الأربعاء، 30 مايو 2012

مع نفسى10



الدنيا دى غريبة اوى..ممكن يكون عندنا فيها كل حاجة او معظم الحاجات ومع ذلك نشغل نفسنا بحاجة صغيرة..نفضل وراها ونتعب علشان تبقى عندنا..
وتبقى كارثة لو مابقتش لينا..
ومايقدرش حد يلومنا على ده كمان على فكرة..لان ممكن رحلة بحثنا عن الحاجة دى..
هى اللى مدينا سبب للحياة!!!
************

هنا هكتب شرح للحالة واعتذار عنها فى نفس ذات الوقت
بعتذر عن انى مش بتابع حد ومش بقرا لحد كمان
ده انا حتى ماكنتش بكتب من فترة وبعدين حسيت انى هصدى فقررت انى اى كلام هيبقى احسن من السكوت

حالة غريبة من عدم القدرة على عمل اى شئ او حتى التفكير فى اى شئ
حالة غريبة حاسة فيها ان جوايا طاقة كبيرة ومخزون من المشاعر والافكار عديمة الملامح مش عارفة احدد ان كانت ايجابية ولا سلبية غاضبة ولا لاء
تقولولى حاولى تخرجيها من جواكى وانتى تعرفى..
وهنا تكمن المشكلة ..ماعنديش طاقة اخرج الطاقة
حالة هبوط لا معنى لها.....

الخميس، 3 مايو 2012

هى وهو...2



هى: هو انت ليه ما بتسألنيش مالك؟
هو:عادى يعنى!!
 
هى: يعنى انت مش حاسس خالص ان فيه حاجة مضيقانى؟!
 
هو:طب مانتى لو فيه حاجة مضيقاكى ماتقولى على طول ..انتى غريبة او ى على فكرة!!
 
هو: يعنى انا اقولك على اللى مضايقنى كده من الباب للطاق وانت حتى ماعندكش استعداد تسمعنى؟
ثم اقولك امتى وانت بتتفرج على التليفزيون وانت مش حاسس بالدنيا  ولا وانت عمال تتكلم ومش مستنى منى رد اساسا ولا وانت فى الشغل ولا وانت نايم!!!!
 
هو:عموما انتى بقالك فترة فعلا متغيرة وانا سايبك لحد ماتيجى وتحكى انتى
 
هى:المفروض تحسسنى انك حاسس بيا..انك مهتم
انك موجود علشان تسمعنى انى فارقه معاك مش امر واقع فى حياتك
هو:يوووه تموتى انتى فى الفلسلفة..خلاص ياستى مالك فيكى ايه
 
هى: (بنظرة غيظ والم),..........مافيش
 
هو: (بنظرة غيظ وزهق).....خلاص انتى حرة انا غلطان اصلا