السبت، 30 يونيو 2012

عن..فقاقيعى




هل تذكرون فقاقيعى  ..

منكم من سيتذكرها..سيتذكر كم كانت بريئة ايام الطفولة..محملة بالامنيات..
ومع الوقت تحولت فقاقيعى الجميلة الى وسيلة مواصلات تاخذ تلك الامنيات الى مكان مجهول بلا رجعة..

الان ومع مرور الوقت اكثر ..مازالت هى لعبتى المفضلة التى تبهرنى بالوانها فى اشعة الشمس كعادتها..ولكن ..اصبح لى فيها مأرب اخرى..

فلقد اصبحت احمل كل واحدة منهم باسماء من تسببوا لى بالم او جرح ..او جعلونى افقد الثقة فى معانى جميلة عشت عمر اؤمن بها..اصبحت احملها باسماء من خذلونى..

تخيلوا معى..هذه الفقاعة باسم فلانة...راقبوا معى ..هاهى تذوب فى الهواء(تنفجر فى الهواء من اجل الدقة)..
نعم لقد تطورت فقاقيعى...

تطور غريب...منفسن...ومقلق لو جاز لى الحكم عليه...

لكنها ستظل لعبتى المفضلة..

الاثنين، 25 يونيو 2012

عن...الحاجات اللى مش فاهماها





لما ضرس احمد حصله تسوس وسببله الم جامد لم يجد جده غيرى انا علشان اخلعهوله.!!
لماذا؟!...لانى  دكتورة صيدلانية طبعا..واضحة يعنى
 اى علاقة الصيدلة بالاسنان؟؟!!..علاقة واضحة جدا ..اقله هناك لقب دكتور قبل اسمى موجود..
 لازم اكون بفهم فى الحاجات دى..!

...............
لما دخلت ام دينا الصيدلية علشان تشترى حاجة مش فاكراها..لقيتها بتنبهنى وبتقولى خدى بالك يا دكتور المقص اللى على المكتب مفتوح..!!
بصيت للمقص وبصتلها ..وفى عدم فهم قلتلها يعنى عاوزانى اقفله ولا عاوزاه تعملى بيه حاجة؟!
قالتلى لا يا حبيبتى تسلمى بقولك بس اقفليه الحاجات دى مابتبقاش حلوة..!!
وللى هيتفزلك فيكم ويسألنى اى الحاجات اللى مش حلوة وهتحصل دى...فانا ماسألتش 

الجمعة، 22 يونيو 2012

عن ....البدايات





كتير من الناس بيشوفوا البدايات عبارة عن امل جديد ..حاجة بتديهم هدف يسعوا ويعيشوا علشان يحققوه...
كل ده صح جدا 
لكنى بخاف من البدايات..

لازم كل ما تيجى بداية جديدة احس بتوتر شديد وحالة الحذر والشك والترقب تبتدى ..مش عارفة ليه

جايز لان البداية مصحوبة بنهاية حاجة انا اتعودت عليها؟ويمكن ده اللى كان بيخلينى ابقى خايفة اوى فى كل بداية مرحلة دراسية..خايفة الناس اللى اتعودت عليهم مالقهومش..خايفة الطريق اللى اتعودت  امشى فيه اغيره..

بخاف على الحاجات اللى عندى لاتقع منى  رغم ان عندى قناعة انى هكسب حاجات غيرها فى بدايتى الجديدة..زى ما اكون عاوزة كل حاجة عاوزة احتفظ بقديمى واكسب جديدى وده مستحيل لان وبالمنطق لازم تفضى مكان فى حياتك علشان تملاه بحاجات تانية...

يمكن بخاف من البداية لانها مجهول..

يمكن بخاف من البداية لانها ممكن تأثر على حالة الاستقرار اللى عندى رغم ان ممكن تكون الحالة دى اصلا مش بسطانى..ممكن ايه ده اكيد!!

جايز لان الوقت اللى بيعدى بين كل بداية وبداية فى حياتى كبير اوى فببقى اتعودت على الدنيا كده..
مش عارفة..
رغم انى فى امس الحاجة لبداية جديدة لكنى فعلا بخاف من البدايات...

الخميس، 21 يونيو 2012

وانت ماااااالك...





اوقات كده بيجيلى حالة غيظ من الناس لما الاقيهم حاشرين مناخيرهم فى تافصيل حياتى..
اوقات التدخل ده علشان نبلعه بنحطله عنواين شبه انهم بيحبوك او امرك يهمهم ..بس مش فى كل الاوقات هينفع نضحك على بعض ونقول كده..لأ..ده اسمه تدخل

يعنى مثلا لما تبقى حد مافيش بينا اتصالات وكنا زمايل ثانوى ولا اعدادى حتى وتقابلينى صدفة والاقيكى بالاحضان  واموووواه اموووواه ايه ياريمو يا حبيبتشى لسه ماتجوزتيش؟! طب ليه ؟انتى فى حد فى دماغك ولا ايه؟ طب بترفضى ليه؟ولا هو ماحدش بيجى؟!!! يلا بقى اتجدعنى..كله ورا بعضه كده  ومالاقيش حاجة ارد بيها الا على الله التساهيل ..تقوم رزعانى الجملة النهائية فى ماتش الملاكمة ده(لا ياحبيبتى اتجدعنى العمر بيعدى)
وانتى مااااااالك ..وايش عرفك بظروفى...انا اصلا افتكرت اسمك بالعافية:!(طبعا ده فى عقل بالى يعنى..)

احاول اتناساها واقول اهى مرة ومش هقابلها تانى ان شاء الله الاقى طنط حشرية على رأى غادة صحيت من النوم العصرية كده مالقتش حاجة تعملها تقوم متصلة بماما..
ازى ريمو يا ام ريمو عاملة ايه ..الا قوليلى يا حبيبتى هى لو جالها فلان ترضى بيه؟
تقوم ماما ببرائتها المعتادة تقولها لو فيه قبول هنرفضه ليه بس يعنى هو كلمك فى حاجة ؟
 تقولها لا ابدا!!!!
اومال بتتكلمى على اساس ايه؟
ابدا يا حبيبتى ده انا بقول لو يعنى..جت على دماغى الفكرة كده وانا بشرب شاى ياترى لو هو فكر يتقدم هى هتوافق ؟؟؟!!!!!!!!!!

اسمه ايه ده بقى!!!!!!! 

وكله كوم والتالته كوم
تقابلنى فى الشارع ازيك وعامله ايه واخبارك..وتسيبنى وتمشى

وبعد نصاية كده تقابل اختى وسلامات وطيبيون وتقوم سألاها هى صيدلية اختك دى بتاعتها ولا هى حاطة اسمها عليها بس؟؟

طب مانتى كنتى معايا لسه ماسألتنيش انا ليييه؟واصلا اصلا انتى مااااالك؟

كنت زمان بسمع جملة من تدخل فيما لا يعنيه سمع مالا يرضيه..

ومالا يرضيه دى هتكون انتى مالك بعلو حسى..اكيد يعنى مش هفضل اقولها فى سرى كتير  اكيد فى مرة هتنطلق فيها واللى يحصل يحصل بقى
هه بس

الأربعاء، 20 يونيو 2012

عن ..الوردة اياها

بمناسبة ذكرى التدوين اللى عرفتنى على عالم من الابداع لا حدود له...مشاركة بسيطة واختارتها من الحاجات اللى بكتبها للى ماعرفش اسمه ده بناء على طلب صديقتى الانتم امنية واللى هتموووووت وتعرف كتباله ايه....فضول بقى :)



طول عمرى بحلم انك تجيبلى وردة..تكون جميلة ولسه مافتحتش اوى..بمناسبة او من غير مناسبة ماتفرقش..وتقولى مثلا الوردة دى اول ماشفتها فكرتنى بيكى..او اى كلام يجى على بالك وقتها مش هدق يعنى كل اللى يجى منك اكيد فى الموقف ده هيبقى روعة...اخد منك الوردة دى بقى واحطها بين اجمل صفحات اقرب روياتى ليا...وتعدى الايام والورد تنشف بس تفضل ريحة ذكراها الحلوة فيها..كل ما اشوفها افتكر لحظتها وابتسم..وانسى اى حاجة ممكن تكون مضيقانى منك..مانا اكيد هتضايق منك يعنى كل اللى سبقونا بيقولوا كده .....
المهم..من كتر ما الحلم ده شغلنى لفترة رحت واشتريت الوردة اياها ..زى ماتخيلتها..وحطتهابين صفحات الرواية اياها برده...والوردة عملت اللى عليها وقامت بالدور بتاعها بالظبط..نشفت
وفعلا كل ما افتح رواياتى سواء صدفة او متعمدة ادور عليها...امسكها وافتكر حلمى الوردى ده...وابتسم ..
اينعم ابتسامة تفرق كتير عن اللى كنت بحلم بيها...بس اهى بردك ابتسامة :) 

الثلاثاء، 12 يونيو 2012

عن توارد الاحاسيس.....

عارف ايه اللى مضايقنى؟

انى حاسة انى انضحك عليا..
زى ما تكون الدنيا شاورتلى على الفرحة من بعيد وقالتلى ..بصى بصى العصفورة!!!

بصيت وماطلتهاش.!!!

ولما رجعت لقيت الدنيا اخدت من حياتى كل حاجة حلوة!!

ل سارة درويش
__________

اهو ده تلخيص للى عاوزة اقوله ولذلك اول ما قريته لقتنى بقوا..
كنت هقولها!!