الثلاثاء، 9 نوفمبر، 2010

هيا بنا نأكل


ثقافة الاكل فى بلدنا ثقافة عريقة جداوماقدرش اقول فى بلدنا بس لا اعتقد فى العالم العربى كله بس انا هخلينى فى بلدنا لان ده اللى شفته يعنى

مثلا لما يبقى فيه واحد تخين وواحد رفيع يتقال على التخين انه ابن عز,او مثلا الطريق لقلب الراجل معدته,وواجب الضايفة ده حاجة رغم انها حميمية وبتدل على الالفة لكنها عادة شرقية صميمة يعنى

كل دى مقدمة ممكن اقعد اكتب فيها يجى بلوجين تلاته لكن انا بصراحة وبينى وبينكم مش جاية اعرفكم اهميه الاكلة بالامثله والا مثال لا
انا كعادتى اللى ربنا مايقطعها جايه احكيلكم اخر مواقفى وطرائفى

مؤخرا رحت يوم الصيدلى زى عيد العمال كده بيحتفلوا بيه كل سنة تقريبا فى فندق شيراتون القاهرة

كان يوم ظريف ببروجرام اتضمن يجى خمستاشر كلمة لناس مهمه فى المجال وتكريم ناس اينعم مانعرفهاش بس اكيد يعنى تستاهل

ادونا فاصل كده ونزلوا البوفيه  اللى كان ترتيبه كالاتى

طربيزة كبيره على اليمين واختها على الشمال وفى اخر القاعه خاااااالص يجى اربع طرابيزات مرصوصه صف واحده

انا بقى وصحباتى ماعرفناش ان ده البوفيه الا لما شفناالقاعه اللى ماكنش فيها مكان لرجل لدرجة اننا كنا واقفين مرة واحدة كراسيها فضيت واتوزعوا على الاماكن السابق ذكرها بشكل منظم ورهيب

اوووم اييييييييه ,اخدنا بلنا انا والابرياء صحباتى ان ده مارثون اكل وكل واحد خارج ومحمل طبق  بيقع منه من كتر ماهو مليان

قلتلهم تعالوا نتفرج ورحنا على التربيزة اليمين ربع ساعه على ماعرفنا نوصلها  ونلاقيلكم ايييه....بح  اه والله اتمسحت بالاطباق اللى عليها وكذلك الشمال

سمسمة وطمطم صحاتى جاتلهم صدمه وقالوا نرجع نلحق كراسى بكرامتنا واهو يبقى لحقنا حاجة فى الليلة دى
قلتلهم لا انا لازم افهم لحقوا خلصم البوفيه ازاى دول وكان موجود ايه

على ماوصلنا ورا لكم ان  تتخيلوا ان المشهد بيتكرر ولكن بصورة اكبر
وكل واحد طالع ومعاه طبق يكفيه هو  وعيلته كلها وانتهى المولد او الفاصل وطلع دكاتره يكملوا محاضرات بس تقول لمين ......الناس مشيت

اخدوا غرضهم من الحفلة ومشيوا والباقى اللى قاعدين بيشتركوا فى صفة واحده الا وهى انهم مالحقوش البوفيه

وكنت انا وصحباتى منهم طبعا.......

وطلعنا بمعلومة المؤتمرات ماهى الا حفلات اكل كبيرة والاكل فرص وكل واحد وشطارته

                                                       ويجعله عامر



هناك 8 تعليقات:

صيدلانيه طالعه نازله يقول...

سيبك انتى

اهم حاجه طلعت بيها من البوست

انك زميله و شريكه فى نقابتنا الجميله

هههههههههههههه

تعيشى و تاخدى غيرها

يوووووووووووووه قصدى ما تخديش غيرها

هى دى حفلات بلدنا و مؤتمراتها

اكل ثم اكل و لا شىء غير الاكل

و كل سنه و انتى طيبه يا قمر

شيرين سامي يقول...

أنا لما بروح فرح الناس بتبقى مجرمه وقت البوفيه عموماً دي ثقافة الشعب المصري في الأكل بكل مستواياته
شكراً للموضوع الجميل و الطرح الأجمل

reemaas يقول...

وانتى طيوووووووبة يا دك والله كان يوم لاينسى وان شاء الله نشوف بعضينا المؤتمر الجاى ولا تقلقى انا اتمرنت

reemaas يقول...

تسلمى ياشيرى وهى فعلا ماعدتش تفرق فى المستوى

محمد الجرايحى يقول...

تقبلى مرورى وتقديرى واحترامى
واحييك على حسن اختيار موضوعاتك الشيقة

reemaas يقول...

تسلم يا محمد كتير مبسوطة ان الكلام عجبك

جايدا العزيزي يقول...

كل عام وانت بخير

كل عام وانت الى الله اقرب

وعلى طاعته ادوم

عيد اضحى مبارك

اعاده الله عليك وعلى امة نبينا محمد

بالخير واليمن والبركات

عيد سعيد

تحياتى

reemaas يقول...

اللهم امين يارب العالمين كل سنة وانتى طيبة يا جايدا