السبت، 4 ديسمبر 2010

نفسنة بس مفيدة والله

اعتقد كلنا عرفنا موضوع فوز قطر بتنظيم المونديال والمؤكد ولو بنسبة كبيرة اننا فرحنا

انا عن نفسى فرحت يعنى اخيرا دولة عربية فلحت وقدرت تعملها وكمان فازت فى التصفيات  على الفوز ده مع امريكا وده فى حد ذاته مفرحنى جداااااااااا

ورغم كده ماقدرش انكر انى لما شفت الملف القطرى اللى ادمته للفيفا تحركت جواية نفسنة كده وغيره مصحوبين بكثير من الحزن لما افتكرت الملف بتاعنا ولله العلم اصلا ماكنش فيه ملف

لما قريت عن العقبات اللى قابلت قطر واللى ذللت بعضها مثل صغر مساحة الدولة واللى قلبته لمصلحتها بانها ممكن تستغل ده فى سهولة وسرعه الانتقال بين ملاعبها

وحلت بعضها زى حكاية ارتفاع درجة الحرارة فى الملاعب دى بردت الملاعب يا جماعة

جه فى دماغى مقارنة بين كل ده وبين اللى حصل معانا ,عارفين لو كانت مشكلتنا فى الحر واننا ماعندناش سيولة نبرد زيهم كنت سكت يعنى على اد لحافك مد رجليك

لكن احنا مشكلتنا ولا فخر   النظاااااااافة
يعنى حاجة تكسف الصراحة وبصراحة من كتر غيظى وزعلى قعدت اقول لنفسى طيب يعنى ده مش عيب حكومة بس احنا كمان اكيد معيوبين يعنى احنا اللى رمينا الزباله فى الشارع

وعليها قعدت امخمخ فى حلول او تعديلات لسلوكيتنا كده من الملاحاظات اللى بشوفها من الناس وعليه هقولكم اللى جه فى بالى ونتناقش فيه او نحاول نظبطه كده ومافيش مانع من حلول ومخمخات منكم 
1\كل واحد مننا وهو ماشى فى الشارع بيبقى فى ايده كانز ولا فارغه مياه معدنية ولا ورقه مش محتاجها ولا حتى  منديل ياسلام لو يفضل شايلها لحد ما يلاقى صندوق قمامة ويرميها فيه

2\ممكن يبقى معاك لى من الحاجات السابق ذكرها وراكب عربية ولا ميكروباص وترميها من الشباك ياريت برده تخليها معاك لحد ماتنزل

3\ياريت اكياس الزباله لما تخرج من البيت ياريت ناكد على اللى بيرميها انه برده يرميها فى صندوق  مش يحطها ادام العمارة او البيت

4\الاهالى اللى قالبين بلوكانتهم مخزن بيعينوا فيه بصل وااقفاص وحاجات غريبة جداااااا الواحد بيشوفها فى البلوكانات ياريت بلاش لانها لو مش واخدين بالهم بتبقى باينة والله

5\دى خاصة بالولاد شوية بقى ياريت بلاش بصق فى الشارع وانت ماشى والله حاجة وحشة خاااااااالص

الملاحظات دى يا جماعة حاجات جت فى بالى من خلال يومين بس ركزت فيهم فى تصرفات البشر ولو لاحظتم حاجات والله سهل تتحل جدا وماتقولش يعنى هى جت عليا

يعنى هفترض ان هيقرا البوست ده اربعه وهيتأثروا ويعملوا بيه مثلا كل واحد من الاربعه هيأثر مثلا فى اربعه من اهله او اصحابه كده بقينا 16 وهكذا ماهى الزباله مابقتش اكوام من يوم وليلة وكذلك حلها وتصحيح سلوكيتنا مش هيحصل بين يوم وليله
نحاول جايز نحقق ده بعد قطر وطالما مش عارفين نتأهل لكاس العالم  على الاقل ننظمه

                                                                         ويجعله عامر 

هناك 11 تعليقًا:

هبة فاروق يقول...

والله معاكى حق مشكلتنا النظافة والله لو جابولنا شركات النظافة كلها عمرنا ما حنتصلح لازم كل واحد فينا يبتدى بنفسة علشان حالنا ينصلح ونبطل اهمال
والاعلام المصرى زى ما بيهتم يعمل اعلانات عن الضرايب
يعمل اعلانات ارشاد للمواطنين عن اهمية النظافة وتكون هناك غرامة مالية ويعاقب من يرمى اى شىء فى الشارع ولو حتى كان بيرمى ورقة
موضوع جميل يا ريماس مشكورة حبيبتى

reemaas يقول...

تسلمى يا هوبا بس تعرفى نفسى نحلها من غير مانخاف من الغرامة مع انها للاسف باينها الحل الوحيد

سواح في ملك الله- يقول...

واللهي انتي تفكيرك منظم وجميل
بس احنا في الاساس شعب زي مبتقولي كده مكبر دماغه
وعايزين دايما كرباج ورانا نمشي فيه
متروا الانفاق
ممنوعاته كتير بس عشان اللي بيرمي اي حاجة
بيتعمل له محضر فمالشيين علي الصراط المستقيم
مبنحترمش اشارة المرور الا لما بيكون واقف عليها عسكري
مع العلم ان العسكري نفسه بيبقي واقف محتاس مش عارف ينظمها
واقف بس عشان ياخد مخالفات
وقبل شركات الزبالة دي ماكان في زبالين عاديين
بس الحكومة طمعت في مكاسبهم وخدت منهم حتي شغلانة الزبالة دي وادوها شركات اجنبية نيلت الدنيا
موضوعك مهم تحيتي الطيبة ليكي

reemaas يقول...

تسلم يا سواح وعارفه والله اننا مابقيناش نعمل حاجة الا تحت التهديد هى واضحة بس ارجع واقول اللى بننعمله بضغط اثبتت التجربة اننا بنخربه اول ما يزيد الضغط او يختفى لكن لو حابين حاجة بنحافظ عليها والله وبندافع عنها

التغيير لازم يبدء من جوانا احنا هتفرق كتير صدقنى

شيرين سامي يقول...

قلبتي عليا المواجع أنا كمان على قد ما فرحت لقطر على قد ما اتفرست و اتحسرت علينا محدش حتى عارف يقدم البلد في صوره مُشرفه لأن محدش بيهمه الا مصلحته و نفوذه و فلوسه و بس
طبعاً كلامك زي الفل و يا ريت الناس تفهم و تحس أشكرك يا حبيبتي على نفسنتك المفيده و يا ريت كل الناس تنفسن كده

reemaas يقول...

طيب ياشيرى كده بقينا 4 انا وانتى وهبه وسواح قشطة توقعاتى اتحققت
ههههههههههه
شوفى انتى هتاثرى فى كام كده وكذلك الباقى ونشوف

عباس ابن فرناس يقول...

نفسنة مفيد وحميدة بكل تاكيد
لكن المشكلة ان المنفسنين اليومين دول بقو قلة قليلة
يعنى زى ما تقولى ما بقيناش نغير من حد خالص مالص
بقينا باردين جداً بصراحة
وان حد قال قطر وغير قطر هيردو عليهم الجماعة اياهم
ويقولو اصل هما عندهم ومعاهم انما احنا غلابة واللى جاى على قد اللى رايح والاسطونات ايها
وبالمناسبة احنا نقدر نعمل كل حاجة
بس المشكلة اننا مستنيين حاجة ايه هيا مش عارف !

عباس ابن فرناس يقول...

ياريت تلغى تدقيق التعليقات
علشان بيسهل فى توصيل التعليق

تحياتى

Timo.. يقول...

طبعا موضوعك مهم جدااا..
بس صدقيني احنا محتاجين نشيل الزبالة من العقول في الاول ..
وفورا هتتشال الزبالة من كل (سلوكياتنا) بما فيها الشوارع لان الموضوع موضوع وعي عام :)

reemaas يقول...

ماهو ياعبس لو كان مشكلتنا مشكله غلب كان ماشى والله ماكنت هتكلم لكن دى مشكله نظاااافه يعنى عيبة يارب غيرنا يستفيد مين

معلش ممكن تقولى بتتغلى ازاى معلش اختك لسه مبتدئة

reemaas يقول...

وانا معاك جدا يا تيمو هنبدء بنفسنا الاول