الخميس، 21 يونيو 2012

وانت ماااااالك...





اوقات كده بيجيلى حالة غيظ من الناس لما الاقيهم حاشرين مناخيرهم فى تافصيل حياتى..
اوقات التدخل ده علشان نبلعه بنحطله عنواين شبه انهم بيحبوك او امرك يهمهم ..بس مش فى كل الاوقات هينفع نضحك على بعض ونقول كده..لأ..ده اسمه تدخل

يعنى مثلا لما تبقى حد مافيش بينا اتصالات وكنا زمايل ثانوى ولا اعدادى حتى وتقابلينى صدفة والاقيكى بالاحضان  واموووواه اموووواه ايه ياريمو يا حبيبتشى لسه ماتجوزتيش؟! طب ليه ؟انتى فى حد فى دماغك ولا ايه؟ طب بترفضى ليه؟ولا هو ماحدش بيجى؟!!! يلا بقى اتجدعنى..كله ورا بعضه كده  ومالاقيش حاجة ارد بيها الا على الله التساهيل ..تقوم رزعانى الجملة النهائية فى ماتش الملاكمة ده(لا ياحبيبتى اتجدعنى العمر بيعدى)
وانتى مااااااالك ..وايش عرفك بظروفى...انا اصلا افتكرت اسمك بالعافية:!(طبعا ده فى عقل بالى يعنى..)

احاول اتناساها واقول اهى مرة ومش هقابلها تانى ان شاء الله الاقى طنط حشرية على رأى غادة صحيت من النوم العصرية كده مالقتش حاجة تعملها تقوم متصلة بماما..
ازى ريمو يا ام ريمو عاملة ايه ..الا قوليلى يا حبيبتى هى لو جالها فلان ترضى بيه؟
تقوم ماما ببرائتها المعتادة تقولها لو فيه قبول هنرفضه ليه بس يعنى هو كلمك فى حاجة ؟
 تقولها لا ابدا!!!!
اومال بتتكلمى على اساس ايه؟
ابدا يا حبيبتى ده انا بقول لو يعنى..جت على دماغى الفكرة كده وانا بشرب شاى ياترى لو هو فكر يتقدم هى هتوافق ؟؟؟!!!!!!!!!!

اسمه ايه ده بقى!!!!!!! 

وكله كوم والتالته كوم
تقابلنى فى الشارع ازيك وعامله ايه واخبارك..وتسيبنى وتمشى

وبعد نصاية كده تقابل اختى وسلامات وطيبيون وتقوم سألاها هى صيدلية اختك دى بتاعتها ولا هى حاطة اسمها عليها بس؟؟

طب مانتى كنتى معايا لسه ماسألتنيش انا ليييه؟واصلا اصلا انتى مااااالك؟

كنت زمان بسمع جملة من تدخل فيما لا يعنيه سمع مالا يرضيه..

ومالا يرضيه دى هتكون انتى مالك بعلو حسى..اكيد يعنى مش هفضل اقولها فى سرى كتير  اكيد فى مرة هتنطلق فيها واللى يحصل يحصل بقى
هه بس

هناك 52 تعليقًا:

rona ali يقول...

الا صحيح هى مااااااااااااااالها دة اتنقط ليكى سلف يا شيخه

ايوان ايوان الحضن المعتاد مع مافيش جديد تحسي انك عايزة تقولى ليها يا حجه لو عايزة الجديد جيبي جرايد بكرة بليل هههههههههههههه
حاجه تنقط يا اختشي والله
بس انا بقي بصد وارد واخد حقي يعنى اتنقط واسيبها :))

سندباد يقول...

هههههههههههههه
ومن الفضول ما قتل او ومن قيل له وانت مالك

Śђąžล ฬąђ٤єĐ ♥ يقول...

يارييييييت نقدر نقول انتي مالك دي بصوت عالي ساعتها هنرتاح ونبقا مبسوطين
;)

NoNa AnGeL يقول...

ههههههههههههههه
بس برااااحة على نفسك شوية هيجرالك حاجة بسبب ناس ملهاش لازمة حشرية
بصراحة بشوفهم كتير اويييي :D
الله يكون فى عونــك

Aya Mohamed يقول...

هههههههه انا اوقات بقولها بقى
بس بهزار اقولها وانتى مالك هو انتى يعنى
كنتى بتسالى ههههههههههه
واوقات فى ناس بتحسى انهم هيسالوا حاجة
فقبل ما يسالوا تقومى انتى ساله نفس
الحاجة نوع من الرخامة يعنى :))
بس معاكى انا جدا بتبقى حاجة مستفزة جداربنا معاكى يا ريمو :)

ابداعى لا يعرف حدود يقول...

جميله جدا وطريقة الكتابه مسليه وحلوه
حياكى الله كم جميل ان اقرء كلماتك

E73 يقول...

هقولك على ردود افعالي كما كانت اثناء قراءة البوست

بالنسبة للبنت اللي قابلتك وغسلتك
"وانتي مال اهلك؟" اتجدعن ازاي يعني والله مفهمتش اروح اشتري واحد يعني ولا اعمل ايه؟ متورينا شطارتك حضرتك لو الموضوع مأزمك قوي كدا

بالنسبة لطنط حشرية أول رد فعل جه على بالي
دانتي رخمة سقاعة >_<

بالنسبة للسؤال الاخير
لما هو السؤال محشور في زورك قوي كدا ونفسك تسأليه ماكان أولى تسأليني أما دي حاجة غريبة صحيح ناصحة قوي مجاش علىب الك اختي هتقولي؟

بس كدا انا ارتحت هههههههههه

wessam يقول...

اجمل حاجه البدايه والله لسه بضحك وبعدين ليه مستغربه مااحنا العرب كده غاويين نحشر نفسنا فى كل حاجه

مصطفى سيف الدين يقول...

طبعنا و لا هنشتريه
ده كويس انها بتيجي تسألك
غيرها بيألف مع نفسه قصص عنك و يصدقها و يروجها

ابراهيم رزق يقول...

ايه يا نوووووووووور

بجد بجد ناس حشرية
ومش عارف بيسالوا الاسئلة دى ليه
بجد بجد بجد بجد الناس دى عندها فضول قاتل

الا صحيح لما تكون بنت زى القمر كده و دمها خفيف ومثقفة متجوزتش ليه
وبعدين تعالى هنا هى الصيدلية بتاعتك و لا لا
و تعالى هنا هو انتى عندك فلوس فى النك و لا فلوسك بتحطيها
فين ايه ده بتقولى مفيش فلوس فى البنك
امال فلوسك بتصرفيها فين
مفيش فى مصر اكتر من العيانين
و الصيادلة طالعين واكلين نازلين واكلين
لازم تحافظى على فلوسك متصرفهاش فى اى حاجة فاهمة
بجد بجد عالم رزلة
اللى تعالى قوليلى محدش هيسمع
امتى هنفرح بيكى ونشوفك بالفستان الابيض يا اجمل عروسة
ههههههههههههههههههههههههه

يالله سلام قبل متخبطينى بزجاجة المحاليل اللى فى ايدك

shreif elsaftty يقول...

الا صحيح المدونه دي بتاعتك وده كلامك ولا مستلفها من حد هههههه لا بصراحه الفكره حلوه جدا وده طبعا داء فينا احنا المصرين بالذات مش عارف ليه انا بحسه تحقيق مش حد بيطمن عليا فعلا انت مالك تسلم ايدك

Bent Men ElZman Da !! يقول...

انا بتشل بجد من الناس اللى كده
لا والاسوء بقى
فى ناس بتبقى عامله حوالين حياتهم سلك شائك ومزاجهم يعملوا حياتك مشاع
ويسألوا ويستفسروا منك ومن غيرك
ولو فكرتى تعرفى عنها حاجه تبقى بتحلمى
ناس حشريه صحيح والله
ربنا يكون فى عونك وفى عونا كلنا

Nour يقول...

من اكتر الحاجات اللي ممكن تضايقني في حياتي بجد
مش ممكن الفضول والحشرية اللي في بعض الناس بجد خصوصا لو انتي بقى كمان مش كده
بس ساعات السكوت او النظرات في حد ذاتها بتبقى انسب رد على الناس اللي زي دي :D

mena moon يقول...

الفضول ده حاجه رخمه جدا والناس فعلا ديما حاطه مناخيرها في حياتي الناس التنيه ليه ما كل ولحد يخلى مناخير في وشه وخلاص ^_^

بس صحيح يا ريمو هي الصيدليه بأسمك ولا ايه ؟ هههههههههه بهزر

ريـــمـــاس يقول...

صباح الغاردينيا يانور
هههههههههه
بجد ضحكت الناس دي بتلاقيها في كل مكان
ويموتوا ويعرفوا كل حاجة عنك "
؛؛
؛
لروحك عبق الغاردينيا
كانت هنا
Reemaas

reemaas يقول...

rona ali


ههههههههه والله يارونى بيحسسونى انى مهمة اخر حاجة واخبارى هتغير مجرى التاريخ

reemaas يقول...

سندباد
هم ونصيبهم بقى انا استحلفتلهم خلاص

reemaas يقول...

Śђąžล ฬąђ٤єĐ ♥
انا بدرب نفسى اهو وهديكى نتيجة التجربة اكييييييييد

reemaas يقول...

NoNa AnGeL


هههههههه عاوزة اعملهم ابادة

reemaas يقول...

Aya Mohamed

تصدقى فكرة حكايه اسبقهم دى :)

هجربها

reemaas يقول...

ابداعى لا يعرف حدود


متشكرة جدا واتمنى كل اللى اكتبه يعجبكم

reemaas يقول...

E73

هههههههههههههههههه ايون نفسى اقولهم كل ده

reemaas يقول...

wessam


اه ماحنا لازم نتغير بقى هنفضل كده كتير ولا اييييه

reemaas يقول...

مصطفى سيف الدين

يالهوى
اهو ده اللى ناقص بجد

reemaas يقول...

ابراهيم رزق
هههههههههههههههههههههههه

اول مرة احب الحشريين ههههههههههههههههههههه


ادعى انت بس اصل النية موجودة هههههههههههههه

reemaas يقول...

shreif elsaftty

ايجار سنة :)

انا خلاص بدات اتاكد انه طبع مصرى اصيل

reemaas يقول...

Bent Men ElZman Da


ايووووووووون دول بقى عاوزين ديناميت ونفجرهم اصلا

reemaas يقول...

Nour


جربتها والله بس قوبلت ببجاحة نااااااااادرة

reemaas يقول...

mena moon


وعلشان كده عهد المناخير المسمسمة ولى وراح خلاص :)

reemaas يقول...

ريـــمـــاس


كده بقت خصلة عربية مش مصرية بس :)

نورتى الدنيا ريموسة

هبة فاروق يقول...

عارفه ان نفسى اعملها مره واحده فى حياتى واقولها بس مش فى سرى لا اقولها وتفضل ترن فى ودان اللى قدامى انتى مالك انتى مالك حلوه مش كده
بوست عسل وربنا يكفينا شر الحشرييين

شيرين سامي يقول...

هههههههههههههه
أنا بتخنق من الناس دي أوييييي
ده حتى في العزاءمبيحترموش الموقف ويفضلوا يتحشروا!
بس بجد أنا معاكي إحنا لازم نقولها بصوت عالي..
و إنت مااااااالك

تحياتي يا ريمو يا قمر :)

نيسآان يقول...

هو مش فضول...هو قلة ذوق بنظري.
اسئله كثيره مالهاش داعي ...

βent Pasha يقول...

ههههههههههههههههه

حقيقي الناس دي بيبقوا عايزين محرقة ويتحطوا فيها .. إيه الناس الحشرية دي ؟

ياساتر يارب
:-)

تقبلي مروري

reemaas يقول...

هبة فاروق

ماهى دى خطتى الجايه يا هوبة :)

reemaas يقول...

شيرين سامي


ههههههههه اه وربنا العزا ده بحسه مناسبه للنميمة والله

reemaas يقول...

نيسآان


ايوووووووون انا احتمال اشير البوست ده للحشريين علشان يعرفوا هههههههههه

reemaas يقول...

βent Pasha


صدقتى والله عالم زيادة عن حاجة البشرية

الاحلام يقول...

وجزاء كل من يتدخل فى ملا ليعنيه هو انتى مالك
حقا لابد ان نقولها بعلو الصوت والى يحصل يحصل
اصلح الله حالنا جميعا
تحياتى ابوداود

إيمي يقول...

معاكي حق و الله
الواحد ماله أصلا يدخل في اللي ليه و اللي ملهوش
المشكلة مش بتقدري بقى تقوليله أو ليها و انت أو انتي مااااااااالك
و بتفضلي كل يوم بقى تقوليها في سرك لغاية لما في يوم تنفجري
بس يستاهلو

كنت هنا

إيمي

habiba يقول...

بجد كلامك معبر جدًا...يللللهوى على الناس دى..
أكتر من مرة يبقى نفسى أقول وانت مالك بس بسكت..وبعدها أقول المرة الجاية مش هسمح لحد يسالنى بالطريقة دى..
الحمدلله اننا مش من نوعية الناس دى..الحمدلله الذى عافانا
دمت بخير حال

richardCatheart يقول...

:)

eng_semsem يقول...

الله يكون في عونك
وبصراحه البنات مظلومه في الناحيه ده بالذات دايما طنط بتحب تساعد وتخدم وتتدخل وخلاص
تحياتي

نهر الحب يقول...

معلش بقي معلش
دي يتقالها لامؤاخذة يعني
مش وانتي مالك
وانتي مال اهلك يا تيييييييييييييييييت يا بنت التييييييييييييييييييييييييت
sorry
:DDD

غير معرف يقول...

اجمل شئ انك تحبيهم
زي ما بيقولوا حب عيبك يكرهك
يعني زي ما بيسالوا اسالي زي ما بيرخموا في الاسئله
رخمي في الاجوبه ومافيش مانع انك تشتغاليهم من غير ماحد
يمسك عليك غلطه في الرد جربي كده وقوليلي
تحياتي 

غير معرف يقول...

نسيت أضع اسمي
كارولين فاروق وليس غير معرف

reemaas يقول...

الاحلام

ايون كده شجعوووونى

reemaas يقول...

إيمي


مانا عاوزة اقولها فى وشهم وينفجروا هم بس ازااااى

reemaas يقول...

habiba

الحمد لله اكيد
ماهو السكات ده اللى بيفقع

reemaas يقول...

richardCatheart

:)

reemaas يقول...

eng_semsem

طنط حشرية عارفاها

reemaas يقول...

نهر الحب


لا لا لا سورى ليه صح وربنا