افكارهم وماعجبتنيش..
ياترى هحب اجرب؟ هحب اعرف؟؟

ياترى لو قريت افكار اللى قدامى هيفضلى  ناس ينفعوا يتصاحبوا؟؟
والسؤال الاهم بقى لو حد قرى افكارى هتبسط؟ ياترى هتفضل فكرته عنى زى ماهى؟

هى مش وحشة ..بس برده تفضل افكارى..حاجة انا حرة ارتبها انكشها..افكار تكون شريرة بطبيعة بشرية بحتة وبعدين ارجع انا لعقلى فى اخر لحظة ومانفذهاش..

افكار ماتمناش حد يعرفها غير ربنا..هو اللى قادر يهديها ويسامح فيها ..
وياسلام لو افكارى دى هى مشاعر ناحية حد وجنابه قراها قبل ماعرف جواه زيها ولا لاء..
يادى التسييح!!!!

لا لا انا كده تمام جدا وفلة على الاخر..
احمدك يارب على نعمة الستر..

هناك 22 تعليقًا:

P A S H A يقول...

الستـــر نعمــة
:)

مسلم مصرى يقول...

عندك حق
تحياتى :)

سواح في ملك اللــــــــــــــــــه- يقول...

الحاسة السادسة

هي كانت موجودة عند القدماء في غياب ادوات الاتصال

بس مش بالطريقة اللي بتقولي عليها

يعني مثلا سيدنا عمر رضي الله عنه

كان قد ارسل جيشا لمحاربة الفرس

وكان يخطب في المسجدبين المسلمين

ففي لحظة توقف عن الخطاب وقال

(( "يا سارية الجبل، الجبل، من استرعى الذئب الغنم فقد ظلم"

وكان يقصدان يحتمي جيش سارية بالجبل

وسمعه سارية

واحتمي بالجبل

وكانت لحظة انتصار للمسلمون

ولم تكن هناكاي وسائل اتصالات ولا اقمار صناعية

مصطفى سيف الدين يقول...

الحمد لله على نعمة الستر
وحده خالقنا من يغفر لنا زلاتنا و يتوب علينا
اما قارئي الأفكار من البشر سينظرون لنا باحتقار دائم
تحياتي

AhMeD RaDy يقول...

صيدالانية

ساعات بعمل كدا والله بقول يا سلام اعرف بس هو بيفكر فى ايه !! اللى ادامى دا !!

ولكن فعلا من رحمة ربنا به انه مش يدينا القدرة دى عشان بالطريقة دى ممكن بجد ما نقدرش نعيش !! الا لو كلنا عندنا نفس الخصية فكلنا هنقى نفسنا من الشوائب اللى جوانا

جميل البوست يا فندم

ابراهيم رزق يقول...

ايه يا نوووووووووور

هتعملى زى سى محمد افندى عبد الوهاب
لما قال
ياريتنى صحيح اقدر اعرف واساله على فى بالى
اذا كان مشغول و لا خالى

تحياتى

E73 يقول...

تصدق يالحمد لله ان افكارنا بيننا وبين ربنا

ههههههههههه انهمكت قوي في البوست وفتحت فالضحك عند نقطة تسييح دي

لا دا مش هيبقى تسييح حضرتك دي هتبقى فضايح >_<

الحمد لله ربنا امر بالستر ^^"

نهر الحب يقول...

بصي يا ريمو
انا مع الرأي التاني
دي من نعم ربنا علينا اننا منعرفش للي قدامنا بيفكر فيه ايه
لسبب بسيط اوي
ان لكل حاجة وقتها يعني ممكن اعرف حد وافضل عارفاه وهو مش كويس بس ربنا له حكمة في اني افضل عارفاه لوقت معين عشان اوصل لنتيجة معينة
والعكس ممكن يفضل حد قدامي مش عارفة بيحبني وخايف عليا قد ايه لحد ا ييجي الوقت اللي ربنا كاتبه عشان نعرف ويلاقي فرصه انه يبقي جمبنا بجد
:))

وحشني كلامك اوي
يا ريت بس تعرفي تقري اللي جوايا ليكي
حتعرفي اني بحبك
:)

habiba يقول...

أحيانا الواحد بيظهر عليه أفكاره من غير مايقولها وبيزعل من الموضوع ده
ما بالك حد يقرأها لوحده كده..ويمكن مش يقول انه عرفها..لا دى فكرة مش اللى هيه خااالص.
اسمتعت بتدوينتك الجميلة تسلمى
مع تحياتى :)

هبة فاروق يقول...

خلى الطابق مستوووور
والله بجد نعمه ان كل شىء بيدور فى رأسنا يبقى مستور
بوست لذيذ وطعم زيك يا نور

reemaas يقول...

P A S H A

:)

reemaas يقول...

مسلم مصرى

منورنى

reemaas يقول...

سواح في ملك اللــــــــــــــــــه-

بصراحة مش عارفه مدى صحتها بس فيه حالات بيتكلموا عنها فى العالم

reemaas يقول...

مصطفى سيف الدين

ده غير الاستغلال بقى وعيشة يعنى

reemaas يقول...

مصطفى سيف الدين

ده غير الاستغلال بقى وعيشة يعنى

reemaas يقول...

AhMeD RaDy

اه تخيل كلنا نبقى بالنقاء ده او كلنا نبقى بالخبث اننا نتعلم نخبى اكتر ماحنا بنعمل هههههههههه

reemaas يقول...

ابراهيم رزق

هههههههههههه ساعات اقول ياريت وساعات اقول لا بلاش

reemaas يقول...

E73

ربنا يستررررررها

reemaas يقول...

نهر الحب

صح

والله يا سوسو حاسة جدا ولو تعرفى انتى ايه عندى

بحبك جدااااااااا

reemaas يقول...

habiba

ايون هتبقى فضايح

reemaas يقول...

هبة فاروق

تسلميلى يا هوبا ربنا يسترها معانا ديما يارب

nesma hatem يقول...


افكار ماتمناش حد يعرفها غير ربنا..هو اللى قادر يهديها ويسامح فيه

لا لا انا كده تمام جدا وفلة على الاخر..
احمدك يارب على نعمة الستر..
بالظبط :)