الخميس، 9 يونيو 2011

رجل المستحيل








عارفينه؟

اكيد فى ناس كتيرة منكم قرأت روياته وفى ناس منكم كمان شافت روياته فى ادين اخوات او اصحاب ....وممكن يكونوا اتريقوا عليهم كمان اعترفوا اعترفوا

وجايز بردو يكون منكم حد زى متابع السلسلة كلها .........بقول جايز

بداية معرفتى برجل المستحيل كانت وانا فى الصف الخامس الابتدائى يعنى تقريبا كده من حواااااالى .......سنة     ههههههه عمر بحاله اهو

كانت روايه  وجدتها فى ايد صحبتى واحنا فى درس العربى واخدتها منها اقراها وكانت البداية

بدأت اسالها عن اعداد تانية عندها..وبدأت ادور عليها عند اصحاب تانين وعند اصحاب الاصحاب لدرجة انى اتعرفت على ناس كتير من اصحابى بسببها

بدأت اخلى امى كل ماننزل المنصورة تشتريهالى وبدأت ارتبط جداااااااا بالصفات الخيالية اللى كان يملكها البطل "ادهم صبرى"

فى فترة من الفترات شكل ادهم صبرى صفات فتى الاحلام عندى ولقيت ده موجود كمان عند كتير من اصحابى

وصلت للمرحلة الجامعيه وفضل الشغف ده معايا واللى خلانى اجمع اى عدد ينزل واحرص على كده حرص خلىكتير من اصحابى يقولولى اكبرى بقى هو حد لسه بيقرا عن الراجل اللى بيضرب كل الناس ده؟

ولو ياجماعه انتم ليه زعلانين انا كده مرتاحة وبعدين مانتم بتتفرجوا على افلام جيمس بوند وسلفستر وهم بردوا بيضربوا كل اللى فى الفيلم ولاحد بيكلمهم ولا احنا مانصدقش الا الاجنبى بس

دفاع مستميت الصراحةوعن قناعة جدا يعنى

ولحد يومنا هذا لما اشوف اى حلقة من csi ايا كان بقى اسمها استغرب ليه ماعندناش من ده  ليه ماعندنا حاجة تعرف الناس على شغل مخابراتنا ولا شغل الامن عندنا دعايه زى الامريكان ماهم عاملين وهم خرافى لامكانيتهم الامنية نعمل احنا كمان

يعنىمش ناقصين كتاب ولا ممثلين ولا فلوس 

طب هقولكم على حاجة بسيطة انتم تعرفوا ان رجل المستحيل هو الشخصية الروائية الوحيدة فى تاريخ الادب العربى كله؟!وكل ماعداها عبارة عن سير لشخصيات تم سحبها من التاريخ واضافة صفات عليها

معظم الدول لديها ابطال خارقون
يعنى مثلا عندكم سوبرمان فى امريكا وجيمس بوند  وشرلوك هولمز فى انجلترا واحنا ماعندناش الا ادهم صبرى فى الوطن العربى.........

نرجع لبطلنا.......

فرحت جدااااااااا لما الدكتور نبيل فاروق صرح ان شخصية ادهم صبرى هى تحوير لشخصية حقيقية موجودة فى جهاز المخابرات المصرية وتتمتع بقدر كبير من المهارات اللى مصورها لينا الكاتب فى الاعداد

مازلت حتى الان من عشاق تلك السلسة
ومازلت حتى الان احب قراءة تلك الاعداد للمرة المليون

ومازلت حتى الان اجمع فى اعداد مطبوعه ومش على النت لان قراية قصة مطبوعه متعةمابعدها متعه.........................

هناك 26 تعليقًا:

Casper يقول...

شكلي كده اول تعليق ^_^

في البداية اولا القراءة شئ جميل جدا ولم اكن اعرف قيمته الا منذ سنين قليلة

سلسلة رجل المستحيل اسمع عنها وقريت منها حاجات بسيطة لكن لم اتابعها كاملة بس واضح انها تحفة لان كل اللى قروها شكروا فيها

و حاجة جميلة جدا ان الواحد يدافع بشدة عن ابطال روايته

مفيش احسن من الوفاء والانتماء D:

_______

خالص تقديري
تقبلي مروري

Casper

reemaas يقول...

منورنى باول تعليق يا كاسبير

هى فعلا بالنسبالى على الاقل اثرت فيها كتيييير

منورنى

سواح في ملك اللــــــــــــــــــه- يقول...

بنوتة

مساء الجمال يانور

انا كمان كنت مغرم بقصص رجل المستحيل

والشياطين الخمسة

تعرفي ان سحر السينما في هوليود

حول هزيمة فيتنام عند الامريكان الي

انتصار سينمائي

كل مايجيبوا فيلم بطله سلفستر

يرجعلك بالتاريخ لورا ان هذا البطل كان

محارب في فيتنام وبناءا عليه يبقي الراجل

الخارق

رغم ان الفيتناميين وروا الامريكان الامرين

بس سينما بقي

مصطفى سيف الدين يقول...

انا فعلا كنت من مدمنين سلسلة رجل المستحيل
بس بعد العدد رقم 100 اكتشفت ان الدكتور نبيل فاروق بيحاول يمط ويمد في الاحداث وده خلاني ابطل اقراها
بقيت مدمن في وقتها لرفعت اسماعيل وما وراء الطبيعة :)
تحياتي

FAW يقول...

مين قال لك إنه جايز

ده مؤكد :)

أنا عندي من 1 إلي 160 رجل المستحيل

ومن 1 إلي 160 ملف المستقبل

بقرأ فيهم من أولي ثانوي , متأخر شوية :)

وعندي كمان كل الأعداد الخاصة :)

فعلا أنا معاكي في موضوع إن لازم يبقي عندنا أبطال روائية , ويتعمل لهم أفلام كمان , نفسي والله في حاجة زي دي :)

بالنسبة لكلامك عن سي إس آي . . تخيلي الوزارة المتخلفة أيام العادلي الله ياخده كانت رافضة فيلم المصلحة بتاع أحمد السقا عشان بيكشف طرق البحث الجنائي . . آل يعني تيجي حاجة جنب مسلسل زي سي إس آي ده فعلا , جهل بعيد عنك :)

المهم متركزيش مع الناس وإعملي اللي إنت بتحبيه .

تحياتي . .

Bent Men ElZman Da !! يقول...

ومين مايعرفش رجل المستحيل :D
بيتهيالى كلنا فى نفس السن تقريبا بدأنا نقرا رجل المستحيل
انا كنت ومازلت بحب ادهم صبرى جدا وكنت زيك لفتره من الفترات هو فتى احلامى الاول
ومش متخيله ان فى انسان كده
نفسى فعلا اشوف الشخصيه اللى منها شخصيه ادهم صبرى
مش مهم حد يقولى اكبرى واعقلى والكلام ده
كفايه انك مبسوطه باللى بتعمليه :))

eng_semsem يقول...

بصراحه انا تابعتها جامد في فترة الثانوي بس لما دخلت الجامعه بعدت عنها كل البعد
يلا بقى حكم السن
تقبلي تحياتي

غير معرف يقول...

صباحك غاردينيا يااطعم ريمو
اممم بصراحة وبلاش كذب عمري ماقرأت له
بس بجد شوقتيني ..
بس انتي من سنة كنتي في خامس ابتدائي
عارفة انا من سنة كنت في ثالثة ابتدائي هههههههههههه
؛؛
؛
لروحك عبق الغاردينيا
reemaas

دعاء العطار يقول...

مش قريتها ياريمو بصراحه بس طبعاً عارفاها وبسمع عنها

على فكره ارتباطنا بالحاجات اللى كانت بتفرحنا واحنا صغيرين واللى أكيد أثرت فى تشكيل شخصياتنا

بتفضل محفوره فى الذاكره وبنفضل نقراها ونحبها حتى لو بقى عندنا 50 سنه

عشان جوه كل حد فينا موجود طفل بينادى برجوعه ... وممكن لأنها بترجعنا لأيام احنا كنا فيها فى منتهى البراءه

هتخلينى كده أتابهع رجل المستحيل وأنا على كبر D: D:

دعاء العطار يقول...

ع فكره ياريمو أنا علقتلك تانى على الموضوع اللى فات

روحى بقى شوفيه (: (:

reemaas يقول...

سواح في ملك الله-

عليك نووووووووور يا خالد اهو انا نفسى يبقى عندناكده

reemaas يقول...

مصطفى سيف

اوقات بينى وبينك يامصطفى كان بيجيلى الاحساس ده وخصوصا بسبب سونيا اللى مش بتموت دى بس بعد العدد 130 اعتقد فرقت

reemaas يقول...

FAW

منه لله حبيب العدل يا مصطفى كان خاربها

بس سبيك انت ممكن استلف منك العدد 160 من رجل المستحيل قلبت عليه المنصورة مش لاقياه
هههههههه

reemaas يقول...

Bent Men ElZaman Da !!

ايوووووووووون يا بنوتة مان مكبرة وبعمل دهوبحبه جداااااااا

reemaas يقول...

eng_semsem

احم احم بغض النظر عن موضوع السن ياسمسم وبما انى لسه صغنونة يعنى مبسوطة انك كنت متابع

reemaas يقول...

ريــــمــــاس

ههههههههههههههه مانتى عارفه بقى ياريماس دى اسرار حربية تابيعيها اعتقد هتحبيها

reemaas يقول...

دعاء العطار

مش هتندمىىىىىىىىى يا دعاء خالص دى ممتعه جدا جدا

وفعلا كانت ايام جميله

هروح هوا هناااااااااااااك

Unknown يقول...

بصراحه أنا عمري ما قريته بس بنت خالي زيك كده كانت مجنونه بيه و عندها كل الأعداد...جميل ان الواحد يلاقي حاجه صغيره و ممتعه كده يرجعلها بين الوقت و التاني...بس أكيد مواصفات فتى أحلامك إتغيرت و لا إيه:)
تحياتي لأجمل نور

reemaas يقول...

شيرين سامي

اه والله ياشرين اتغيرت خالص ونزل عليها التخفيض وبرررررررررررده مش موجودة هههههههههههههههه

ابراهيم رزق يقول...

انا كنت مغرم بالمغامرون الخمسة و المغامرون الثلاثة و الشياطين التلاتاشر و كانت الشياطين التلاتاشر لمحمود سالم فى بدايتها بتطبع فى لبنان كنا نبحث عن النسخ اللبنانية و يا سعده اللى يغثر على نسخة لبنانية
تحياتى

reemaas يقول...

ابراهيم رزق

سعيدة انى فكرتك بذكرى حلوى يا استاذ ابراهيم

الاحلام يقول...

والله ريماس كنت استمتع جدا بقراءتها من فتره كبيره لاننى لم اقرأها من مده ليست بالقصيره لكننى كنت استمتع بها كثيرا
شكرا على التذكير دام قلمك متالق دائما تقبلى تحياتى الاحـــلام

هبة فاروق يقول...

حبيبتى ريماس القمراية وحشتينى اوووى وعايزة اقولك انى عمرى ما مسكت كتاب او قصة غير كتب المدرسة والجامعة بس من كلامك يظهر ان فاتنى كثير من عدم قرأتى للقصص دى سلامى لكى يا عسولة المدونين

reemaas يقول...

الاحلام


مبسوطة انى فكرتك بحاجة كنت بتحبها

reemaas يقول...

هبة فاروق

جد يا هوبا ده انا مفكرة انك من اسلوبك الروائى الرائع بتقرى قصص كتير جدااااااااا
طب اقريها كده وقوليلى رائيك

Tamer Moghazy يقول...

عارفة يا بنت يا ري انت..
اكتر حاجة بحبها هي الذكريات..
واكيد الحاجة اللي بنقراها واحنا صغيرين بتكبر معانا وبتعمل احلى واجمل ذكريات.
مش بس بنرتبط بالرواية..
لأ..
احنا بنرتبط بالشخص اللي بيرسمه خيالنا زي ما احنا عاوزين..
لدرجة انه ساعات بيتحول لحد ممكن نتعايش مع تفاصيله..
وهي دي ميزة القراءة والراديو واحنا صغيرين :)

ديما بتعجبني موضوعاتك :)