الخميس، 13 يونيو، 2013

من فضلك لا تندهش !!







*ولما سألنى وغلب الدنيا فى عينه..
عندكيشى علبة لبن مدعم يادكتورة؟
قلتله هيجيلى بكرة ان شاء الله هعينلك واحدة..
راح مبتسم وقالى..(بروموس)
نعم؟!
بصلى بصة كده اللى هى معناها اومال دكتورة ايه وتعليم ايه بس!! شهدات على الفاضى صحيح..
وراح قايلى فى صبر..يعنى وعد يعنى يا (ابلة) ؟

قلتله اه ..بروموس بروموس !! معلش ماليش فى اللغات !


******



دخل عندى الصيدلية وقالى لو سمحتى يادكتورة عاوز 100 علبة كيتوفان كبسول..
قلتله الكمية كبيرة ان شاء الله اجهزهملك على بكرة..
قالى طيب ماشى حسابهم كام..
قلتله 100 فى 5ج تمن العلبة يبقوا 500 ج
بصلى باستغراب وقالى حرام عليكى ده انا بجيب العلبة ب3 ج وربع والعربية بتجبهم لحد عندى كمان بس  قولت اجى اسأل عندك يمكن يكون السعر ارخص!
قولتله ليه انت بتشتغل ايه ياحاج وعربية اى دى وبتجيبهم فين بالظبط؟!!

قالى انتى ماتعرفنيش ولا ايه انا فلات الفلانى صاحب سوبر ماركت الفلانى..وفى عربية من اللى بتوزع ادوية دى ! بتجيبلى الكيتوفان وباقى العلاجات التانية وبتحسبه زى مابقولك كده وانا بقى بوزعه على باقى الدكاكين الصغيرة..قلت اجى اعمل معاكى سبوبة بس واضح ان الجشع لو ساب الصيادلة مش هيلاقى صدر حنين وهيبقى يتيم!!!!!!!


هناك 10 تعليقات:

AhMeD RaDy يقول...

بالنسبة للجزاء التانى ..

ازاى ! مش فاهم الادوية بتتع ازاى بالسعر دا وبتتباع فى الصيدلية بالسعر دا .. عموما عادى .. كارثة من كوارث وزارة الصحة لا رقابة ولا اى حاجة !!!!

بالنسبة للجزء الاول ..

نفس اللى حصل معايا شخصيا من فترة .. واحد عايز يعمل password لحسابه على الموق ودا مش متاح لان المفترض ان الخط مفتوح ويقدر يعمل اى طلب .. وفجاة لائيت بيقول ازاى هو انا بكلم بقالة .. انت موقعكم مفتوح .. واعد يقولى هو مش ممكن اعمل hack على بياناتى .. ههههههههههههههههعرفت انه مش فاهم حاجة .. بصراحة تقريبا كدا قفل السكة .. اخده غسيل مكواة

Timo.. يقول...

(وانت كمان .. فيه حد يتجوز واحدة اسمها "أشًّــف"..؟؟
أهو يا "أشًّــف".
اهو يا "أشًّــف")

ده كان الرد اللي كان لازم ترديه عليه وانت ماسكة في ايدك العصاية بتاعت احمد حلمي في الف مبروك.

زينب علي يقول...

بروموووس؟

انا قلت يمكن كلمة جديدة دارجة بالمصري!

زي عندنا مرات ناس بيتكلمو اتا بجد مبفهمش بيقولو ايه هي نفس الحروف بس اللفظ مش انجليزي ... بحزن اوي عشان المستوى العام كدا!

habiba يقول...

السلام عليكم
للأســف المواقف دى كتييرة أوى
بس أول مرة أعرف إن الكيتوفان بيتباع فى السوبر ماركت كمان..
ولا بروموس..أنا قلت يمكن دوا جديد ولا حاجة.
وليه الصيادلة طلعوا وحشين كده بس ؟؟
ده احنا غلابة :(
اسمتعت بتدوينتك :)
ودمت بخير حال.

P A S H A يقول...

ههههههههههههههه
بروموس !!
ناس فقر والله :))
زي واحدة غلبانة كانت بتقول للبياع : ودي بفلوس ولا جادون (كادو) ؟؟
قال لها : هي جادون بس ليكي انتي بفلوس D:

الموقف التاني ده منتهى قلة الذوق بصراحة !!
وبعدين أنا مش فاهم هو الدوا إزاي يعني بيتباع في الدكاكين ؟؟ هو بسكويت ؟؟
حضرتك أصلاً المفروض تعلقي ورقة على الصيدلية "للأغبياء فقط .. عفواً لا يوجد بنزين 80 ولا فراخ شمورت"

وربنا يهدي

Nelly Aly يقول...

اللي يعيش ياما يشوف:)

ابراهيم رزق يقول...

هههههههههههههههههههههههه

ماشى يا نوووووووووووووووور
صلى على النبى
زيدى النبى صلاه

بالنسبة للموقف الاول عادى جدا مش عيب ان حد بسيط يحاول يتعلم كلمات اجنبية و ممكن بطريقة بسيطة نصحح لهم الكلمات ان امكن

بالنسبة لموضوع الادوية لم افاجىء به لان فى احدى المرات كنت فى احدى القرى و احتاجت مسكن فسالت على الصيدلية فقالوا قفلت و خدونى لبقال مش سوبر ماركت بقال صغير
و كان عنده بترينة مخصوص للادوية كل انواع المسكنات و ادوية البرد و الكحة و الاسهال و الامساك و الصداع و ادوية السخنية
و بعدين انتى فاكره ايه
كلية صيدلة ايه و دراسة و شهادات ايه
العملية بسيطة جدا و انتوا اللى بتكلعوها
قال كلية صيدلة قال
بلد شهادات صحيح

تحياتى

Gamal Abu El-ezz يقول...

المواقف دى عاديه دا فيه مواقف تشل أكتر من كده واحد يقولك ايه مؤهلك ايه فتقولى مؤهل عالى طبعا المعلومة مش وصلاه كويس فيقولك أصل أنا شغال معايا ناس معاهم كليات

E73 يقول...
أزال المؤلف هذا التعليق.
nesma hatem يقول...

ياريت الجشع يفضل ماليهم احسن من المهزلة دى
و مضايق كمان
منه نستفيد الحقيقة معلومة جديدة برضه
ربنا يعينك بصراحة

:)