الثلاثاء، 30 أكتوبر، 2012

عن.....مش عارفة!!






عن..انك تكون بتعيش علشان تشتغل

عن..الفرحة اللى بتحنسك تقرب منك تيجى تمسكها ولا كأنها كانت هنا

عن..الحلم اللى مش حلمك وانت اللى بتستعبط ولازق فيه

عن..الصداقة اللى قلبت حب وبعدين وقفت لاعارفة تكمل ولا ترجع زى ماكانت..باظت

عن..الاحلام اللى لسه ماتحققتش

عن..القعدة على لسان راس البر

عن..صفحات الكتاب اللى بتقلبها مش علشان خلصتها لا..علشان تحاول تخفى الصورة اللى عمالة تنطلك كل ماتقلب صفحة

عن..الرسالة اللى على موبايلك واللى مش راضى تمسحها وكل ماتقراها تبتسم وتدمع

عن..دقات القلب اللى بقت عملة زى دقات الساعة..وقت بيعدى وخلاص

عن ..لمعة العيون اللى مانت عارف تفسرها ان كانت دمعة حزن ولا فرح ..ولا تراب مالى الجو

عن..الحاجات المناسبة اللى بتيجى فى وقت مش مناسب

عن ..الحاجات اللى مش مناسبة وبتيجى فى وقت مناسب

عن.. اللايك اللى بتلاقيها على الفيس وبتبقى مش عارف  تفسرها بايه..يعنى كده اتصالحنا ولا لاء

عن..المفجأة اللى بتستناها ومابتجيش

عن..الحد اللى بيختاره قلبك  وكل الناس تقولك مش مناسب..حتى هو

عن..السؤال اللى بيفضل يزن فى دماغك..ياترى دماغه مشغولة بيك كده ولا انت بس اللى تاعب نفسك فى الفاضى

عن..انك تكونى بتحبيه وعارفة ان ده حب عمرك قلبك بيقولك كده بس الكل يلومك ويقولك ماينفعش ده اصعر منك..وكأنه ذنبك

عن..انه يكون حد وحش جدا واذاكى جدا وبرده انتى اللى تتلامى ..انتى اللى اخترتى

عن..انك تقررى تروحى وتقوليله بحبك لانك مش قادرة تستنيه وخايفة الوقت يعدى وهو   ساكت وخايفة ماتقوليش وتضيعى فرصة سعادتك..وبرده يفضل ساكت

عن..انك تكونى صح والكل بيلومك وبيقولك انك غلط فتشكى فى نفسك وتقولى اكيد انتى اللى غلطانة ازاى تكونى صح والكل غلط..بس غلطت فى اى

عن..انك تمشى تمشى تمشى لحد ماتنهجى من كتر التعب وتقف تاخدى نفسك تلاقيكى واقفة فى مكانك

 

 

هناك 37 تعليقًا:

سواح في ملك اللــــــــــــــــــه- يقول...

بصي يانور

لما يكون كل اللي حواليكي

بيقولولك انتي مش صح في حاجة

يبقي لازمتقفي وقفةمع نفسك وتبصي

للمنظر من بعيد وكأنك مش جواه

وتحطي نفسك مكانهم وتشوفي لوانتي

مكانهم كنتي هتحكمي ازاي

ربنا يانور نزللنا في الدين محظورا ت

علشان يوفر علينا وقت وجهد التجربة

ولله المثل الآعلي

ربنا برضه بيحط حوالين كل انسان

ناس اكتر خبرةوتجربة علشان يقولولنا اعمل كذاومتعملش كذا

توفيرا للوقت والجهد

وبعدين

لا لايك ولا مالايكش عالصفحة

ارمي ورا ضهرك بكرةتضحكي عالايام دي

تحيتي لآطيب نور

Nour يقول...

انا مش لاقية حاجة اقولها .. انا حاسة ب99% من الكلام ده بجد

نهر الحب يقول...

بصي بقي
كل اللي انا عارفاه انك وجعتيني
......
عارفة
فيه حاجات مش بنعرف سببها ولا ليه حصلت ولا ازاي غير لما بتخلص وبتيجي حاجة تبين لنا شريط حياتنا اللي فات ونقعد نقول اااااه دي حصلت عشان كذا ولو ده اللي كان حصل مكنش حينفع..ووو
فاهمة قصدي
.....

عن الحد اللي عايزة تقوله بحبك...انا ضد ده تماما
لأن اللي عاوز حاجة بيعملها وبيقولها..وشايفة اني اندم علي اني مقولتش لحد بحبك ولا اني اندم اني قلتها وهو مكنش حاسسها وكان رده صادم ليا

بصي ويمكن قلتهالك قبل كدة
الراجل عنده الحق والقدرة والشجاعة الكافية انه يبدأ ويقول الكلمة دي ولو مقالهاش يبقي يا اما مافيش حاجة حاسسها اصل يا اما هو جبان وحيضيع الانسانة اللي بيحبها..وفي الاغلب بتحبه..حيضيعها بسبب جبنه ده وساعتها حيبقي فعلا يستاهل تضيع منه
......
المفروض مننتظرش حاجة مش حتيجي
ساعات بنكون محتاجين نخرج بره دايرتنا اللي بندور فيها من غير ما نقف دي نخرج براها ونسيب نفسنا للدنيا...لربنا...وللقدر....

ساعتها الدنيا كلها حتختلف
....
:(

;كارولين فاروق يقول...

ما أنا قولت من زمان
ماتسمعيش لحد
وحشاني يا نور
حسيت انك متلغبطه
لأن جواكي صراعات كتيره
خدي اجازه من الناس شويه
واسمعي نفسك شويتين
صباحك ورد حبيبتي

AhMeD RaDy يقول...

انت اصدق من اى حد
لانك الوحيدة اللى هتتحملى النتيجة


طز الف مرة فى كلام الناس !
المهم انتى
الناس عمرها ما هترتاح

ومش عشان هم ضاغطين عليكى يبقى انتى اللى غلط

استمرى ربنا معاكى

بوست عبقى تاريخى بجد شكرا لانك اتكلمتى عن ناس كتير مش لوحدك

E73 يقول...

ريماس

مش هقولك غير اني حسيتها

ربنا يهديلك العاصي

وادعيلي :")

Bent Men ElZman Da !! يقول...

عن ان الحياه اصلا ملغبطه
بالحلو والوحش اللى فيها
وعن ان تبقى مش عارفه فى بعض الاوقات تفرحى والا تزعلى من الناس والا على نفسك
عن حاجات كتير اووووى احنا هنفضل نعيشها مع كل يوم بنتنفس فيه

شيرين سامي يقول...

بقالي كتير مقريتش بوست لمسني كده..

ساعات بحس إني عايشه زي المكن أو التروس..بحاول كتير أخرج من قيد الروتين و كونك عايشه عشان أي حاجه إلا إنتِ..
الصداقه اللي قلبت حُب..عمرها ماهترجع صداقه..مش هينفع بعد ما ندوق جنون الحب نرضى بعادية الصداقة..باظت يا نور.
اللايك اللي على الفيس..مممم أنا وجهة نظري إن الحبيب ماينفعش يكون في قائمة الأصدقاء.
التوقيت الغير مناسب..
سيبك من الناس تماماً
إعترفي لو حاسه إنك صادقه و متنتظريش أي رد فعل..إنتِ بتحبي و بس..
وحش و أذاكي..طبعاً هتتلامي عندهم حق بصراحه لكنها أقدارنا..

مش عارفه أقولك إيه يا نور
لمستيني

Aya Mohamed يقول...

ساكت واصغر منك وكل الناس بنقول لا
صحاب وقلبت حب و هو نفسه بيقول مش مناسب
يبقى تقعدى مع نفسك وتقنعيها انه لا
هتتعبى اوى لو فضلتى بالحالة دى
يمكن علشان انا حساكى اوى
كتبت حاجة شبه كدا من كام سنة
بعد الدوامة دى بحر حياتك هيهدى وهتلاقى امواج الفرحة جاية من بعيد بس انتى
استنيها
ربنا يسعد قلبك ويريح بالك يا نور

reemaas يقول...

سواح في ملك اللــــــــــــــــــه-

اه انا كمان عاوزة اطلع برانى الحقيقة بس ايه رائيك فى البوست اللى ماكنش على الخاطر ده

reemaas يقول...

Nour

مش عارفة افرح انى عبرت عن حاجة مستك ولا ازعل لانك حاسة كل اللخبطة دى

reemaas يقول...

نهر الحب

حبيبتى معلش والله ماقصد اوجعك هو خرج كده لوحده مش عارفة ازاى والله

reemaas يقول...

;كارولين فاروق

فعلا يا كوكى عاوزة ده اوى

reemaas يقول...

AhMeD RaDy

ساعات لما بتخنق ببقى عاوزة اقولهم كده طز فيكم :)

reemaas يقول...

E73

ربنا يكتبلك الخير ويريح بالك يارب

reemaas يقول...

Bent Men ElZman Da !!

صح طول مافينا نفس فينا احساس

reemaas يقول...

شيرين سامي

معاكى فى انى اصارح بس مؤلمة بصراحة

مبسوطة اوى انها ثابت فيكى حاجة وانك هنا:)

reemaas يقول...

Aya Mohamed

عبقرية يا اية فى الربط :)

يااااااااااااارب

Amira Yusuf يقول...

آه يا نور آه :(

ريـــمـــاس يقول...

مساء الغاردينيا نور
دايماً جوانا ألف سؤال ليه وليه
وحاجات كتير مش عارفين نفسرها
وتصرفات لاقادرين نفهمها ولا ليه بتتعمل أصلاً ..
وحيفضل عن طول ماأحنا عايشين "
؛؛
؛
كل سنة وأنتي حبيبتي
لروحك عبق الغاردينيا
كانت هنا
reemaas

ابراهيم رزق يقول...

بصى يا نوووووووووووووووووووووور

مش لازم ان الناس تبقى صح واحنا اللى غلط حتى لو اجمعوا
احيانا بتترسب قواعد وعادات اجتماعية خاطئة وتصبح من قوة ترسيبها حقيقة مؤكدة وثابتة
هذه الاشياء يجب ان تنسف
عايز اعلق على كل حاجة بس خايف تعليقى من طوله يبقى ممل

تحياتى

عباس ابن فرناس يقول...

على فكره يا نور اسواء حاجه فيكى انك بتعرفى توجعينى كويس!

وطبعا انا اسواء واحد يقدم صائح فى المواضيع اللى زى دى لانى بعانى من حجات شبه كتير

..........

تحياتى وكل سنه ونتى طيبه

reemaas يقول...

Amira Yusuf

اسفة يا ميرا والله ماقصدش اسبب اى الم والله

reemaas يقول...

ريـــمـــاس

ايون يا ريما حاسة ان الحيرة دى حاجة مكتوبة علينا
منورانى ديما يارب

reemaas يقول...

ابراهيم رزق

انا بقى نفسى تعلق على كل حاجة فيهم طول على اد ماتقدر :)

reemaas يقول...

عباس ابن فرناس

ياخبر والله ماقصد انت لو تعرف البوست ده اتكتب بسرعة ورا بعضه ماحضرتش ولا كلمة قبل ماكتبها
جت كده بقى حقك عليا

العاب فلاش يقول...

well done

هبة فاروق يقول...

بصى يا نور انا شايفه ان ممكن جس النبض يعنى مش لازم المصارحه بطريق مباشر واكيد فى اشياء كثير بتبين الحب من نظرات ومعامله مختلفه عن الاخرين

well يقول...

كل دى عن وعن وعن وفى الاخر مش عارفة يا شيخة قولى كلام غير ده
عموما المشاعر متعبة

..
ابتسماتى

Timo.. يقول...

"التوحد ،
الوحدة ،
الوحيدون ،
هم كما هم دائماً..
لا شيء يحتويهم..
ولا أحد سوى الله.."

اقري البوست ده اكيد هاتلاقي حاجة ليك..!!
http://wannatouchthemoon.blogspot.com/2012/10/random-thoughts_31.html

Timo.. يقول...

عن..
عن..
عن..
عن نور نتحدث..!!

reemaas يقول...

غير معرف العاب فلاش

ميرسى كتير

reemaas يقول...

هبة فاروق

صح بس ممكن تقف لحد هنا ودى المشكلة

reemaas يقول...

well

هههههجايز علشان متلخبطة

reemaas يقول...

Timo..
البوست حلو اوى عارف الجملة اللى سرحت فيها بتاعة الموت اللى بيدى حياه...انا كتبت حاجة شبهها :)

مش عارفة ياتيمو عن نور دى تخلينى ازعل ولا عادى...بس انا نفسى مابقاش كده

nesma hatem يقول...


عن..الحاجات المناسبة اللى بتيجى فى وقت مش مناسب

عن ..الحاجات اللى مش مناسبة وبتيجى فى وقت مناسب

وعن حجات حلوة كتير تانية انتى كتباها
أستمتعت جدا :)

nesma hatem يقول...
أزال المؤلف هذا التعليق.