الثلاثاء، 17 يناير 2012

كتابك بكام.!!!!!!!!!!!!




صباح الخيرات...

من فترة لا بأس بها وانا عاوزة انزل معرض الكتاب فى المنصورة ودى هتبقى اول مرة انزله الصراحة 

واللى شجعنى على ده كتب اصحابى اللى نزلت مؤخرا واللى مقررة انى اشتريهاكلها ان شاء الله

اكيد طبعا ولعدة اسباب منها انى عارفة ان اساليبهم جميلة ومتأكده ان الكتب هتعجبنى وكمان علشان اقول للاهل والاقارب  انا عارفة الكاتب:)

المهم .....وصلت المنصورة واخدت تاكسى لقصر الثقافة ونزلت هناك لقيت يافطة مكتوب عليها معرض الكتاب على ساحة كده جنبه مفروش فيها صوان وست دواليب وكام ترابيزة مفروش عليهم كتب كتير .....قربت اكتر لقيت الكتب مرصوصة بطريقة غريبة الاطفال جنب المجلدات  وماعرفش اللى جنبهم دى كراريس بيضا ولا دى تهيأت .....بس العامل المشترك ان كلهم عليهم تراب!!!!!!

والكتب شكلها قديم زى ماتكون حد استلفها وقراها قبل كده وجابها تانى...

ماعرفتش ابدء منين لحد ماخرج رجل فى الخمسينات من العمر كده من حجرة جانبية  وفضل يبصلى كانى جاية من كوكب تانى..(معاه حق اصلى كنت الوحيدة اللى موجودة!)

سألته لو سمحت هو انا لو عاوزة اوصل لكتاب معين الاقيه ازاى؟
قالى كتاب مين ؟
قلتله هم كتابين فى الحقيقة يوميات شحات لشريف الخطيب وبنكهة مصر لشيرين سامى

الراجل بصلى كده وحط اديه فى جيوبه وقالى مش عارفهم

قلتله اه ماهم اول كتاب ليهم طيب هم ناشرين عن طريق دار ليلى للنشر فلو مجمعين الكتب حسب دور النشر شاورلى بس على مكانها

قالى اى دار ليلى دى؟

ساعتها انا ماعرفتش اقوله ايه الراجل مش عارفها يكنش انا نسيت اسم الدار؟
الراجل راح قالى استنى اسألك محمد ونده على الاخ محمد واذ بشاب فى اخر العشرينات كده يطلع من ورا احد الدواليب!

سأله :انت تعرف حاجة اسمها دار ليلى؟
الشاب فكر شويه كده وقاله اه ماهى دى الدار الجديدة اللى حكتلك عنها وراح موجهلى الكلام

معلش مالهاش حاجة عندنا بس ممكن تلاقيها فى المكتبه الجديدة اللى امام كليه طب اسمها كلمات وادانى الكارت بتاعها شكرته وقبل ما امشى قلتله معلش سؤال كده على الماشى

هى الكتب هنا مترتبة تبع ايه؟
قالى تبع السعر .....الكتب ام نص ج مع بعضها والكتب ام 1ج مع بعضها وهكذا!!!!!!!!

الحقيقة ماعرفتش ارد ولا اعلق اخدت الاجابة وحاولت افهمها ومشيت

بس مايأستش ..رحت للمكتبة اللى ادونى عنوانها ..مكتبة ظريفة فعلا ..اينعم مالقتش اللى بدور عليه..واينعم مايعرفوش دار ليلى بردو ..بس وعدونى ان كتبها هتنزل عندهم قريب

والجميل انى لقيت عندهم كتابين كنت بدور عليهم من سنة تقريبا واحد اسمه تاكسى والتانى اسمه212  يعنى ماخرجتش بايدى فاضية

واوعدكم انى هبقى احكيلكم عن الكتب دى .....وانى ورا كتب اصحابى لحد ما اوصلها:)

هناك 35 تعليقًا:

Unknown يقول...

علي فكرة انتي غلطانه كنت بل ماتنزلي من البيت كنتي عرفتي اسعار الكتب
بصراحه انا نزلت قبل كدا معرض الكتاب بس الحمد لله ماكنتش بنزل لكتب معينه علشان كدا ماكنتش بتبع في الكتب اللي انا عايزها لاني مافيش كتب انا عايزها بس الكتاب اللي بشوفه ويعجبني بشتريه
وياريت تقوليلنا الكتب اللي جبتيها كويسه ولا ايه اخبارها
تحياتي

حنين محمد يقول...

مساء الغاردينيا يانور
بجد بجد قعدت ابتسم طول ماأنا بقرأ مش عارفة ليه دايما اسلوبك بيخليني اشوفك واحس بتعابيرك هههههههههه تخيلت شكلك قدام التربيزه مستنيا كتاب شيري يظهر هههه ولا الراجل حسيت كله غبار هو كمان بس عارفة حبيت كلمتك الاخيرة وانا ورى كتب صحابي بجد بتكوني سعيدة اما تقولي انا بعرف الكاتب :) ربنا يوفقك في رحلة البحث وبجد شيري تستحق نقرأ لها وعقبالك ياعسولة "
؛؛
؛
لروحك عبق الغاردينيا
كانت هنا
reemaas

هبة فاروق يقول...

انتى كنتى يا نور فى مكتبه داخل كهف فوق فى الجبل ولا كنتى فين ..دول لا شايفين ولا سامعين ولا عايزين يسمعوا
وحلوه الكتاب بكام مش مهم بقى مين الكاتب ولا ايه اللى يحتوى الكتاب
المهم بجنيه ولا نصف جنيه ..كتاب ايه ده اللى بجنيه .وعجبى
بوست ضحكنى يا عسل

غير معرف يقول...

ههههههه
المعرض اللي في قصر الثقافة ده ملوش علاقة بمعرض القاهرة 2012
ده تقريبا معرض البواقي و التوالف و على فكرة ساعات بيبقى فيه حاجات كويسة
على العموم الكتاب متاح دلوقتي في مكتبة pen&paper اللي قدام كلية الطب
مشكورة جدا

ابراهيم رزق يقول...

طب و الكتاب اللى بمية خمسة و سبعين

بجد انا دلوقتى لما بحب اشترى كتاب بريح نفسى و اروح دار المعارف او الهيئة العامة للكتاب او مكتبة مدبولى او الديوان او الشروق بجد بيريحونى من اول ما ادخل
لكن زمان كنت بجيب كتب فى منهى الجمال بجنية و اثنين جنية و ثلاثة جنية من سور الازبكية و دى كانت مترتبة وفقا للثمن
بس انا كنت بدور و اللى يعجبنى اشتريه
ربنا يوفقك فى رحلتك

تحياتى

FAW يقول...

نص جنيه ؟

دي مجلة ميكي بأربعة جنيه باين :))

طب الكُتّاب ماشي بس الدار ميعرفوهاش إزاي ؟؟

أمال مين اللي بينشر لأحمد خالد توفيق ونبيل فاروق ، ما هي دار ليلي (وأحمد المسلماني مؤخرا) !!!

بس إحمدي ربنا والله ، عندنا في الزقازيق مفيش مكتبات أصلا ، مشروع هايل نفسي إعمله هكسب دهب :))

تحياتي . .

Bent Men ElZman Da !! يقول...

المعارض اللى بتبقى فى قصور الثقافه عموما بتبقى الكتب بتاعتها غريبه وقديمه ومتربه مش بيهتموا ابدا بالكتب زى ما المفروض انها فى "قصر الثقافه"
بس كويس انك مش رجعتى بأيدك فاضيه :))

E73 يقول...

يا نونو فعلا الساحة اللي انتي رحتيها دي اللي جنب قصر الثقافة زي سور الأزبكية في القاهرة يعني الكتب اللي بيجيبوها بالكيلو والكتب اللي اصحابهم استغنوا عنها وما إلى ذلك

أما بالنسبة للمكتبات اللي تلاقي فيها كتب النشئ فهتلاقي المكتبة العصرية ودي جنب مارشال الجزيرة أو مكتبة بوكس آند بينز ودي قدام نادي الجزيرة في شارع جانبي على نصيته محل اسمه عصفور

ومنتظرين رأيك في الكتابين اللي جبتيهم

نورتي المنصورة يا فندم

rack-yourminds يقول...

تريحي نفسك وتروحي معرض القاهره الدولي وبعتقد الاسعار بتبقي مخفضه

سواح في ملك اللــــــــــــــــــه- يقول...

هههههه ولله انتي زي العسل يابنوتة

مفعلا انتي علي طريقة فهمهم دي جاية من

كوكب تاني

وياتري لقيتي الكتابين اللي اشتريتهم بكااام

مصطفى سيف الدين يقول...

انتي كنتي في سور الازبكية ولا ايه؟
بس عموما كتب مشروع النشر لمن يستحق مش هتتعرض في المنصورة غير بعد معرض الكتاب في القاهرة

rona ali يقول...

الكتب اللي جبتيهم كانو بكام يا ريمو :):)

ناخد فكرة برضوا :):)

انا دايما لما بدور علي اللي عايزة مش بلاقي ولما بسيب نفسي بلاقي
في الغالب بحب موضوع معرض الكتاب اللى في القاهره لانى بعتبره رحلتى الممتعه
لعالمى المفضل :):) واروح اتفرج بقي واختار هشتري إيه :)

reemaas يقول...

mohamed amer

ماهو انا شكلى هعمل ده بعد كده

reemaas يقول...

ريـــمـــاس

ايون طبعا يا ريموسة
هم اصحابى وده واجب يعنى ثم ان الحكاية كبرت فى دماغى الحقيقة

reemaas يقول...

هبة فاروق

اه والله يا هبه انا وقتها افتكرت ان جنب الاسم بتاع معرض الكتاب اللى على اليافطة مكتوب الاسعار تبدء من نصف جنيه

reemaas يقول...

يوميات شحات

ايون ايون
بوااااااااااااااقى

انا مقتنعه جدا ببواقى ده

ان شاء الله يا شريف

reemaas يقول...

ابراهيم رزق

ايون انا اجيبهم منين الناس المحترمة دى

مافييييييش هنا يا ابو زياد هم بيتعاملوا مع باقى المحافظات على اسس تانيه غير القاهرة

reemaas يقول...

FAW

تصدق يا درش فكرت فيها

وناخد حاجة زى توكيل بقى لدار ليلى وكام كاتب كده ونقب على وش الدنيا :)

reemaas يقول...

Bent Men ElZman Da !!

انا رجعت بتحفة هحكيلكم عنها اكييييييييييييييييييد

reemaas يقول...

E73

ايون مانا عرفت ده بس متأخرررر

reemaas يقول...

rack-yourminds

انت عارف المسافة بينى وبين القاهرة اد ايه :(

reemaas يقول...

سواح في ملك اللــــــــــــــــــه

212 ب25ج

وتاكسى ب 20 ج

:)

reemaas يقول...

مصطفى سيف الدين

تفرقه عنصرية وهنعمل ثورة عليهم بقى

reemaas يقول...

rona ali

ده عاوزله اجازة ومكان مبيت يارونى واستعداد بقى

;كارولين فاروق يقول...

ههههههههه
والله انت سكره يا ريماس
تحياتي

eng_semsem يقول...

استمري وحاولي اكتر مفيش حاجه في الزمن ده بتيجي بالساهل هههههههه
واحلى ما في موضوعك رساله لاصحابنا ان احنا جنبهم
تحياتي

aya mohamed يقول...

لما قولتى معرض الكتاب فى المنصورة استغربت جدا قلت ايه ده عملوا ف المنصورة معرض كتاب وانا معرفش ههههه
بس لما قلتى ف قصر الثقافة عرفت انك تقصدى حاجة تانية
المعرض ده معمول زى مهرجان القراءة للجميع اللى كان بيتعمل ف اجازة نص السنة واجازة الصيف مع تغيير المسمى بعد الثورة وهى كتب قديمة نسبيا واسعارها بتبقى قليلة جدا
بس انا مبسوطة برحلتك وبانى عرفت مدونتك :)

admelmasry يقول...

علي فكرة انا بحب جدا التصنيف اللي حسب السعر دا .. بشيل فيه بالكميات والله

reemaas يقول...

;كارولين فاروق

تسلميلى يا كارولين :)

reemaas يقول...

eng_semsem

اكييييييييييد يا سمسم دى عشرة بلوجات يعنى

reemaas يقول...

eng_semsem

اكييييييييييد يا سمسم دى عشرة بلوجات يعنى

reemaas يقول...

Aya Mohamed

مانا ماكنتش اعرف بقى انه مجرد اسم

ثم احنا لازم نحتج ليه يعنى مافيش معرض كتاب هماك هى المنصورة دى شوية :)

منورانى ديما

reemaas يقول...

ادم المصري
جد؟

يبقى الموضوع محتاج خبرة بقى :)

نيللى على يقول...

انا اشتريت كتاب شيرين النهارده من معرض الكتاب وانتي لأ لولولولول:)

بهزر معكي:) يارب تلاقيه إن شاء الله وجميل أنك بتحبي اصحابك ونزله مخصوص عشان كتبهم ربنا يبارك فيكي

رضوى يقول...

المعرض اللى قصدك عليه ده فعلا عامل زى سور الأزبكية كده بس ممكن تلاقى فيه حاجات حلوة زى كتب الهلال القديمة مثلا و حاجات جديدة برضه بأسعار كويسة .
الراجل اللى فى ميدان المحطة بيبقى عنده اصدارات دار ليلى و دون و اكتب و كل الحاجات بتاعة الكتاب الجدد فممكن تلاقى اللى عاوزاه هناك .
مكنتش أعرف ان pen & paper عنده كتب لأنى مدخلتوش أساسا ... يبقى اذن هجوووووم :)