السبت، 26 أكتوبر 2013

مع نفسى ..... 25





عدت سنة ... زى النهاردة  من سنة وزى كل سنة اتمنيت كذا امنية وانا بطفى شمعة عيد ميلادى
بس يمكن السنة اللى فاتت اتمنيت اوى .. اتمنيت بكل ما فيا من قوة ماعرفش يمكن هما هماهم الامانى ماتغيروش بس حسيت انى نفسى يتحققوا اوى وبصراحة جالى احساس ساعتها انهم هيتحققوا جايز من كتر ماكان نفسى فى كده وجايز من منطلق انك لو امنت بحلمك اوى هيتحقق.. بس للاسف ربنا مااردش.. وبصراحة بردو  خايفة اتمناهم تانى لمايتحققوش..
بس مافيش ادامى حل تانى 
يااااااااااااااااااااااارب يتحققوا السنة دى 
يارب..
**********

زى النهاردة من سنة نويت انى اعمل حاجات معينة فى حياتى فى السنة الجديدة من عمرى اممممممم هم بالظبط 3 حاجات 
1/ اتعلم سواقة
2/اخرج الكتاب بتاعى للنور
3/اقرا كل الكتب اللى عندى على اللاب 
ماعمتلش منهم تقريبا الا حاجة واحدة.. الكتب اللى عندى على اللاب  اينعم ماخلصتهاش كلها بس تقريبا قرأت اكتر من 100 كتاب فى خلال السنة دى .. سعيدة بالانجاز ده وهتكلم فى تدوينة تانية عن اهمهم بالنسبالى..
بالنسبة للكتاب اينعم مش هعرف انزله ورقى بس نويت انزله الكترونى وبشتغل على ده حاليا
ان شاء الله هقدر اكمل باقى الكتب واتعلم السواقة :)
*********

مش عارفة انوى اعمل حاجة السنة دى ماعرفش ليه .. جايز لانى ماخلصتش حاجات السنة اللى فاتت؟!
هعتبر دى الاجابة وهخلصهم واشوف فى خلال السنة الجديدة المستجدات ان شاء الله :)

الخميس، 24 أكتوبر 2013

على الهامش .. 11









قاعدة لازم ناخد بالنا منها .. ارصدتنا فى قلوب الناس ايا كان الناس دول مين(ماعدا الام و الاب والابناء لانها بالفطرة ) هى كأى ارصدة اخرة قابلة للنفاذ مش لازم نعتمد عليها من غير ما نزودها  علشان مانجيش فى يوم ونحتاجها ونلاقى رصيدنا نفذ

الاثنين، 21 أكتوبر 2013

مع نفسى ... 24









النظرية بتقول.. السعادة قرار.. قرر انك تبقى سعيد هتبقى سعيد!
مش عارفة كنت الاول معترضة على ده لسببين الاول .. انى كنت حاسة ان لما تيجى فرحة او سبب للسعادة حقيقى هتلبخ ومش هعرف افرح اوى 
التانى.. انى كنت حاسة انى هبقى بكدب على نفسى.. او بمعنى الطف شوية بستعبط
 بس بما ان الحاجات المفرحة مش عاوزة تيجى .. او بتيجى وبتمشى ولا كأنها جت .. او يمكن جت وانا ما اخدتش بالى.. وحيث ان انا زهقت من عدم وجود الحاجات المفرحة..
وبما ان الكل حوليا بيستعبط ...
خلاص انا كمان هستعبط .. جايز !!
انا سعيدة :D
*************

نفسى يبقى معايا عصايا سحرية.. مش علشان اخلى العالم وردى ولا علشان السلام العالمى يعم البلاد.. لا لا ولا علشان اجيب رئيس للبلد... اى الافكار السودوية الحمصية دى !

انا لو معايا العصايا دى هبقى انانية جدا هحقق احلامى اللى واقفة مكانها .. او جايز هحرك نفسى شوية على اعتبار ان انا اللى واقفة مكانى..
 ممكن كمان ابرمجها على الكلمة السحرية اللى حفظاها من  رفعت اسماعيل ( ابرا كادبرا)
واقولها بقى لما حد يغيظنى واسلط عليه العصاية  فيختفى .. ياسلااااااااااااام
ممكن استخدم كمان نفس الكلمة مع تغيير تون الصوت لأحن شوية واخلى اى حد واحشنى يظهر ادامى فى التو واللحظة..

الخميس، 17 أكتوبر 2013

علشان انت بنى ادم !









زهقان؟ مخنوق؟ مش لوحدك على فكرة .. مصر كلها كده مش بس علشان حال البلد  لا خالص ابسلوتلى يعنى.. ده انا حتى حاسة اننا اتعودنا على مصر كده لو رجعت لحالة الاستقرار وفى ظل ان الكورة انضربت  فهنعمل ايه ؟!
عموما هى حالة عامة وليها اسباب كتير سياسة ممكن .. حال واقف تمشى.. روتين حياة اساسى..
اللى فى ايدك مش عاجبك وكان ممكن يبقى احسن .. انت مظلوم.. انت ياعينى..
Bla..Bla..Bla

كلنا عارفين الكلام ده طالما حاملين لقب بنى ادمين..انا عن نفسى ماشفتش عصفور زهقان وسايب بيته علشان يغير جو..ولا حصان ولا حتى حمار مثلا قال لمراته تعالى ناخد اجازة من بعض علشان نجدد حياتنا الزوجية !
كل دى حاجات بتاعتنا احنا ولا ننافس فيها اى كائن اخر

السبت، 12 أكتوبر 2013

على الهامش ... 10









كم اكره من يتعامل بقسوة مع الاخرين مبررا هذا بان فيه خيرا لهم..لا تبرير للقسوة فلا تصنعوا من انفسكم اوصياء تعرفون اين الخير..
انتم قساة القلوب وفقط.

الأربعاء، 9 أكتوبر 2013

عن... الشيزوفرينيا











* عن الاخ اللى بيزعق لاخته علشان حبت وهو بيحب ومعرفها عليها كمان..!

* عن الاب اللى هارى نفسه سجاير وضرب ابنه اللى عنده 15 سنة علشان شم ريحه دخان منه!

*عن صاحبنا اللى متجوز من كام سنة وعنده اطفال وكاتب على اكونت الفيس !single

* عن صاحبتنا اللى عاملة اكونت على الفيس عايشه بيه حياتها واكونت لاخوها وخطيبها وباقى العيلة الكريمة!

* عن صاحبنا اللى شايل موبايليين موبايل للشغل والبيت ومبايل للحب والعواطف!

*عن صاحبنا اللى كل اسامى الناس اللى على موبايله رجاله بس لو جيت للحق مش كلهم رجاله واللى دايما  موبايله خالى من ذاكرة الاتصالات والرسايل!

* عن صاحبنا اللى بيشترط ان البنت اللى هيرتبط بيها وتشيل اسمه ماتكنش حبت قبل كده واحيانا ماتكنش حبته هو شخصيا قبل كده!

*عن صاحبتنا اللى مقطعة فروة طوب الارض وزعلت جدا لما عرفت ان صاحبتها جابوا سيرتها وهى مش موجودة!

الثلاثاء، 8 أكتوبر 2013

على الهامش...9








فى كلمات تبان انها عكس بعض او بينها فرق كبير فى المعنى زى مثلا.. الصراحة والوقاحة ,
المجاملة والنفاق.. خفة الدم والاستظراف.. الكرامة والغرور..
 وهكذا..

الفرق كبير فى المعنى .. لكن فى التصرفات..الفرق شعرة !

الأحد، 6 أكتوبر 2013

عنها... 8









اهو ده اللى صار وادى اللى كان...

انت ضعفت.. ماحربتش علشانى..علشانا 
استسلمت عند اول مطب.. ورفضت تحارب وحكمت على محاولتك من قبل ما تحاولها بالفشل !
قلت لنفسك ايه اسهل؟ انك تحارب افكار مجتمع..تحارب افكار اهلينا؟تقولهم انك عارف وجه اعتراضهم بس ده ولا فارق معاك؟ انك اختارت بعقلك قبل قلبك؟
لا.. ده اختيار صعب انت مش اده..
الاسهل انك تبعد..
والنكتة لما جيت وقلت انا ببعد علشانك..

وزعلان انى بقول جبان؟!

مالكش حق تلوم عليا.

السبت، 5 أكتوبر 2013

الأربعاء، 2 أكتوبر 2013

على الهامش...7








فى اوربا والدول المتقدمة.. الحب مالوش سن يعنى ممكن تلاقى حد عندى 10 ولا 15 سنة وبيحب .. حاسس انه متعلق بحد ..والاهل بيحترموا ده بغض النظر عن التفاصيل.. مابيقلوش له انت لسه عيل..

ممكن بردو تلاقى حد معدى الستين  ولا السبعين ولا حتى التمانين وبيحب كتوكوتة كده اده فى السن ..وبيقرروا انهم ..يكملوا حياتهم مع بعض.. يفتحوا صفحة جديدة ..
ماحدش بيقولهم عيب على شيبتكم ولا اللى ادكم يفكر فى اخرته ولا هم اصلا بيفكروا فى العمر اللى لسه مش باقى فيه اد اللى راح!
ممكن بردو ا تلاقيهم متجوزين من زمان وكبروا فى السن ولسه بيقولها بحبك من غير ماتقوله هى يا راجل احنا كبرنا على الكلام ده..
وتلاقيها هى بتقوله بحبك من غير ما يقولها اعقلى بقى يا وليا انتى احفادك قربوا يتجوزا !

الثلاثاء، 1 أكتوبر 2013

على الهامش 6








فى الافلام الامريكانى كل الناس اصحاب البيوت الفخيمة واصحاب البيت الاوضة وصالة بيشيلوا مفتاحهم تحت الدواسة اللى ادام الباب او على عقب الباب من فوق .. او تحت الزهرية اللى محطوطة فى اي حتة ادام الباب بردو.. مش فاهمة ايه الفكرة اللى المفروض توصل هنا..
انهم عايشين فى امان ؟!... ماعندكوش حرامية؟ الحرامية بتوعكم تخصص بنوك وبيدخلوها من بلعات المجارى اللى انضف من اجدعها شوارع عندنا؟!!

ده احنا ناقص نحط بيوتنا فى قفص حديد وبردو بنتسرق!!
وبعدين هم الحرامية الامريكانى مابتفرجوش على افلام امريكانى ولا ايه ؟ 
عزيزى الحرامى الامريكانى المفتاح  فى الاماكن السابق ذكرها على فكرة .. تعامل بقى