الجمعة، 24 يونيو 2011

اتكلمى



دخل احدهم الصيدليه عندى لشراء شئ معين وكانت اختى قاعده معايا

الراجل سالنى مش حضرتك الدكتورة فلانة؟قلتله اه.......قالى حضرتك تبقى من العيله الفلانيه؟اه ياسيدى..........مامتك فلانه وبابكى الله يرحمه الاستاذ فلان؟اه والله


مين حضرتك بقى؟انا فلان الفلانى وابتسم ابتسامةمالهاش اى معنى وقالى انا بسأل يعنى علشان جايلك خير...........وراح ماشى وانا واختى بصينا باستغراب وابتسمنا وعادى


بتحصل يعنى وخصوصا ان الراجل ماشتراش حاجة يعنى طبعا فهمتوا الخير هو ايه!!!!!!!!!


روحت البيت ......وحصل الاتى


اختى الفتانة راحت قالت لماما ولقيت ماما بتندهلى


نوووووووووور مش عاوزة نقاش اللى جاى دى هتقبليه وبطلى دلع بقى......

مين يا ماما اللى جاى ؟!!!!!



انتى عاوزة تخبى عليا اختك حكتلى على كل حاجة الخير اللى جايلك اقبليه وماتتعبيش قلبى بقى انا نفسى اطمن عليكى


وعلشان ماتعبش قلبها قلت يابت لايميها كلمة حاضر بتريح........حاضر يا ماما


تانى يوم لقيت خالتى بتتصل عليا ......ازيك يانور والنبى ياحبيبتى اقبلى  بقى احنا نفسنا نفرح بيكى........اقبل ايه يا طنط؟ الخير ياحبيبتى


اممممممم هى الاخبار لحقت وصلت؟حاضر يا طنط ربنا يسهل


وتكررت المكالمات بنت خالتى وعمى وبنات عمى واحدةواحده


صحبتى الانتيم وجارتنا طنط حشرية


الكل يطالبنى بالقبول!


قبول ايه؟الخيييييييييييير انتم نسيتوا ولا ايه


مش مهم الخير ايه ولا مهم مناسب ولا لاء ولا مهم ان كنت هرتاحله ولا هو هيرتاحلى ولا لاء


اصبحت جملة الراجل العجيبة قصة اعايشها والويل وسواد الليل لو رفضت هذا الخير  هبقى بتدلع بقى!!!!!!!!!!


معلش يا جماعة بس ماقدرتش مافضفضش  اسم الحملة اللى قريته فى مدونة دعاء العطار"اتكلمى"........خلانى انفجر




هناك 23 تعليقًا:

ياسمين يقول...

من رأي انا كمان انك تقبلي يانور هههههههه وضل راجل ولا ضل حيطة هههههه
شوفي ياابني خليك عارفة حاجة انك اللي هتجوزي مش حد تاني ودي حياتك اختاريها زي ما انت عايزة ومحدش عارف نصيبه فين ربنا يوفقك يارب

Bent Men ElZman Da !! يقول...

هو فى البيت اللى فيه بنت على وش جواز كده
اول ما يجى عريس حاله الطوارئ بتبدأ
وتلاقى محاولات الاقناع تهبط عليكى من جميع الاتجاهات :))
المهم ان الواحد يشوف هو حاسس بأيه ومقتنع بأيه ويعمله

Amira Yusuf يقول...

والله صح
انا بستغرب بجد من الكروته اللي بيكروتوهالنا
انا في مره كنت قاعده مع اصحابي قلتلهم انا عاوزه اتخطب سنه ونص
قالولي ياااااااااه وهوا هيفضل داخل خارج كده ؟؟
قلتلهم وفيها ايه ما ده عشان الحق اعرفه وخصوصا اني مش بفهم اللي أدامي كويس بسرعه
قالولي ما تتجوزو وبعدين تعرفيه
نعمممم ؟؟؟؟
نظريه غريبه ازاي اربط نفسي وبعدين اتمرجح بين صفاته الوحشه والحلوه
طيب افرض معرفتش اتأقلم معاه
الغريب انهم معرفوش يردوا

انا رفعت شعاري ومش هتنازل عنه
" انا جوازتي مش كروته "

ياسمين يقول...

ميرا عايزة أقولك حاجة ان سنة ونص فعلا كثير اوي وانا من رأي أصحابك ..وانا معاك بردو ان الإنسان اللي هتعيشي معاها لازم يكون كويس وابن حلال طيب هتعرفي ازاي اصل فيه ناس بتمثل وبتنجح ف التمثيل وينكشفوا بعد الجواز ...وبعدين الاهل هو دا دورهم بئا انهم يسألوا كويس عن الشاب وعائلته الكريمة...وأخلاقه وكل حاجة..كثر فترة الخطوبة بتخلي المشاكل تكثر جداا...وانا مش معي التطويل هم 8 شهور ونخل ههههه حد لاقي عرسان وصدقيني كله قسمة ونصيبة ومحدش عارف نصيبه فين بس ادعي ربنا انه يرزقك باين حلال ويحافظ عليك

موناليزا يقول...

طيب وبعدين؟؟؟

شكله لسه ماجاش البيت
طيب ..مش هوصيكى..اول ما ييجى تنزلى بالتفاصيل على طول:)

سواح في ملك اللــــــــــــــــــه- يقول...

اه المهم يانور

طلع ايه الخير ده

انا متهيالي الراجل ده مش جاي لجوازة

واللي عندكم اول تفكير ليهم جه

في بالهم عريس

جايز والله اعلم

دعاء العطار يقول...

ماتقبلى يانور بقى الله p: p:

ههههههههههههههه

انفجرى يابنتى براحتك ... مااحنا ساكتين بقالنا كتيير

بس ابقى عرفينى بينى وبينك كده على اللى حصل للخير D:

حاجات تفرس وربنا

مصطفى سيف الدين يقول...

هي للقصة جزء تاني ولا النهاية مفتوحة :)
طبعا زي ما قلنا ان جواز الصالونات له مميزات وعيوب
واللي بينفع مع حد مش لازم ينفع مع حد تاني
تحياتي

ابراهيم رزق يقول...

خير الله اجعله خير

هذه الكلمة تقال بعد الحلم و بعد الكابوس اعوذ بالله
هو طلع ايه مش فلتلك بطلى شغل المسلسلات التركى و اقطعى فرط الحكاية

تحياتى و اتمنالك الخير

هبة فاروق يقول...

يعنى ازغرط ولا لسة شوية
اقولك نصيحة عصفور فى اليد خير من الف على الشجرة اتكلى على الله عايزين نفرح بيكى يا نور ونفرق الشربات
تحياتى لاجمل بنوتة

هبة فاروق يقول...

يعنى ازغرط ولا لسة شوية
اقولك نصيحة عصفور فى اليد خير من الف على الشجرة اتكلى على الله عايزين نفرح بيكى يا نور ونفرق الشربات
تحياتى لاجمل بنوتة

Unknown يقول...

بصي يا نور الراجل ده شاكله هيكسبك جايزه أو حاجه بيفكرني بالشباب اللي نقابلهم و يقولولنا (مساء الخير يا فندم...حضرتك كسبت معانا...تحب تعرف إيه هديتك؟)
:)
حاجه تزعل و الله يا نور لما كللللل الناس تبقى نفسها تفرح بينا تقوم تزقنا في أي حفره.
عيشي حياتك و ربنا يرزقك باللي يفرح قلبك يا بنوته.

تحياتي الشديده لكي

reemaas يقول...

ياسمين

انتى كمان رايك اقبل؟
عاااااااااااااا
هو انا لسه شفت حاجة هقبل غمييييييضى هههههههههههه

reemaas يقول...

Bent Men ElZaman Da !!

هو السؤال اللى بيفرض نفسه هنا يابنوتة بيحاولوا يقنعوا بايييييييييييييه

reemaas يقول...

mira@

ههههههههه اهلا بيكى فى النادى بتاعنا بس خدى بالك ممكن يوصل بيكى الحال زى حلاتى ويتقالك شفتى دماغك وصلتك لفين اديكى اتاخرتى فى الجواز

reemaas يقول...

ياسمين

ماهو الحكايه ماعدتش اخلاق بس الخلاق على اخلاقه ممكن يتحل باننا نسال عليه المشكله فى الخلاف الجزرى اللى بين الطباع واللى مش بيبان من خطوبه قصيرة

reemaas يقول...

موناليزا

على طووووووووووول
هههههههههههه
اشوفه بعينى بس

reemaas يقول...

سواح في ملك الله-

هههههههههههههههه
تصدق ممكن بس هتبقى مشكله فعلا حرقوا دمى على الفاضى يعنى

reemaas يقول...

دعاء العطار

عينى يا دودو حاضر كان هذا الموجز وهنلحقكوا بالتفاصيل........
ان وجدت

reemaas يقول...

مصطفى سيف

هههههههه لحد دوقتى نهايه مفتوحة على ماتفرج بقى

reemaas يقول...

ابراهيم رزق
هههههههههههه
حاسة انى مدوخاك

والله لسه ماعرف اى اخرتها هم قالولى خير وبس
يعنى زى زيكم

reemaas يقول...

هبة فاروق

عارفه ياهبه انا جه فى بالى كده بردو بس بس هتبقى دى اول حاله من نوعها لانى ماعرفش ايه نوع الخير ده فهتبقى عصفور على الشجرة ولا عشرة على الشجرة بردو

reemaas يقول...

شيرين سامي

ايوووووون ياشيرى انتى جيبتى المفيد هو ده احساسى والله رغم انى عارفه ان نيتهم صافيه بس حسانى بتدبس