الخميس، 25 فبراير، 2016

# صورة_تحكى










لا تعتقد يا عزيزى انى لن استطيع اخذ قرارتى من دونك..
من قبلك كنت اَخذ قرارتى وكان لى كينونتى..
ولكنى تقبلت الدور الثانى  لانى أحببتك  وارتضيت لك دور البطولة..
ولكن ضع دائما فى حساباتك أن المرأة التى تستطيع ان تتخذ قرار قص شعرها تستطيع ان تسير حياتها وتأخذ اى قرار بحياتها.

الأربعاء، 17 فبراير، 2016

#التفاصيل







المثل الغربى يقول ان الشيطان يسكن التفاصيل..
اسمع المثل ده مؤخرا كثيرا فى البرامج الحوارية ولا اتفق معه فى كل الحالات..
ففى رأيى أجمل شئ فى الدنيا التفاصيل..
هى اللى بتفرق حدوتة عن حدوتة..
هى اللى بتفرق زيد عن عبيد..
تفاصيلك هى انت.. هى كينونتك..
هى الطريقة اللى بتحب بيها..
ولما انت بتحب حد بتحبه بكل تفاصيله , بتحبه علشان بتحب تفاصيله..
انا اعشق التفاصيل واعشق من يعرف تفاصيلى ويرضى بها ويحبها ;)

الثلاثاء، 16 فبراير، 2016

رسالة 38 (رسايل الى مجهول)













(38)

بحب تركز فى التفاصيل..

 تفاجئنى انك عارف انا عندى كام ضحكة..

 بتريق ازاى.. بزعل ازاى.. ايه بيستفزنى ..

انا بعشق التفاصيل وهحبك اوى لو ركزت.

الاثنين، 8 فبراير، 2016

castaway on the moon








انها تضيق فى وشك فتبعد لحد ماتلاقى نفسك..
تلاقى أمل تقدر تعيش ليه تانى..
انها تضيق فى وشك من كتر الجرى والعقبات والبيبان المقفولة , فتبعد..
تبعد وتعرف ان مش المهم انك تلحق البيبان قبل ماتتقفل..
المهم انك تلحق نفسك وماتنساش ان البيبان حتى لو اتقفلت ممكن تلاقيلها مفتاح مناسب ونحاول تانى..

انها تضيق وتفتكرها خلصت معاك على كده فتلاقى حد بيعافر علشان يحقق امله بنفسه فيصحى الأمل تلقائى جواك وتعافر انت كمان تانى ..

فيلم حلو :)

الثلاثاء، 2 فبراير، 2016

عنها..50








_المفروض ده احلى يوم فى حياتنا عاوز افهم ايه لازمة الدموع دلوقتى؟!

_ مش هلخص الحكاية واقولك دى دموع الفرح..
لحظة ماكنت بتردد الكلام ورا المأذون حسيت ان كل الحدوتة بتاعتنا بتمر قدام عنيا كأنها شريط ,صور لينا عمالة تنور فى دماغى زى الومضات او النجوم اللى بتظهر بسرعة وتختفى بسرعة!
افتكرت واحنا لسة بنبتدى وخايفين من كل اللى حوالينا ليهدوا حلمنا..
افتكرت لحظة العناد اللى وصلنا فيها لقرار ان اى حاجز هيقف فى سكتنا هنزيحه..
 
افتكرت العهد اللى اخدناه بان فرحتنا واحاسيسنا واحلامنا اللى حلمناها وتفاصيلنا مش هنحققها  الا مع بعض ولا هنشارك فيها حد..

افتكرت ساعة مامسكت ايدى وقولتلى مش هسيبها ماتخفيش..

افتكرت كل الدعوات اللى دعيت ربنا بيها واللى ملخصها انت..
عرفت اد ايه رحمة ربنا كبيرة ونعمه عليا مالهاش حصر..
افتكرت كل ده وانت ايدك فى ايد وكيلى وبتردد كلام المأذون فدمعت..

_ الله طب انت بتدمع ليه دلوقتى؟!

_ دى دموع الفرح :)