الجمعة، 2 مارس 2012

عن..المطر



وطبعا كلامى عنه من وحى الجو الفظع اللى عيشينه اليومين دول..

المطر ديما مرتبط عندنا بالخير يمكن علشان احنا بلد زراعى ومطر يعنى ارض مروية ومحصول مزهزه..

المطر مرتبط عندنا بابواب السما المفتوحة وده بيخلينا كلنا تقريبا بنرفع اديناوندعى بكل احلامنا اثناء المطر..ويمكن النظرية المتفائلة دى هى اللى استفذت احدهم علشان يقول مقولته الشهيرة "طالما قبلت بخير المطر لازم تقبل بطينه!" اعتقد كان قصده اننا لازم نقبل بسلبيات الحاجة زى ما بنفرح باجابيتها..واعتقد معاه حق

المهم ان المطر مرتبط عندنا بالخير والرخاء ديما ..
المطر مرتبط عندنا بالغسيل..غسيل الارواح والهموم  ..والذنوب ان اقتضى الامر..ويمكن ده السبب الرئيسى  وراء خروج احدهم على غير الطبيعى والسير تحت المطر..ان سألته هيقولك انه بيحس براحة..بيحس ان المطر مش بس بيغرقه مية من برا لاء..ده بيدخل جوا نفسه وبيغسل قلبه ومشاعر وبيخفف عنه احساسه الوقتى بالالم او الحزن او اى مشاعر سلبيه عنده وقتها..ولو جينا للحق ساعات بتمنى انى امشى تحت المطر من هذا المنطلق عله يغسل بعض همومى..كمان ساعات بتمنى ان فيه ناس معينة فى حياتى تمشى تحت المطر..عله يغسل نواياهم....

المطر بيخلق حالة رومانتيكيه لاشك فيها ..ولا شك كمان اننا كلنا نفسنا نعيشها ..ولما بقول حالة رومانتيكيه فالمقصود بيها الومانسية بكل انواعها من حاله حب لحالة ذكريات الحب لحالة الشفافية المصحوبة للمطر وكانك بقين مصنوع من بلور نقى كل مشاعرك باينه للى واقف جنبك ..لو كان واقف جنبك حد..

واحد عوامل زيادة الحالة دى  اعتقد هى السينما مصرية كانت او اجنبية..مين فينا ماشفش مشهد رومانسى فى احد الافلام لما البطل يجى يصرح بحبه للبطلة وتهطل الامطار بغزارة من حيث لا تدرى!..

اعتقد ان الافلام هى سبب ترسيخ المشهد ده فى نفوسنا ومش بس كده اعتقد كمان انها ليها اليد العليا فى تجسيد المشاعر السلبية ناحية المطر..اه مشاعر سلبيه ..ماننكرش ان فى ناس بينتابها حالة اكتئاب مع المطر او مع الشتا بوجه عام..مش عارفة بسبب الجو المغيم ولا بسبب ايه المهم ان دى حالة بتيجى لكتير من الناس..وليها اصل سنيمائى كمان فالمخرجين والمؤلفيين مصرين على ربط الاحداث الكارثية فى رواياتهم من فشل وفراق وخيبة امل وخيانة بالمطر ..تلاقى البطل ماشى فى طريق لوحدة ويأتيه المطر من حيث لا يحتسب برده..واعتقد كلنا فاكرين عبدالحليم حافظ فى الخطايا وجئت لا اعلم من اين ولكنى اتيت...
الحقيقة مش عارفة احدد هل المشاهد دى هى السبب فى الاحاسيس دى  بما اننا متربيين عليها تقريبا ولا العكس  واننا مصدر ايحاء للمؤلفين علشان كده جتلهم الافكار دى..محيرانى الحكاية دى بصراحة ياترى البيضة الاول ولا الفرخة؟!

وبناء عليه فكل واحد فينا له وجهة نظره فى المطر وله احساسه الخاص جدا تجاهه ويمكن له ذكرياته وحكاياته اللى مرتبطة بيه..كل واحد فينا المطر بيأثر فيه بطريقة ما..
فسبحان الذى خلق المطروسيره لنا..

هناك 42 تعليقًا:

نهر الحب يقول...

:)
وحشتيني

المطر
احلي احساس واحلي حاجة في الدنيا
تعرفي
انا كتبت عن المطر برضه

في المطر بقف تحته وبحس ان روحي نقييييييه اووووي وقلبي مرتاح جدااااا
انا بقي الدنيا بتنشن عليا وانا ماشة عشان تمشي وانا في الصيدلية يبقي الجو حلو واول ما اطلع الاقيها بتشتتي
:DDD

بس بعشق المشي تحت المطر طبعاااااااااا

حلو البوست يا نور

نهر الحب يقول...

انا اول تعليق وانتي عندي في نفس ذات الوقت
:)))

reemaas يقول...

Blogger نهر الحب


انتى كمااااااان وحشانى كتير ومبسوطة انك رجعتى تكتبى تانى

وبينى وبينك كنت متاكده من ده :)

لسه قاريه البوست بتاعك حالا والمطر عامل مشترك بينا


كتير بيعمل معانا المطر كده يا سوسو واعتقد انه هيعمل معايا كده حالا لان معاد صيدليتى جه والمطرة عماله ترخ هههههههههههههه

reemaas يقول...

ههههههههههههه اه اخدت بالى من هذه النقرة هههههههههههههههههه

نهر الحب يقول...

هذه النقرة
ههههههههههههههه

دعاء العطار يقول...

مساءك سكر ياريمو

بصى ياسيتى

انا بحب المطر لكن بكره الشتا

يعنى بحب امشى تحت المطر .. لكن بكره الغيوم والبرد وان الشمس مش تطلع

وده لانى بعشق حاجه اسمها شمس لانى بحسها " أمل "

ولما الدنيا تغيم بيجيلى اكتئاب بصراحه وتلاقينى قفلت الشبابيك وولعت النور عشان احس اننا بالليل ومااشوفش الجو اللى مش فيه شمس ده

دايما انا رافعه الجمله دى قبل مالشتا يدق البيبان

" والنبى ياشتا وحياة ولادك _ البرد والشبورة والضباب _ بلاش المره دى لما تيجى تيجى وتجيبلى اكتئاب "

الجمله دى للمبدع وليد طاهر :)

هبة فاروق يقول...

بحب المطر ويا سلام بقى لما بينزل ويغسل الجو والاشجار من الاتربه
اعشق رائحه الارض بعد نزول المطر وانتعاش الجو ونقاءه رغم كرهى للشتاء الذى دائما يكون مصاحبا له
يعنى لو المطره تنزل فى الصيف حيكون الجو رائع
بوست حلو اوى يا نور

beautiful mind يقول...

انا كمان بحب المطر
بس بكره السقعه جدا ولبس الهدوم التقيلة
الشتا عندنا بيكون معاناة
الشوارع بتبوظ والحياة بتقف بس هو في الاخر خير ورحمة من عند ربنا
بس انا مش بحب الشتا من صغري لانه بيفكرني بايام العيد اللي كانت باستنااها وبحلم بيها كل يوم وبحلم باللي هعمله فيها وفجأة كدا تيجي الدنيا ممطرة
وتتبخر احلامي كلها
تحياتي

مصطفى سيف الدين يقول...

المطر خير
و الدعاء مقبول لحظة المطر
مفيش احلى من وقت المطر
تحياتي ليكي

nesma hatem يقول...

المطر والشتا من أجمل نعم ربنا علينا أصلا
مع أنه بيبقى برد جدا وطين فظيع
بس عمره ما حسسنى بأكتئاب
بستناه كل سنة
:)

سواح في ملك اللــــــــــــــــــه- يقول...

بصي يانور

من ييجي سبعين سنة كدة او اكتر

لما كنت شباب

كان المطر ده بيمثل لي فرحة وسعادة

جامدة اوي ملهاش علاقة بالافلام

كنت احب امشي في الشوارع وهي خالية من البشر

وكانت لما المطرة تزيد

اتظلل تحت اي بلكونة

لما تخف شوية

وبعدين اكمل مشي

ساعة كدة والا حاجة وبعدين اروح بيتنا غرقان

كنت بحس كأني زي الزرع

بيرويه المطر

تحيتي يااطيب نور

habiba يقول...

سيبك من انه بيوقف عندنا السكة ساعتين تلانة اربعة خمسه كده ولا حاجة..
بس برده جـــــــــميل.
تسلم ايدك على الموضوع ده لانى من عشــــاق المطر وكتبت وهفضل اكتب عنه..لان فعلا كل واحد له احساس معين مع المطر ومواقف لا تنسى.
تقبلى تحياتى ودمت بخير.

ابراهيم رزق يقول...

مطر اية و رومانسية اية

اية الجو اللى مش رومانسى خالص ده

هو انا مستغنى عن جزمتى عشان امشى بيها فى المطر
و مجنونة اية اللى تطاوعنى دى عشان تنزل معايا فى المطر
هذه مؤامرررررررررررررررررررررررررررررة
من الدكاترة و الصيادلة
لعبة مكشوفة اناس تنزل فى المطر يجلها برد تعى تروح تكشف الدكاترة تكسب
تاخد ادوية من الصيدليات الصيادلة يكسبوا
هى مؤامرة منك و من شرين و مصطفى سيف عشان الصيدليات تكسب
لكن انا صاحى قوى و هاكشفكم
قال مطر قال و رومانسية قال
بلد مجانين صحيح

faroukfahmy58 يقول...

فعلا يانور المطر احيانا بيخلق حالة رومانسية واحيانا العكس وهذا يتوقف على حجم هذه الامطار هل هى مجرد تنديعات بسيطة ام غزيرة شوارعنا غير مهيأه لا ستقبالها والشوارع فى الاسكندرية اعدت باتحدارات لكى تتسرب مياه المطر الغزبرة فى اوقات النوه الى بللاعاتها بعكس القاهرة كما وكان البلاعات تتخاصم مع مياه المطر وتسد وتغمض عيونا الجارية اليها
عموما موضوعك مشوق ويذكرنى بايام فرحنا كاطفال ونحن نجرى نتسابق مع تنديعات المطر الخفيف

faroukfahmy58 يقول...

فعلا يانور المطر احيانا بيخلق حالة رومانسية واحيانا العكس وهذا يتوقف على حجم هذه الامطار هل هى مجرد تنديعات بسيطة ام غزيرة شوارعنا غير مهيأه لا ستقبالها والشوارع فى الاسكندرية اعدت باتحدارات لكى تتسرب مياه المطر الغزبرة فى اوقات النوه الى بللاعاتها بعكس القاهرة كما وكان البلاعات تتخاصم مع مياه المطر وتسد وتغمض عيونا الجارية اليها
عموما موضوعك مشوق ويذكرنى بايام فرحنا كاطفال ونحن نجرى نتسابق مع تنديعات المطر الخفيف

Bent Men ElZman Da !! يقول...

المطر ده بيعمل معجزات والله جوه الواحد
بحب اوى امشى تحت المطر
بحس انى بعرف اتنفس احسن من اى وقت باخد النفس من جوايا اووووى
بحس ان هاطير وحاسه بحريه اول مره بحسها
بيعمل شعور رائع بجد جوه الواحد

ريبال بيهس يقول...

مساء الورد ريماس

بالفعل المطر نعمه كبيرة لا تقتصر على الماء فحسب فهي بكل طهر تغسل ما بداخلنا من شوائب تكون في مجملها نفسية ورغم تحليلك إلا أن المطر بالنسبة لي سعادة وابتسامة ترافقني في مشواري معه حتى تقفل السماء بابها فنرتوي مع الأرض بنقائها ولا ننسى أنه بالفعل وقت المطر وقت إجابة دعوة وهذا ما أضاف له بعد ثاني جميل ورائع ....

تحياتي وإحترامي

افكار مبعثرة يقول...

انا يعشق المطر جدااااااااا
المطر مرتبط عندي بالصفاء و الارتياح
بحس انه فرج من عند ربنا ببقى مبسوطة اوي وقت المطر و اجري على البلكونة و اقف واخلي قطرات المطر تيجي عليا :))))
بحس اني مرتاحة اويييييييييي
عجبني البوست اوي :)
تحياتي ليكي يا جميل

Tarkieb يقول...

هههههه اول ما قلتي المطر مرتبط بالغسيل افتكرت كلام امي لما كانت الدنيا تمطر وتقول يالا يا اولاد نلم الغسيل قبل ما يتبل ......جميل اوووي البوست ورمانسي بس انت عارفة انا بحب المطر دلوقتي عشان ارتبط معايا دلوقتي بعدم نزول تلج ولو نزل التلج بتبقى لييلتي سودة لما باروح الشغل

reemaas يقول...

Blogger دعاء العطار


عجبتنى جدا الجملة
وعلى فكرة انتى شبهى كمان فى الحكايه دى

reemaas يقول...

هبة فاروق

ياااااااااه يا هوبا
امنية حياتى تمطر فى الصيف
وخصوصا الصيف الجاى

reemaas يقول...

beautiful mind
ههههههههههههههه

اه والله فكرتنى ساعتها العيد بيبوظ جدا

reemaas يقول...

مصطفى سيف الدين

يارب يكون ليا نصيب فى دعا الايام اللى فاتت

reemaas يقول...

nesma hatem

هو اكيد نعمة وهحاول اقبل بطينه ده هنعمل ايه :)

reemaas يقول...

سواح في ملك اللــــــــــــــــــه-

ودلوقتى بعد ما كبرت كده يا خالد هههههههههه

هو احساس حلو بس بعدها هتاخد لطشه برد من العيار التقيل

reemaas يقول...

سواح في ملك اللــــــــــــــــــه-

ودلوقتى بعد ما كبرت كده يا خالد هههههههههه

هو احساس حلو بس بعدها هتاخد لطشه برد من العيار التقيل

reemaas يقول...

Blogger habiba

منورانى وفعلا بيوقف عندنا كل حاجة ومع البرد بقى ماقولكيش يا محلى القاعدة فى البيت

reemaas يقول...

ابراهيم رزق

ههههههههههههههههههههههه
اوباااااا
اتكشفنا

استر علينا يا ابو زياد

reemaas يقول...

Blogger faroukfahmy58

ايون يا ستاذنا جايز لو الاستعدادات اكبر كنت فرحت بيه

reemaas يقول...

Blogger Bent Men ElZman Da

يا بختك يا دينا

بار عليكى ههههههههههههه

بس حلو الاحساس ده

reemaas يقول...

Blogger ريبال بيهس

منورنى ديما ياريبال وجميل احساس النقاء ده هم بس لو يرصفوا الشوارع هتبقى جميله جدا

reemaas يقول...

افكار مبعثرة

اه طبعا هو فرج جدا وبدعى زيك كتير بس اهم حاجة ماخرجش من البيت وقتها

reemaas يقول...

Blogger Tarkieb

ده انا نفسى تمطر تلج يا تراكيبو اقله الرض هتبقى بيضا مش سودا وطينه

هههههههه بحقد على البلاد المثلجة انا

نور القمر يقول...

اهلا حبيبتى
وحشيتتتتتيني كثييير كلكم واللهي ..
كلمات رائعه واحلى حاجه المطر
مع تحياتى لك
نور

eng_semsem يقول...

المطر بنحس انه بيغسل كل حاجه حوالينا فتظهر على حقيقتها وتظهر في اجمل صوره
المطر بيغسل روحنا فبنحس فيها وبننسى احساس التوهان لاننا بنشوف كل حاجه بعيننا
المطر نعمه نازله من السما كلها خير
تحياتي

reemaas يقول...

منورانى يانور القمر انتى كمان ليكى وحشة كبيرة

reemaas يقول...

صح يا سمسم بس لما تمشوا تحته كتير صدقنى هتاخدوا برد صدقنى عن تجربة يعنى
على فكرة انا مش عارفة ادخل عندك المدونة خالص بتحولنى على صفحة فيها قرءان كريم.

reemaas يقول...

منورانى يانور القمر انتى كمان ليكى وحشة كبيرة

الاحلام يقول...

رائعه نور
احساس جميل وشعور اجمل
المطر شىء جميل وممتع ولكن عندما يزيد عن الحد بيكون رهيب والجو مخيف
نعيشه هنا فى الاسكندريه بكل ما فيه
تحياتى ابوداود

Mona يقول...

أنا من الناس اللى كان بيكأبهم منظر المطر وده لاننا برضه بلد زراعى مطين فى الشتا
ولكن لما إنتقلت لبلد غير زراعى
حسيت بجمال المطر ومتعه دفء الشتا

تقبلى مرورى

reemaas يقول...

Blogger الاحلام

وانا معاك المشكلة فى الجو اللى بيجى معاه بيبقى مرعب فعلا

reemaas يقول...

Mona

عقبااااااااااااااالى لما اتنقل انا الكمان :)
منورانى