الثلاثاء، 18 سبتمبر، 2012

مع نفسى 13






انا متصالحة مع الدنيا...ايووووووون زى ماقريتم كده بالظبط..

غريبة؟!
مع انى شيفاها عادى..جايز التعبير هو اللى غريب..متصالحة !

اصل الحكاية ماينفعش تتسمى حب..او هو حب بس مش حب  اوى يعنى..
ابسطهالكم..

انا بحب حاجات فى الدنيا ..بس مش بحب الدنيا نفسها..!!
يعنى مثلا بحب اغنى بصوت عالى..بحب اضحك بصوت عالى..بحب اتفرج على افلام اجنبى..

بحب اسمع قرأن مش لانه واجب لاانا بحب اسمعه علشانه هو وياسلام بقى لو بصوت عبد الباسط..مزاج 

بحب اسمع حمزة نمرة ومنير جدا..بحب اقرا..وبعرف اقرا اللى بحبه  وشايفه ان دى موهبة على فكرة:)
حاجات كتيرة بحبها فى الدنيا ..بس مش بحب الدنيا نفسها..مش مرتبطة بيها يعنى ومافيش حاجة لحد النهاردة مخليانى ماسكة فيها..ممكن اسيبها عادى..!
 مش يأس على فكرة بس هو احساسى كده..عارفين شبه ايه ..اتنين مش طايقين بعض بس مضطرين يتعاملوا مع بعض بس كل واحد منهم جواه اللى جواه!!

بس انا بقى طلعت احسن منها ولقيت فيها حاجات تتحب..مش عارفة بالنسبة ليها بقى....

هى حرة 

********************

على الهامش كده: زى النهاردة من سنتين كنت لسة ببدأ فى المدونة دى ..بصراحة مش مصدقة نفسى :)


هناك 25 تعليقًا:

P A S H A يقول...

أولاً : كل سنة وانتي طيبة وبألف خير وصحة وسعادة ودايماً منورة مدونتك المميزة :)
ثانياً : بالنسبة للدنيا .. متفق معاكي جداً في وجهة نظرك وأحييكي عليها ..ما هي منفاته أصلاً .. يبقى هانضيع شوية الوقت اللي قاعدينه فيها في حزن وهم ونكد ؟؟ .. الشيطان بيجرينا وراها ويزعلنا عليها علشان ننسى الآخرة وهي ولا تسوى أصلاً !
يبقى نكون صرحاء مع نفسنا ومتصالحين مع روحنا وناخد منها اللي يسعدنا ويفرحنا من غير ما يتقل ميزان سيئاتنا .. يعني م الآخر نبقى ضيوف خفاف عليها
.. أو بمعنى تاني نبقى بتوع مصلحتنا معاها طالما هي بتاعة مصلحتها .
:)
ظبطتي ساعة المدونة ولا لسه ؟؟
الساعة الأن 3:44 ص
:)

ريـــمـــاس يقول...

صباح الغاردينيا يانور
عارفة كل الي قلتيه صحيح او على الأقل كنت بعيشه يمكن قبل ماأعرف فارس كنت عايشه لأني عايشه بحب حاجات وبتعلم على حاجات وبتعايش مع حاجات بس ماكنتش ماسكه في الدنيا او عشان ابقى صريحة كنت بعد الأيام وبستنى موتي وخاصة بقى بعد وفاة بابا الله يرحمه تغيرت حاجات كتير جوايا وماقدرتش بجد أتصالح مع الدنيا تقدري تقولي كنت بكرههها ومجبورة أرضى بيها بس لو تسأليني النهرده بتحبي الدنيا هقولك أنا عايشه الدنيا دي عشان فارس وبحبها عشان فارس فيها :)
أنا رغيت مش كدا اعملك ايه ماهي مع نفسي بردو :)
كل سنة وأنتي طيبة يانور
وكل سنة وأنتي بيننا
ويارب مدونتك دايما جميلة بيكي وبإحساسك "
؛؛
؛
لروحك عبق الغاردينيا
كانت هنا
Reemaas

سواح في ملك اللــــــــــــــــــه- يقول...

انتي عسولة يانور

وتلقائية وجميلة وكثيرة الطيبة

انتي اسم علي مسمي

نور

;كارولين فاروق يقول...

ماتفكريش في الدنيا
وكويس ان في اسباب حلوه
جعلتك متصالحه معاها
كل سنه ومدونتك بخير
والموسيقي يا نور بتجعل الانسان
في حاله جميله صدقيني
انا كمان بحب منير
تحياتي يا سكر

habiba يقول...

السلام عليكم
جميل إنك تتصالحى مع الدنيا..ولو دورت أكتر فيها هتلاقى حاجات جميلة كتييير وكويس إنك مش متمسكة بيها بس ضامنة إنك مش هتحتاجلها تانى !!!
الدنيا هتبقى بجد حلوة لو نطلع منها بعمل صالح ورحمة ربنا :)
وكل سنة وانت ومدونتك طيبين وربنا ينفعك بيها.
مع تحياتى.

Timo.. يقول...

سنتين...؟؟
سنتين يا ري...؟؟
ده انت المفروض تقولي لي يا جدو :D

كل سنة وانت ديما متصالحة مع دنيتك..
ولو ان فيه احساس خبيث جوايا عبرت عنه فيروز في اغنيتها
(في شيء عم بيصير)

...!!!!

Timo.. يقول...

فهمت حاجة ...؟؟

Timo.. يقول...

اسمعيها كتير وانت تفهمي قصدي .

faroukfahmy58 يقول...

احمدى ربنا يا نوران فيه حاجات فى الدنيا تحبيها
ممكن الواحد يحب شئ فى الشئ دون ان يحب الشئ نفسه عشان لو فقد الشئ ده يبقى الامر بسيط
عقبال يا نور ميجر السنتين سنين لكى نستمتع بكلامك الحلو

نهر الحب يقول...

يعنى مثلا بحب اغنى بصوت عالى..بحب اضحك بصوت عالى..بحب اتفرج على افلام اجنبى..
بحب اسمع قرأن مش لانه واجب لاانا بحب اسمعه علشانه هو وياسلام بقى لو بصوت عبد الباسط..مزاج
بحب اسمع حمزة نمرة ومنير جدا..بحب اقرا..وبعرف اقرا اللى بحبه

:))
اكيد مش حقولك ان ده انا
:D
....

ممم
التصالح مع الدنيا متهيألي له معني الرضا...لما تحسي ان كل حاجة ماشي زي ما تكون
انا راضية
مش حزعل ومش حقول ليه...
حمشي واكمل وخلاص...
احساس حلو علي فكرة...متهيألي برضه حاة بيه اوي اليومين دول
.........

ريمو الاغاني عندك شغالة وحلوة اووووي
استمتعت ب "كلمات ليست كالكلمات"
:)))

وانا مش عارفة اسمع اغانيا
:(

نهر الحب يقول...

ايه ده نسيت اقولك كل سنة وانتي والمدونة طيبين

تخيلي انا بقالي ست سنين وملحقتش احتفل بعيد ميلاد مدونتي عشان كان في شهر 8 وزحمة رمضان
:))

reemaas يقول...

P A S H A

ايون هو احساس الضيوف ده يا شريف باشا

حلو بجد يعنى

reemaas يقول...

ريـــمـــاس ي

رنا يخليكوا لبعض يا ريموسة ويديم محبتكم تستاهل حبيبتى تحبى الدنيا علشانها :)

reemaas يقول...

سواح في ملك اللــــــــــــــــــه

وش مكسوف :)

تسلم ياخالد ربنا يخليك

reemaas يقول...

;كارولين فاروق

وانتى بالف خير يا كوكى وحياتك هى اللى بتفرض نفسها عليا دنيا غتيتة

reemaas يقول...

habiba

وانتى طيوبة يا حبيبة اه فعلا حسانى مش عاوزاها اصلا

reemaas يقول...

Timo..

:)

ايه رايك بقى هقولك بعد كده يا جدو تيمو ههههههههههههههه


هدور عليها حالا علشان افهم ولو مافهمتش هجيلك

reemaas يقول...

faroukfahmy58

الحمد لله طبعا يا استاذنا حساها رحمة من ربنا
يارب ديما تكونوا معايا :)

reemaas يقول...

نهر الحب
انا اصلا اصلا متاكده انك زى ههههههههه وشوية ودعاء هتيجى احنا كربون يابنتى



انتى على الدرب يا بنيتى

6 سنين يا جبارة ههههههههههه عقبال ما يبقوا مؤبد كده

Bent Men ElZman Da !! يقول...

كل سنه وانتى منوره المدونه وبلوجر كله يارب :)

احسن حاجه ان مهما الحياه كانت رخمه وبتغلس علينا
احنا بردو نشوف ونحب فيها حاجات صغيره بتفرحنا كده

ده مش اكتئاب ولا غلاسه ده اسمه تفائل :)

AHMED SAMIR يقول...

كل سنة و مدونتك بكل خير و اكثر ابداع و تألق

Tarkieb يقول...

كل سنة وانت ومدونتك طيبة وان شاء الله نيجي نبارك ليكي في القرن الجاي لما يبقى اسمها امرأة عجوز مصرية ونكتبلك بفونت كبير اووووي عشان تشوفي الكلام يا تيتة هههههههه.... طب كويس انك بتحبي حاجات كتيرة في ناس نفسها تحب ومش عارفة....

reemaas يقول...

Bent Men ElZman Da !!

مش كده برده بزمتك

reemaas يقول...

AHMED SAMIR

وانت بالف خير تسلم

reemaas يقول...

Tarkieb

تراكيييييييييييييبو فينك يا جدو بس من زمان مختفى

يدينا ويديك طولة العمر يارب