الاثنين، 27 يونيو 2011

the secret






عاوزين تعرفوه؟

يقال انه سر الحياة.....من امتلكه فقد امتلك القوة امتلك السعادة

يقال ان الاجداد عرفوا هذا السر واحتفظوا بيه لانفسهم بل وحرموا على من يعرفه ان يبوح به لاعتقادهم الشديد ان من يمتلكه ممكن يحقق معجزات

هحاول اشرحلكم السر ببساطة زى مافهمته

نحن نعيش ونتعايش فى الدنيا دى تحت تأثير قوة كبيرة  تسمى قوى الجذب

ايييييييون كل حاجة فى حياتك سواء كنت بتحبها او بتكرهها انت اللى بتجذبها

مش فاهمين؟...............ابسطهالكم

حضرتك هتتخيل نفسك بمنتهى البساطة انك مغناطيس

مغناطيس يجذب كل اللى حوله من احداث وصور وافكار فمثلا لما تيجى فكرة حزينة على بالك او سيئة تفضل تفكر فيها فتكرهها وكل ماتفكر فيها اكتر كل ماحالة الغضب تزيد عندك  لدرجة اكتر بكتير مما كانت عليه مع بداية الفكرة......وكل ده من فكرة!

وعلى فكرة الحكاية دى او القانون ده مالوش دعوة ان كنت انت حد متشائم ولا متفئل

فقانون الجذب لا يرى اشخاص انما يرى الشئ نفسه بغض النظر ان كنت انت عاوزه ولا لاء

ابسطهالكم............ندى مثال

عندما تجول بخاطرك فكرة مثل:انا لا اريد انا اتأخر على عملى

كأنك بتقول انا هتأخر على عملى.......فقانون الجذب ما بيبصش ل اريد او لا اريد

احسنلك تقول:سأصل باكر الى عملى

طول مانت بتفكر قانون الجذب شغال ولازم تاخد بالك ان اللى بتفكر فيه هو اللى هيحدد مستقبلك

وبتغيير طريقة تفكيرك  ممكن تغير حياتك كلها

ده يا جماعة للامانة مش كلامى ده شرحى لمقدمة كتاب يحمل نفس عنوان البوست
the secret الكتاب لفت نظرى مرتين وده اللى خلانى اقراه

مرة قريت اسمه فى رواية كنت بقرأها
ومرة لما عمكم تمورة قال اسمه ف فيلم هيما

مش معقوله يعنى تامر حسنى يبقى عارف الكتاب وانا ماعرفوش

المهم دونته من على النت الكتاب فعلا حلو

ومقنع كمان رغم انى اوقات بحس انه مدى للقوة دى حجم اكبر من حجمها ياريت اعرف رائيكم على الاقل من الملخص اللى قلته ده

طلب بقى معلش
دعاء العطار وشرين سامى نوهوا عندهم على موضوع الكتاب الالكترونى والمشاركة بتدوينة فياريت والنبى ترشحولى واحد اصلى مش قادرة اقرر

كلهم اولاااااااااادى:)  

هناك 29 تعليقًا:

سواح في ملك اللــــــــــــــــــه- يقول...

كلام معقول

ابسطهالك انا

فيه مثل مصري قديم بيقول ((الي يخاف من العفريت

يطلعله ))شفتي البساطة

كل الكلام الي قلتيه ده والكتاب نفسه

قالوه المصريين اللي قبلنا في مثل من اربع

كلمات وكنت قريت كتاب فرعوني زمان

مترجم من بردية فرعونية وهوة قصة في عهد

اخناتون

كان علي مافتكر اسمه الصقر والنسر

كان فيه هذا العالم المجهول

بالنسبه للبوست هدور وهرد عليكي

FAW يقول...

هو تامر حسني بيعرف يقرا ؟ :)

مش فاكر خالص الفيلم

بس الفكرة مشوقة . . إنترستينج يعني :)

أنا عجبتني قوي " بيض بالعجوة " :))

Bent Men ElZman Da !! يقول...

انا قريت الكتاب ده وماقتنعتش بيه صراحه
يمكن عشان مدى القدره دى اكبر من حجمها زى ما بتقولى
لدرجه انى حسيت انها حاجه خارقه للطبيعه مثلا

انا حبيت تدوينه بيض بالعجوه
وصديقى الوحيد

سواح في ملك اللــــــــــــــــــه- يقول...

صديقي الوحيد فعلا جميلة

موناليزا يقول...

حالياً أقرأ كتاب "ساحر الصحراء"
اللى اتكلم عنه أحمد السقا فى فيلم تيتو:)
دى قصاد تامر حسنى وفيلم هيما:)

وفيه نفس الفكرة تقريباً

مصطفى سيف الدين يقول...

الكتاب شكله جامد وفكرته روعة
انا سمعت عنه بس مجتش فرصة اقراه
بالنسبة للترشيح
انا عجبتني صباحك سكر
تحياتي

ابراهيم رزق يقول...

طالما قلتى تامر يبقى معاكى حق

و الله العظيم فى بوست كتبه عن تمورا و مش عايز بس باين عليا هنزله

متشكرين بس انتى سديتى نفسى قصدى فتحتى نفسى بفاتح الشهية تمورا
هههههههه

خالص تحياتى

Casper يقول...

انا فعلا عرفت الكتاب من فيلم كابتن هيما لتامر حسني والكتاب باين عليه انه تحفة فعلا بس انا مش بحب قراية الكتب اللى بالانجليزي يمكن لاني مش بروفشنال في الانجليزي وفي نفس الوقت مش بحب اقرا كتب مترجمة بحس ان اللى بيترجم بيترجم على مزاجه مش زي ما المؤلف كاتب

_________

خالص تقديري لفكرك وقلمك

غير معرف يقول...

مساء الغاردينيا نور
اختيارك رائع وبجد واضح انه الكتاب جميل وممكن يساعدنا كثير "
؛؛
؛
لروحك عبق الغاردينيا
كانت هنا
reemaas

دعاء العطار يقول...

أنا سمعت يانور عن الكتاب قبل كده كتير بس مش من تموره D: D:

بس حسيت انه على طريقة كتب التنيه البشريه .. فمش قريته

لأنى بصراحه شبعت كتب تنميه بشريه

لما أجوع تانى ... هقراه (: (:

......

بالنسبه للبوست ... فأنا هدعبس فى مواضيعك وهرجع اقولك ..

فكره حلوه انكم انتم اللى ترشحوا دى .. شكلى هعملها عندى .. اسمحيلى أغش منك يانور (: (:

Tarkieb يقول...

اكتر من ميتين وتلاتين صفحة بتحاول تثبت أن الطاقة الموجبة هي اللي بتعملك كل حاجة وتخليك غني وسليم كل اللي تعمله تفضل تفكر في كدة...طب الناس اللي ماتت في حادثة؟ الاطفال اللي مولدين معاقيين؟ الستات اللي بتغتصب ؟دول كمان لحقو يفكرو في الطاقة؟ بصراحة كتاب اونطة في اونطة ومقدرتش اكمله ...

Unknown يقول...

سمعت عن الكتاب و شوقتيني اني أقراه
بصي أنا برشحلك (اتكلمي) لأنه كان مهم و أسلوبه يشد.
و يوميات الصيدله دي تُحفه طبعاً جداااااً
تحياتي لأجمل بنوته

reemaas يقول...

سواح في ملك الله


اه والله يا خالد المثل تلخيص لفكرة الكتاب هحط اختيارك للبوست فى حساااااااااااابى

reemaas يقول...

FAW

اه ياسيدى طلع مثقف على اخر الزمن

بردوا هحط اختيارك للبوست فى حسابى يادرش

reemaas يقول...

Bent Men ElZaman Da !!

اه يا بنوتة حسانى كده هعمل بيها معجزات هى كبيره اه بس مش لدرجة دى

هحط اختيارك فى حسابى

reemaas يقول...

موناليزا

ههههههههه فانانين عباقرة هحاول اقراه الكتاب ده

reemaas يقول...

مصطفى سيف


اه لو على الفكرة يا درش ففعلا جديدة جدا وتشد

انا بحب البوست ده على فكرة:)

reemaas يقول...

ابراهيم رزق
هههههههههههههه يا خبر طب انا اسفه بغض النظر بقى عن تمورا اى رائيك فى الفكيره طيب

reemaas يقول...

Casper

كنت امييينة والله فى الترجمةوراجعتها من اكتر من مصدر على ضمنتى يا كاسبير

reemaas يقول...

ريــــمــــاس

اه والله يا ريماس بغض النظر عن المبالغه اللى فيه بس فعلا الفكرة مفيدة

reemaas يقول...

دعاء العطار
يا دودو انا سرقاها من شرين ههههههههههههههههههههه

reemaas يقول...

Tarkieb
هههههههههههههههه

كرهتنى فيييييييييييه

انا نوهت من الاول ان فيه مبالغه يا سيدى

reemaas يقول...

شيرين سامي


اقريهوادينى رائيك

من عويناتى هحط الترشيح فى حسابى

Tamer Moghazy يقول...
أزال المؤلف هذا التعليق.
engbaky يقول...

قريت جزء من الكتاب الصراحه بس مش كملته حسيت انه بيلغى القضاء والقدر يعنى انت اللى فى ايديك كل حاجه مش فى قوه تانيه خالص بتتحكم فيك

بس احنا لو اخدنا الفكره من منطلق تانى متهيألى هتفيد

بس تدوينه جميله اوى :)

reemaas يقول...

engbaky

منورانى اولا

انا عملت كده
لغيت من حساباتى فكرة انه لاغى القضاء بحكم انه كاتب مش مسلم يعنى واخدت منه اللى يفدنى
نظرة التفاؤل بتاثر ايجابى على حياتنا وقرارتنا

tarek_salah1000 يقول...

كدة يبقى تغير طريقه التفكير نفسها هى اللى بتحدد واعتقد ان دة مرتبط بالطموح والاصرار فى الشخصيه نفسها

reemaas يقول...

tarek_salah1000

انا كمان قريتها كده يا طارق الحقيقة وده اللى شدنى للفكرة جدا

zikoniss يقول...

كلامك صحيح جداً أنا أيضاً تعرفت على قانون الجذب لكن ياريت لو قرأت كثير عنو و عرفت معلومات
بالتأكيد سأحاول أن اتبحث في هدا الموضوع و موضوعك جميل جدا و بسيط جدا و مفهووم
شكرا جزيلاً على التوضيح و الشرح

أما بالنسبة لتامر حسني فأنا شاهدت فيلم و لا أتذكر ما قال ممكن تنسخي العبارة التي قالها و إللي عندها علاقة مع قانون الجذب ^_^

شكراً لك ^^