الجمعة، 17 يونيو 2011

يومياتى 3

لمتابعة الجزء اللى قبل كده اضغط  هنا








استمريت فى الصيدلية اياها لمدة 7 شهور وكنت اطول صيدلانية تعمر فيها دليل على قوة الاحتمال طبعا
الى ان جاء جواب التكليف........

فرحة دخلت البيت يومها طبعا فى قلب بابا وماما بنتهم الكبيرة اتعينت .......

رحت وزارة الصحة علشان استلم العمل وجواب التوجيه للمستشفى اللى هشتغل فيها

وبدأت رحلة الامضاءات ......!! ماقدرش اقولكم الصراحة انا مضيت على كام ورقة يوميها لدرجة انى حسيت ان الناس دى بتبيعنى اللى ورايا واللى قدامى!!

بس لان دى الحكومة فطبعا مضيت وبسرعة لانى فهمت ان الحكايه هتبقى على حسب اللى يلحق بمعنى ان اللى يمضى ويستلم الاول هيبقى الاقدم فى التعيين ودى حاجة حلوة..........اينعم انا ماكنتش فاهمة حلوة فى ايه بس بكرة هفهم اكيد

اوقات كنت بقرء اللى بمضيه واوقات لا بس اكتر ورقة صدمتنى وانا بمضيها كانت استمارة المرتب

اساسى المرتب 48جنيه!!!!!!!!!!!!!!!!!!!!!!

بصيت للموظف كده وقولتله بكل براءة فى صفر ناقص قدام الرقم حضرتك!!

قالى ازاى يعنى؟؟

قلتله ماهى اكيد يا اما 480ج او 408ج صح؟

ابتسم ابتسامة صفرا كده مالهاش معنى وقالى لا هى 48ج ......

نعم؟ يعنى انا هقبض مرتبى 48 ج ازاى يعنى دول مايكملوش كرتين شحن!!!

قالى يابنتى ده الاساسى لسه فى اضافى وحوافز

قلتله لما المرتب يبقى 48ج هتبقى حوافزه كام يعنى اى الهبل ده

قالى لا ماهو الاضافى بقى والبدلات بتجيلك على استمارات مختلفه واجمالى اللى هتقبضيه هيبقى فى حدود مثلا 300 بحالهم او اقل شوية

هههههههههههههههه ايوووووووون ده كان رد فعلى والله.........ضحكت

قلتله بغض النظر عن ال300 بحالهم دىولما هو بينضاف ماتضيفوه من اولها وخلاص  ليه شغل ودنك منين ياجحا ده؟؟؟؟؟؟؟

رد الرجل باقتضاب لانهاء النقاش :هى القوانين كده هو ده النظام

فليسقط النظام...........ماكنتش عارفه انى بناقش قضية المرتبات والاجور وقتها طبعا

اخدت الجواب الموجه لمستشفى عام فى مدينة جنب مدينتى

رحت استلم وعرفت هناك ان فيه واحدة بلدياتى هتمسك معايا


هنمسك ايه بالظبط هو ده اللى هحكيه ليكم بس بكرة بقى ان شاء الله وكان لينا عمر 

هناك 26 تعليقًا:

سواح في ملك الله- يقول...

48 جنيه

انا شكلي كده هقر عليكي واللا ايه

مبلغ خيالي طبعا يصرف كدة ييجي

علي تلات اربع بيوت وتحوشي منهم في خلال

سنه واحدة يكون عندك شقة وعربية

والا اقوللك بلاشششش العربية لحسن دي لوحدها

تجيلها بخمسة وخمسين جنيه

الله يخرب بيوتهم بجد

دكتورة وبتقبض المرتب الجامد ده

اتعلمتي ليه يانور

مش حرام عليكي دانتي بعد ييجي مية وخمسين

سنة كدة لو حوشتي مرتبك كله مش هتجيبي اللي

اهلك الافاضل صرفوه عليكي

استفزاز والله ههههههه

reemaas يقول...

ههههههههههههههههههههههههههه
ماتحصرنيش على نفسى بقى ياخالد انا كنت بقول لنفسى كده وانا راجعه يومها

ولسه على فكرة بقول لنفسى

وتشوف وش الراجل وهو بيقولى 300 جنيه بحالهم تحس انه بيحقد عليا مانا واكلاها زى مابيقولوا
هههههههههههههههههه

Casper يقول...

دول ما يجيبوش وجبة كنتاكي
^_^

لكن برضه لو هنبص لها بنظرة منطقية فاكيد الشغل افضل من قعدة البيت
وفي نفس الوقت حاولي تدوري على شغل في مكان افضل بمرتب افضل

وربنا يعينك ويوفقك

FAW يقول...

حاجة تكسف والله فعلا (متزعليش مني :))

الحكومة دي مستفزة بجد , يعني مش كفاية المرتب مسخرة لأ وكمان مقطعينه ستين حتة

وحتي لما المرتب يزيد برضو بييجي متقطع ومفيهوش بركة وكل جزء يتصرف قبل مالتاني ييجي . . الله يحرقهم

أنا برضو مقولكيش علي صدمتي في مرتبي وأساسي مرتبي , كان رقم كده بحاله برضو :)

ربنا يقويكي . . :)

عباس ابن فرناس يقول...

48 جنيه 1

يبقا علشان كدا الصيدلة لسه فيها امر تكليف

تحياتى المستعطرة

ابراهيم رزق يقول...

سندوتش فول و سندوتش طعكية 4 فى 30
120
واحد شاى 1 جنيه فى 30 30 جنية

5 جنيه مواصلات مش تاكسيات فى 30 150

المجموع 300 جنيه يعنى المرتب مكفى اهو يعنى الناس عاداها العيب

امال احنا بس نعمل ايه
وش واحد بيحسد
جتنا نيلة فى حظنا الهباب
ههههههه

تحياتى

Bent Men ElZaman Da !! يقول...

انا من رأيى
ترجعى الصيدليه وتستحملى تأخير المرتب احسن ههههههههه
48 جنيه ايه؟
وليه يصدموا الواحد فى الاول كده
مايقولوا 300 على طول
هما اه مش هيكفوا بس اهم احسن من 48
فى مرتبات ومعاشات ارقامها غريبه بطريقه مش طبيعيه
مش عارفه امتا الموضوع ده هيتعدل بقى
ربنا يكون فى عونك
ويوفقك فى شغلك :))

شيرين سامي يقول...

ههههههههه يا بنتي إحنا كنا كوبي بيست هههههههه
بس على فكره هما بيستعبطوا على التكليف عشان الكبار بياخدوا بالألفات.
و برغم ان أول سنه المرتبات كانت ضايعه بس سبحان الله كنت بجيب كل اللي نفسي فيه :)
أنا عارفه هتمسكوا إيه إنت و صاحبتك يا نور....عهـــــــده

و طبعاً هتتسرقوا للصبح و تطلعوا من المستشفى مديونين لو مكانش عندكم اللي يظبط العهده.

مستنياكي يا بنوته صيدلانيه

مصطفى سيف يقول...

فضل ونعمة
هي ال 48 جنيه قليلة؟
ده احتمال تدفعي اضعاف اضعافهم لو مركزتيش في العهدة
انا بقى لغيت التكليف من اولها وفهمت ان الحكومات مبيجيش من وراها خير
تحياتي

reemaas يقول...

Casper
طبعا احلى من قعدة البيت هى بس الصدمة

reemaas يقول...

FAW

ايووووووووووون هى البركة دى يا درش اللى نفسى فيها

الراتب الحكومى اعتقد ذاد بعد الكادر بس بردو لسه بيتقسم اموت وافهم لييييييييييه

reemaas يقول...

عباس ابن فرناس

ههههههههههههه ايون ياعبس لقطها انت

reemaas يقول...

ابراهيم رزق


يالهوى هو احنا برده نتحسد عااااااااااااااا

جميله التقسيمة يا استاذ ابراهيم فعلا يادوبك

reemaas يقول...

Bent Men ElZaman Da !

ويبقى السؤال قائم لييييه بيعملوا كده

تفتكرى علشان يقولوا اهو المرتب بيزيد اهو احمدوا ربكوا؟

reemaas يقول...

شيرين سامي


ههههههههههه طبعا ياشيرى لازم كوبى حبيبتى ما الحال من بعضه

وفعلا كنت بجيب بيه حاجات كتير وده الغريب فى الموضوع

اصبرى على رززززززقك

reemaas يقول...

مصطفى سيف

العهددددة اه يانى من العهدة


معظم الصيادلة الولاد بيلغوه يا مصطفى انا ساعات بشك ان كل الصيادله الحكوميين بنات

eng_semsem يقول...

وهتعملي ايه ب 48 جنيه انا بقول تعملي مشروع صغير عشان الفلوس ده مش تروح على الفاضي ربنا يقويكي انا اختى دكتوره صيدلانيه في مستشفى ومتوقع حكاياتك
تقبلي تحياتي والف مبروك على التعيين

هبة فاروق يقول...

48 جنية بحالهم يا دى النعيم اللى نزل عليكى حبيبتى بجد انا لو منك ارمى التكليف فى الزبالة واقول علية العوض ومنة العوض
تحياتى لنور الغلبانة مع الحكومة الفقرانة

دعاء العطار يقول...

ههههههههههههههههههههه

48 ج بحااااااااااااااالهم يانور

عايزه ايه اكتر من كده

مااعرفشى ايه الناس الطماعه دى

بطلى افترااااااااا بقى

عسل يانور والله (:

موناليزا يقول...

يا خبر أبيض 48 بس!!!

وبجد مش مكسوفين وهما بيكتبوها

ضحكتينى بجد وانتى بتنبهيه ان فيه صفر ناقس:)

الاحلام يقول...

للاسف اختى العزيزه القطاع العام والحكومه بهذا الشكل المرتبات المتدنيه والمعاملات السيئه والامكانيات المتواضعه دمتى بخير تقبلى تحياتى الاحــــــــلام

reemaas يقول...

eng_semsem

كنت ناوية افتح بيهم دفتر توفير

reemaas يقول...

هبة فاروق

هههههههههه مانا رميته واجازة حاليا بس مش بسبب الفلوس هبقى احكيلكم بعدين

reemaas يقول...

دعاء العطار

ااااااااااااااااااه يانى هههههههههه ربنا يسامحنى بقى

reemaas يقول...

موناليزا

مانا كنت ساذجة يا مونى اعمل ايه بس ماتخيلتهاااااااااااش ولا حد قال قبلها من باب التحذير

reemaas يقول...

الاحلام

ربنا ينفخ فى صورتهم بقى الواحد لسه عنده امل