الأحد، 12 يونيو 2011

يومياتى



                                                                   اول زبون


مساء الخير عليكم

التعامل مع الناس حرفة وموهبة وخصوصا لو فرض عليك شغلك تعامل يومى مع ناس مش يوميين

بمعنى انك تتعامل يوميا مع ناس مش ثابته وانت مكلف فى كل الاحوال وفى كل الاوقات وفى كل حالاتك المزاجية ان تبتسم فى وجوههم لانهم فى غالب الاحوال مرضى ده غير انهم زباين والقاعدة التجارية الشهيرة بتقولك ايييييييه


  "الزبون ديما على حق"


الكلام ده كله مادرستهوش فى الجامعه طبعا يعنىدى حاجة اتعلمتها من سوق العمل زى مابيقولوا


وانا واحدة من الناس والحمد لله دخلت السوق ده بدرى جدا يعنى اشتغلت اول ماخلصت امتحاناتى ماستنتش حتى لما النتيجة تطلع وكان شغل لا على البال ولا على الخاطر وخصوصا انى ماتدربتش فى صيدليات فترة الدراسة الا قليل جدااااااااا


خلصت امتحانى وقلت هناااام بقى وخصوصا انهم كانوا خاتمين الامتحانات بصيدلة صناعية وللى مايعرفهاش فيكوا فهى مادة الرخامة فى صيدلة المنصورة هى ودكاترتها وكل مايمت ليها بصلة ...........ماعلينا


صحيت تانى يوم على تليفون من صيدلانية اكبر منى  بتقولى انتىمش خلصتى امتحانات انا عندى ليكى شغل.........بينى وبينكم انا اتخادت شغل اي يابنتى ده انا الروشتة بالنسبالى طلاسم


قالتلى لازم من مرة اولى وكده كده دى خطوة لازم هتخطيها والصيدليه كويسه وهداية وانا مرشحاكى


بينى وبينكم انا اتمكعت كده مرشحانى دى يعنى شايفه ان يجى منى وماله اجرب


رحت تانى يوم الانترفيو مع صاحبة الصيدلية وطبعا سالتنى بتعرفى تقرى روشتات  قولتلها اه طبعا ده انا بريمو.......!.


قالتلى ماشى هتيجى تفتحى الساعه 8 وانا هبقى معاكى فى الاول


للعلم الصيدليه مش فى نفس مدينتى دى فى قرية جنبنا 


المهم رحت تانى يوم على اساس انها هتبقى معايا اتصلت 8 وربع تقولى انها مش هتعرف تيجى وانها متوسمة فيا خير وواثقه فيا...........!.!


قفلت سماعه التليفون وانا بدعى ربنا يسترها وفجاءة وانا لسه بخلص الدعاء لقيت واحد بلديتنا داخل الصيدليه


قمت وانا واثقه من نفسى كده وقولتله خير يا حج


قال:الله يسترك يابنتى انا بتمشى باليل شوفيلى حاجة تكون كويسة


انا:نعم؟؟؟؟؟؟؟


هو:بتمشى بالليل ولا مؤاخذه يعنى امال هى الدكتورة فين؟


انا:انا ياسيدى الدكتورة خير  بقى؟.......طبعا وانا دمى محروق هو بيسال عليها ليه 

                                          انا مش ماليا عينه



هو:طب ياستى هاتيلى حاجة تكون قوية كده تشيل الحكايه دى


انا:حكاية اى بقى فهمنى


هو:وبدء صوته يعلى.....بقولك بتمشى بالليل اى هو انا بتكلم اجنبى


انا:وبحاول اهديه     اه ياحج يعنى بتمشى وانت نايم مثلا مانا مش فاهمة بتتمشى
                 بالليل ازاى ولا مؤاخذه
هو: بمشى وانا نايم اى بس ! هو انتى لسه تلميذه ولا اى  يابنتى بدجل الحمام 
             كتير يعنى


انا:اسهال يعنى طب ماتقول كده من الصبح لازم يعنى تحورها"اى الاصطبحة اللى زى
                     بعضها دى"
               وابتسمت طبعا تطيب لخاطر الراجل اللى كان اول زبون اتعامل معاه فى حياتى ...................ومش ممكن هنساه ابداااااااااااا

هناك 20 تعليقًا:

سواح في ملك اللــــــــــــــــــه- يقول...

اكيد عملتي زي الفيلم

اديتيله الدوا وبعدين

وزعتي ميكروفونات بتقول الي الحج اللي بيتمشي بالليل
لاتاخذ هذا الدواء
الدواء فيه سم قاتل هههههه

تحيتي يااطيب نور

مصطفى سيف الدين يقول...

ههههههههههههههههههههههههههههه
والله لو كتبنا عن الحالات والكوميديا اللي في الصيدليات مش هتكفينا المدونات
بالنسبة للصيدلة الصناعية كانت رخمة جدا جدا زي الاغنية اللي مشغلاها هنا جدا جدا جدا وكان عندنا ستاف في اسيوط اجارك الله رخمين اكتر من الصيدلة الصناعية نفسها
وبالرغم اني مبحبش الرسم جدا جدا برضه وبالذات لو كان آلات معرفش ازاي نجحت فيها
تحياتي

reemaas يقول...

ههههههههههههه انا لو طولت اقوله ماعتش تيجة هنا تانى كنت قلتله يا خالد ده عقدنى

على فكرة بقى صاحبىوكل يوم يجى يصبح عليا ويفكرنى باليوم المشلفط ده

reemaas يقول...

مصطفى سيف


اكيييييييييد يا مصطفى ده انا بيحصلى حاجات ليها العجب

يابنى بدعا الوالديييييييين انا تقريبا ماحطتش فيها قلم وعديت
معجزات

FAW يقول...

إيه الراجل المسخرة ده

أنا كمان جه في بالي إنه بيمشي وهو نايم :)

ليا واحد صاحبي صيدلي كان برضو بيحكيلي علي بلاوي

ربنا يعينك . .

ابراهيم رزق يقول...

الشعب يريد هذه الحكايات بجد نريد منك و مصطفى هذه الحكايات
هى تجارب حياتية عملية

ساقترح عليكى اقتراح
ايه رايك كل يوم من باقى الشهر نقرا حكاية
ضحكت و الله على الراجل هههه اصل مرة كنت فى صيدلية و حصلت حاجة زى كده بس بطريقة مختلفة
تحياتى

reemaas يقول...

FAW

طيب وعلى نياتك يا مصطفى زى حلاتى ايامها اديك عرفت

reemaas يقول...

ابراهيم رزق

طب ماشى هحاول يا استاذ ابراهيم على اد ماقدر والله وعلى اد ماتسعفنى الذاكرة


بس احكيلنا انت حصل معاك ايه

غير معرف يقول...

هههههههههههههه
ههههههههههههه
هههههههههههه
رموسة يخرب بيتك
هههههههههههه
والله مت ضحك بتخيلك وانتي واقفة قدام الراجل الرخم ده وعمال يقولك بتمشى في الليل طب ماكان قالك بطني بتمشي اقلها هتفهمي انها حاجة في البطن هههههههههه تصدقي بالله على قد ماضحكت مش ممكن انسى الحكاية دي يبقى انتي هتنسيها ازاي بجد موقف حلو وكمان الذكرى حلوة "
؛؛
؛

ربي يسعدك على قد ماضحكتيني
لروحك عبق الغاردينيا
كانت هنا
reemaas

موناليزا يقول...

ههههههههههههه
فيه مصطلحات كتير بتحتاج فك طلاسمها مش الروشتات وبس

Unknown يقول...

هههههه فكرتيني بنفسي إشتغلت أول ما خلصت إمتحانات بردو و كنت زيك تمام :)
و كنت بسمع مصطلحات غريبه كتير بس مقرفه أوي مش هقدر أقولهالك و كان دمي بيتحرق لما يقولولي (أمال فين الدكتور؟) كأني طفله تايهه مثلاً هههههه بجد ذكريات تُحفه.
مستنين الحكايه التاني من حكاوي صيدله.
تحياتي لأجمل صيدلانيه

مشرفانا يا نووووور

reemaas يقول...

ههههههههههه والله ياريماس انا فضلت متعقدة بعدها فترةمن التمشية كلها

reemaas يقول...

موناليزا

اه يا مونى وخصوصا الارياف بجد مالهومش حل

reemaas يقول...

شيرين سامي

حبيبتى شيرى ده انا هسيطكم فى المنطقة هى مش كلها حكايات فانى فى حكايات نصب بقى وعينك ماتشوف الا النور

دعاء العطار يقول...

ههههههههههههههه

وربنا طول ماانتى بتحكى بحسبه بيمشى وهو نايم

وقولت ياعيتى الراجل اتجنن

العلم نووووور برضه ياريمو D: D:

ضحكتينى (:

reemaas يقول...

دعاء العطار

ايتها خدعه يا دعاء زرونا تجدوا مااااايسركم

زينب علي حبيب يقول...

ههههههههههههههههههههههههههههههههههههههههههههههه ايه الوصف داااا ؟


بجد ضحكتيييييني ... المهم انك عرفتي تتفاهمي معاه بالنهاية ههههههههههههههه بيمشي كتير بالليل :))

Bent Men ElZman Da !! يقول...

هههههههههههههههه
ياعينى من اولها كده
كويس انك عرفتى تتفاهمى معاه قبل ما كان صوته يعلى اكتر من كده هههههههه
ربنا معاكى فى شغلك ويوفقك ان شاء الله :))

reemaas يقول...

قطرة وفا

ايووووووووون طبعا لقطتها بس بعد ما طلع عينى

reemaas يقول...

Bent Men ElZaman Da !!


تسلمى يابنوتة اه كنا هنلم الناس علينا وفى الاخر هطلع انا الغلطانة