الأحد، 17 سبتمبر 2017

مع نفسى 45

ديما كانت امى تقولى العشر سنين اللى مابين عمر العشرين والتلاتين بتعدى هوا ،مابنحسش بيها .. ماكنتش بركز اوى فى الجملة
بعدها قالتهالى اخت واحدة صاحبتى اكبر مننا نفس العبارة تقريبا .. لما كسرت التلاتين فهمت !
هم صحيح عدوا امتى ال10 سنين دول .. عدوا فى ايه وايه اللى عملته فيهم .. ازاى ماحستش بيهم كده .. جايز لأنى ماحققتش فيهم تغيير فى حياتى ،فضلت زى مانا فيهم تقريبا اخسر ناس كتير من اصحاب ثانوى وجامعة لأى سبب كان حتى ولو كان السبب هو ان مافيش وقت نسأل حتى على بعض  وقصاد كده ماكسبتش ناس كتير بسبب ظروف شغلى .. ماحققتش فيهم اى حلم تقريبا حتى ماكنتش بقرأ فيهم كتير زى دلوقتى .. يمكن كل اللى زاد عليا انى اشتغلت كتير فيهم كتير جدا لدرجة انى  متأكدة ان الشغل ده هو اللى سرق ال10 سنين دول .. والكوميديا بقى انى ماطلعتش منهم بفلوس كتير مثلا احس معاهم انى انجزت .. لا.. كان اللى جاى على اد اللى رايح  ماكنتش بحرم نفسى ولا اللى حوليا من حاجة محتاجنها  جايز دى الميزة..
الشغل دى هو اللى سرق الوقت الاخير اللى كان لازم أقعده مع بابا الله يرحمه، لكن ده موضوع تانى محتاج فضفضة تانية
ولأن الوقت اتسرق كده بشكل محبط مش حاسة بقى انى فى التلاتينات خالص .. عايش فى العشرينات لسه ومش حسانى كبرت .. اصل الواحد بيكبر فى رأي باللى عمله واللى عاشه وبكده يبقى انا لسه يدوبك بنت 23 سنة
هكبر امتى وهحقق الحاجات المجنونة امتى مش عارفة
قدام الكل انا كبرت  بس انا حسانى لسه صغيرة البس البنطلون الجينز والتيشرت واجرى واتنطط ..
مش عارفة دى ميزة ولا عيب لكن جوايا زعل على ال10 سنين اللى فاتوا وخوف على اللى جاى حتى ولو يوم 
عاوزة اعيش بقى ومش عارفة ابدأ منين !

هناك تعليق واحد:

محمد سلامة يقول...

ياااااه
والله جيتى على الجرح
انا خايف موت من التلاتين
وفاضلي سنتين
اتمني يطولوا عشان الحق اعمل اي حاجة
كل عام انتي بخير
وربنا يطيل في عمرك ويحسن عملك
وماتبطليش تبقي طفلة :)