الجمعة، 10 يونيو، 2011

اخيرا هنبنى






اعتصامات واضرابات وجمع غضب وحاجات لا بتودى ولا بتجيب فى نظرى وبلد الله اعلم ماشية ورايحة على فين

ده الحال اللى انا حساه بقالى فترة كبيرة وجايبلى اكتئاب الصراحة

النهاردة حسيت ان فيه امل ان حد يعمل حاجة غير الكلام

سمعت حلقة بكرة احلى بتاعه عمرو خالد ولقيته مستضيف محمد صبحى وهو بيعلن عن فكرة مشروع بناء مساكن فى العشوئيات

هىماعدتش فكرة خلاص ده بقىمشروع له دراسة واتفتحله حساب للتبرعات كمان وده اللى خلى عندى امل

جمعوا او حصروا عشوائيات مصر وقرروا يبدؤا باكتر خمس اماكن متفرقه فى الجمهورية نبتدى نبنيا ونعمل فيها مساكن ادمية تحل مصيبة العشويات اللى محزمة البلد زى حزام الديناميت دى

الامكان هتبقى على ما اتذكر   القاهرة والاسكندريه وبورسعيد ومحافظتين  كمان ده مبدئيا

تم فتح حساب فى البنك المركزى وتحت اشرافه لتلقى التبرعات وكان اول تبرع اعلن عنه المشير طنطاوى من الجيش المصرى بمبلغ 50 مليون جنيه مصرى

كما تعهد الجيش ببناء 6000وحدة سكنية تحت اشراف الجيش فى مدة 6 شهور وطبعا الجيش اد كلمته

والاجمل كمان ان اى عامل بنا فى المنطقه العشوائيه اللى بتتبنى ان كان بناء ولا نجار ولا مبلط ولا اى صنايعى هيشارك فى البناء بتاع المساكن باجر

الفكرة بجد روعه وخطوة فعلا للامام بجد .......زتخيلوا معايا محتاجين كام 6 شهور لو كملنا بنفس العزم

وهتبدء حنان ترك بصفتها احد مشرفى جماعه الاغاثة الاسلاميه بحمله جمع تبرعات عن طريق الجمعيه من المصريين بالخارج تحت مسمى حمله 25مليار واللى ممكن جدا حسب التوقعات توصل ل 50 كمان

تخيلوا كده لو عملنا جمعة التبرع واتلم من كل واحد هيقف  فى الميدان خمسة جنيه او حتى جنيه واحد

افتكروا ديما ان مستشفى سرطان الاطفال اتبنت من تبرعات الشعب

افتكروا ديما ان جامعه القاهرة اتبنت بالاكتتاب وعن طريق مشروع التعريفة ايامما كان ليها قيمة

نا عن نفسى شايفة ان دى خطوة وغيرها خطوات كتير ممكن تتعمل

رقم الحساب يا جماعه للى يحب يشارك هو 555666|7 البنك المركزى

هناك 16 تعليقًا:

مصطفى سيف يقول...

كلنا محتاجين نحط ايدينا في ايد بعض ونبدا نبني
كلنا محتاجين نساهم في تعمير البلد دي
كفاية وقت ضيعناه
كفاية فلوس ضاعت من بين فساد و مستثمرين خايفين
جه وقت العمل
تحياتي

ريــــمــــاس يقول...

صباح الغاردينيا ريماس
والله خبر حلو وفرحني جداً مصر غالية على قلبي اكتر بكتير مما تتصوري يمكن لاني سافرت في طفولتي مع بابا الله يرحمه كتير وليا ذكريات فيها بفتكرها زي الحلم لكن بجد عمري مانسيتهاوكل يوم بفرح بيها اكتر وبفرح بكل مصري ومصرية وانا بشوفكم قد ايه فرحانين بمصر وبتكتبوا عنها وايديكم في ايدين بعض مصر محتاجة اكتر ياريماس وانتو بجد محتاجين تكونو سوا وزي ماقال استاذ مصطفى كفاية الوقت الي ضاع ويارب من قلبي اشوف مصر اجمل من زمان بيكم وبكل مصري بيحب بلده "
؛؛
؛
لروحك عبق الغاردينيا
كانت هنا
reemaas

شيرين سامي يقول...

حمله ممتازه سمعت عنها و كويس انك نشرتيها يل نور جزاك الله خيراً احنا فعلاً محتاجين نبني كفاية كلام بقى تعبت جداً...تعرفي أنا حاسه ان عامله زي ما بعد الامتحان نسيت كل المذاكره دلوقتي بفضي دماغي من السياسه عشان تعبت.
تحياتي ليك

سواح في ملك الله- يقول...

مشروع فعلا فوق الممتاز

يارب بس يكتمل علي خير

تحياتي يابنوتة

Timo.. يقول...

انا لسه اول مرة باعرف منك هنا.
لاني مش موجود بقالي فترة.
بس بجد فكرة كلها امل وتفاؤل وصدقيني مش مهم ها ناخد كام من الوقت.. المهم اننا نمشي في (الاتجاه) الصحيح حتى لو هناخد الف سنه.

اعذريني على التأخير بس انا ساعات اجي من وقت للتاني اطمن عليك في هدوء زي ما اتعودت ديما :)
صباحك بنفسج يا اجمل ري.

هبة فاروق يقول...

ان شاء الله بكرة احسن وبوست كلة تفائل
ومصر حترجع شابة وفى عز شبابها بأولادها الطيبين
تحياتى لاجمل بنوتة

موناليزا يقول...

الله عليكى يا ريمو
ربنا يبشرك بكل الخير يارب
ايوة كده ..اخيرا حاجة تفرح وتبشر بالأمل:)

Bent Men ElZaman Da !! يقول...

حقيقى فكره تحفه
ياريت كلنا نفكر بالطريقه دى
ونقدر نطلع بفكره تخلى بلدنا احلى
وحتى لو هنبدأ بالتبرع
اهى مشاركه بردو

Casper يقول...

ان شاء الله الخير قادم لمصر
بس كل واحد يعمل اللى عليه

_________

تقبلي مروري
Casper

FAW يقول...

فكرة روعة سمعت عنها فعلا

والأجمل إنها بدأت بخطوات فعلية وبعيدة عن الحكومة وإعلانات التبرع المستفزة
وإن شاء الله تكمل بنجاح

سؤال صغير . .
هو إنتي إسمك ريماس ولا ده نيك نيم :))
أصل شيرين عمالة تقولك يا نور فحسستني إني أهبل :))

دعاء العطار يقول...

سبحان الله لسه سامعه من شويه عن المشروع ده من محمد صبحى فى قناة التحرير

فعلاً فكره جميله أوى ماشاء الله

ربنا يكملها على خيييييير يارب

احنا فعلاً محتاجين كلنا نبنى ونساعد فى البناء عشان مصر تتقدم

جزاكى الله كل خير ياريماس على التنويه عنها والدعوه ليها (: (:

reemaas يقول...

مبسوطة يا جماعه ان الفكرة شدتكم ويارب نبقى ايجابيين معاها

reemaas يقول...

سلام خاص لتيمو افندى زعلانه منك انا على فكرة

reemaas يقول...

ههههههههههههه سلامتك يا مصطفى لا طبعا انت بس اللى ما اخدتش بالك يوم ما شرين مررتلى تاج التعريف

انا ياسيدى نور ريماس ده نيك نيم وله قصة ظريفه كده معايا

ابراهيم رزق يقول...

اذا الشعب يوما اراد الحياة فلابد ان يستجيب القدر

الحياة و الحياة و الحياة
الحياة بمشمولها تشمل الحرية اى التنفس و الغذاء اى الطعام و التنفس اى الحرية و الحركة اى العمل
خالص تحياتى

reemaas يقول...

ابراهيم رزق

فعلا يا استاذ ابراهيم محتاجين حياتنا ترجع بقى