الأربعاء، 17 أكتوبر 2012

عن..بيت البيوت..










كنت بتفرج على حاجة سورى تقريبا او حاجة تركى مدبلجة بالسورى غالبا..وكان فيه طفلة بتلعب لما سألها حد بتعملى ايه قالتله بلعب ((بيت بيوت))..

ساعتها سرحت-وانا بسرح كتير باين اليومين دول- وافتكرت ايام زمان..كنت بحب العب اللعبة دى انا واصحابى كتير بس ماكنش اسمها كده ..كنا مسمينها((سكنة)) -بضم السين- نخلص جرى ونط الحبل وكهربا ولما نحب نهدى بقى نقول يلا يا عيال نسكن..

كل واحدة من صحباتى بتجيب فنجان من فناجين مامتها اللى مستغنية عنها طبعا..وانا عندى الصنية وعندى الورد وعندى المية..وطبعا مفهومة ان المية بنملا بيها الفناجين علشان نشربها والورد علشان ناكله..ايون كنا بنقطع ورقه وناكله :)
وكان بيبقى التجمع عندى بسبب توفر المكان .. واقدملهم بقى-بما انى صاحبة البيت- الصنية عليها فناجين المية والورد ونفضل نشرب وناكل لحد مايجيلنا تخمة او يجى معاد مرواحهم..
ايااااااااام....

 

هناك 19 تعليقًا:

AhMeD RaDy يقول...

الصيدلانية العزيزة

يااااااااااااااااااااه انتى فكرتى الواحد بايام ما كان طفل .. وكان الواحد بيعد يعمل حاجات غريبة اوى ..

تعرفى ان بقى كنت مجنون عربيات اساسا .. وبمناسبة البيت .. الواحد كان يعد يعمل عشش من الملاية ههههههههه

يلا ايام

نهارك سعيد بقى

سواح في ملك اللــــــــــــــــــه- يقول...

ايوة يانوور العزيزة

ذكريات الطفولة دي متتنسيش

هبة فاروق يقول...

ذكريات جميله يا نور وكنت بلعب زيك بالفنجان بس البلاستك مش الحقيقى وكان عندى خلاط ومكواه وكنت اقعد اسرح بخيالى كانت ايام فكرتينى بالذى مضى

eng_semsem يقول...

طيب بتعزميهم على ققهوه لما كبرتي ولا خلاص شبعوا ميه ههههههههههههههه
كل سنه وانت طيبه يا دكتوره

E73 يقول...

:)

بتاكلوا ورد يا متوحشين؟ :D

بس حاجة حلوة قوي لما تفتكري ذكريات الطفولة في شريط الذكريات

ابراهيم رزق يقول...

ايه يا نووووووووووور بتسرحى اليومين دول
بتسرحى فى ايه قولى محدش سامع
ههههههههههههههههههههههههه

بجد يا نور ذكريات الطفولة دى من اكتر الحاجات اللى بسرح فيها
ولو سألتينى عن امنيتى
هقولك ارجع طفل اسبوع واحد بس

تحياتى

reemaas يقول...

AhMeD RaDy

ههههههههههههه وانا كمان بس من البطانية ههههههههه

reemaas يقول...

سواح في ملك اللــــــــــــــــــه-

فعلا كانت حلوة اوى

reemaas يقول...

هبة فاروق

جابولنا البلاستك ياهوبا وحياتك بس حسينا انهم بيضحكوا علينا ههههههههه

reemaas يقول...

eng_semsem
هههههههههههههه

ولا بشربها انا نفسى تخيل

reemaas يقول...

E73 ي
ايون كان مالى الجنينة وببلاش بقى
وطعمه حلو :)

reemaas يقول...

ابراهيم رزق

هههههههههه مش لاقية حاجة اعملها فبسرح


وانا والله نفسى جدا يمكن علشان كده بسرح

محمود(باحث عن حب) يقول...

زمان مش يتعوض ابدا

بس ممكن نرجعه فى اطفال نعيشه معاهم
ونرجع اللى فات
بس البراه نجيبها منين

مدونه جميله
وكلمات رقيقه

habiba يقول...

السلام عليكم
أكيد كلنا لعبنا بالفناجين والصوانى بس الحمدلله مكنش فيه أكل ورد خااالص
ذكريات تحفة
تحياتى :)

ريـــمـــاس يقول...

مساء الغاردينيا نور
ههههههههههه
احنا بقى بنسميها بنات
عشان كل وحدة بتعمل ام وصاحبة بيت

ريـــمـــاس يقول...

سوري يانور اتقطع التعليق
كنت عاوزة اقولك وحشتيني
وكل عام وأنتي بخير وسعادة يارب "
؛؛
؛
لروحك عبق الغاردينيا
كانت هنا
Reemaas

reemaas يقول...

محمود(باحث عن حب)

ربنا يرزقنا بقى

مبسوطة انها عجبتك جدا

reemaas يقول...

habiba

براءة اختراع :)

reemaas يقول...

ريـــمـــاس

حلو الاسم :)

انتى كمان وحشانى جدااااااااا والله كنا لسه فى سيرتك امبارح