السبت، 18 يونيو 2011

يومياتى4

تابع الجزء اللى قبل كده من   هنا





كنا وقفنا فيييييين......
اه يوم المستشفى

رحت بقى يا جماعة وهناك عرفت ان صحبتى هتشتغل معايا ودخلنا على المدير اللى استقبلنا بترحاب شديييييد جدا ..شديد شديد يا جماعة لدرجة مريبة والله
 انا شكيت فى الراجل انه معرفة  زميلتى فميلت عليها وسالتها انتى تعرفى الراجل ده؟
قالتلى انا فكراه معرفتك
اوباااااااااا قرون الاستشعار بدأت تشتغل بس سكت جايز الراجل مجامل زيادة

حاجة ساقعه وسخنة وكلام مجاملات وان ماشلتكوش الارض!!
هو احنا ظالمين الحكومة ولا كل المدراء كده؟         بلد اشاعات صحيح

بعد المجاملات حبيت افهم بقى فسالته وهو حضرتك احنا هنمسك اى بالظبط؟

قالى انتم يا داكترة المستقبل  هتمسكوا صيدلية نفقة الدولة واملنا فيكم بعد ربنا كبير 

امممم طب انا ليه حاسة حضرتك؟ انك زى ماتكون بتودعنا كده فى ايه؟

بصوا بقى يابنات انتم روحوا مع الاستاذ فلان استلموا الشغل كده وبعدين تعالولى افهمكم

قمنا رحنا وانا الردار عندى على اخرة وقلت لزميلتى بقولك ايه احنا نستلم شغل اه لكن اوعى تمضى على اى عهد انا حاسة ان فيه مصيبة

رجعناله بعد ما استملنا لقيته بيقولنا صلوا بقى على النبى نفقة الدولة بتاعتنا فيها اكبر عدد من القرارات فى المستشفيات المحيطة    عندنا اكتر من 5000 قرار

الدكتورة اللى ماسكاها غلطت ومضيت لزمايلها على موافقات باجازات لحد ما فضلت وحدها وجه معاد جوزها راحت مقدمة على اجازة وطبعا ماتوفقش عليها فانقطعت عن العمل والصيدليه مقفولة من اول الشهر وانتم عارفين احنا دلوقتى 25 منه والناس الغلابه ماصرفتش علاجها

وانتم بقى يا بنات عليكم المهمه دى......!!!!!!!!!!!
نعم؟!!!

احنا مين حضرتك احنا الاتنين؟

اه.........هو المفروض يجيلكم خمس صيادلة كمان بس لما عرفوا  بالورطة مقدمين تظلمات

يااااااااااااااااااحلاوة واحنا بقى اللى اتدبسنا!!!!!!!

الراجل بصلى بصة تهديد كده وقالى لا طبعا المستشفى هتاخد مع كل اللى عطل العمل اجراء حاسم المهم نعدى من الشهر ده

انا وزميلتى طبعا بصينا لبعض وفى عينى نظرة معناها مش قولتلك انا حاسة ان فيه مصيبة!!

ولقينا جنابه راح قايم وقال تعالوا افرجكم على الصيدلية
رحنا معاه وياريتنا مارحنا


الراجل كان بيدبسنا فعلا
رحنا لقينا امة لا اله الا الله واقفة قدام باب كده وبيخبطوا عليه والباب مقفول
واذ فجاءة المدير صوته على وقال ابشروا يا جماعه الصيادلة الجداد وصلوا


وعينكم ماتشوف الا النور هتافات بقى على دعا لينا على دعا علينا مظاهرة بمعنى كلمة المظاهرة وبقوة الدفع وصلنا للباب المقفول  وطلع المدير المفتاح اللى رمتهولو الصيدلانية صاحبة العهدة زى ماعرفنا بعد كده


فتح الباب وفضل يزق لحد ماقفله.......
وبقينا جوا
جوا الصدليه اللى مساحتها بالظبط متر ونص فى مترين


اتفضلوا يا جماعة الصيدليه اهى والمفتاح اهو وان احتاجتوا حاجة تعالولى المكتب وراح سايبنا وماشى


بصيت لصحبتى وقلتلها  انتى فاهمة حاجة ؟قالتلى انا حاسة ان رجلى مش شيلانى هو في اى؟  كل ده طبعا والناس بتخبط علينا برا
قلتلها لا مابدهاش تعالى نروح للمدير العجيب دهونقله احنا كمان هننقطع عن العمل


خرجنا واذ بالناس ماشية ورانا مع توسلات تقطع القلب وبكا الستات الكبار اللى طلع عينهم وماصرفوش دواهم لحد النهاردة


مأساه وكارثة   واحنا اللى هنشربها...............................!


                           يتبع بكرة بقى ان شاء الله  يا جمعة علشان ماطولش عليكم

هناك 16 تعليقًا:

Bent Men ElZman Da !! يقول...

اه ماهو ما تجيش حاجه بالساهل كده
لازم كل حاجه تبع الحكومه يبقى فيها آنه :D

مصطفى سيف الدين يقول...

وده بقى حال الحكومة
ممكن 5000 موظف شغالين في مكتب واحد نفس الشغل اللي مالوش لازمة وواحد بس في مكان تاني لوحده بيقوم بعمل 5000 واحد
ربنا يصبركم يا رب

عباس ابن فرناس يقول...

محدش بياكلها بساهل

تحياتى المستعطرة

سواح في ملك اللــــــــــــــــــه- يقول...

حلوة حكاية قرون الاستشعار دي ههههههه

ربنا يستر

ابراهيم رزق يقول...

غزارة فى الانتاج و سوء فى التوزيع

هكذا ثروة مصر البشرية

فى انتظار الجزء القادم و بلاش تعملى زى المسلسلات التركى انا فاهمك بلاش تطويل الحكاية فى بوست واحد هههههههههه

تحياتى

reemaas يقول...

Bent Men ElZaman Da

صحيح فعلا لازم تطلع عينا

reemaas يقول...

مصطفى سيف

فعلااا اتنين موظفين ل 5000 ومش عاجب كمان

reemaas يقول...

عباس ابن فرناس

منورنى يا عبس

reemaas يقول...

سواح في ملك الله-

دى جامدةجدا يا خالد وعلى طوول شغاله

reemaas يقول...

ابراهيم رزق

ههههههههههه ديما كده فاهمنى يا استاذ ابراهيم

والله كان نفسى اكملها بس حسيتها هتبقى طويله جدا

موناليزا يقول...

مابحبش "يتبع" قولى على طول يا ريماس بعد كده:)

دعاء العطار يقول...

ههههههههههههههه

واتدبستى يابنتى

مادام عندك قرون استشعار كده يبقى تعالى اشتغلى صحافه

بس ساعتها هتحمدى ربنا ع شغلك لأ الصحافه الشغل فيها لله وللوطن D: D:

فى انتظار باقى اليوميات (: (:

Unknown يقول...

نفقة الدوله آهههههه إشتغلت فيها لمدة سنتين كانت...و لا بلاش الحسنة الوحيده اني عرف جوزي من المستشفى :)
يوميات تُحفه و أنا كنت متأكده ان العهده مش مظبوطه ده غير ان عيانين نفقة الدوله للأسف نصهم حراميه بيبيعوا الدوا...هو أنا لسه هقولك انت شاكلك دايسه في الموضوع.
مستنياكي يا بنوته

reemaas يقول...

موناليزا

حاااااااااااااااضر يافندم من عينى رايحة اكتب اهو

reemaas يقول...

دعاء العطار

حمديييييينه اينعم بناخد فوق دماغنا بس طبعا الحمد لله يا دودى

reemaas يقول...

شيرين سامي

اه فعلا ياشيرى والنص التانى بيتعامل معانا على اساس اننا اللى حراميه