الاثنين، 21 أكتوبر، 2013

مع نفسى ... 24









النظرية بتقول.. السعادة قرار.. قرر انك تبقى سعيد هتبقى سعيد!
مش عارفة كنت الاول معترضة على ده لسببين الاول .. انى كنت حاسة ان لما تيجى فرحة او سبب للسعادة حقيقى هتلبخ ومش هعرف افرح اوى 
التانى.. انى كنت حاسة انى هبقى بكدب على نفسى.. او بمعنى الطف شوية بستعبط
 بس بما ان الحاجات المفرحة مش عاوزة تيجى .. او بتيجى وبتمشى ولا كأنها جت .. او يمكن جت وانا ما اخدتش بالى.. وحيث ان انا زهقت من عدم وجود الحاجات المفرحة..
وبما ان الكل حوليا بيستعبط ...
خلاص انا كمان هستعبط .. جايز !!
انا سعيدة :D
*************

نفسى يبقى معايا عصايا سحرية.. مش علشان اخلى العالم وردى ولا علشان السلام العالمى يعم البلاد.. لا لا ولا علشان اجيب رئيس للبلد... اى الافكار السودوية الحمصية دى !

انا لو معايا العصايا دى هبقى انانية جدا هحقق احلامى اللى واقفة مكانها .. او جايز هحرك نفسى شوية على اعتبار ان انا اللى واقفة مكانى..
 ممكن كمان ابرمجها على الكلمة السحرية اللى حفظاها من  رفعت اسماعيل ( ابرا كادبرا)
واقولها بقى لما حد يغيظنى واسلط عليه العصاية  فيختفى .. ياسلااااااااااااام
ممكن استخدم كمان نفس الكلمة مع تغيير تون الصوت لأحن شوية واخلى اى حد واحشنى يظهر ادامى فى التو واللحظة..

هناك 6 تعليقات:

Gamal Abu El-ezz يقول...

ايه الخيال ده كله
أنتى غلبتى هارى بوتر كده
بس على فكره مش لازم نكدب على نفسنا علشان نفرح لو مفيش موقف سعيد فى حياتنا ممكن نشوف السعاده فى عيون الأخرين يعنى ممكن تعطفى على طفل فقير فلو لقتيه سعيد أكيد هتكونى قمة السعادة أو لو حد قربك كان سعيد لسبب ما اكيد هتبقى سعيده لانه سعيد ممكن تفرحى لما تلاقى ام سعيدة ان ابنها خلص تعليم مثلا بس يا ريت مش تكملى المشوار معاها لانه احتمال مش يلاقى شغل ههههه :)

E73 يقول...
أزال المؤلف هذا التعليق.
mahmoud khalaf يقول...

عصا سحرية وشخل جامد وأبرا كادبرا مرة واحدة ده الموضوع كبر أوى أوى وخرج من إيدينا ومتنسيش ان كل الأبطال اللى معاهم العصا السحرية دى اتمرمطوا طول الرواية أو الفيلم لغاية ما وصلوا للى هما عاوزينه فى أخر 5 دقايق فى الفيلم أو أخر 3 صفحات فى الرواية وبعدين لا هنكدب على نفسنا ولا حاجة لو مش عارفين نفرح أقل حاجة نحاول نبعد عن اللى يضايقنا بس خلاص ....

doaa elattar يقول...

لا يانوري جربت أعمل كده وامشي بمبدأ أنا سعيد وتماموز .. مش بتجيب مفعول إلا لو انتي عملتي حاجة فعلاً تفرح .. عشان إحنا مش عيال صغيرة هنضحك على نفسنا .. عن نفسي جابت نتيجة عكسية تمامًا :D

ـــــــــ

آآآه آهو أنا كمان نفسي في دي بقى .. لو لاقتيها ابقي اديهالي لفة ده أنا أختك برضه :)

ابراهيم رزق يقول...

كرباج سعاده وقلبي منه انجلد
رمح كأنه حصان و لف البلد
و رجع لي نص الليل و سألني .. ليه
خجلان تقول انك سعيد يا ولد
عجبي
ده كلام عمنا جاهين

مش هقولك السعادة قرار
و لا هاقول السعادة ممكن تشوفيها فى عيون الاخرين
تشوفيها اه
تحسيها ممكن
لكن تستمعى بيها لا اعتقد
بصى يا نووووووووووور
اتمردى و بعدين اتمردى و بعدين اتمردى
كونى نفسك
و متحاوليش تيجى على نفسك
و اعملى كل اللى فى نفسك
و بعدين خدى نفس عميق
اراهنك هتكونى سعيدة

ياسمين خليفة يقول...

الحاجة الوحيدة اللي اعرفها عن السعادة هي انها مش بتيجي بالعافية