السبت، 27 نوفمبر، 2010

والله مابتفرق معانا الشهادات

زمان لما كنا بنسمع عن السحر والشعوذة الاعمال او العمالات زى مابيقولها الناس البسيطة كان ديما ده مربوط عندنا بناس ماتعلمتش ناس بسيطة جدا وعقلها جايبه ان فيه حد ممكن يئذيها ويكرهلها الخير فيقفهولها بعمل ويروحوا بقى للراجل اياه او الست اياها فيفكوا العمل ده وبتقديم ماغلى او رخص من القرابين ابتداء من الفرخة لحد ماعقلك ييبك بقى ويعمل عمل معاكس  او اى تخريفة المهم انه يبطل العمل القديم
مسلسل قديم بنشوفه فى  الافلام والمسلسلات والجرايد يعنى مش جديد

الجديد بقى انى اكتشفت ان الحكاية دى مش مرتبطة بالشهادات خالص يعنى عن طريق حكايتين لاتنين من اصحابى  دكاترة يعنى وصلوا لاعلى درجات التعليم المتاحة

اول واحده جاتلى البيت تقولى اقولك على سر يا ريمو قولتلها  خير يارب قالتلى ماما مصممة اروح لشيخ علشان يعرف اى سبب تاخر الزواج ده قولتلها شيخ ايه يابنتى وهبل ايه دى قسمة ربنا  مال الشيخ ومالها  بلاش تخريف قالتلى بصى انا قلت اجرب يعنى والراجل بيستخدم القراءن فى العلاج وكده وبياخد اجر رمزى
رمزى اييه ورسمى اييييييييييه يابنتى عيب الكلام ده قالتلى بعد ماستفذتها برفضى طب ايه رائيك ان انا رحت فعلا وسقانى ترياق كده وقالى لو رجعتى دم يبقى العمل انتى شرباه ولو مارجعتيش يبقى العمل ماشية عليه


قلتلها يعنى كده كده فيه عمل ماعلينا وبعدين؟ قالتلى وقد كان يابنتى شربته من هنا و مغص بقى ودم كتير !!!!يخرب بيت شيطانك اكيد حاطتلك حاجة فيه يا دكتورة اخر زمن قالتلى لا انا شاربة عمل يابنتى الحمد لله بعدها حسيت انى ارتحت
اتغظت بقى وقولتلها وبتحمدى ربنا ليه بقى ماتشكرى عمك الشيخ


المهم يعنى بعدها بشهرين تقريبا اتخطبت ههههههههه رحت خطوبتها وماقلكوش بقى النظرات اللى بتحمل معنى شفتى مش قولتلك!!!! وطبعا انا استغفر ربى فى سرى وابتسم واسكت مانا لو اتكلمت  هبقى حاقدة وحاسدة وعندى حبة ضغائن


ثبت علينا العقل والدين يااااااااااااااااارب
                                                                    ويجعله عامر

                       ملحوظة

اه من حق هبقى احكيلكم حكاية صاحبتى التانيه ومفاجئتها البوست الجاى 

هناك 8 تعليقات:

صيدلانيه طالعه نازله يقول...

هههههههههههههههههه
ايوه و الله يا بنتى مالوش دعوه بالشهادات نوهاااااااااااائى
و اكتر ناس تلاقيهم مقتنعين بده هم اعلاهم تعليما و اكثرهم ثقافه
متقديش يا دوك لاحسن حتتعبى خالص

reemaas يقول...

هههههههههههههه اه والله ده انا يومها الفيوز اللى فاضل عندى كان فعلا هيضرب

هبة فاروق يقول...

فعلا يا ريمو مش بالشهادة هو بيبقى معتقد وفكرة
ان الشيوخ هما المنقذ الوحيد لحل المشكلة
ودة طبع كفر فمن يريد ان يفك همة وحزنة ما علية
الا ان يرفع يدية لله وحدة مشكورة موضوع جميل
تقبلى مرورى وفى انتظار متبعتك

reemaas يقول...

منورة ياهبة وفعلا مش جهل ابدا ده قله ايمان وده هيبان جدا البوست الجاى

شيرين سامي يقول...

ههههههه حلوه يا ريموو بس تعرفي ربنا بيمتحن ايمانكوا و أشكرك على دعائك بالثبات أثبتلي انك ايمانك قوي ربنا يزيدك يا قمر

عباس ابن فرناس يقول...

كذب المنجمين ولوصدقو
لكن ميمنعش ان السحر شى حقيقى
بس فيه فرق بين الدجل والسحر
عمما اعتقد انهم بيستغلو نقط الضعف عند الناس ويشتغلو علبها
تحية عطرة

reemaas يقول...

ربنا يثبتنا ياشيرى ياااااااااااااااارب

reemaas يقول...

تسلم يا عباس والاهم ان اللى بيروحولهم عارفين كده يعنى بينضحك عليهم بمزاجهم