الاثنين، 20 يونيو، 2011

هتعملوا ايه؟؟؟؟؟؟







سؤال فرض نفسه الصراحة على تفكيرى بعد ما قريت توبيك مصطفى صاحب مدونة باش كاتب وتطورت العملية لسؤال ملح بعد بوست شرين فى مدونة حدوتة مصرية

المقالتين اتكلموا عن التحرش

وعجبنى جدا اراء الجميع عليهم والرفض والشجب وكل الحاجات الحلوة

السؤال بقى اللى بيطرح نفسه .......او خلينا نقول مجموعه الاسئلة اللى بجد نفسى اعرف رائيكم فيها اى؟


1\رد فعلكم ايه يا بناتيت لو حصلكم كده لا قدر الله هل هتحطوا وشكم فى الارض وتستنوا لما يعدوا؟ ولا هتسرعوا فى مشيتكم وتسموعوا ولا كانكم سمعتم؟ ولا عندكم استعداد تواجهوا وتقفوا  وان لزم الامر تروحوا القسم يحلهلكم؟


2\رد فعلكم ايه ياشباب لو شفتوا الموقف ولحد طبعا فى الغالب مش هتبقوا عارفينوا؟ هتدخلوا وتتخانقوا وتضربوا وتنضربوا؟ولا هتتفرجوا وتنقدوا فى سركم؟


3\طب بردوا ياشباب انتم رائيكم كرجال فى موقف البنت اى المفروض انها تسكت؟ولا المفروض انها تدافع  وتاخد حقها؟


4\طب انتم منكم اللى اصبحوا ابهات وامهات عاوزة اعرف رائيكم كاهالى لو بنتكم جت البيت وقالتلكم انا حصلى كذا وسكت هلى هتذعقولها ولا هتطبطبوا عليها وتقولوليها معلش؟


5\طب رد فعلكم بردو كاباء وامهات لو جت بنتكم وقالتلكم انا حصلى كذا ورديت هتزعقولها ولا هتقولولها جدعه؟


6\طب رد فعلكم كاباء وامهات لو عندكم ولد واتقالكم ان ابنكم عمل كذا كذا هتعاقبوه ولا هتشخطوا فيه ولا ده ولد وغلط وطيش شباب؟


معرفش اسئلة كتير اتزحمت فى دماغى ماهو لازم هيبقى لينا رد فعل مش مجرد نقد وانا حابة جا اعرف ردود افعالكم

هناك 11 تعليقًا:

موناليزا يقول...

من قُتل دون نفسه فهو شهيد

طبعا البنت لازم تدافع عن نفسها ولو بأضعف حاجة وهو صوتها
ولو حصل واتخرست من هول الموقف بالنسبة لها
يبقى عيب اوى على اى حد شافها وماحاولش انه ياخد حقها

تاكاشى يقول...

كشاب لازم اعيب على اى شاب يعمل كدا
ولو شوفت بنت بيحصلها كدا ودا حصل اكتر من مرة بتدخل لانه ماينفعش نسكت اللى فى الشارع دى اختى او قريبتي او جارتى وانا مارضاش اشوف اى بنت فى الموقف دا

لو فى ايديها انها تدافع باي وسيله طبعا لازم تدافع
بس مش تشرشح :D

كأب او حتى ام وشوفت بنتى كدا هازعقلها باي منطق يعني ؟؟ هابقى انا والزم عليها ولا ايه اكيد لازم اخدها فى حضنى واحسسها بالامان اللى فقدته فى الشارع ولو دافعت عن نفسها اشجعها واقولها جدعه .. ف مجتمعنا بنات بميت راجل جدعان اوى ولحمهم جملى مكنز مايتاكلش
ولو اتاكلنا نشرك فى الزور ومانتبلعش :D

FAW يقول...

والله أنا شايف إن البنت لازم تدافع بس بالأسلوب اللي يدل علي تربيتها وده هيظهر غصب عنها :)

بالنسبة للولد لازم يبقي مقتنع تماما هو بيعمل كده ليه , عشان أخته ممكن تبقي مكانها وهيبقي نفسك لو إنت مش موجود حد يدافع عنها بالقول والفعل أحيانا

بالنسبة للإبنه مش لازم أبدا نحسسها بالرعب إنها تحكي , وده بيجيي أعتقد من التربية الجنسية السليمة اللي بتخلي البنت تفهم كل حاجة من الأهل مش من بره , أو متفهمش خالص ودي المصيبة , موضوع منكرش إنه صعب علي معظم الأهل بس واجب عليهم مش لازم يتجاهلوه

بالنسبة للإبن فعلا حاجة تجنن لما تلاقي الأب أو الأم بيشجعوا إبنهم علي كده أو علي الأقل لا يوبخوه , وهو ده سبب المشكلة من البداية

تحياتي . .

مصطفى سيف يقول...

احنا بالنسبالنا في بلدنا محصلش اي موقف مشابه ومسمعتش من حد ان في حاجة زي دي عندنا بس اصلا متاكد ان اللي هيحاول يعمل كده الناس كلها هتاكله واهله مش هيعرفوله مطرح
صحيح في حاجات غبية دخلت في ثقافة بلدنا زي ظهور بعض الجوازات العرفي بس مفيش حد يجرؤ يعمل كده في الشارع
وعلشان متحطتش في موقف مشابه او شفت موقف مشابه مش هاعرف ارد على اسئلتك بس اكيد هاحاول اخلصها منهم ده اقل واجب الواحد يعمله تجاه مواطنة المفروض لما تمشي في الشارع تكون حاسة بالامان
تحياتي

سواح في ملك الله- يقول...

بصي يابنوتة

المشكلة دي مش سهلة

هما اللي بيعملوا كده واقصد المتخرشين

مش قلة زي منتي متخيلة

يابنوتة كتيراوي عرضت نفسي لمشاكل بسبب

بنت معرفهاش وشوية شباب بتستظرف

لكن في الاخر الواحد مش هيقدر يستمر علي

المشاكل دي كتير لان ده بقي العرف السائد

واللي بيشجع الشباب ان فيه بنات كتير

بتتجاوب بالاسلوب الرخم ده

وتاني يوم ممكن تلاقي البنت اللي اتخانقت

عشانها مع الشاب ده صاحبته

عايزة الحل

1- المخدرات والبرشام وكل مايغيب العقل

لازم تتشدد عقوبته

2- البنات تحتشم شويه يعني متهزرش في الشارع

او تضحك بصوت عالي وتلبس محتشم

3-الاهل مايسمحوش لبنتهم تتغيب لوقت متاخر

برة خاصة لما تكون لوحدها

ولوهي مضطرة يعني في شغل ولا حاجة

لازم حد من اهلها راجل يروح يجيبها

4 - تبعد البنت عن المناطق النائية

5-هتقوليلي والشباب

هقوللك حللهم امني تشديد العقوبة حتي لو

تصل لللاعدام في خالة هتك العرض

ويكون الحكم سريع وعلني

دعاء العطار يقول...

طبعاااااً لازم أدافع عن نفسى

مااعرفشى هتبقى الوسيله ايه ساعتها بس اللى انا عارفاه انى لو ماأخدتش حقى هعيش طول عمرى مذلوله ومكسوره ومهزوزه جداااااااا من جوايا

لو أنا بقى أم أكيد هحتوى بتى جداااااااً ولو هى مش لجأت للقانون أنا اللى هلجأله عشان أعلمها ان ماضاع حق ورائه مطالب

وان نفسها غاليه عندها جدااااااااااً ومش أى حد يهينها وتسكت

عارفه يانور بالرغم إننا فى 2011 إلا ان المجتمع لسه جواه ترسبات من أيا الجاهليه

لسه بيعاملوا البنات ع انها نص كائن

ربنا يشفى ويهدى

Bent Men ElZaman Da !! يقول...

اكيد هدافع عن نفسى بأى شكل من الاشكال
اصل الشخصيات اللى بتبقى عندها عقده التحرش دى اكبر صفه فيهم هى الجُبن
يعنى لو صوتك على بس شويه هتلاقيهم خدوا ديلهم فى سنانهم وهربوا

شيرين سامي يقول...

بصي يا نور للأسف لسه البنات بتتكسف تقول و لسه مبنعرفش ناخد حقنا من هول الصدمه إنهاره مثلاً و أنا سايقه واحد من الدبان عمال يغملي باي باي و يضحك بكل سماجه لدرجة اني افتكرت نفسي أعرفه لحد ما لاقيته بيغمز...بصراحه كان نفسي أكسر عليه و أنزل أمسح بيه الأرض...بس خفت مش منه لأ خفت العربيه تتخبط :)
قلت مبدهاش بقى و رحت شتماه أنا عارفه ان الشتيمه مبتلزقش بس ده أقل واجب مع السفله دول.
لما بمشي في الشارع ببقى متحفزه و ماسكه شنطتي جامد جاهزه اني اضرب بيها أي حد يتعرضلي بس مش عارفه وقت الجد هيبقى عندي الشجاعه...ربنا يستر.

حضرة الظابط يقول...

احم احم
سلامو عليكو

اولا هي فعلا بقت ظاهرة بايخة جدا وقلة ادب يعني
زمان كنا بنقول البنت المسؤولة ولازم تنزل لابسة محترمة عشان محدش يكلمها
للاسف بقي دلوقتي بقي التحرش للمحترمة واللي مش .....

انا بقي من رأئي ان البنت مش لازم تسكت علي حقها
واعتقد ان الشعب المصري لسه باقية فيه شويه مروءة يعني
متهيألي كده لو حد شاف بنت بتهزأ شاب مش محترم عشان بيعاكسها
الف مين هيجامل يعني
كانو زمان بيكالو علقة تمام قوي الشباب اللي المهزئة دي

انا مش بتاع خنقاقات يعني قوي
بس متهيألي ممكن اتخانق في موقف زي ده
هو اكيد هنضرب بس مش مشكلة يعني


وربنا يرجعلنا مصر بالسلامة


سلامو عليكو

Casper يقول...

هكتفي بالصمت لان الموضوع كبير
هل نطلب من الشباب يكونوا محترمين !
هل نطلب من البنات تكون محتشمة !
هل نطلب من المجمتع ييسر أمور الزواج !
هل نطلب من الاسرة التربية الصحيحة !
هل نطلب من أنفسنا الحياء !

أعتقد لو وصلت لاجابات للاسئلة دي
هقدر أرد ومش هكتفي بالصمت

____________

تحياتي

reemaas يقول...

حاولت ارد على كل واحد فيكم لواحده يا اصحابى بس لقيت تقريبا رائينا واحد

المجتمع فيه سلبيات ولازم تتعالج والمعالجة مننا

الموضوع ماعدش بس بيلقى على عاتق البنت واخير الكل اعترف ان الولد له دور

الاهالى ليهم دور مش بس تربيه محترمة للبنت والولد ومعرفه العيب والحرام والحلال

لا معرفه ازاى ناخد حقنا ومانستسلمش ومانخافش

المجتمع لازم يغير نظرته للبنت ويعتبرها كائن كامل الحقوق ومش عار ومش اى حاجة تحصلها لازم تستخبى

المشاكل اللى عرضها كاسبير وسواح مش هنقدر نتغاضى عنها بس مش هنشيلها كل الخطء فاحنا بنشوف المتزوج بيعاكس يبقى مش مساله تسهيل جواز وبنشوف المحترمة بتتعاكس وبنشوفها بتتعاكس فى عز الضهر وفى اماكن عامة وزحمة كمان

فى اخلاق غايبة بجد