السبت، 18 مايو 2013

اول حب ....









سرح صديقى العزيز لدقائق ثم ارتسمت على وجهه ابتسامه ..وقال لى :
عارفة انا اول مرة حبيت ازاى ؟
قلتله: وهى دى فيها ازاى اعتقد الحب بيجى كده من غير ازاى..

صديقى: هو ممكن تقولى ان ده اللى حصل بس بطبيعة الحال انا ماكنتش فى سن يسمح بانى افكر كده..انا كنت ايامها 11 سنة كنت فى خامسة ابتدائى وهى كانت زميلتى
كانت اول حب فى حياتى..واستمر من خامسة ابتدائى لحد تاية كلية

انا: (لفت نظرى طبعا طول المدة والسن الصغيرة دى)..لا لا انا عاوزة تفاصيل  احكى..
صديق :كانت زميلتى فى المدرسة..اسمها (نوران) كنت بفضل باصصلها كتير ومركز معاها اوى لحد ما ده لفت نظر صديقى (حسام) واللى كنا بنعتبره صايع الشلة..
لقيته فى مرة سألنى انت مالك بتبص للبنت دى اوى كده ليه؟!
قتلته مش عارف ! جايز علشان شاطرة!
قالى يمكن!!
بعدها بكام يوم جدى سمحلى اخيرا اتفرج على ال TV شفت فيلم شارع الحب..
عجبتنى اوى قصة الحب اللى بين عبد الحليم وصباح..
رحت حكيت ل(حسام ) على الفيلم.. وقلتله عارف يا (حسام) انا عاوز احب (نوران)
زى ماعبد الحليم حب صباح...
قالى طب ماتحبها..
قلتله عادى كده!!
قالى اه طبعا عادى..
قلتله خلاص..انا بحبها!!
قالى شفت سهلة جدا اهى ....
قلتله اه يا اخى ده الحب ده طلع حاجة سهلة اوى...
ومن يومها وانا بحبها..كانت بلدنا الصغيرة دى كلها عارفة انى بحبها..
لدرجة ان عمى مرة قالى انا سامع انك بتحب يامفعوص انت..
قلتله مين قالك؟! 
قالى سمعت على القهوة !!!
فضلت احبها تقريبا 10 سنين..

قلتله: يااااااه وعلى كده كنتم بتتكلموا ازاى وبتتكلموا فى ايه فى السن ده؟

قالى: لا احنا ماكناش بنتكلم..  
قلتله: ازاى يعنى ..كل ده من بعيد لبعيد كده؟!
قالى: اه.. انا اصلا كنت بخاف عليها اوى..عارفة
واحنا فى ابتدائى كانت عنيا بتروح على المكان اللى هى فيه تلقائى كده..ماكنتش عارف اى الاحساس الغريب ده حتى بعد كلام (حسام) اللى حسسنى ان الحب اسهل من حقنة التطعيم
عارفة.. مرة الاستاذ ادانا واجب وكنا فى اول الترم..وانا كنت مركز معاها اوى لان هى اللى كانت قامت تشرح اللى فهمته وطبعا انا كنت مركز معاها هى فى كلامها وازاى بتنطقه وماليش دعوه باللى بتشرحه..يومها حليت الواجب ده كله غلط..وانضربت مرتين مرة علشان الواجب اتحل غلط ومرة علشان حليت حاجة غير اللى كانت مفروض نحلها اصلا :)

فضلت ال3 سنين بتوع اعدادى ماشفهاش ..لحد اخر السنة بتاعة 3 اعدادى شفتها..كانت يوم وفاة والدها...
بعدها شفتها ..كنا فى اول حصة فى درس الفرنساوى فى اولى ثانوى...يااااااه ماقولكيش..من خجلى كنت هسيب الدرس واطلع اجرى...

يومها كنت فرحان اوى ومتلخبط اوى وزعلان اوى فى نفس الوقت
قلتله: طب فرحان ومتلخبط وفهمتها ليه بقى زعلان

قالى: اصل كان عندنا يومها ماتش وانا كنت بقف جون..كنت مبهدل جدااااااا
اما هى فكان شكلها زى ماهو ..طولت بس شوية
استمرت حدوتة النظرات من غير مابنتكلم.. نظرات مفهمة اللى حوالينا كل حاجة من غير ماحد فينا حتى ينطق بحرف
كنت بغير عليها اوى..حتى من الاساتذة.. وماعرفش هى فهمت ده ازاى .. لقتها حولت كل دروسها عند مدرسات وسابت المدرسين..
كانت هى رائد الفصل وماسكة الغياب وفى يوم بتاخده فواحد من الفصل ضحكلها وانا يومها زعلت جدا.. سابت الغياب تانى يوم علشان انا مازعلش

كانت بتتكسف لما تشوفنى اوى وتحاول تستخبى منى ..
كان وشها بيحمر جداااااا ..كانت جميلة اوى
مش بس شكلا...كانت جميلة فى كل حاجة..
كان حبنا زى ماقولتلك باين لك الناس من خجلنا ده..واللى فضحنا اكتر استاذة عندنا 
كانت قريبة منى وحكتلها..وسبحان اللى تانى يوم لقيت  هيئة المدرسين كلها عارفة...

يعنى مثلا فوجئت ب(ابلة مها) بتاعة الفزياء مرة وانا معدى من قدام فصلها بتقولى احسب الازاحة ما بين فصل 1_7 و 1_5   عند الحركة التى يحدثها (مصطفى ) - ده صديقى-
طول ماهو عمال يطنط قدام الفصل...!!!!

مرة  (نوران) كانت بتعمل بطاطس وصابعها اتعور وجت وهى ربطاه
قلتله:طب وانت عرفت ازاى انها كانت بتعمل بطاطس؟!!! انت بتخم يا (مصطفى) انتم كنتم بتتكلموا

هو: ضحك وقالى لو صبر القاتل على المقتول..
انا كنت رايح اجيب الغياب من فصلهم وكانت عليهم(ابلة منى) ودى رويتر اللى فضحتنا بالمناسبة.. قالتلى ينفع كده ياعم الفرعون العاشق الست كليوباترا بتاعتك قطعت صوابعها علشان تعملك بطاطس..
قلتلها بطاطس ايه؟؟ قالتلها ارفعى ايدك يا (نوران ) وشفت اديها يومها وهى مربوطة..

مرة تانية كنا فى درس الفرنساوى والابلة سألتها بخبث الا (مصطفى) محترم كده على طول يا (نوران) طبعا البنات اتهامزوا والغمزات اشتغلت ..والله يسهلوا طلعت ماتعرفيش منين..
كنت الولد الوحيد طبعا فى المجموعة طبعا بعد محايلات..
 كانت (نوران) ترد وتقول اه محترم بصوت نحسى انها هيغمى عليها من الكسوف اصلا..

فالابلة تقولها يعنى نجوزهولك؟

(نوران) يومها ردت رد استفزنى اوى.. احنا اصلا لسه صغيرين مافيش كلام من ده..

يومها انا اتغظت جدا..بس الابلة ماسكتتش قالتلها طيب لما تكبروا ياستى ؟

راحت (نوران ) مجاوبة اجمل اجابة فى الدنيا
((((اصلا هو جدع))))
ياااااااااااااه على ده احساس

وفضلت احبها من بعيد لبعيد كده..كنت بروح المدرسة مخصوص علشان اشوفها..ولما مش بلاقيها كنت بنط من على السور واروح اذاكر..
 كانت بتنور المدرسة بضحكتها وبكسوفها.. كنت بروح الدرس اللى بتكون فيه بغض النظر عن كفاءة المدرس..
لحد ماجت الكلية..واتفرقنا..

ماشفتهاش سنتين..
 شفتها بعدها مرة فى القطر..قلت لنفسى بس هى دى فرصتى..
رحت قعدت جنبها لحد مواصنا بلدنا..تقريبا نص ساعة..
فضلت احاول انطق طول الفترة دى..مش فاهم لحد دلوقتى لسانى اتخرس ليه؟!!!!

عدا على ده حوالى 6 او 7 شهور..
 ماشفتهاش ولا اعرف عنها اى حاجة طول السنتين دول..

ساعات بقول لنفسى حدوتة وانتهت ..بس مش عارف انساها.!!
بس.

قلتله: بس ايه؟! خلصت كده؟! طب ماتحاول تكلمها..
قالى: هكلمها فين هى خلصت وانا لسه بدرس..ثم تفتكرى لو جاتلى الجرأة وكلمتها الحكاية دى ممكن تكمل؟

********************

لحد هنا خلصت الحدوتة..وبصراحة ماعرفتش انصح صديقى بايه؟..هل يكلمها ويحط نهاية لحكايته دى..بغض النظر هلى هى لسه على مشاعرها ولا الايام والبعد غيرها؟
بغض النظر هيرتبطوا فعلا ولا الظروف مش هتسمح؟
ولا يسكت ويخليها ذكرى جميلة فى البوم ذكرياته..كل مايفتكرها عنيه تلمع نفس اللمعة اللى كان بيحكيها بيها؟؟؟
ديما بتحيرنى النهايات المفتوحة...

**************************************

القصة اهداء لصاحبها..دونتها علشان وصلنى احساسه بيها جدا وغيرت اسامى الابطال كلها علشان التسييح :)     


           

هناك 14 تعليقًا:

P A S H A يقول...

هي .. بكره هاتتجوز وهاتضرب من كل حتة وملامحها هاتتغير وهيكون فيه عيل صغير مجرجراه وراها ، وهو ماسك في العباية وبيطرقع بشبشبه والعيل التاني نايم على دراعها مع شنطتين فيهم خضار .

هو .. هايكون راجع من شغل الحكومة الصبح وطالع ع الشغل التاني بعد الضهر وهايكون اصلع وأرفع ولبس نضارة وبقى يدخن !!

هايعدوا من جنب بعض وكل واحد هايلمح التاني لمدة ثانية واحدة وهايكمل في طريقة عادي جداً .

هي .. هاتشد مودي من دراعه وهي بتشخط فيه وبتقول له : قلت لك ميت مرة تمشي عدل في الشارع .

هو .. بعد خمسة متر هايسأل نفسه : هي البت دي كان اسمها إيه ؟؟ -- يبص عليها من ورا -- وإيه اللي فاشولها أوي كده ؟؟

:))

reemaas يقول...

P A S H A

ياساااااااااتر

نهاية فظيعة يا باشا

ماتعرفش بقى الخلفية البيضا دى اشيلها ازااااااااااى انا شيلت البوست وكتبته تانى ولا فايدة

غير معرف يقول...

قصه جميله جداا
بس الاجمل النهايه المفتوحه لانها بتبقي ذكري جميله لاصحاب الحكايه ..
وان كان المفروض انه يدور عليها ويصارحها بحبه علشان مش يندم بعد كده علي سكوته .
تقبل مروري
تحياتي

E73 يقول...

هو مجنووووووووون!!

هو بيسأل انساها!!

لو بيفكر بالطريقة دي يبقى مكنش يستاهل يحبها من الأول

ايه الإحباط دا بجد!!

بجد!!

صديقك جابلي احباط يا ريمى

خليه يقرأ لعبد الوهاب مطاوع

اقولك.. قوليله يقرأله بس كتاب أقنعة الحب السبعة

من ضمن القصص فيه قصة زي قصته بالظبط

__________________

بالنسبة للخلفية البيضة علمي على الفقرة اللي فيها الخلفية البيضة كلها وهتلاقي في التنسيقات اللي في المدونة فوق علامة كدا زي صباع الطباشير اضغطي عليها هتلاقيه مختار اللون الابيض اختاري انتي بدون لون او اختاري اللون الاسود

او فيه حل تاني انك تخلي لون النص نفسه في الفقرة دي اسود عشان "الكونتراست" يبين الكلام

او فيه حل تالت وهو انك لما تاخدي الكلام كابي علشان تمسحيه وتحطيه تاني متاخديهوش على وورد لإن الوورد مش بيمسح التنسيق من الكليب بورد
خدي الكلام وحطيه في نوت باد ملف تكست يعني واعملي نسخ "كابي" لكلمة واحدة من النص وارجعي ظللي النص كله واعمليله كابي وحطيه بيست في المدونة هتلاقيه ظبط

reemaas يقول...

E73

جيت اكحلها عميتها ههههههههههههههههههه بقت ابيض كلها

E73 يقول...

هههههههههههههه

عادي ولا يهمك

بس على الاقل كدا الكلام اوضح من الأول ^_^

تتعوض في بوست تاني

زينب علي حبيب يقول...


http://img822.imageshack.us/img822/8813/50405467.png

http://imageshack.us/a/img195/7951/99242004.png


http://img543.imageshack.us/img543/3048/11368011.png


دول تلات صور بالترتيب فيها طريقة تخلصي منها من الخلفية البيضا ... بتمنى تفيدك ...

بالنسبة للرد هحطو فكومنت تاني

زينب علي حبيب يقول...

انا عندي وقفة تأمل في المواقف دية بصراحة ... استحمليني معلش وبتمنى صاحب المشكلة يقرا ردي برضو ...

اولاً ... في حاجة كلنا متفقين عليها شئنا أو أبينا ان الجامعة اغلب الوقت اللي فيها بيكون ولا حاجة والدراسة مبتاخدش ساعة او ساعتين بالكتير -دا لو اللي بيدرس بيدرس يوميا للتفوق- وباقي الوقت فراغ ... هنا بيجيني هاجس فضيع للي بيقول انا معنديش شغل وانا معنديش فلوس ووو ... هو انت مبتقدرش تشتغل في الوقت دا؟ ... اي حاجة مش عيب ... المهم انك تقضي وقت فراغك لو بتحبها بجد او حتى لو حابب تكون نفسك وتعتمد عليها ... ليه الواحد يستنى لحد ميتخرج؟ ... الشغل موجود للي بيدور عليه يعمل اي حاجة بسيطة وحتى لو المرتب مش هيكفي الشهر كلو لو حتى بسيط الواحد بيحس انو راجل والشغل ممكن يؤدي لشغل تاني ببساطة ... مش زي اللي قاعد مع اصحابو ويدور شغل مرتبو يوازي مرتب واحد خريج وعندو شهادة او لازم يكون المرتب اكتر من يومية بابا !!

الشب لو كان بجد عايز يعتمد على نفسو يشتغل وتكون دي اول صدق نية ...

نجي لتانيا دلوقت ...

هحط نفسي مكان البنت ...

انا الناس كلها تعرف انو في شاب بيحبني من احنا صغيرين واني بحبو او معجبة بيه ... انا احترمتو اكتر عشان مكنش بيكلمني ... بس هو فين يا ترى دلوقت ؟؟


يعني البنت تستنى وتستنى وتحلم وتعيش بخيالها عشان واحد بيقول انا انساها والا اكلمها؟

يعني هو دا سؤال؟ ... انت ليه هتكلمها اصلا؟ ... مانت متأكد انها بتحبك يعني !

انت تقدر لو كنت جاد تتكلم مع حد يتوسطلكم وتكونو نفسكم سوا وانتو مخطوبين تتعرف عليها وتكونو نفسكو سوا ... قلتلي مش مكمل دراستك ... فاضلك سنة او اتنين؟ ... طيب اشتغل فيهم ولما تتخرج امشي بالمعاملة دي على الاقل تكون محوش شوية ...

لو حد قالي مثالية هقولو ليه الشاب يعلقها اكتر مكان عامل قبل كدا ويمكن ابتدت تنساه او عايزة تبتدي حياتها يا اما يكون على قد المسؤولية ويجيها من الباب يا اما يسيبها للي يجيها من الباب ويكون صادق فعلا وبالنهاية كلو نصيب وتوفيق من ربنا ... المهم يكون صادق بجد ..

سوري بجد على ردي الطويل يا ريماس وعلى الحدية لو ظهرت اصل موضوعك قريتو الصبح واجلت ردي لحد مهدى (كنت متنرفزة اكتر من كدا) :)

انا ضد اي حد يبني علاقة هلامية مع حد تاني ويعلقو فيها وانتي عارفة بمشاعر البنات اد ايه سهل تتحرك واد ايه صعب تختفي ..

E73 يقول...

:DD

عجبني قوي رد زينب

أصل أنا برضه كنت متنرفزة ومعرفتش أقول ايه >_<

وفعلا في قصة أو تلاتة تحديدًا من قصص كتاب أقنعة الحب السبعة اللي قلتلك تنصحيه بقراءته بطل القصة عمل كدا بالفعل

مع العلم ان قصص عبد الوهاب مطاوع هي عبارة عن قصص حقيقية أرسل بها قرائه له إما لإسعاد باقي القراء أو البحث عن حل لمشكلاتهم

ولو كان ناوي يروحلها أو مش ناوي على الأقل ياخد الخطوة

والله اترفض رفض تام وقتها يسيبها وكل واحد فيهم ضميره مرتاح ومش حاسس انه ظلم التاني "بالنسبالها متحسش انها اتخلت عن حد كان متعلق بها" وبالنسباله علشان ميبقاش بعد التسييح دا كله وكل الناس عارفة ويبقى علقها "على رأي زينب" وخلي بها

أما بقى لو الناس وافقوا به وقرروا يتمهلوا ويساعدوه فساعتها يبقى مخسرش حاجة

لكن أهم حاجة يكون جدي على رأي زينب وياخد خطوة تثبت انه قد المسئولية

وبالمناسبة القصة اللي في كتاب أقنعة الحب السبعة البطل عمل زي صاحبنا دا كدا بالظبط وخلي بالبنت اللي كانت بالفعل متعلقة به لكن دا بعد ما تقدم لها ووالدها رفضه وصاحبنا محاولش أي محاولة للتمسك بها أو اقناع والدها ولكن قرر الرحيل مباشرة لأبعد محافظة في مصر

ومرت السنين والبنت تزوجت من واحد على رأي الباشا فعلا طلع عينها وبهدلها وهي أصلا مكانتش طايقاه وفي النهاية اتطلقت ولإنها هي اللي أخدت الخطوة راحتله وقالتله انت لسة عايزني؟ واتجوزوا بس بعد ايه؟!!

وليه ميحاولش يعفيها من الضغوط العظيمة دي؟!!

الازهرى يقول...

بصراحة
ربنا يكرمك على كمية الضحك اللى ضحكتها فى بداية اليوم دى :)

تحياتى دوما

زينب علي حبيب يقول...

انا كدا هقرا الكتاب دا ان شاء الله وبأقرب فرصة ... شجعتيني عليه :)

النسر المهاجر يقول...

تعرفى احسن نصيحة إنه يكلمها ويعرف هى لسه بتحبه ولا لا وبصرف النظر عن الى هيحصل بعد الجواز زى الPASHA مبيقول لكن لو متقدملهاش هو من جواه هيزعل لانه ضيعها من ايده طبعا ممكن ميظهرش الزعل ده لكن هى مدام بتحبه وشيفاه كويس يبقى هى الى هتشيله فى عنيها لو إتقدملها

سواح في ملك اللــــــــــــــــــه- يقول...

نور الطيبة

ليست للمشاعر موعد وليس لخفقان القلب

سن

مااجمل براءة المشاعر

لذا دائما مانحن للطفولة ونتمني اننا

لم نتلوث ولم نتعرف علي مانعرفه الآن

تحيتي لاطيب نوووور

نهر الحب يقول...

اااااااااه يا قلبي كنت بقراها امبارح والنور قطع مكملتهاش رجعت اكملها النهاردة
قلبي وجعني
ايه الاحساس ده

........
الموقف ده حصل لحد قريب مني جداااااااا

حد من ابتدائي ظهر فجأة بعد غياب حوالي 14 سنة بس صارحها بحبه علي طول تاني مرة شافها لكن للأسف هي مصدقتش انه فيه حب كدة وكمان الفروق الاجتماعية خلتها تقول للاسف مينفعش
.........
وفعلا كانت النهاية...ووووبس
:(