الجمعة، 27 يناير 2012

.......Holiday




كنت بتفرج على الفيلم ده امبارح..دى تقريبا تانى مرة بشوفه
بنتين بيتعرفوا على بعض فى موقع لتبادل المنازل...
كل واحدة تاخد بيت التانية لمدة اسبوعين يتبادلوا فيها الاماكن والناس
يتبادلوا البلاد نفسها لان فى الفيلم كانت واحدة من امريكا والتانية من انجلترا..

كل واحدة منهم مستواها المادى كويس وكانوا خارجين من تجارب عاطفية فاشلة

كل واحدة منهم حاسة بملل وطبعا غنى عن الذكر انهم مقيمين لوحدهم كعادة الغرب

كل واحدة فيهم بتلاقى اللى بتدور عليه فى الاجازة دى
بتلاقى نفسها اولا..
بتلاقى الحياة الجديدة اللى بتغير رتابة واقعها..
بتلاقى الحب الحقيقى اللى بينسيها مرارة التجربة اللى عاشتها..
باختصار بتلاقى سعادتها اللى رايحة تدور عليها..
التجربة غريبة...بغض النظر عن انها مستحيلة اصلا

يعنى لو افترضنا ان اللى فى الموقع ده جدى اصلا فى العرض ولو افترضنا انه مش حرامى

ولو افترضنا انه مش هيبوظلك بيتك

ولو افترضنا انك هتسيبى غريب عايش فى بيتك اسبوعين بحالهم لوحده
غريب مش فضولى ومش هيفتح فى الدوااليب
ولو افترضنا ان الجيران هيسيبوه فى حاله ومش هيبلغوا عنه ابسطها يعنى
لو غضينا النظر عن كل اوجه استحالة التنفيذ

التجربة غريبة ولو نتيجتها ان الواحد هيقابل اللى مش عارف يقابله فى حياته الروتينية

لو دى النتيجة........

افكر......

الثلاثاء، 24 يناير 2012

يوميات شحات....انا اسمى مكتوب:)





سالخير......

امبارح عملت اول انجاز وحصلت على اول كتاب من كتب اصحابى.........

يوميات شحات.. لصديقنا م\شريف الخطيب  صاحب مدونة يوميات شحات

الكتاب تصميمه شيك جدا وقريت فيه اول فصل اسلوبك روعة يا باشمهندس فعلا.....

ومن احد مظاهر الجمال فى الموضوع بقى ان اسمى مكتوووب:D

ايوووووون كنت كتبت رائ لشريف فى المدونة ومشكور نشره فى صفحة قراء المدونة

ماتتخيلش ياشريف كنت مبسوطة اد ايه وانا بقرء كلماتى البسيطة فى كتابك بجد فرحت وعملت فرح امبارح هههههههههه وريت الكلام لكل اللى قابلنى لدرجة انى وانا بستلم الكتاب من الدكتور ايمن امبارح وفتحته كنت هموت واقوله انا ريماس دى اللى مكتوب اسمها هههههههههه

الف الف مبروك وديما من نجاح لنجاح يارب واتمنى تعمل حفل لتوقيع الكتاب فى المنصورة كمان مش بس فى معرض الكتاب لحد مايبقوا يحنوا على باقى المحافظات ويعملوا معرض زى الناس فيه

الف الف مبروك ليك تانى

السبت، 21 يناير 2012

ابن مين فى مصر!



ملحوظة:هذا البوست عبارة عن صفحات قليلة من احدث كتاب اشتريته وقررت اشارككم فيه وهو كتاب 212 للكاتب الشاب هيثم دبور وهو كتاب سياسى ساخر يتحدث عن الدستور المعمول به فى الشارع المصرى واللى حطه المصريين وماشيين بيه بغض النظر عن الدستور الفعلى ولذلك فهو بادئ بالمادة 212 تكملة بعد مواد الدستور ال211 وطبعا غنى عن الذكر ان الكتاب مكتوب قبل الثورة........... وان كنت ارى ان البوست كان لازم يبقى اسمه انت منين فى مصر ولكن لا املك التعديل على رغبة الكاتب اكيد......


ابن مين فى مصر

يستخدم المصرى هذه الصيغة من السؤال بشكل ساخر او بشكل فعلى لمعرفة فعلا انت ابن مين فى مصر.......

ولقد استطاع المصريون ان يكونوا صورة شديدة الخصوصية والعدائية تجاه بعضهم وخلفت تلك الصورة موروث مصرى من الامثال الدارجة فى رسم الصفات الاساسية ل80مليون بنى ادم على مليون ك م مربع كل الذنب اللى اقترفوه انهم يقعوا ضمن التخطيط الادارى لاحدى المحافظات..

تتكون مصر من29 محافظة يمكن توصيف العلاقة بينهم كالاتى
- القاهرة(العاصمة) والجيزة(امتداد العاصمة)
مفيش حد اصوله من القاهرة ودى قناعة ثابته فى الاذهان دون وجود مبرر لها فلو اخبرت احد انك من القاهرة تلاقيه يسألك ويشدد فى السؤال يعنى جدودك واصولك منين؟ وبتلك القناعة قرر المصريين ان يعيدوا 14 مليون من سكان العاصمة الى باقى المحافظات ......
-(مية مالحة ووشوش كالحة)

المحافظة المستهدفة الاسكندرية 4,1 مليون نسمة
 ورغم انها من اكتر المحافظات اللى اتغنالها لكن ده لم يزحزح قناعة الشعب المصرى تجاه المواطن السكندرى
-(تتعشى ولا تنام خفيف..تشرب شاى ولامنتاش كييف)
-----------------------------------------------
المحافظة المستهدفة :دمياط 1مليون نسمة
يتاخذ المواطن المصرى سلوكا هجوميا مسبقا حين يعلم انك دمياطى ويتخذ الدمياطى سلوكا دفاعيا تلقائيا ولسانه حاله بيقول انا مش كده او احنا مش كده لو كان مواطن وطنى....
-(المنوفى لايلوفى ولو اكلته لحم الكتوفى)
-------------------------------------
المحافظة المستهدفة:المنوفية 3,2مليون نسمة
وللمثل تأسير سياسى اكبر منه جغرافى فمصر محكومة  بعقلية منوفية منذ عقود ولذلك اعتقد ان المصريين لو استيقذوا ووجدوا نحو 3مليون منوفى بجناحات مثل الملائكة لما تغير رأيهم.....
بالمناسبة امى لسة قيلالى المثل ده امبارح ويمكن ده اللى شجعنى اكتر انقلكوا المقال....
-(اللى عزموا التروماى)
----------------------
المحافظة المستهدفة:الشرقية 5,3مليون نسمة
الشراقوة بيعتبروا المثل دليل كرم وباقى المصريين يعتبروه دليل سذاجة.....
-(صاحب حاوى ولاتصاحب محلاوى)
-----------------------------------
المحافظة المستهدفة:الغربية 4 ملايين نسمة
المثل لم يحدد السبب الذى لايجعلنى اصاحب محلاوى يعنى لما اقابل واحد واعرف انه محلاوى اقوله "ياى"من غير سبب!
-(ميت نورى ولا دمنهورى)
--------------------------
المحافظة المستهدفة :البحيرة 4,7مليون نسمة
واضع المثل كان كثير الترحال ويعتقد المؤرخون انه كان تباع ولذلك حين استقر فى البحيرة قرر استخدام تلك القافية فل استقر فى محافظة اخرى لاختلف الحال بابناء البحيرة...
-(قيراط عداوة ولافدان جار البداوة)
-----------------------------------
المحافظات المستهدفة:شمال وجنوب سيناء والوادى الجديد والبحر الاحمر
المثل ده دمر اكتر من نصف مصر جغرافيا ,بجد واللهيعنى استثمر فى الصحراء ازاى وانا ارى العداوة اهون من مجاورة البدو وبالطبع واخدين بالكم انه بيحث على اهمية التكدث......
-(الصعايدة وصلوا....او مرة واحد صعيدى)
----------------------------------------
المحافظات المستهدفة:بنى سويف والمنياواسيوط وسوهاج..13,6مليون نسمة
اكبر تأثير سكانى لجملة وهنستبعد قنا واسوان لان ليهم حاجات خاصة بيهم...
لبصعايدة نفسهم يتعاملوا مع بعضهم بطريقة استعلائية فالعرب والهوارة يتعاملون مع الفلاحين بطريقة والعائلات تتعامل مع بعضها بطريقة....
-(ياقلل)
---------
المحافظة المستهدفة:قنا   3 مليون نسمة
ورغم ان القلل نفسها كاختراع وهو فعلا اختراع موحى بالكولدير لكن المقولة لسة راسخة...

-(بكار)
------------
المحافظة المستهدفة :اسوان  4 مليون نسمة
يخلط المصريون بين الاسوانلية والنوبيين رغم طيبة الاثنين ويبحث الزائر لاسوان عن المعزة رشيدة ولذلك يتعذر على البعض تصديق متوسطى السمرة حين يؤكدون انهم من اسوان...
-(يابطة)
----------
المحافظة المستهدفة :الفيوم  2,5 مليون نسمة
ولفاتن حمامة تأثير سئ فى ترسيخ المقولة بعد رائعتها مع عماد حمدى موعد مع السعادة
-(يامخلط)
--------------
المحافظة المستهدفة:الدقهلية  5 مليون نسمة
تلعب النفسنة دور مهم فى هذه المقولة فاهالى الدقهلية والمنصورة تحديدا شديدوا البياض بشعور مصفرة او شقراء واعين ملونة وبالتالى يحقد عليهم سكان مصر فهم الفرع الحليوة فى مصر واللى ممكن يزعل الدقهلاوية فعلا اننا ماسمعناش ان حتشبسوت كان شقرا وعيونها زرقا
-(مملح)
-------------
المحافظة المستهدفة:مطروح
لم تحدد المقولة السبب فهل بسبب امتداد المياه المالحة فى اسكندرية ام اللب الابيض المطروحى..
-(مايوهات بلطيم)
-----------------
المحافظة المستهدفة:كفر الشيخ
المجتمع المصرى شديد الطبقية ورغم ان معظمه لم يزر العجمى او شرم او على اسوء تقدير جمصة فانه ينظر لبلطيم باعتباره مصيف لا وجود للميوهات فيه والناس بتنزل بهدومها
-(بلد الغريب)
---------------
المحافظة المستهدفة:السويس
لم يعد هناك سوايسة فى السويس هذه قناعة راسخة فكل سكان السويس غرباء  وان كان اغلب السوايسة يحتلون مدينة نصر والمنزلة بعد التهجير
-(ماتمصش دمى)
------------------
المحافظة المستهدفة:الاسماعلية
الناموس فى الاسماعلية اشهر من المانجو واكتر منها واكبر فى بعض الاحيان والزائر للاسماعلية اعتاد مص دمه من الناموس ومن اصحاب مزارع المانجو
-(ابو العربى)
--------------
المحافظة المستهدفة:بورسعيد
اجمل تعليق سمعته عن برنامج"الحلم"لعمرو دياب بعد اول حلقتين كان من احد الاصدقاء قال وقتها"انا حاسس ان عمرودياب هيطير زى سوبر مان فى اخر البرنامج"ثم صمت وضاف"ادى اخرة لما تجيب واحد بورسعيدى وتقوله اتكلم عن نفسك"


بقيت 3 محافظات استطاعت الهرب من هذا المصير المعقد هم حلوان و6 اكتوبر والاقصر
نظرا لحداثتهم فى التكوين.
وانصح الثلاثة بالبحث عن خصوصية لتورث للاجيال 
المواطن الاقصرى يجب ان يستقل بميزة تميزه عن  الصعيد
والمواطن الحلوانى عنده مزارع الخنازير مثلا يتصرف على اساسها
اما المواطن السادس اكتوبراوى فله الله لانه يقضى ثلثلى عمره على الحدود بين الجيزة ممثلة فى المهندسي ومحافظته تحدييييييدا على المحور يعنى ممكن نعدل اسم المحافظة للمحور بحكم الانتماء له اكثر  ويكون المواطن محوراوى............

ده كان من اجمل اجزاء الكتاب اللى عجبنى كله من الجلده للجلده وانصح بشراءه وليس تحميله لان الكاتب محسبن على اللى هيحمله عن طريق النت :)

الثلاثاء، 17 يناير 2012

كتابك بكام.!!!!!!!!!!!!




صباح الخيرات...

من فترة لا بأس بها وانا عاوزة انزل معرض الكتاب فى المنصورة ودى هتبقى اول مرة انزله الصراحة 

واللى شجعنى على ده كتب اصحابى اللى نزلت مؤخرا واللى مقررة انى اشتريهاكلها ان شاء الله

اكيد طبعا ولعدة اسباب منها انى عارفة ان اساليبهم جميلة ومتأكده ان الكتب هتعجبنى وكمان علشان اقول للاهل والاقارب  انا عارفة الكاتب:)

المهم .....وصلت المنصورة واخدت تاكسى لقصر الثقافة ونزلت هناك لقيت يافطة مكتوب عليها معرض الكتاب على ساحة كده جنبه مفروش فيها صوان وست دواليب وكام ترابيزة مفروش عليهم كتب كتير .....قربت اكتر لقيت الكتب مرصوصة بطريقة غريبة الاطفال جنب المجلدات  وماعرفش اللى جنبهم دى كراريس بيضا ولا دى تهيأت .....بس العامل المشترك ان كلهم عليهم تراب!!!!!!

والكتب شكلها قديم زى ماتكون حد استلفها وقراها قبل كده وجابها تانى...

ماعرفتش ابدء منين لحد ماخرج رجل فى الخمسينات من العمر كده من حجرة جانبية  وفضل يبصلى كانى جاية من كوكب تانى..(معاه حق اصلى كنت الوحيدة اللى موجودة!)

سألته لو سمحت هو انا لو عاوزة اوصل لكتاب معين الاقيه ازاى؟
قالى كتاب مين ؟
قلتله هم كتابين فى الحقيقة يوميات شحات لشريف الخطيب وبنكهة مصر لشيرين سامى

الراجل بصلى كده وحط اديه فى جيوبه وقالى مش عارفهم

قلتله اه ماهم اول كتاب ليهم طيب هم ناشرين عن طريق دار ليلى للنشر فلو مجمعين الكتب حسب دور النشر شاورلى بس على مكانها

قالى اى دار ليلى دى؟

ساعتها انا ماعرفتش اقوله ايه الراجل مش عارفها يكنش انا نسيت اسم الدار؟
الراجل راح قالى استنى اسألك محمد ونده على الاخ محمد واذ بشاب فى اخر العشرينات كده يطلع من ورا احد الدواليب!

سأله :انت تعرف حاجة اسمها دار ليلى؟
الشاب فكر شويه كده وقاله اه ماهى دى الدار الجديدة اللى حكتلك عنها وراح موجهلى الكلام

معلش مالهاش حاجة عندنا بس ممكن تلاقيها فى المكتبه الجديدة اللى امام كليه طب اسمها كلمات وادانى الكارت بتاعها شكرته وقبل ما امشى قلتله معلش سؤال كده على الماشى

هى الكتب هنا مترتبة تبع ايه؟
قالى تبع السعر .....الكتب ام نص ج مع بعضها والكتب ام 1ج مع بعضها وهكذا!!!!!!!!

الحقيقة ماعرفتش ارد ولا اعلق اخدت الاجابة وحاولت افهمها ومشيت

بس مايأستش ..رحت للمكتبة اللى ادونى عنوانها ..مكتبة ظريفة فعلا ..اينعم مالقتش اللى بدور عليه..واينعم مايعرفوش دار ليلى بردو ..بس وعدونى ان كتبها هتنزل عندهم قريب

والجميل انى لقيت عندهم كتابين كنت بدور عليهم من سنة تقريبا واحد اسمه تاكسى والتانى اسمه212  يعنى ماخرجتش بايدى فاضية

واوعدكم انى هبقى احكيلكم عن الكتب دى .....وانى ورا كتب اصحابى لحد ما اوصلها:)

الجمعة، 13 يناير 2012

الحواجز الوهمية



التقى رجلان غريبان فى محطة القطار احدهما بدين انيق جدا كان خارجا من مطعم المحطة,
والاخر كان نحيل جدا وكانت معه زوجته النحيله ووولديه وحقائب سفرهما......

اخذ كل منهما يحدق فى الاخر وقد اكتشفوا انهم اصدقاء الطفولة...

اندفع يحى كل منهما الاخر ويعانقه فى سعادة..واخذ النحيل يقدم للبدين اسرته الصغيرة فى فخر ثم اخذ يذكره بايام الطفولة والدراسة واللقب الذى  اطلقوه عليه فى صغره لاغاظته واخذ البدين يضحك من كل قلبه ..ويذكره هو الاخر بالمقالب التى كان يصنعها به ..ثم سأله عن حاله 

فاجاب النحيل بالحمد وان الله ساترها معهم رغم المرتب الضئيل لكنه يشغل وظيفة موظف محترم فى احدى الوزارات الحكومية ويساعد نفسه على المعيشة بعد الضهر بكشك سجاير ومعلبات صغير امام البيت..وانه ات للمدينة فى زيارة عائلية

ثم سأل صديقه البدين  عن حاله فاجابه فى تواضع انه يشغل منصب جلل فى احدى الوزارات...

فيمتقع وجه النحيل حين يعلم انه امام احد كبار رجال الحكومة وتذهل زوجته ويزرر احد الابناء زرار جاكتته بحركة تلقائية....ثم يتمالك النحيل روعه ويقول بصوت هادئ وبابتسامة

                         "فرصة سعيدة ياصاحب السعادة"

ترن العبارة فى اذن البدين رنينا غريبا ويشعر كأن حاجز وهمى  قد اقيم فجأة بينه وبين صديقه

يحاول جاهدا ان يهدمه.....

صاحب سعادة ايه بس ياعم اى اللهجة دى احنا اصحاب ومافيش بينا الكلام ده.......

لكن هيهات لقد اقيم الحاجز وانتهى الامر..

صافحهم وانصرف مودعا الاسرة فى ذهولها السعيد ومودعا معهم احساس الصفاء القديم.......

الأربعاء، 4 يناير 2012

الحب هينقرض!!



نعم..سوف ينقرض الحب ايها السادة .......سوف ينقرض فى يوم من الايام لو استمر الحال على ماهو عليه.....

لو نفتكر زمان ايام الابيض والاسود وايام عبدالحليم الحب كان عامل ازاى..كان شئ فريد جدا احساس رقيق يصيب البطل والبطلة والمتفرجين بحالة من الشفافية والرقة والعذوبة لا مثيل لها

كان القارئ لرواية رومانسية او المشاهد لفيلم يروى قصة حب بسيطة بيخرج حامل نفس الروح الرقيقة المهذبة

لكن الحال الان اختلف ....اصبح من يقرء راية رومانسية هو شخص فاضى لاهموم له يعيش فى عالم خيالى افتراضى منغلق ويتوقع له المحيطين  بحالة اكتئاب رهيبة هيعانى منها بالتاكيد بعد اصتدامه بالواقع

اصبح مشاهدة فيلم رومانسى فى السينما شئ مخجل وتشوبه شوائب ونواية غير حسنة بالمرة!!

حتى اننى اتوقع انه سيأتى يوما وينقرض فيه الحب والرومانسية مثلما انقرضت حضارات كثيرة..

يوم ما بعد الف سنة سيقف السياح لمشاهدة تمثال لاثنين من المحبين ويلتقطون له بعض الصور

ويشرح لهم المرشد ان فى الزمن البعيد كان هناك عادة غريبة عند البشر ان يقف رجل وامراءة ينظران للقمر او للغروب ويتهامسان بكلمات غريبة لا هدف منها سوى  اقناع كل واحد منهم للاخر بتكوين اسرة!!!!!!!

الأحد، 1 يناير 2012

ونبتديها بضحكة:)




احترت ابتدى السنة الجديدة بايه......
بتفاصيل يومى؟....
لا لا ده كان فيه ضرب نار وحاجات فانى خالص مش وقته احكيهالكم النهاردة

بكلامى وذكرياتى ومين كنت عاوزة اسمع صوته وماحصلش؟......
برده لا مش طالبة 
لكل مقام مقال يعنى ولازم نبتديها تفاؤل كده
ايه رائيكم نبتديها بضحكة؟؟

توكلنا على الله
بيقولك ايه.........

فى حاجات فى ضحكتنا بتحسسنا اننا عايشين..
حتى لو كنا متكلبشين...

طول ما الضحك ببلاش بيطلع فى اى وقت..
"ضحكة تعديك من ازمة"
او
"ضحكة تخلى اليوم يعدى"
او
"ضحكة تخلى البساط احمدى"
مش مهم بنضحك ليه!!
المهم نضحك....
اضحكلها تضحكلك:)