الأربعاء، 22 ديسمبر 2010

الهوم ورك بتاعى





طلبت منى صديقتى شرين اعمل هوم ورك بتاع انت ليه مدون ؟وقبل مابدء بشكرها جدا كان نفسى بصراحة حد يقولى اعمليه ههههههه


ليتس جوووووو
1\التعريف بالمدون
اسمى نور,مسلمة,مصرية,من المنصورة
الصورة اللى حطاها على المدونة صورة  بحبها جدا وكتير من اصحابى بيقولوا انها شبهى لانى ديما بقعد كده فى شغلى وديما بفكر بغض النظر عن النضارة يعنى

  سميت نفسى  ريماس لانه اسم بنت
اعز صحباتى وانا اللى مخترالها الاسم ومن زمان وانا بستخدمه كاسم ليا فى الفيس بوك وهنا كمان  ومعناه ماء الماس

انا مجرد بنوته مصريه زى اسم المدونة مش بكتب شعر ولا قصص بس متزوقة جيدة جدا للاتنين بحب اتامل كل حاجة حواليه وده بيخلينى ابان ساكتة كتير وقليله الكلام للى مايعرفنيش طبعا

بحب قراية اى حاجة وكل حاجة ابتداء من ميكى ومجلدات الاطفال لحد كبار الادباء والمفكرين

ايه تانى ايه تانى! اه ومش مرتبطة
2\المكانة العلمية والوظيفة
انا خريجة صيدلة المنصورة دفعة 2003 وحاليا اجازة من الحكومة لان فيها سرقه كتير
وبدير صيدليه خاصة

3\كيف كانت البداية مع التدوين
هى المدونة مش من زمان بدئتها فى شهر 9 اللى فات ده لكن علاقتى انا بالمدونات كانت من قبل كده من زمان
 اقدر اقول ان الفضل فى تعريفى بالتدوين هى غادة عبد العال صاحبة مدونة عاوزة اتجوز كنت متابعاها وفضلت كده لحد ما هى توقفت بعد عمل المسلسل وبعدها كانت مدونة بنوته لاسعه لسارة درويش حبيت الفكرة جدا بسببهم وكنت بمارس مايشبه التدوين فى الفيس بوك وزوربيا وحتى فى اجندتى كنت بكتب مايشبه اليوميات لكل غريب وكل موقف فى يومى

لحد ماجتلى فكرة وقلت طيب ما اجرب واعمل مدونة وبينى وبينكم ماكنتش اتخيل ان فيه حد هيتابعها اصلا
بس الحمد لله عرفتنى على ناس اعتز بيهم جدا وموهوبين بجد

4\ليه انت مدون؟
كتابه اللى بيجى فى خاطرك وبتفكر فيه شئ جميل لانه هيخفف عنك كتير شبه الفضفضة
وانك تدون وحد يشاركك ويقولك رائيه سواء بالثناء على كتابتك او بالنقد او بالنصيحة لو انت طالبها ده اجمل  فى وقت ماحدش عاد فاضى فيه لحد
وبالتالى انا حابه التدوين

يارب اكون عملت الواجب صح

واتمنى ان اللى يعمل الواجب بعدى Temoصاحب مدونة اسف على الازعاج   

هناك 16 تعليقًا:

صيدلانيه طالعه نازله يقول...

بصى بقى يا ست نور و برضه سعيده انى عرفت اسمك الحقيقى مش الحركى
ههههههههههههههههههههههه
اتفق معاكى ان الحكومه فيها سرقه كتير و انا لو منك استقيل خالص واريح دماغى بلا قرف ووجع دماغ
كلنا عرفنا التدوين عن طريق غاده عبد العال
و كان صدور كتابها تشجيع لناس كتير اوى بدات تدوين فى اوائل 2008 و كنت انا منهم
كل كلامك فى الواجب جميل اوى
كل واجب وانتى طيبه

سواح في ملك الله- يقول...

عشرة علي عشرة يانور
علي فكرة
طلعتي زي ماتوقعتك بالظبط
وبعدين انا مبسوط منك جدا لانك بتتقي الله
ومبتحبيش تشتغلي في حتة فيها سرقة
ادعيلكي الله ان يكرمك
وتحققي كل طموحاتك
ربنا يخليكي لاهلك ويخليهم ليكي

شيرين سامي يقول...

كنت عارفه انك بنوته مصريه جميله زي مدونتك اجاباتك تلقائيه و بسيطه و عشان كده انتي مُميزه
بالنسبه لصيدليات المستشفيات أنا اشتغلت فيها فتره و هي فعلاً أماكن سيئه بكل المقاييس و غاده عبد العال كان نفسي أتابعها بس بصراحه مش عارفعه هي ليه بطلت تدوين ما احنا كلنا مشغولين
ربنا يوفقك في شغلك و حياتك سعيده جداً اني اتعرفت عليكي أكتر
اقبلي تحياتي و حبي

خواطري مع الحياة يقول...

مساء الجمال والرقة على اجمل رقيقة
وتعرفنا على اجمل بنوتة
نور اسم جميل يعني اسم على رقة على حلاوة كله مجتمع فيكي
ربنا يوفقك ويحقق كل الي تتمنيه
تقبلي مروري
سلامي لاجمل وارق نور.

اسماء عبدالعزيز يقول...

انتِ انسانه بجد مميزة وجميلة وبسيطة جدا
ومدونتك سكر زيك
ودوني براحتك اكيد متابعينك على طول
اما بالنسبه للسرقه
فحسبي الله عليهم
دمت بكل الحب

reemaas يقول...

تسلمى يا علا وانتى طيوبه وعقبالك كده

وبجد انا بحترم غادة جداااااااااااا

reemaas يقول...

اللهم امين يا خالد انا حاولت والله اغير بس ماعرفتش ولا عرفت اوقف اللى كان بيحصل يلا كل واحد منه لله

reemaas يقول...

ربنا يخليكى يا شيرى اعتقد غادة موضوع نزل مدونتها ككتاب وترجمته لكذا لغة وحكايه المسلس كله ضاغط عليها بس وارجع واقول يارب بس تطمنا عليها باى شكل

reemaas يقول...

خواطرى مع الحياة
_______________
تسلمى يا قمر والله انتى اللىكلك ذوق يعنى اخجلتى تواضعنا

reemaas يقول...

تسلمى يا اسما ويارب نفضل نتابع بعض على طول
ربنا يهدى الجميع يارب

هبة فاروق يقول...

جميلة يا نور وانا سعيدة انى اتعرفت عليكى اكثر
يا احلى بنوتة رقيقة فى الدنيا

reemaas يقول...

تسلمى يا هوبا ربنا يخليكى حبيبتى

عباس ابن فرناس يقول...

نور قصى دكتورة نور

ياريت الناس كلها تكون بتقراء وتتامل

كانت حاجات كتير تتغير

وخصوصا لو كانه زوقهم رفيع زيك يانور
تحياتى

reemaas يقول...

ربنا يخليك يا عبس تسلم كلك ذوق

يوميات شحات يقول...

ربنا يوفقك يا دكنورة نور
و تحية لك و لكل مدونين المنصورة بلدياتي

reemaas يقول...

ربنا يخليك يا شحات تسلم