الاثنين، 24 يونيو 2013

مع نفسى 18









ياستى مش معنى انى بعمل مش زعلانة انى فعلا مش زعلانة ..لا بقى
كل الحدوتة انى عاوزة الدنيا تمشى وانى فيا قدرة انى اعدى ..لكن ناخد بالنا من تصرفناتنا بقى ..ولا ايه!!

******

شوفتى فلان اترقى فى شغله.. ياستى اصله مظبط مديره ناس بتعرف تتصرف!
شوفتى فلانة اتخطبت..اه ياستى رسمت على الواد ووقعته!
شوفتى فلانة لسه ماتخطبتش.. اه يابنتى اكيد فيه ان  تلاقيها مرتبطة!
شوفت فلان دخل كلية عسكرية.. اه ياسيدى هى البلد دى اصلا بلد كوسة!

ايييييييييييييه يا جماعة هو مافيش حد  مجتهد ولا حد ربنا كاتبله كده خالص؟!!
لازم نظرية مؤامرة!!!!
*****

فرق كبييييير جدا انك تخسر حد وانك تكون ناوى تخسر حد !
*****

فى ناس كده لما بتتعامل معاهم بتكتشف فى نفسك حاجات حلوة ماكنتش انت نفسك تتخيلها ..وناس تانية تخصص فى اخراج اسوء ما فى الناس يا جدع!

الخميس، 20 يونيو 2013

عنها 6....









فاكر لما سألتنى اى اكتر حاجة بتحبيها؟

فاكر لما قولتلك؟
فاكر لما وعدتنى انك تحققهالى لانك نفسك تفرحنى؟

فاكر لما صدقتك؟!!
فاكر لما جتلك فرصة تعمل ده وماعملتوش؟!

طب فاكر لما جتلك فرصة تانية وتالتة ...وعاشرة وعملت هندى بردو؟!!
 فاكر؟!!
انا فاكرة !!!

الخميس، 13 يونيو 2013

من فضلك لا تندهش !!







*ولما سألنى وغلب الدنيا فى عينه..
عندكيشى علبة لبن مدعم يادكتورة؟
قلتله هيجيلى بكرة ان شاء الله هعينلك واحدة..
راح مبتسم وقالى..(بروموس)
نعم؟!
بصلى بصة كده اللى هى معناها اومال دكتورة ايه وتعليم ايه بس!! شهدات على الفاضى صحيح..
وراح قايلى فى صبر..يعنى وعد يعنى يا (ابلة) ؟

قلتله اه ..بروموس بروموس !! معلش ماليش فى اللغات !


******



دخل عندى الصيدلية وقالى لو سمحتى يادكتورة عاوز 100 علبة كيتوفان كبسول..
قلتله الكمية كبيرة ان شاء الله اجهزهملك على بكرة..
قالى طيب ماشى حسابهم كام..
قلتله 100 فى 5ج تمن العلبة يبقوا 500 ج
بصلى باستغراب وقالى حرام عليكى ده انا بجيب العلبة ب3 ج وربع والعربية بتجبهم لحد عندى كمان بس  قولت اجى اسأل عندك يمكن يكون السعر ارخص!
قولتله ليه انت بتشتغل ايه ياحاج وعربية اى دى وبتجيبهم فين بالظبط؟!!

قالى انتى ماتعرفنيش ولا ايه انا فلات الفلانى صاحب سوبر ماركت الفلانى..وفى عربية من اللى بتوزع ادوية دى ! بتجيبلى الكيتوفان وباقى العلاجات التانية وبتحسبه زى مابقولك كده وانا بقى بوزعه على باقى الدكاكين الصغيرة..قلت اجى اعمل معاكى سبوبة بس واضح ان الجشع لو ساب الصيادلة مش هيلاقى صدر حنين وهيبقى يتيم!!!!!!!


الخميس، 6 يونيو 2013

مع نفسى 17






ملاحظة فى الناس حاجة غريبة اوى..لما مابيعرفوش اخبارك سواء انت مخبيها او ماعندكش اخبار اصلا تستاهل حد يعرفها بيألفوا.. اه والله بيألفوا اخبار عنك  تبدأ بالمقولة الشهيرة تلاقيها مشغولة فى كذا او عندها جديد كذا..ثم بتختفى كلمة تلاقيها الافتراضية وتصبح واقع وانت اللى مخبيه!
******

اوقات كتير بنصدق الكدب اللى بيتكدب علينا مش علشان احنا هبل لاء ابسلوتلى..بس علشان مابنتخيلش ان فى حد قادر يكدب متقن اوى كده!

******

اوقات كتير بيبقى فيه رسايل بين السطور بنعمل مش شايفنها علشان مانتوجعش او مايخلصش الحلم اللى عايشينه..الغريب بقى انها لما بتظهر او بتبقى علنية كده وواضحة زى الشمس بنتصدم ونزعل وكأننا ماكناش عارفين!
*****
رغم انى خلصت مذاكرة ودراسة من زمان بس ديما عندى احساس ان عندى امتحان ومش مذكراله كويس ومش داخله بكل المنهج..لدرجة انى بحلم بده !
 

الثلاثاء، 4 يونيو 2013

# كلمات سيئة السمعة





نهضة
 دستور
كهربا
مية
سد
ليبرالية
اخوان
شفافية
سيناء
قطار
تطهير
توافق
على مسافة واحدة من كل الاطراف
يجمعنا الحب
صوابع
الصندوق
تقصى حقائق
............... ( مين يزود )
 

الأحد، 2 يونيو 2013

عن ...ايه مواصفات فتى وفتاة احلامك؟




هو: عاوزها بيضا وحلوة ... مزة يعنى لو صح التعبير 
هى: عاوزاه واد حليوة ويا حبذا لو كان شبه مهند او حتى كريم
***

هو: عاوزها بنت مثقفة يعرف يتكلم معاها فى اى موضوع ويحس انها فاهمة
هى: عاوزاه بيعرف يختار لبسه وكلامه علشان تتباها بيه ادام عيلتها
***
هو: عاوزها من عيلة غنية وهتورث بعد عمر طال وياحبذا لو قصر 
هى: عاوزاه غنى يعرف يعيشها فى نفس مستواها او اعلى من مستواها حتى لو كانت بدون اى مستوى المهم يبقى غنى يجيبلها كل اللى بتحلم بيه يكون عنده بيت مستقل  وعربيه

***
هو: عاوزها حنينة طيبة ترعى بيته زى امه, بتطبخ زى امه, ست بيت زى امه
هى: عاوزاه بيصرف زى جوز بنت خالتها, حنين زى جوز اختها, طموح زى جوز صاحبتها
***

هو: عاوزاها بمية راجل تاخد بالها من البيت والعيال فى وقت انشغاله
هى: عاوزاه راجل يعتمد عليه يشيل همها اللى تعبت من كتر شيله لوحدها
***
هو: عاوزها هادية مش بتحب  الاختلاط ولا الظهور 
هى: عاوزاه بيحب التنطيط والسفر والجرى اللى مش عارفة تعمله طول ماهى فى بيت اهلها

***
هو: عاوزها تبقى شخصية قوية  ومتعلمة ومتدينة وطموحة..علشان تعرف تربى عياله على كده وتساعده انه ينجح
هى: عاوزاه شخص قوى ومتعلم وطموح علشان يساعدها انها تنجح اكتر ويشجعها تكمل احلامها
***
هو: عاوزها بنت حلوة اوى جميلة اوى بجسم فرنساوى علشان يفرح بيها ويجيب عيال قمرات زيها
هى: مش ناوية تخلف اول ماتتجوز وتلخم نفسها بعيال وتوظ شكل جسمها لسه بدرى
***
هو: عاوزها تبقى حلوة وصغيره ماتزيدش عن 22 سواء كان سنه 25 او حتى 35
هى: عاوزاه راجل يكون دكتور  هى مش اقل من بنات خالها اللى واخدين داكتره
***
هو: عاوزها متوسطة فى كل حاجة وراضى باى حاجة بس اهم شئ تكون رفيعة وتفضل كده هو بيكره التخن
هى: من غير شنب  ومن غير كرش ورومانسى ويفتكر كل الاعياد والمناسبات فى حياتهم
***
هو: عاوزها تكون خام بدون تجارب ويكون اول حب فى حياتها ماعندوش ثقة فى البنات من كتر ما صاحب
هى: عاوزاه راجل يعرف يعبر عن حبه مايبقاش خام ويتعلم فيها عاوزاه يعرف يهتم بيها ويلغى كل اللى قبله واللى طبعا مش هتجيبله سيرتهم
************************************

حاجات كتيرة وممكن تكون غريبة بيحلم بيها كل واحد فى التانى..بقدرالامكان بيحاول يلاقيها
ممكن تبقى غلط من وجهة نظرك.. بس اكيد هى صح من وجهة نظره ومش هيكتشف انها صح او غلط الا لو لاقاها وجرب يتعايش معاها..وبنى حياته عليها..
ممكن كمان مايلاقهاش وتخليه ظروف الحياه ينساها ويتعايش مع واقعه او يحاول يغير واقعه لحد مايبقى شبهها..
ايا كان الحال..للكل حق الحلم ولكل الاطراف الاخرى حق رفض مشاركته فيه ولكن لا يحق لحد تتفيه حلم حد