السبت، 30 يوليو، 2011

تخاريفى...........





*دائما كنت كاتمة اسرارهم ...........واسرارى

*احتاج الى اجازة على وجه السرعة

*رغم انى تعودت على استخدام الكومبيوتر والكاى بورد فى الكتابة ولكنى مازلت اعشق ورقتى وقلمى


*مسامحتك ليست حل مطروح..........

*الحب زى كتب الفلسفة كل ماتيجى تدور على اجابة تتورط فى اسئلة جديدة......

*التزامى الصمت ليس ضعف ولكنه مجرد رد فعل..........

*الانسان قبل الحب شئ وعند الحب شئ وبعد الحب شئ اخر..........

*من الجنون ان تفعل نفس الخطأ مرة بعد اخرى وتتوقع نتيجة مختلفة!!

*اللى مايستحملكش وانت متضايق ..مايستهلكش وانت رايق..........

*ياترى بيدخل على صفحة الفيس بوك ويتابع كتبت ايه؟.......مجرد فضول

*غصب عنى كل ما بيقرب رمضان بفتكر رمضان اللى فات .........غصب عنى

*ليه كل ماحد يطلب منى اقول ذكرى حلوة بغمض عيونى واحاول افتكر.......احاول بجد......وفى الاخر اقول مش فاكرة........معقول مافيش؟؟ 

       
*عندى مشكلة رهيبه مع الوقت......مش عارفه هو اللى بيجرى ولا انا اللى بطيئة؟

*عندى مشكلة فى التعامل مع الناس.....مش عارفه امتى بيتكلموا من قلوبهم وامتى بيكدبوا.....وامتى بيهزروا؟

*مازلت على قائة الانتظار........................

   

الاثنين، 25 يوليو، 2011

وحشتنى









وحشتنى

تعبت من المواجهة لوحدى
محتاجة ارجع اشوف كل حاجة تانى من خلالك
اكتشاف الحاجات وانت موجود كان أأمن
 النجاح وانت موجود له طعم تانى
  الحزن وانت موجود كان اقصر
الدموع وانت موجود ماكنتش قريبه كده
حتى الاحلام مهما كانت صعبة كان تحقيقها فى وجودك اسهل

وحشتنى اوى
                          

ملحوظة صغنونة لانى اتفهمت غلط رسمى فى التوبيك ده فالصورة والكلام موجههة لابى

الجمعة، 22 يوليو، 2011

على الهامش






طيبة زائدة,غيرة زائدة,عاطفة زائدة......

احتاج لاستئصال الزائدة من كل انفعالاتى........


فانا مبعثرة جدا......هذا هو احساسى مؤخرا..

فقط احتاج..بل اتمنى شئ من الهدوء وبعض الوقت حتى اجمعنى من جديد...

الثلاثاء، 19 يوليو، 2011

ياهناه ياهناه..................




                                      مين قال العلام فى بلادنا قديم

                         لا ده احنا تمام..اه والله العظيم

                         سلاح التلميذ..موجز ولذيذ

                        نماذج اجابات..مافيهاش تحفيظ

        ياهناه ياهناه اللى يتعلم عندنا..ياهناه ياهناه اللى يتعلم عندنا

                                  ابله عطيات.....بتاعت الدراسات

                      هتغيب اسبوع...هيصوا ياولاد

       ياهناه ياهناه اللى يتعلم عندنا..ياهناه ياهناه اللى يتعلم عندنا

                      يونى فورم جنان...شغل ستاير

                     وليائة ستان ......دايرن داير

       ياهناه ياهناه اللى يتعلم عندنا..ياهناه ياهناه اللى يتعلم عندنا

                     استاذ عصفور...ده الامبراطور

                     لو علمى علوم...عديت فور شور

      ياهناه ياهناه اللى يتعلم عندنا..ياهناه ياهناه اللى يتعلم عندنا

                     قالوا فى اوروبا العلام...جامد اوى وفى السليم
                 
                     معلش بقى فى الكلام...ده احنا الجديد والقديم

                     ده علينا فصول ...سيراميك بالطول

                     والحمام  ايييه....ديما مغسول

     ياهناه ياهناه اللى يتعلم عندنا ..ياهناه ياهناه اللى يتعلم عندنا

                    والكل اخوات ...فى الامتحانات

                    وسؤال بسؤال...خد منى وهات

    ياهناه ياهناه اللى يتعلم عندنا..ياهناه ياهناه اللى يتعلم عندنا

                   والناظر ياه.......بلسم يا ولاد

                  راخر محبوب......لله فى لله
    
    ياهناه ياهناه اللى يتعلم عندنا ..ياهناه ياهناه اللى يتعلم عندنا

                  رزقك موجود....رغم الشهادات

                  وباذن الله.........مندوب مبيعات

    ياهناه ياهناه اللى يتعلم عندنا ..ياهناه ياهناه اللى يتعلم عندنا


                  والوضع جميل...انا متفائل

                 عندنا هتشوف....مستوى هايل

   ياهناه ياهناه اللى يتعلم عندنا... ياهناه ياهناه اللى يتعلم عندنا

                لو شفت زبون .....خطوته جيباه

                قلبه دليله...........سيبه على عماه

                 ياهناه ياهناه اللى يتعلم عندنا 

                ياهناه ياهناه اللى يتعلم عندنا

                ياهناه ياهناه  اللى يتعلم عندنا           








شوفوا الكليب بقى وادعولى

الأحد، 17 يوليو، 2011

صوتووووولى









يا مسا الوردات على عينكم

طبعا عرفتوا كلكم ان التصويت ابتدا

للى مش عارف انا شاركت بتدوينة صباحك سكر
http://100posts-voting.blogspot.com/2011/07/blog-post_7829.html


ده اللينك بتاعها اللى عجباه التدوينى يظبطنى بقى ويروح يعمل فوووووت

اللى مش عجباه مافيش مشاكل يعنى.........يجاملنى ويعمل فوووووووت:)

منتظراكم

السبت، 16 يوليو، 2011

الحب وسنينه!!!!!!!!





هى:احبت هو كثيرا ولكنه لم يشعر حتى بوجودها....

هو:احب اخرى كثييرا ولكنه لم يستطع ان يواجهها بهذا الحب......

الاخرى:احبت اخر كثيرا واعتقدت انه يحبها ايضا وبصدق وحلمت كثيرا بالنهاية 
               السعيدة..........

الاخر:استغل حب الاخرى وكذب ومثل عليها الحب فهى عنده مثلها مثل الاخريات
         وكان ينظر دائما ل تلك التى تصده ويتفنن كيف يوقعها........

تلك:كانت تحب هو ولكنها تعلم انه غارق حتى اذنيه فى الحب وان لم تعلم من هى
        فقررت ان تصمت وتغلق قلبها.......

انا:عندى كل الاسرار وكل الحكايات واعلم عنهم كل ذلك ولا ادرى ما الحل؟؟
        هل التزم الصمت؟ام اكشف كل الاوراق؟؟؟؟؟؟؟؟    

الأحد، 10 يوليو، 2011

صداااااااااااع..





المشهد الخارجى:هدوووووء نسبى

المشهد من الداخل:مجموعه من الافكار والاقوال عماله تخبط فى بعضها بطريقة تشبه 
                             صدى الصوت

القطر هيعدى.......

يابنتى كبرى يعنى اللى اتجوزا اخدوا ايه.....
يابنتى اعقلى والحقى اختاريلك واحد من اللى بيتقدمولك احنا هنتكبر ليه......

القطر هيعدى......
  
يابنتى ده نصيب ولما نصيبك هيجيلك مستحيل هترفضيه...........
يابنتى  انتى هتفضلى ترفضى كده لحد ما تقعدىولا حد يتقدم ولا تتجوزى.......

القطر هيعدى.....

ياستى انتى واحدة ناجحة فى شغلك قلقانة ليه بكرة يجيلك اللى يستاهلك.....
انتى خلاص وهبتى حياتك للشغل وفضيتى اديكى من البيت والاستقرار..خلى الشغل ينفعك..........

القطر هيعدى........

قلقانة ليه انتى دكتورة اد الدنيا اوعى تتنازلى واستنى لما تيجى الفرصة المناسبة......
 بلا دكترة بلا شهادات البنت مالهاش الا الجواز والله لو عملتى ايه .........

القطر هيعدى.......

مافيش حاجة اسمها تتجوزى علشان الجواز لازم تحبى البنى ادم دى عشرة عمر.....

حب اى وكلام فارغ ايه فوقى بقى الراجل مايعبوش الا اخلاقه وجيبه واليومين دول الجيب اولى الحقى نفسك........

القطر بيعدى........

صدى صوت لحركة المسكنة اللى بتتعمل بالبؤ دى (بس مش عارفه اكتبها)

القطر بيعدى.......

 ايوة معاكى الحق العريس الاخير واللى قبله دول حاجة صعبه جداااااااااا اى الاشكال دى بس ياربى انتى يابنتى حظك وحش........

اى الدلع ده بقى بزمتك العريس اللى الاخير ده ولا اللى قبله يترفضوا.........

القطر بيعدى.........

احسن حاجة بتعمليها انك بتشغلى نفسك عن التفكير فى كلام الناس وفى حالك بالشغل......

هو احنا كل مانسأل عليكى نلاقيكى فى الشغل ماهو ده اللى بيطفش العرسان.....

القطر بيعدى........

لازم لما تقعدى مع عريس تبقى على طبيعتك وتسأليه كل اللى فى نفسك.......

لما تقعدىمع العريس خليكى ساكتة الرجاله مابيحبوش اللى بتناقش.........

القطر بيعدى........

تتلاحق خلال تلك الاصداء صور لاعز الصديقات اللى اتجوزت واللى خلفت ولا حد قال من باب درء العين طبعا............

القطر بيعدى........

 بصى بقى انتى اكيد معمولك عمل ........يابنتى الحاجات دى مذكورة هبقى اجيبلك اسمه الشيخ...........!!!!!!!!

القطر بيعدى...........

القطر بيعدى..........

القطر بيعدى.........   


على الهامش:اسفة لو الكلام مش مربوط ببعضه بس هو ده بالظبط حاله:(             

الخميس، 7 يوليو، 2011

صندوقى






تم تمرير الواجب التدوينى ده من الاستاذ ابراهيم(سالزياد)ومن خالد(سواح فى ملك الله)
وبشكرهم بصراحة لانى ماكنتش عارفة ابدأ تدوين تانى بعد شهر التدوين..

الغريب بقى فى الصندوق ده انه بيحدد ان الذكرى تكون مبهجة وانا اه كل حياتى ذكريات بس عمرى ما حاولت اعرف ان كانت مفرحة ولا حزينة اهى ذكريات وخلاص
 فالموضوع تطلب منى تفكير......عميق

                                           الصندوق

المشهد الاول:ظهور نتيجة الثانوية العامة فرحة من القلب بجد اخيرا تعب سنتين ثانوى وشدة اعصاب تم تكليله بنجاح ومش اى نجاح يعنى ده نجاح مبهررررر

مجموعى كان100%هههه اه وربنا ده بعد طبعا المستوى الرفيع والذى منه ورغم انى ماكنتش الاولى لان كان فيه اتنين جايبين فوق كده وماتسألونيش ازاى!!!!!!!

بس انا فضل مجموعى غير......مجموع كده له شنة ورنة........

المشهد التانى:وكأى فرحة فى حياتى يجب ان يتبعها وسريعا جدااااا حاجة تغير المود ماتفهمش ليه

جه معاد كتابه الرغبات وكنت انا طبعا راسمة طول السنتين على صيدلة حباها وحساة انى هدخلها  باذن الله......

المجموع زغلل عين ماما وبابا وقتها طيب يابنتى ماتدخلى طب !

طب ايه يا جمعة انا مش بحبه انا عاوزة صيدلة 

يابنتى خسارة .....

يا جماعه انا ماينفعش ابقى طبيبه خالص .....

ليه بقى ان شاء الله؟.........لانى مابعرفش اخمن!!(من صغرى وانا مش مقتنعه ان فى حد يحط سماعه ويسمع على ظهرك ويعرف عندك ايه......مع احترامى لكل الاطباء طبعا)

طبعا الكلام ماقنعش امى وانا يا جماعه مابعرفش ازعل ماما يعنى كفايه بس احس فى عنيها ولا نبرة صوتها انها زعلانة حتى بدون توجيه كلام عندى استعداد الغى كل حاجة علشان خاطرها

المهم سكت وقلتلهم اللى تشوفوه بقى......واخدت جنب وسكت كعادتى

بابا حبيبى كعادته حس بيا ......زقالى طيب بصى انا هعمل ورقتين ونختار بينهم ونشوف هيطلعلك ايه(طبعا من باب التهريج وانى يخلينى ابتسم يعنى)

وقد كان عملناها وطلعت اول مرة صيدلة.....كررناها...10 مرات.....فى كل مرة صيدلة

ماما لفت نظرها الموضوع وقالتلنا لا انتم بتخمو هاتوا انا اعملها.....

وعملتها باديها........بردو صيدلة......وصل العدد الاجمالى للمحاولات 30مرة

فى كل مرة صيدلة..............نصيب بقى:)--------وقد كان


                                         اهداء
                                    *******
الى روح ابى رحمه الله....ديما كل حاجة حلوة فى حياتى يا بابا ليك نصيب فيها
             ربنا يجمعنى معاك فى الجنة ان شاء الله


                                        عتاب
                                    *******

هعاتب نفسى اولا لانها بتغلط غلطات غبية الصراحة  وديما بتصدق اللى حواليها وده غلط,وهعاتب كل من وثقت به وخان الثقة دى.....ليه كده يعنى؟

                                       كلمة
                                    *******

بقلها لنفسى وليكم........تفاؤلوا خير فمع كل نهاية لابد من بداية جديدة الى ان تقوم الساعة

                               تمت بحمد الله
                           *******************


نحول الصندوق بقى لخمسة من الاصدقاء 

1\موناليزا صاحبة مدونة امة الله

2\بنت من الزمن ده

3\مصطفى صاحب مدونة باش كاتب

4\عباس ابن فرناس صاحب مدونة مات الكلام

5\دعاء العطار صاحبة مدونة كلمتى